DOITERONOMIO 14

₁Lena le bana ba Morena Modimo wa lena. Le se ke la itlhabela ka legare; le se ke la dira seubu mo phatleng ka baka la mohu. ₂Gobane le setšhaba se sekgethwa sa Morena Modimo wa lena Morena o le kgethile mo gare ga ditšhaba ka moka tša lefase, la ba setšhaba, se yena a lego Mong wa sona.

₃Le se ke la ja tše makgapha. ₄Tše le kago di ja šedi: Ke kgomo, le nku, le pudi, ₅le kgama, le tshepe, le phala, le kome, le phuti, le tholo, le letlabo. ₆Diphoofolo ka moka tše di pharogilego dihlako tše di pharogilego dihlako tše di otlago, le ka di ja. ₇Fela mo go tše di pharogilego dihlako, mme tša otla, le ile kamela, le mmutla, le pela; ka gobane, le ge di otla, dihlako tša tšona ga tša pharoga ruri; le di ile. ₈Le ile kolobe, ka gobane le ge e pharogile dihlako, ga e otle; le se ke la ja nama ya yona; le setoto sa yona le se ke la se kgwathiša.

₉Go tše di lego meetseng le ka ja tšohle tše di nago le diphego tša go rutha le tša matlagapi. ₁₀Le ile tše di se nago diphego tša go rutha le matlagapi; le se ke la di ja.

₁₁Dinonyana le ka ja tšohle tše di sekilego. ₁₂Le se ke la ja nong, le leaka, le ntšhu, ₁₃le sepekwa, le segotšane le mehuta ya sona, ₁₄le magukubu le mehuta ya ona, ₁₅le mpšhe, le peolane, le tlhapawatle, le mehuta ya bosehlabamaebana, ₁₆le leribiši, le tlobjane, le seroramahlwana, ₁₇le tladi, le sefudi, le mogole, ₁₈le leakabosane, le mehuta ya boletlaka, le lewang, le mankgaganyane.

₁₉Digagabi ka moka tše di fofago le di ile, le se ke la di ja. ₂₀Go tše di fofago ka moka le ka ja tše di sekilego.

₂₁Le se ke la ja nama ya setoto. O ka e nea modiiledi e a lego dikgorong tša geno a e je; goba o ka e rekiša go ba ditšhaba; gobane wena o setšhaba se sekgethwa sa Morena Modimo wa gago; o se ke wa hladia putšane ka lebese la mmayo.

₂₂Mo go dienywa ka moka tša dipeu tša gago, go tše mašemo a gago a di tšweletšago ka ngwaga o mongwe le o mongwe, o ntšhe karolo ya lesome. ₂₃Dikarolo tše lesome tša mabele a gago, le tša mananose a morara wa gago, le tša maitšibulo a dikgomo tša gago le dihuswane tša gago. O di je pele ga Morena Modimo wa gago, felo mo a ikgethetšego go bea leina la gagwe ntshe, gore o ithute go mmoifa ka mehla. ₂₄Ge tsela e ka ba e telele, mme wa šitwa go di iša ntshe, ka ge felo mo Morena Modimo wa gago a ikgethetšego go bea leina la gagwe gona, e le kgole, -- gobane Morena Modimo wa gago o tlo go šegofatša, -- ₂₅gona o ntšhe tšhelete, o e sware ka seatla, o ye felo fao Morena Modimo wa gago a go kgethilego, ₂₆o tle o reke tšohle tše pelo ya gago e ratago go di reka, e ka ba kgomo, e ka ba sehuswane, goba beine le seno se bogale, le tšohle tše pelo ya gago e di nyakago; mme o di je o le gona moo pele ga Morena Modimo wa gago o thabe le ba lapa la gago ka moka.

₂₇Le Molefi e a lego dikgorong tša gago o se ke wa mo lebala, ka gobane ga a na karolo ya gagwe mo nageng ya geno. ₂₈Ge go fedile nywaga e meraro o ntšhe karolo ya lesome ya tšohle tše o di bunnego ka ngwago wa boraro, o di kgobelele kgorong; ₂₉go tle Molefi e a se nago karolo mo nageng ya geno, le modiiledi, le sešuana, le mosadi wa mohlologadi; bona bao, e le ba metseng ya geno, ba tle ba je ba khore, gore Morena Modimo wa gago a go šegofatše ka mediro ka moka ya diatla tša gago ye o e dirago.