AMOSI 6

₁Kotsi e tlo wela baiketli ba Tsione, le baipoti ba thabeng ya Samaria, mahumagadi a setšhaba sa pele gare ga ditšhaba, bao ba moloko wa Isiraele ba yago go bona. ₂Selelang Kaline le yo bona; le fetele Hamathi motseng o mogolo; le fologele Gathi go Bafilisita. A bolo bja bona ga bo phale bja mebušo yeno? A dinaga tša bona ga di phale naga tšeno tša lena? ₃Lena ba le rego tšatši la dikotši le se kgole, mme kgauswi la tliša madulo a bošoro. ₄Le dula didulo tša naka la tlou, le nama dilaong tša lena, le ja dikwana tša mehlape le mamane a nonnego. ₅Le letša makope le opela tša phaku, la itshema la re le swere diletšo bjalo ka Dafida. ₆Le nwa sedila ka dikgamelo, le tlola ka makhura a bohlokwa, le sa re selo ka thobego ya Josefa. ₇Ke wona molato woo ge bjale le thopiwa, la ba mathopša maetišwapele; ya tlo ba gona go ripša ga masego a ba namilego dilaong.

₈Morena Mong a bohle o enne ka yena ka noši; Morena Modimo wa mašaba o re: Nna ke hlaswa boikgogomošo bja Jakobo; ke hloile nywako ya bona ya bogoši; ke ngadile motse le mahumo a wona.

₉Bjale tše di tlogo direga šedi: Ge ntlong e tee go šetše banna ba lesome, ba tlo hwa. ₁₀Ge wa gabomotho a etla go kuka mohu, gore a yo fihla setoto, a botšiša wa ngwakong a re: A ga go sa le wa geno? Eo a tlo re: Galo! Mme yena a tlo re: Homola; ga se mo go kago bolwa ina la Morena!

₁₁Tsebang gobane Morena o tlo tloga a laela, mme nywako e megolo e tlo thubja ya thunthanywa, mme nywakwana ya phušolwa. ₁₂Lwaleng pitši a e ka kganyela, a go ka lengwa ka dipholo? Mme lena le fetotše kahlolo ya ba mpholo, kenyo ya toko ya ba go galakelwa.

₁₃Le thabela taba tša mafela, la re: Dinaka re di hweditše ka maatla a rena.

₁₄Bjale Morena Modimo wa mašaba o re: Ke nna e! Lena ba moloko wa Isiraele, ke le tsošetša tšhaba se se tlo go le hlakiša se le tsene ka sefata sa Hamathi sa yo goma ka noka ya lešokeng.