ESITERE 8

₁Ka lona tšatši leo kgoši Ahasiwerosi a neela mohumagadi Esitere ngwako wa Hamani lenaba lela la Bajuda. Morodekai a tla a tsena go kgoši, gobane Esitere o be a boditše kgoši a re: Morodekai ke wa gaborena. ₂Kgoši ya tšea palamonwana yela ye e e amogilego Hamani, ya e nea Morodekai. Esitere a bea Morodekai a ba molaki wa ngwako wa Hamani.

₃Gomme Esitere a buša a yo bolela le kgoši, a lotšha, a kgopela gore go gomišwe bošula bjo Hamani wa Agagi a bo hloletšego Bajuda. ₄Kgoši ya šupa Esitere ka lehlotlo la gauta; Esitere a tsoga a ema pele ga kgoši, ₅a re: Ge kgoši e ka dumela, gomme ge ke hweditše mahlo a kgoši a ntebeletše ka botho, gomme ge kgoši e ka hwetša e le taba ye e lokilego e kgahlago kgoši, gona a nke go ngwalwe mangwalo a go gomiša mangwalo ala a a ngwadilwego ke Hamani morwa wa Hamedatha wa Agagi a a rego: Bajuda ba mo dinageng tšohle tša kgoši ba fedišwe. ₆Gobane nka kgona bjang go fo dula ke lebeletše bošula bjo bo tlo go wela setšhaba sa gešo! Nka kgona bjang go fo dula ke lebeletše ge go senywa moloko wešo!

₇Kgoši Ahasiwerosi a fetola a botša mohumagadi Esitere le Morodekai Mojuda a re: Bonang! Esitere ke mo neetše ngwako wa Hamani; gomme Hamani o fegilwe kwateng ka ge a ratile go hlokofatša Bajuda. ₈Lena bjale ngwalang se le bonago gore se swanetše go dirwa Bajuda. Le ngwale ka leina la kgoši, mme le tiiše lengwalo ka seka sa palamonwana ya kgoši. Le tsebe gore, lengwalo lela le le ngwadilwego ka leina la kgoši le lona le tiišitšwe ka palamonwana ya kgoši, ga le sa kgona go hlanošwa.

₉Gwa napa gwa bitšwa bangwadi ba kgoši ka lona tšatši leo la masome a mabedi a metšo e meraro la kgwedi ya boraro e lego ya Siwani, gwa ngwalwa tše Morodekai a di bolelago, tša ngwalelwa Bajuda, le babuši, le balakadinaga, le bakgoma ba dinaga tše di gomago ka la India le la Kushe, dinaga tše lekgolo le masome a mabedi a metšo e šupago; naga ya ngwalelwa ka mongwalo wa yona le ka mmolelo wa yona; le Bajuda ba ngwalelwa ka mongwalo wa bona le ka mmolelo wa bona. ₁₀Gwa ngwalwa ka leina la kgoši Ahasiwerosi, gwa tiišwa ka seka sa palamonwana ya kgoši, gomme mangwalo a tloga le banamedi ba dipitsi, le ka ba ba nametšego dikamela tše lebelo, le dimeila tše di ruetšwego go kganyela.

₁₁Lengwalo la re: Kgoši e dumeletše Bajuda metseng ka moka go rapa le go itwela le go fediša sera sa dilete tše di kago ba tlaiša; ba ka di bolaya ba di fediša, le bana le basadi, mme ba ka rebola dithoto tša bona. ₁₂Ba ka dira seo ka letšatši letee dinageng ka moka tša kgoši Ahasiwerosi, ka la lesome la metšo e meraro la kgwedi ya lesome la metšo e mebedi ya Adara. ₁₃Ditaba tša lengwalo leo e be e le tša gore dinageng ka moka go bewe molao wa gore Bajuda ka tšatši leo ba be ba itokišitše go kwiša manaba a bona bohloko.

₁₄Bakganyeši bao ba wela tsela ba nametše dipitsi le dimeila ba kganyela ka taelo ya kgoši. Mo motseng wa mošate wa Susani molao woo wa goelelwa.

₁₅Morodekai a tšwa go kgoši a apere diaparo tša bogoši tša motwatwa o motala wa bohubetšwana, a rwešitšwe mphapahlogo o mogolo wa gauta; a apere kobo ya leokodi le le phadimago le ya purapura; mme motse wa Susani wa hlalala wa thaba. ₁₆Ya ba gona Bajuda ba tlelwago ke lethabo le tlhalalo le go godišwa. ₁₇Le mo dinageng ka moka le metseng ka moka go fihlago molao woo wa kgoši, Bajuda ba tlelwa ke lethabo le tlhalalo, ya ba monyanya le go nyankelwa. Ba bantši ba ditšhaba tša naga yeo ba ba ba itira Bajuda, gobane ba be ba wetšwe ke tšhogo ya go tšhoga Bajuda.