ESITERE 7

₁Gomme kgoši ya ya selalelong ga mohumagadi Esitere, ya tla e na le Hamani. ₂Ka la ka moswana ge ba enwa beine, kgoši ya botšiša Esitere ya re: Mohumagadi Esitere! Kgopelo ya gago, -- o kgopelang? Le ge e ka ba mphapha wa mmušo, o ka newa.

₃Mohumagadi Esitere a fetola a re: Kgoši ge mahlo a gago a ntebeletše ka botho, gomme ge kgoši e ka dumela, a nke ke kgopele ke fiwe bophelo bja ka, ke lope gore ke fiwe bophelo bja setšhaba sa ka. ₄Ka gobane re rekišitšwe, nna le setšhaba sa gešo, gore re fedišwe, re bolawe, re senywe. Ge re ka be re rekišitšwe, mme banna le basadi ra ba matlapša, gona nka be ke ikhomolela; gobane yeo e ka be e se taba ye kgoši a kago lapišwa ka yona.

₅Kgoši Ahasiwerosi a botšiša mohumagadi Esitere a re: Ke mang e a kago beta pelo a dira tše bjalo? Gomme o kae?

₆Esitere a re: Mohlohlabatho, lenaba, ke Hamani, motho e mobe yo!

Ke mo Hamani a tšhogilego wa go gakanega, a lebane le kgoši le mohumagadi. ₇Kgoši ya tsoga selalelong e galefile, ya tšwela dihlareng tša gona moo ngwakong wa bogoši. Hamani a šala a eme, a rapela mohumagadi gore a se bolawe, ka gobane a bone ge go kgoši di šetše di mo senyegetše. ₈Ke ge kgoši e boa e etšwa dihlareng; e sa tsena mo ngwakong mo go bego go nwewa, ke ge Hamani a khunama pele ga sedulo se Esitere a bego a dutše mo go sona. Kgoši ya re: Bjale o bile o nyako kata mohumagadi fa ngwakong wa ka?

Lentšu le le sa tšo tšwa molomong wa kgoši, ke ge Hamani ba šetše ba mo khurumela sefahlogo. ₉Haribona e mongwe wa balaki ba mošate a ema pele ga kgoši a re: Kwata šele ye Hamani a e tsemilego a re e tlo fegwa Morodekai monna yola e a kilego a thakga ge a sebela kgoši taba yela. Kwata yeo e tsemilwe lapeng la Hamani. Botelele bja yone ka meelo e masome a mahlano.

Kgoši ya re: Mo fegeng mo go yona!

₁₀Ba fega Hamani kwateng ye a e tsemilego a re e tlo fegwa Morodekai. Ya ba mo go phohlelago bogale bja kgoši.