PSALM 55

₁VIR die musiekleier; met snaarinstrumente. 'n Onderwysing van Dawid.

₂o God, hoor my gebed en verberg U nie vir my smeking nie.

₃Luister na my en verhoor my; in my onrus dwaal ek rond en is verward,

₄weens die geroep van die vyand, weens die geraas van die goddelose; want hulle stort onreg op my af, en in toorn behandel hulle my as vyand.

₅My hart krimp inmekaar in my binneste, en verskrikkinge van die dood het op my geval.

₆Vrees en bewing kom oor my, en angs oordek my.

₇Toe het ek gesê: Ag, had ek maar vlerke soos 'n duif, dan sou ek wegvlieg en wegbly!

₈Kyk, ek sou ver wegvlug; ek sou vernag in die woestyn! Sela.

₉Gou sou ek vir my 'n skuilplek soek teen die onstuimige wind, teen die storm.

₁₀Verwar, Here, verdeel hulle spraak, want ek sien geweld en twis in die stad.

₁₁Dag en nag omring hulle dit op sy mure, en binnekant is onreg en moeite.

₁₂Wat onheil aanbring, is daarbinne, en verdrukking en bedrog wyk nie van sy markplein nie.

₁₃Want dit is geen vyand wat my smaad nie, anders sou ek dit dra; dit is nie my hater wat hom teen my groot maak nie, anders sou ek my vir hom wegsteek;

₁₄maar jy, 'n man soos ek, my vriend en my vertroude!

₁₅Ons wat innig met mekaar omgegaan het, in die huis van God gewandel het met die woelige skare.

₁₆Laat die dood hulle oorval, laat hulle lewendig in die doderyk neerdaal; want boosheid is in hulle woning, in hulle binneste.

₁₇Maar ek, ek roep God aan, en die Here sal my verlos.

₁₈Saans en smôrens en smiddags klaag ek en steun, en Hy hoor my stem.

₁₉Hy verlos my siel in vrede van die stryd teen my, want met menigtes is hulle teen my.

₂₀God sal hoor en hulle antwoord; ja, Hy wat op die troon sit van lankal af, Sela; omdat by hulle geen verbetering is en hulle God nie vrees nie.

₂₁Hy het sy hande uitgesteek teen die wat in vrede met hom geleef het; hy het sy verbond ontheilig.

₂₂Glad is die botterwoorde van sy mond, maar sy hart is oorlog; sy woorde is sagter as olie, maar hulle is ontblote swaarde.

₂₃Werp jou sorg op die Here, en Hy sal jou onderhou; Hy sal nooit die regverdige laat wankel nie.

₂₄Maar U, o God, sal hulle laat neerdaal in die put van vernietiging; manne van bloed en bedrog sal hulle dae nie tot op die helfte bring nie; maar ék vertrou op U.