Kotlo ya baporofeta ba maaka le ya baaroši
1E tlo re ge mo go lena go ka tsoga moporofeta le ge e le molori wa diloro, a dira mehlolo le matete; 2mehlolo ya direga, le matete, ka mo a boletšego ka gona, mme a tla a re: A re yeng re latele medimo e šele ye le sa e tsebego, re e direle, 3le se ke la theetša se moporofeta e mobjalo a se bolelago, le ge e le molori wa diloro, ka gobane Morena Modimo wa lena o tlo ba a le leka gore a tsebe goba le rata Morena Modimo wa lena ka pelo ka moka le ka moya ka moka. 4Le latele Morena Modimo wa lena, le boife yena, le hlokomele ditaelo tša gagwe, le kwe se a se bolelago, le mo direle, le mo gomarele. 5Ge e le moporofeta eo, le ge e le molori wa diloro, a bolawe, ka gobane o boletše tša go hlanogela Morena Modimo wa lena, gore a le aroše tseleng ye Morena Modimo wa lena a le laetšego go swara yona, yena e a le ntšhitšego nageng ya Egipita, e a le namoletšego ngwakong wa bohlanka; le tloše bobe mo gare ga lena.
6Le ge ngwaneno, ngwana wa mmago, le ge e le morwa wa gago, le ge e le morwedi wa gago, goba mosadi wa gago wa morategi, goba mogwera wa gago wa bohloko, ge ba ka go otelela ka thopeng, ba re: A re yeng re direle medimo ye o sa e tsebego, ye botatago ba bego ba sa e tsebe, 7e lego medimo ya ditšhaba tše di agilego tikologong ya lena, e ka ba kgauswi goba kgole le go fihla kua magomong a lefase thoko tšohle, 8o se ke wa mo dumela, o se ke wa theetša se a se bolelago; leihlo la gago le se ke la mo tsebafela; O se ke wa mo gaugela; O se ke wa mo uta. 9O mmolaele ruri; seatla sa gago e be sa pele go mmolaya, go tsebo tla diatla tša setšhaba ka moka. 10O mo thume ka maswika, a hwe, ka gobane o lekile go go aroša gore o lahle Morena Modimo wa gago e a go ntšhitšego nageng ya Egipita ngwakong wa bohlanka. 11Gomme di kwiwe ke Baisiraele ka moka gore ba boife, gore taba e bjalo e se ke ya ba ya dirwa gape mo go lena.
12Ge o ka kwa go bolelwa motse o mongwe wa geno wo Morena Modimo wa lena a le neilego wona, mme ba re: 13Go tšweletše banna ba babe ga geno, mme ba arošitše ba ba agilego motseng woo, ba re: A re yeng re direle medimo e šele ye le sa e tsebego, 14gona le latišiše, le lote, le botšiše gabotse. Gomme ge le ka hwetša e le therešo, gomme taba yeo e tiile, ge makgapha a mabjalo a dirilwe ga geno, 15gona ba ba agilego motseng woo le ba bolaele ruri ka bogale bja lerumo; le o dire segafiwamoka, le tšohle tše di lego mo go wona, le dikgomo tša wona ka moka, ka bogale bja lerumo. 16Gomme dithebola tša wona ka moka le di kgobele letlatsweng la wona, le di fišetše Morena Modimo wa lena gona moo. Le fiše motse gotee le dithebola tša wona ka moka; e be marope ka mehla le mehla, o se ke wa ba wa tsoga neng le neng. 17Mo seatleng sa gago go se ke gwa šala se se gafilwego ka moka, gore Morena a gomiše kgalefo ya gagwe, a go dire ka kgaugelo, a go atišetše thari, ka mo a enetšego botatago. 18Ka gobane o tlo ba o theetša se Morena Modimo wa gago a se boletšego; o tlo ba o hlokomela ditaelo tša gagwe ka moka tše ke go laetšego tšona lehono, o tlo ba o dira tše Morena Modimo wa gago a bonago gore di lokile.
