JESAYA 35

₁A go thabe lešoka le naga ye e omilego; le lehanata a le hlalale, le tage bjalo ka letšoba. ₂Le tlo taga ruri la hlalala, ka go nyakalala le go bina; le filwe letago la Libanoni; le filwe botšhepi bja Karamele le bja Sarona. Batho ba tlo bona letago la Morena le botšhepi bja Modimo wa rena. ₃Tiišang diatla tše di bego di rephile, matolo a go lokaloka a be le maatla. ₄Ba pelo tše tshesanyane le ba botše le re: Tiišang! Se boifeng! So Modimo wa lena! Go tla tefetšo, moputso wa Modimo, yena o tlela go le phološa. ₅Ke mo go tlogo budullwa mahlo a difofu, gwa thibollwa tsebe tša difoa. ₆Ke mo digole di tlogo taboga boka tshepe, gwa tlo hlalala leme la semuma, gobane lešokeng go thulega diba tša meetse, mo lehanateng go tlo ela dinokana. ₇Naga ye e bego e omile e fetoga letsha la meetse; naga ye e nyorilwego e tšwile methopo; mo e bego e le gola tša phukubje e tlo mela bjang le lehlakanoka le mohlahla. ₈Gomme go tlo ba le mmila o lekelelanego, tsela ye ba tlogo re ke tselakgethwa, e sa sepelwego, ke wa tšhila; e tlo ba ya bona. E a e swerego, le ge e le lešilo, a ka se timele. ₉Go ka se be le tau, le sebata se se bolayago se ka se ke sa gata gona, se ka se ke sa bonwa gona; go tlo sepela ba ba golotšwego. ₁₀Balopololwa ba Morena ba tlo boa ba goroga Tsione ka go hlalala; dihlogong tša bona go tlo ba le lethabo le le sa felego. Ba tlo tlelwa ke go nyakalala le go thaba; mme mahlomola le phegelo di tlo ba di fulere.