2 SAMUELE 22

Lentswe la ka, sebo sa ka, le monamoledi wa ka ke Morena.

₃Modimo ke lefika la ka, le ke le botilego,

kotse ya ka le lenaka la ka la go nnamolela,

morako wa ka, le tšhabelo sa ka,

monamodi wa ka, monnamola bošorong.

₄Morenamoretiwa, ka na ka go bitša.

Wa nnamola manabeng.

₅Ka dikwa ke mafula a lehu,

ka tšhošwa ke noka tša bohlola,

₆ke tantšwe ke dithapo tša bodulabahu,

ke kgamilwe ke mahuto a lehu,

₇ke tlaletšwe, ka bitša Morena,

Modimo wa ka, ka mmitša,

a kwa mokgoši wa ka a le mo Ngwakong wa gagwe;

megobelo ya ka ya fihla mo tsebeng tša gagwe.

₈Fase le la šikinyega mme la roromela,

metheo ya leratadima ya tekema

ya kgwehla a befetšwe.

₉Dinko tša gagwe tša thuntšha meuši,

mo ganong ga gagwe gwa tšwa mollo o tšhumango,

magalamatukuma a tšwa mo go yena.

₁₀A inamiša magodimo a ologa,

a gata mo go lego boso,

₁₁a fofa, Bakerubi ba mo rwele,

a bonwa a išwa ke phego tša phefo.

₁₂Maswiswi a mo šira boka ntlo.

Boso boka diba! Maru a sephirimetša!

₁₃Magadigadi a mo eta pele,

a tuka dikgabo tša mollo.

₁₄Morena o dumiša maru a le kua godimo,

godimodimo o kwatša ntšu la gagwe.

₁₅O betša mesebe a ba gašanya,

o betša kgadima ba tšhoga,

₁₆madiba a lewatle a efoga,

metheo ya lefase ya apoga

ka kgalemo ya Morena, ka ledimo la mohla a galefile.

₁₇Nna a ntshwara a ntšhitše letsogo a le kua godimo,

a nntšha meetseng a magolo,

₁₈a nnamolela ke hloilwe ke yo maatla,

mola ba ba mpekilego ke se sa ba kgona.

₁₉Ba ntikile mohla ke pateletšwe,

ka thekgwa ke yena Morena.

₂₀A nntšhetša kgakala molaleng,

a nthlakodiša ka gobane a nthabela.

₂₁O mputsa ge ke loka,

o mpušetša a bone diatla tše bolo,

₂₂ka ge ke hlokomela tsela tša Morena,

ke sa senye ka mo lahla,

yena Modimo wa ka.

₂₃Ke dula ke lebane le melao yagwe yohle,

taelo tša gagwe nka se di tlogele.

₂₄O mpona ke se na bosodi,

ke ila go oba molato.

₂₅Morena o mputsa bothakga,

o mputsa a bone ke le yo bolo.

₂₆Yo botho o mo kwiša botho,

monnamoloki o a mo lokela,

₂₇yo bolo o mmatela bolo,

wa maaka ga o mmotegele.

₂₈Mothomohlaki o a mo namola;

mahlo a gago a hlaba baipoti, wa ba uša.

₂₉Wena Morena, o lebone la ka.

Ka Morena swiswi la ka e ba seetša.

₃₀Ke na le wena, ke šwahlela sera;

ke na le Modimo wa ka, ke sela morako.

₃₁Modimo e, tsela yagwe ke go loka;

lentšu la gagwe ke ntšulesekegi,

ke kotse ya bohle ba ba mmotilego.

₃₂Gobane Modimo ke mang, ge e se Morena?

Lentswe ke mang, ge e se Modimo e wa rena?

₃₃Modimo e ke sebo sa ka se se tiilego;

o mpulela tsela ya go loka.

₃₄O mpha maoto boka kome,

o nkiša mo ntlhohlong ya thaba ya ka.

₃₅O ruta atla tša ka go hlabana,

bora bja tshipi ke bo nganga ka matsogo a ka.

₃₆O mphile kotse ya gago ka phologa,

wa nkinamela wa nkgodiša,

₃₇bogato bja ka wa bo katološa,

nao tša ka di se sa thedimoga.

₃₈Manaba a ka ke a hlomaretše ka a fetša,

ke se gome ke sešo ka a feleletša,

₃₉ka a ja, ka a phumakanya a se sa tsoga,

ka a gata ka dinao tša ka.

₄₀O ntlhamišitše maatla a tlhabano;

bantsogedi a ba thokga mme ba ntoba.

₄₁Bantlhoi ba nneela dietse o na le nna,

bampeki ke ba iša go lobeng.

₄₂Ba iša mahlo thoko tšohle, ba hloka monamodi,

ba a iša go Morena, a se ba fetole.

₄₃Ka ba šilakanya boka role la lefase,

ka ba pšhatlaganya, ka ba gatakanya wa seretse mokgobeng.

₄₄A nkemela mola tšhaba sa ka se ntsošetša kgang,

a nteta, a mpea kgoši ya ditšhaba,

gwa loba le bao ke sa ba tsebego.

₄₅Ba tšhaba dišele ba tlile ba lotšha,

ba re go botšwa, ba napa ba nthaetša.

₄₆Ba tšhaba dišele ba šaretšwe;

ba thothomela ba tšwa mo dibong tša bona.

₄₇Morena o gona! A go retwe Lentswe la ka,

go tlotlwe Modimo, Sebobophologelo.

₄₈Modimo e, montefeletši,

moreditšhabadintobe.

₄₉O ntšhegetše ka tšwa manabeng,

a mpea ka tletlolo ga bampeki,

a nnamoletše mo atleng tša monna e mošoro.

₅₀Morena ke tlo fela ke go reta ka tše bjalo ditšhabeng;

ka tlotla leina la gago,

₅₁wena monamolakgošiyago ka tše kgolo,

mošetšamotlotšwa wa gagwe

Dafida le peu ya gagwe

Neng le neng.