PSALM 17

₁'n GEBED van Dawid.

Here, hoor 'n regverdige saak, let op my smeking; luister tog na my gebed met onbedrieglike lippe.

₂Laat my reg van u aangesig uitgaan; laat u oë regverdig sien.

₃U het my hart getoets, dit in die nag ondersoek, U het my gekeur, U vind niks nie; wat ek ook dink, my mond oortree nie.

₄Aangaande die handelinge van die mens, ék het deur die woord van u lippe die paaie van die geweldenaar vermy.

₅My gange het vasgehou aan u spore, my voetstappe het nie gewankel nie.

₆Ek roep U aan, want U verhoor my, o God! Neig u oor tot my, luister na my woord!

₇Maak u gunsbewyse wonderbaar, o verlosser van die wat by u regterhand skuil vir teëstanders!

₈Bewaar my soos 'n oogappel; verberg my in die skaduwee van u vleuels

₉teen die goddelose wat my geweld aandoen, my doodsvyande wat my omring.

₁₀Hulle het hul gevoel afgesluit; met hul mond spreek hulle hoogmoedig.

₁₁Nou het hulle ons in ons gang omsingel; hulle rig hul oë daarop om ons op die grond uit te strek.

₁₂Hy is soos 'n leeu wat begerig is om te verskeur, en soos 'n jong leeu wat in skuilplekke klaar lê.

₁₃Staan op, Here, gaan hom tegemoet, werp hom neer; red my van die goddelose met u swaard;

₁₄met u hand van die manne, o Here, van die manne wie se deel in die lewe uit die wêreld is en wie se buik U vul met u verborge skat; wie se seuns daarvan nog sat is, wat weer hul oorskot aan hulle kinders laat agterbly.

₁₅Maar ek sal u aangesig in geregtigheid aanskou; ek sal versadig word met u beeld as ek wakker word.