Bahlapetši le baahlodi
1Dihlopha tša baleti ba dikgoro šedi: Go Bakora e be e le Meselemia morwa wa Kore wa barwa ba Asafa. 2Barwa ba Meselemia e be e le Sekaria wa ntlha, le Jediele wa bobedi, le Sebadya wa boraro, le Jathiniele wa bone, 3le Elama wa bohlano, le Johanani wa go selela, le Elioenai wa go šupa.
4Barwa ba Obede-Edomo e be e le Semaria wa ntlha, le Josabadi wa bobedi, le Joage wa boraro, le Sakaria wa bone, le Nethaniele wa bohlano, 5le Amiele wa go selela, le Isashara wa go šupa, le Peulithi wa seswai; gobane Modimo o be a mo šegofaditše.
6Le Semaya morwa wa gagwe o be a na le barwa ba gagwe ba e kilego ya ba bagolo ba leloko la gabo, gobane e be e le banna ba dinatla. 7Barwa ba Semaya ke Othini, le Refaele, le Obede, le Elisabadi, le bana ba bobona ba banna ba dinatla, le Elihu le Semakia.
8Bao ka moka e be e barwa ba Obede-Edomo; bona le bana ba bona le ba bobona, e be e le banna ba dinatla, ba matla modirong; e be e le ba masome a selelago a metšo e mebedi, ba ga Obede-Edomo.
9Le Meselemia o be a na le barwa le bana babo, banna ba lesome la metšo e seswai ba dinatla.
10Le Hosa e mongwe wa barwa ba Merari o be a na le barwa; mogolo wa bona e be e le Simiri, le ge e se yena wa leitšibulo; o filwe bogolo ke tatagwe. 11Wa bobedi e be e le Hilikia; wa boraro e be e le Tebalia; wa bone e be e le Sekaria; barwa ba Hosa ka moka le bana babo e be e le ba lesome le metšo e meraro.
12Dihlopha tše tša baleti ba dikgoro, ka palo ya bagolo ba banna, modiro wa bona e be e le go hlokomela Ngwako wa Morena ga mmogo le bana ba bobona. 13Ba hlaotšwe ka matengwa, ba bayane le bagolo, ka go ya ka meloko ya bona le ka dikgoro. 14Tengwa la kgoro ya thoko ya bohlabela la wela Meselemia; morwa wa gagwe Sekaria e be e le yo bohlale dikeletšong; yena ba mo diretše matengwa, mme a welwa ke tengwa la kgoro ya thoko ya leboa. 15Obede-Edomo a welwa ke tengwa la kgoro ya thoko ya borwa; barwa ba gagwe ba welwa ke tengwa la go leta nywako ya matlotlo. 16Supima le Hosa ba welwa ke tengwa la go leta thoko ya bodikela le kgoro ya Salekete, mo mmila o rotogago, mme baleti mo ba emago ba lebane. 17Thoko ya bohlabela go be go leta Balefi ba ba selelago; thoko ya leboa e be e le ba bane ka mehla; thoko ya borwa e be e le ba bane ka mehla; nywakong ya matlotlo e be e le babedibabedi. 18Mo mathuding a ka thoko ya bodikela, mo mmila o rotogago, go be go leta ba bane; mathuding gona go be go leta ba babedi. 19Ke tšona dihlopha tša baleti ba dikgoro ba barwa ba Kora le ba barwa ba Merari.
20Banababo ba Balefi ba e bego e le balaki ba mahumo a Ngwako wa Modimo le ba dipolokelo tša tše kgethwa šeba: 21Ke barwa ba Laedani, ba Laedani ba ga Gerisome, ba e bego e le bagolo ba moloko wa ba Laedani ba ga Gerisome, ke ba ga Jehiele. 22Barwa ba Jehiele ke Sethama le Joele ngwanabo, balaki ba mahumo a Ngwako wa Morena.
23Ge e le mo go ba Amorama, le ba Jitsehara, le ba Heburone, le ba Usiele 24molaki wa mahumo e be e le Sebuele morwa wa Gerisome morwa wa Moshe. 25Bana babo moloko wa Eliesere e be e le Rehabya morwa wa gagwe, le Jesaya morwa wa gagwe, le Jorama morwa wa gagwe, le Sikiri morwa wa gagwe, le Selomitha morwa wa gagwe. 26Selomitha yo le bana ba gagwe e be e le bona balaki ba mahumo ala ka moka a a kgethilwego ke kgoši Dafida le balaodi ba dikgao tša ba dikete le tša ba lekgolo, le balaodi ba dira. 27Ba di kgethile e le dithebola le dithopiwa, ya ba tša go thakga Ngwako wa Morena; 28le tšohle tše di bego di kgethilwe ke Samuele mmoni, le Saulo morwa wa Kisi, le Abinere morwa wa Nere, le Joaba morwa wa Tseruya. Tše kgethwa ka moka tše, di be di lakwa ke Selomitha le bana babo.
29Ba ga Jitsehara, ba ba bego ba beilwe go hlokomela mediro ya kwa ntle ya Isiraele, e le bahlapetši le baahlodi, ke Kenanya le barwa ba gagwe.
30Ba ga Heburone ba ba bego ba beilwe go hlapetša Isiraele ka mošono wa Jorodane thoko ya bodikela, le mediro ka moka ya go hlankela Morena le kgoši, e be e le Hasabya le bana babo, banna ba dinatla ba sekete se se nago le makgolo a šupago. 31Go bona ba gaHeburone mogolo e be e le Jeria, mogolo wa ge go iwa ka leloko la gabo le ka dikgoro tša gabo. Bona ba kile ba balwa ka ngwaga wa masome a mane wa pušo ya Dafida; go bona gwa hwetšwa banna ba dinatla ba motseng wa Jasere wa Gileada. 32Ba gabo e be e le banna ba dinatla ba dikete tše pedi le makgolo a šupago, beng ba malapa; kgoši Dafida o ba beile go hlapetša Barubeni, le Bagada, le ba seripa sa Bamanase ditabeng ka moka tša Modimo le tša kgoši.
