JOB 5

₁ROEP maar — is daar iemand wat jou antwoord gee? En na wie van die heiliges sal jy gaan?

₂Want verbitterdheid vermoor die dwaas, en naywer maak die domme dood.

₃Ek self het gesien hoe 'n dwaas wortel skiet; maar skielik het ek sy woning vervloek.

₄Ver is sy kinders van geluk; en hulle word verbrysel in die poort sonder dat iemand red.

₅Wat hy geoes het, eet die hongerige op, en dié haal dit selfs uit die doringheining uit; en die ondergang hyg na hulle rykdom.

₆Want onheil kom nie voort uit die stof, en moeite spruit nie uit die grond nie.

₇Maar die mens word vir moeite gebore soos die vonke boontoe vlieg.

₈MAAR wat my aangaan, ek sou na God vra en my saak aan die Godheid voorlê,

₉aan Hom wat groot dinge doen en ondeurgrondelike, wonders sonder getal;

₁₀wat reën gee oor die aarde en waters uitstuur oor die velde;

₁₁om nederiges op 'n hoogte te stel daarbo; en die wat in die rou is, verkry die hoogste geluk.

₁₂Hy wat die planne van listige mense verydel, sodat hulle hande niks kan uitrig wat standhou nie;

₁₃wat die wyse manne vang in hulle listigheid, en die raad van die slinkse mense misluk van haastigheid.

₁₄Oordag stuit hulle op duisternis, en soos in die nag tas hulle rond op die middag.

₁₅So verlos Hy dan van die swaard wat kom uit hulle mond, en die behoeftige uit die hand van die sterk man.

₁₆So is daar dan verwagting vir die arme; en ongeregtigheid hou die mond toe.

₁₇KYK, gelukkig is die man wat God kasty; verwerp daarom die tugtiging van die Almagtige nie.

₁₈Want Hý doen smart aan, maar verbind ook; Hy verbrysel, maar sy hande maak gesond.

₁₉In ses benoudhede sal Hy jou red, ja, in sewe sal geen onheil jou tref nie.

₂₀In hongersnood verlos Hy jou van die dood en in die oorlog uit die mag van die swaard.

₂₁As die tong gésel, word jy weggesteek; en jy hoef nie te vrees vir verwoesting as dit kom nie.

₂₂Oor verwoesting en broodsgebrek sal jy lag, en vir die wilde diere van die aarde hoef jy nie te vrees nie.

₂₃Want met die klippe van die veld is jou verbond, en die wilde diere van die veld is met jou bevriend.

₂₄En jy sal uitvind dat jou tent in vrede is; en as jy op jou woonplek rondkyk, sal jy niks vermis nie.

₂₅Ook sal jy uitvind dat jou kroos talryk is en jou nakomelinge soos die plante van die aarde.

₂₆Op rype leeftyd sal jy na die graf gaan, soos 'n koringgerf ingebring word op sy tyd.

₂₇Kyk, dit het ons nagespeur, so is dit; hoor dit, en neem jy dit ter harte.