Pono tše tharo tša Amosi; o a begwa
1Šedi tše Morena a mpontšhitšego tšona. Ke bone a tšweletša tšie, e le lebaka la lehlabula, kgoši e šetše e lomile tše mpsha. 2Ya re ge tšie e lle botala bja naga e bo feditše, nna ka re: Morena Mong a bohle, hle ba lebalele! Jakobo o tlo ema bjang, e le e monyenyane?
3Morena a šegama a re: Di ka se direge! Morena o realo.
4Morena Mong a bohle a mpontšha tše dingwe. Ka bona Morena Mong a bohle a ntšha dira tša mollo; mollo wa fiša bodiba bjo bogolo. Wa re o šetše o bo feditše thoko e nngwe, 5nna ka re: Morena Mong a bohle, a ko lese hle! Jakobo o tlo ema bjang e le e monyenyane?
6Morena a šegama a re: Di ka se direge! Morena Mong a bohle o realo.
7A mpontšha tše dingwe, ka bona Morena a eme morakong o etšago leriba, ka seatla a swere seelakemo. 8Morena a mpotšiša a re: Amosi o bonang?
Nna ka re: Ke bona seelakemo!
Mong a bohle a re: Ke nna e! Tšhabeng sa ka sa Isiraele ke bea seelakemo; nka se ke ka hlwa ke se feta. 9Meboto ya Isaka e tlo ba ya marope, dintlokgethwa tša Isiraele di tlo phušolwa; mme ba moloko wa Jerobeama ke ba tlela ka lerumo.
10Amatsia moperisita wa Bethele o kile a roma motseta, a tla go Jerobeama kgoši ya Isiraele, a re: Amosi o go tsošetša mpherefere mo go ba moloko wa Isiraele; naga ga e sa kgona go kgotlelela dipolelo tša gagwe ka moka. 11Gobane Amosi o fela a re: Jerobeama o tlo hwa ka lerumo; Baisiraele mo nageng ya gabo ba tlo tloga ba thopilwe.
12Amatsia a bolela le Amosi a re: Wena Mmoni! Tloga, o khudugele nageng ya Juda o yo diilela gona, o yo porofeta o le gona kua! 13Mono Bethele o se ke wa hlwa o porofeta ka gobane ke felo mo gokgethwa ga kgoši, ke ngwako wa mmušo.
14Amosi a fetola a re: Ga ke moporofeta; le gona ga ke ngwana wa moporofeta. Nna ke modiši wa dikgomo, ke sela mago a naga. 15Fela, Morena o ntšere ke dišitše mohlape, a ntaela a re: Yaa o porofetele setšhaba sa Isiraele. 16Bjalo kwaa se Morena a se boletšego, wena o rego se porofetele Isiraele, se rute ba moloko wa Isiraele! 17Molato ke wona woo ge Morena a re: Mosadi wa gago e tlo ba seotswa motseng wo; gobane barwa ba gago le barwedi ba gago ba tlo fela ka lerumo; mme mašemo a gago a tlo elwa a arolelwa ba bangwe. Ge e le wena, o tlo yo hwela nageng ya diila; mme Baisiraele ba tlo tloga fa nageng ya gabo ba thopilwe.
