JESAYA 4

₁Mehleng yeo basadi ba ba šupago ba tlo gomarela monna o tee ba re: Bogobe re tlo ja bja rena; le diaparo re tlo apara tša rena; fela, a re bitšwe ka ina la gago, o fediše go nyatšega ga rena.

₂Mohlang woo lehlogedi la Morena le tlo taga la tumišwa; mme kenyo tša naga e tlo ba bothakga le botšhepi bja baphološwa ba Isiraeli. ₃Ba ba šaletšego mo Tsione, le mašalela a mo Jerusalema, ba tlo bitšwa ba bakgethwa; e tlo ba bohle ba ba ngwadilwego le baphedi fa Jerusalema. ₄Ke tša mohla wo Morena a tlogo ba a hlatswitše tšhila tšohle tša barwedi ba Tsione, a swietše melato ya madi ya Jerusalema, ya tšwa ka moya wa kahlolo le ka moya wa go tšhuma. ₅Mme godimo ga thaba ya Tsione mo go fela, le godimo ga diphuthego, Morena o tlo bea leru la muši mosegare, le seetša sa mollo o tukago bošego; e tlo ba yona tšhireletšo ya bokwala bjohle. ₆Go tlo ba le leobo la moriti mosegare ge go fiša, la go tšhabela gona le go khuta ditimo le dipula.