JESAYA 5

₁A nke ke binele mogwera wa ka koša ya moratwa wa ka, ya tšhemo yagwe ya merara. Mogwera wa ka o ne tšhemo ya merara mmotong wa mobu o bogale. ₂A e lema, a epola mabje, a šema merarasešifa; a aga sethala ka gare; a dira bofotlelo; a holofela a re e tlo enywa tlhatlha tša morara, mme ya bea megwelema.

₃Bjale ahlolang, baagi ba Jerusalema, lena banna ba Juda; taba ya ka še ya tšhemo ya ka.

₄Se se kago dirwa tšhemo ya ka ya merara e ka bang, se ke sa kago ka se dira? Go ya kang ge e beile megwelema, mola nna ke lebeletše tlhatlha tša morara?

₅Lesang ke le botše se ke tlogo se dira tšhemo ya ka ya merara. Legora la yona ke tlo le tloša, ya tlo ba ya go lewa; morako wa yona ke tlo o phušola, e tle e gatakanywe. ₆Ke tlo e lesa ya ba hlaga, e sa hlwe e thenwa; e tlo ba ya go mela metlwa le ditshehlo; le maru ke tlo a iletša go e nešetša pula. ₇Šidio gee! Tšhemo ya merara ya Morena ke moloko wa Isiraele. Banna ba Juda ke temo ye a e ratilego. O be a re go tlo iwa ka molao, mme ya ba polao; o be a holofetša bolo, mme ya ba malla.

₈Kotsi e tlo wela bao ba go ikolela mantlo, ba go amoga ba bangwe mašemo, gwa ba gwa hlokwa temelo, lena la šala le le beng ba naga le nnoši. ₉Tsebeng tša ka go kwetše tše Morena wa mašaba a di boletšego a re: Ka kgonthe mantlo a mantši ao e tlo ba marope; le ge e le tše kgolo le tše botse, di ka se dule motho. ₁₀Le gona tema tše lesome tša dirapa tša merara di tlo tšwa kgamelo e tee; peu ya seroto setee, e tlo tšwa ntlatla e tee.

₁₁Kotsi e tlo wela ba go tsogela go yo nyaka bjalwa, ba bo dulela la ba la dikela ba tagilwe. ₁₂Menyanyeng ya bona ba swere diletšo le makope, le meropa le dinaka; mme tiro tša Morena ga ba di šetše selo; mediro ya atla tša gagwe, ga ba e bone. ₁₃Ke tšona tše di tlogo iša tšhaba sa ka bothopja ka go se be le tsebo; bahumi ba sona ba tlo hwa ka tlala; makoko a sona a tlo kgalega ka lenyora, ₁₄Molete wa bahu wa di bona wa kganyoga ka kudu, wa ahlama molomo wa go se gome, gore go kodumele letago la motse, le makoko a wona, le mašata a wona, le ba a thabetšego.

₁₅Yo e lego motho fela o tlo inamišwa, yo e lego monna o tlo kokobetšwa; mahlo a baipoti a tlo ribamišwa. ₁₆Yo a tlogo phagama ka kahlolo yeo ke Morena wa mašaba. Yena Modimo e mokgethwa o tlo bonala bokgethwa ka ge a sa hlaole motho kahlolong. ₁₇Go tlo šala go fula kwanyana, e le mafulo a yona; megola ya bahumi e tlo lewa ke bafeti.

₁₈Kotsi e tlo wela ba go ikgogela bokgopo ka thapo ya maaka, ba go goga dibe e ke ba di goga ka lerala la koloi, ₁₉Ba ba rego: A a hlaganele a dire modiro wa gagwe ka pela, re tle re o bone; a go tšwelele go tle tše Mokgethwa wa Isiraele a di rerilego, re tle re di tsebe.

₂₀Kotsi e tlo wela ba ba rego bobe ba re ke botse, mme botse ba re ke bobe; ba ba beago leswiswi ba re ke seetša; seetša ba re ke leswiswi; se se galakago ba re ke se bose, se bose ba re se a galaka.

₂₁Kotsi e tlo wela ba ba itshemago ba bohlale, ba re re ne tlhaologanyo.

₂₂Kotsi e tlo wela bagale ba go nwa sebela, ba go hlalefela go hudua bjalwa, ₂₃Ba go lopolla sesenyi ba bone tsogolekobong, moloki ba mo senyetša toko ya gagwe. ₂₄Ke wona molato woo modu wa bona ge o bodile, letšoba la bona le hlohlorega, gwa tlo etša mola kgabo ge e fiša hlaga, mollo ge o fetša bjang; ka gobane ba lahlile Morena wa mašaba, ba nyaditše tše Mokgethwa wa Isiraele a di boletšego. ₂₅Bogale bja Morena ge bo tuka, molato ke wona woo; setšhaba sa gagwe o se emišetša tsogo lagwe a se otla; dithaba di a šišinyega, ditoto mekgotheng di tletše wa maudi. Le ge go le bjalo bogale bja gagwe ga bo ešo bja phohla, letsogo la gagwe le sa emišitšwe.

₂₆Ditšhaba tša kgole o tlo di tsemela sefoka; o bitša sa kua mafelong a lefase. Sese, se hlaganela go tla ka lebelo. ₂₇Ga se na wa go lapa; ga se na wa go hlotša; ga se na e a otselago; ga se na wa serokoroko; ga se na wa mohlantšhu wo o kago tlemologa; ga se na wa go kgaogelwa ke lerala la seeta.

₂₈Mesebe ya bona ke e boelo; mara a bona a ngangegile; tlhaku tša dipitsi tša bona ke tše thata boka tšhilo; maotwana a koloi tša bona a ka disesedi. ₂₉Ba tla ka legowa la ditau; ba bopa boka tau ya ledumaedi, e re go bopa ya swara ya goga, go se be le monamoledi.

₃₀Tšatši leo e tlo ba la modumo wa lewatle ka bona; mme lefase le tlo bona e le la leswiswi le le tlaletšago, seetša se fifetše ka boso bja lona.