JESAYA 34

₁Hee lena ditšhaba, batamelang! Hee lena merafo, theetšang! Naga a e kwe, le tšohle tše di lego mo go yona; le lefase, le tšohle tše di tšweletšwago ke lona. ₂Gobane Morena o galefetše tšhaba tšohle, o befetšwe ke madira ohle a tšona, a di gafamoka a re di bolawe. ₃Mme babolawa ba tšona ba tlo lahlwa; mme seuta sa ditoto tša bona se tlo hlatlogela kua godimo, dithaba di tlo ela madi a bona. ₄Mme makoko ka moka a legodimo a tlo ela a tologile, magodimo a tlo menwa bjalo ka lengwalo, mme makoko a ona ka moka a tlo hlohlorega boka matlakala a morara ge a omeletše mme a hlohlorega, boka matlakala a mogo ge a hlohlorega.

₅Gobane rumo la ka mo legodimong le builwe; bjale le tlo theogela kua Edomo, le tlo theogela tšhaba seo ke se lahlilegomoka ka molao. ₆Lerumo la Morena le tletše madi le kgamethe makhura le madi a dikwana le a diphokwana, a dipshio tša dikgapa; gobane Morena o hlaba sedimo Bosera; naga ya Edomo o e dira leuba le legolo. ₇Le dinare di fologela gona le bona, le dipowana le dipoo; mme naga ya bona e tlo hora madi, le lerole la yona le tlo tshutshuma makhura. ₈Gobane e tlo ba e le letšatši la tefetšo la Morena, e le ngwaga wa go lefeletša ba ba lwago le Tsione.

₉Dinokana tša Edomo e tlo ba tša motimmu; mmu wa gona e tlo ba tshebela, le naga ya gona e tlo ba ya motimmu o tukago. ₁₀O ka se time mosegare le bošego; muši wa gona o tlo rotoga go ya go ile; e tla ba lešope le le sa tsogego, leilwakebafeti. ₁₁Go tlo dula bomašianoka le dinoko, e tlo ba legae la magukubu le maribiši; gobane naga yeo e beetšwe kgobelano le lefela. ₁₂Dikala tša go bopa kgoši di tlo hlokwa; ba tlo ba ba fedile, bakgomana ba Edomo. ₁₃Nywakong ya ka mošate go tlo tlala meetlwa; mo dibong tša gona go tlo mela tshehlo le mekolonyane; e tlo ba letšaba la phukubje, le mafulo a mpšhe. ₁₄Ke mo go tlogo bokanela phiri le mahlalerwa, mo go gahlanago ditotwane, le badimotsela ba tlo lala gona, e le ga gabobona. ₁₅E tlo ba legae la mogohla, wa beela mae gona, wa phaphaša, wa menagana moriting; le manong a tlo bokana gona le a gao.

₁₆Fenyekang mangwalo a Morena le a bale. Le tlo hwetša go se le letee le le kago hloka le le amanago nalo; gobane a laetšwe ke molomo wagwe, a beakantšwe ke moya wa gagwe. ₁₇Ke yena a ba beetšego mellwane ya bona, a ba kgaolela naga ya bona ya go tlo dulwa ke bana ba bona le tlogolo tša bona.