PSALM 56

₁VIR die musiekleier; op die wysie van: „Die Duif van die ver Terebinte.” Van Dawid. 'n Gedig, toe die Filistyne hom gevang het in Gat.

₂Wees my genadig, o God, want mense vertrap my; hy wat my beveg, verdruk my die hele dag.

₃My vyande vertrap my die hele dag, want baie veg teen my in hoogmoed.

₄Die dag as ek vrees, sal ék op U vertrou.

₅Deur God sal ek sy woord prys; ek vertrou op God, ek vrees nie; wat kan vlees my doen?

₆Die hele dag verdraai hulle my woorde; al hulle gedagtes is teen my, om kwaad te doen.

₇Hulle val aan, lê en loer — hulle let op my hakskene net soos hulle op my lewe geloer het.

₈Ondanks hul ongeregtigheid — sal hulle ontvlug? Werp volke neer in toorn, o God!

₉Ú het my omswerwinge getel; hou my trane in u kruik; is hulle nie in u boek nie?

₁₀Dan sal my vyande agteruitwyk op die dag as ek roep; dit weet ek dat God aan my kant is.

₁₁Deur God sal ek die woord prys; deur die Here sal ek die woord prys.

₁₂Ek vertrou op God, ek vrees nie; wat kan 'n mens my doen?

₁₃Op my, o God, rus geloftes aan U gedoen; lofoffers sal ek U betaal;

₁₄want U het my siel gered van die dood — ja, my voete van struikeling — om te wandel voor die aangesig van God in die lig van die lewe.