PSALM 18

₁VIR die musiekleier. 'n Psalm van Dawid, die kneg van die Here, wat die woorde van hierdie lied tot die Here gespreek het op die dag toe die Here hom gered het uit die hand van al sy vyande en uit die hand van Saul.

₂En hy het gesê: Ek het U hartlik lief, Here, my sterkte.

₃Die Here is my rots en my bergvesting en my redder; my God, my rots by wie ek skuil; my skild en die horing van my heil, my rotsvesting.

₄Ek roep die Here aan wat lofwaardig is, en van my vyande word ek verlos.

₅Bande van die dood het my omring, en strome van onheil het my oorval.

₆Bande van die doderyk was rondom my; strikke van die dood het my teëgekom.

₇Toe ek benoud was, het ek die Here aangeroep, en ek het tot my God geroep om hulp; Hy het my stem uit sy paleis gehoor, en my hulpgeroep voor sy aangesig het in sy ore gekom.

₈Toe het die aarde geskud en gebewe; die fondamente van die berge het gesidder en geskud, omdat Hy toornig was.

₉Rook in sy neus het opgegaan, en 'n vuur uit sy mond het verteer; kole uit Hom het gebrand.

₁₀En Hy het die hemel gebuig en neergedaal, en donkerheid was onder sy voete.

₁₁En Hy het op 'n gérub gery en gevlieg; ja, Hy het gesweef op die vleuels van die wind.

₁₂Duisternis het Hy sy skuilplek gemaak, sy hut rondom Hom: duisternis van waters, diktes van wolke.

₁₃Deur die glans voor Hom het sy wolke verbygetrek, hael en gloeiende kole.

₁₄En die Here het in die hemel gedonder, en die Allerhoogste het sy stem laat hoor; hael en gloeiende kole.

₁₅En Hy het sy pyle uitgestuur en hulle verstrooi; ja, sy bliksems in menigte, en Hy het hulle verwar.

₁₆En die beddings van die waters het sigbaar geword, en die fondamente van die wêreld is blootgelê vanweë u dreiging, o Here, vanweë die geblaas van die wind van u neus.

₁₇Hy het uit die hoogte sy hand uitgestrek, Hy het my gegryp, Hy het my uit groot waters getrek.

₁₈Hy het my verlos van my magtige vyand en van my haters, omdat hulle te sterk was vir my.

₁₉Hulle het my oorval op die dag van my nood; maar die Here was my steun.

₂₀En Hy het my uitgelei in die ruimte; Hy het my gered, omdat Hy behae in my gehad het.

₂₁Die Here het met my gehandel na my geregtigheid; Hy het my vergelde na die reinheid van my hande.

₂₂Want ek het die weë van die Here gehou en nie goddeloos van my God afgewyk nie;

₂₃want al sy verordeninge was voor my, en sy insettinge het ek nie van my verwyder nie.

₂₄Maar ek was opreg by Hom, en ek was op my hoede vir my ongeregtigheid.

₂₅So het die Here my dan vergelde na my geregtigheid, na die reinheid van my hande, voor sy oë.

₂₆By die liefderyke betoon U Uself liefderyk, by die opregte man opreg,

₂₇by die reine rein; maar by die valse betoon U Uself verkeerd.

₂₈Want U verlos die verdrukte volk; maar U verneder die oë wat hoog is.

₂₉Want U laat my lamp skyn; die Here my God laat my duisternis opklaar.

₃₀Want met U loop ek 'n bende storm, en met my God spring ek oor 'n muur.

₃₁Die weg van God is volmaak; die woord van die Here is gelouter; Hy is 'n skild vir almal wat by Hom skuil.

₃₂Want wie is God buiten die Here, en wie is 'n rots behalwe onse God?

₃₃God is dit wat my met krag omgord en my weg volkome maak.

₃₄Hy maak my voete soos dié van herte en laat my staan op my hoogtes.

₃₅Hy leer my hande om oorlog te voer, sodat my arms 'n koperboog span.

₃₆Ook het U my die skild van u uitredding gegee, en u regterhand het my ondersteun, en u neerbuigende goedheid het my groot gemaak.

₃₇U het my voetstap ruim gemaak onder my, en my enkels het nie gewankel nie.

₃₈Ek het my vyande agtervolg en hulle ingehaal, en ek het nie teruggekom voordat ek hulle vernietig het nie.

₃₉Ek het hulle verbrysel, sodat hulle nie kon opstaan nie; hulle het geval onder my voete.

₄₀En U het my met krag omgord vir die stryd; U het my teëstanders onder my laat buk.

₄₁En U het my vyande vir my laat vlug; en my haters, dié het ek vernietig.

₄₂Hulle het geroep om hulp, maar daar was geen verlosser nie — tot die Here, maar Hy het hulle nie geantwoord nie.

₄₃Toe het ek hulle vermaal soos stof voor die wind; ek het hulle uitgegooi soos modder van die strate.

₄₄U het my gered uit die getwis van die volk; U het my 'n hoof gemaak van nasies; 'n volk wat ek nie geken het nie, het my gedien.

₄₅Sodra hulle van my gehoor het, was hulle my gehoorsaam, uitlanders het kruipende na my gekom.

₄₆Uitlanders word kragteloos en kom met siddering uit hulle vestings.

₄₇Die Here leef! En geloofd sy my rots, en laat verhoog wees die God van my heil!

₄₈Die God wat my die wraak gee en volke aan my onderwerp;

₄₉wat my red van my vyande; ja, U verhef my bo my teëstanders; U bevry my van die man van geweld.

₅₀Daarom wil ek U loof, o Here, onder die nasies, en tot eer van u Naam wil ek psalmsing.

₅₁Hy wat die verlossinge van sy koning groot maak en goedertierenheid bewys aan sy gesalfde, aan Dawid en aan sy nageslag tot in ewigheid.