JOB 36

₁EN Elíhu het voortgegaan en gesê:

₂Wag 'n bietjie op my, en ek sal u inlig; want daar is nog genoeg te sê tot eer van God.

₃Ek sal my kennis van ver af ophaal en aan my Skepper reg verskaf.

₄Want waarlik, my woorde is geen leuens nie; een wat volkome is in kennis, is by u.

₅Kyk, God is geweldig, nogtans ag Hy niks gering nie — geweldig deur krag van verstand.

₆Hy laat die goddelose nie lewe nie, maar aan die ellendiges verskaf Hy reg.

₇Hy trek sy oë nie af van die regverdige nie, maar by konings op die troon laat Hy hulle sit vir altyd, sodat hulle verhoog is.

₈Maar as hulle in kettings geklink is, gevang word in bande van ellende,

₉dan gee Hy aan hulle hul dade te kenne en hul oortredinge, dat hul gedrag hoogmoedig was;

₁₀dan open Hy hulle oor vir die tugtiging en sê dat hulle moet terugkeer van ongeregtigheid.

₁₁As hulle luister en Hom dien, dan bring hulle hul dae deur in voorspoed en hul jare in aangenaamheid.

₁₂Maar as hulle nie luister nie, dan kom hulle om deur die spies, en hulle blaas die asem uit sonder kennis.

₁₃Maar die goddelose van hart koester nyd; hulle roep nie om hulp as Hy hulle bind nie.

₁₄So sterwe dan hulle siel in die jeug en hulle lewe soos dié van skandseuns.

₁₅Hy red die ellendige deur sy ellende en open hulle oor deur verdrukking.

₁₆SO lok Hy u dan ook uit die mond van die nood na 'n onbeperkte ruimte en na die behaaglikheid van u tafel wat vol is van vetspys.

₁₇Maar u is vol van die oordeel oor die goddelose: oordeel en strafgerig sal u aangryp.

₁₈Want pas op dat woede u nie verlok by die bestraffing en die grootheid van die losprys u nie verlei nie.

₁₉Sal Hy u geroep om hulp voorbring waar daar geen nood is nie, en alle moontlike kragsinspanning van u?

₂₀Smag nie na die oordeelsnag wat volke wegneem uit hulle plek nie.

₂₁Neem u in ag, wend u nie tot ongeregtigheid nie; want dit verkies u liewer as ellende.

₂₂Kyk, God handel verhewe in sy krag; wie is 'n leermeester soos Hy?

₂₃Wie het Hom sy weg voorgeskrywe? En wie het gesê: U het onreg gedoen?

₂₄Dink daaraan dat u sy werk moet verheerlik waar die mense van sing.

₂₅Al die mense sien dit met welgevalle aan, die sterfling aanskou dit van ver.

₂₆Kyk, God is groot en onbegryplik vir ons; die getal van sy jare is onnaspeurlik.

₂₇Want Hy trek waterdruppels af; hulle sif neer by sy mistige weer as reën

₂₈wat die wolke laat neerstroom, laat afdrup op baie mense.

₂₉Ja, kan iemand die uitspreiding van die wolke verstaan, die gekraak van sy hut?

₃₀Kyk, Hy sprei sy lig oor Hom uit, en die dieptes van die see oordek Hy.

₃₁Want daarmee oordeel Hy die volke, gee Hy voedsel in oorvloed.

₃₂Altwee sy hande oordek Hy met weerlig en gee daaraan bevel teen die aanvaller.

₃₃Sy donderstem kondig Hom aan, die vee selfs dat Hy optrek.