JOB 35

₁VERDER het Elíhu aangehef en gesê:

₂Hou u dit vir reg, noem u dit: my geregtigheid voor God,

₃dat u vra wat dit u baat? Wat help dit my meer as wanneer ek sou sondig?

₄Ék sal u antwoord gee en aan u vriende saam met u.

₅Kyk op na die hemel en sien, en aanskou die wolke wat hoog bo u is.

₆As u sondig, watter skade is dit vir Hom? En is u oortredinge baie, wat kan u Hom daarmee aandoen?

₇As u regverdig is, wat gee u aan Hom? Of wat kan Hy uit u hand aanneem?

₈U goddeloosheid raak net 'n mens soos u, en u geregtigheid 'n mensekind.

₉VANWEË die menigte van verdrukkinge skreeu hulle; hulle roep om hulp oor die geweld van die grotes.

₁₀Maar niemand sê nie: Waar is God, my Maker, wat lofsange gee in die nag,

₁₁wat ons meer leer as aan die diere van die aarde en ons wyser maak as die voëls van die hemel?

₁₂Dan roep hulle, maar Hy antwoord nie, vanweë die trotsheid van die kwaaddoeners.

₁₃Sekerlik, na nietige klagte luister God nie, en die Almagtige slaan daar geen ag op nie.

₁₄Hoeveel minder as u sê u sien Hom nie! Die regsaak is voor Hom: wag dan op Hom.

₁₅Maar nou, omdat sy toorn nie straf nie, en Hy nie grootliks ag gee op oormoed nie,

₁₆maak Job sy mond wyd oop in nietige gepraat, vermenigvuldig hy woorde sonder kennis.