2 SAMUELE 21

₁Mehleng yeo ya Dafida go kile gwa wa tlala ya nywaga e meraro e hlatlamanago. Dafida a nyaka sefahlogo sa Morena. Morena a re: Ke ka baka la Saulo, le ka baka la molato wa madi wa leloko la gagwe, ka ge a bolaile Bagibeoni. ₂Kgoši ya bitša Bagibeoni ya bolela le bona. Bagibeoni e be e se Baisiraele; e be e le mašalela a Baamoro. Baisiraele ba be ba ba enetše leago. Saulo yena a rata go ba fediša gobane a fišegetše Baisiraele le Bajuda. ₃Dafida a bolela le Bagibeoni a re: Ke le dirileng? Le gona nka ntšhang gore ke boelane le lena, gore le šegofatše naga ya Morena?

₄Bagibeoni ba re: Ga re nyake disilifera le digauta go Saulo le go leloko la gagwe. Le gona ga go a re swanela ge re ka fo bolaya motho mo go Isiraele.

Kgoši ya re: Mpotšeng se nkago le direla.

₅Ba fetola ba re: Monna ela e a re sentšego, e a bego a itokišitše go re fediša mo dileteng tša Isiraele ka moka, ₆a re newe banna ba ba šupago e lego bana ba gagwe, re ba fege pele ga Morena gona moo Gibea motseng wa Saulo mokgethiwa wa Morena.

Kgoši ya re: Ke tlo ba ntšha.

₇Kgoši ya gaugela Mefibosethe morwa wa Jonathane morwa wa Saulo ka baka la keno yela ya Morena ye e bego e tlemile Dafida le Jonathane morwa wa Saulo. ₈Kgoši ya hlaola barwa ba babedi ba Ritsipa morwedi wa Aya, a lego Arimoni le Mefibosethe, ba a ba belegetšego Saulo, le barwa ba bahlano ba Merabe morwedi wa Saulo ba a ba belegetšego Adiriele morwa wa Barasilai wa Mehola. ₉Bona bao a ba gafela diatleng tša Bagibeoni; bona ba ba fega thabeng pele ga Morena. Ba ba šupago bao ba bolailwe mmogo, ba hwa e le lebaka la ge ba thoma go buna, mathomong a puno ya mabele.

₁₀Ritsipa morwedi wa Aya a tšea mokotla, a ikalela mo lwaleng mola ba thoma go buna, a dula moo, ditoto tša ba tša newa ke kgogolamoko; a se ke a dumelela manong a godimo go ka tsokama mosegare, le dibata tša naga go tla bošego.

₁₁Dafida a botšwa se se dirwago ke Ritsipa morwedi wa Aya mosadi wa Saulo wa serethe. ₁₂Dafida a ya a tšea mašapo a Saulo le a Jonathane morwa wa Saulo kua go beng ba motse wa Jabese wa Gileada, ao ba nago ba a thopolola kgorong ya Bethesane, mo Bafilisita ba bego ba a fegile mohla wola ba bolaile Saulo kua Giliboa. ₁₃Mohla woo ge Dafida a tliša mašapo a Saulo le mašapo a Jonathane, gwa bolokwa le mašapo a ba ba fegilwego. ₁₄Ba boloka mašapo a Saulo le a Jonathane morwa wa gagwe mo nageng ya Benyamini motseng wa Tsela lebitleng la Kisi tatagwe. Ba dira tšohle tše kgoši e ba laetšego tšona. Ya ba gona Modimo a boetšego a atla naga yeo.

₁₅Bafilisita ba kile ba boa ba lwa le Baisiraele. Dafida a tšwa dira le bahlanka ba gagwe. Ya re ge ba sa hlabana le Bafilisita, Dafida a lapa. ₁₆Gwa tšwelela Jesibi-Benobo wa ba ga Rafa a swere lerumo la boima bja sekele tše makgolo a mararo, a itlhamile ka diphemo tše mpsha, a re ke bolaya Dafida. ₁₇Abisai morwa wa Tseruya a namolela, a bolaya Mofilisita eo a felela. Mohla woo banna ba Dafida ba mo phegelela le ka dikeno ba re: O se ke wa hlwa o tsena le rena mo go hlabanwago, gore lebone la Isiraele le se ke la tingwa.

₁₈Gwa tsoga ntwa e nngwe le Bafilisita kua Gobo. Mohla woo Sibakai Mohuša a bolaya Safi e bego e le setlogolo sa Rafa.

₁₉Gwa buša gwa lwewa ntwa le Bafilisita kua Gobo. Elihanani morwa wa Jaare-Origimi wa Betlehema a bolaya Goliata, eo theko ya lerumo la gagwe e bego e lekana le mpheng wa letšepe.

₂₀Gwa buša gwa lwewa ntwa kua Gathe. Gona moo go be go na le monna yo motelele e a bego a na le diatla tša menwana e selelago, le dinao tša menwana e selelago, ka moka e be e le menwana e masome a mabedi a metšo e mene; e e le wa Rafa ka setswalo. ₂₁Yena eo ge a roga Isiraele, a bolawa ke Jonathane morwa wa Simea ngwanabo Dafida.

₂₂Banna ba bane bao e be e le ba ga Rafa ba Gathe ka setswalo; gomme ba bolailwe ke Dafida le bahlanka ba gagwe.