Job 5

₁“Roep maar!

Sal daar iemand wees

wat jou antwoord?

Tot wie van die heiliges

sal jy jou wend?

₂Want ergernis lei tot die dood van 'n sot,

en naywer laat die onverstandige sterf.

₃Ek self het 'n sot sien wortel skiet,

maar skielik kon ek sy tuiste

in 'n vloek gebruik.

₄Sy kinders is ver van veiligheid;

hulle word vertrap

in die stadspoort,

en niemand kan hulle red nie.

₅Dit wat hy geoes het,

word deur hongeres verteer;

selfs uit die dorings

gaan haal hulle dit;

en dorstiges smag na hulle besittings.

₆Ja, onheil kom nie voort

uit die stof nie,

en teenspoed spruit nie

uit die grond nie;

₇maar die mens is vir teenspoed gebore,

soos vonke na bo vlieg.

₈“Ek, daarenteen,

sou God raadpleeg,

aan God

sou ek my saak voorlê,

₉aan Hom wat groot

en ondeurgrondelike dinge,

ontelbare wonders, doen –

₁₀Hy wat reën gee oor die aarde,

wat water uitstuur oor die oop veld,

₁₁om nederiges op die hoogte te plaas,

en hulle wat rou,

veilig te maak in die hoogte,

₁₂Hy wat die planne van listiges verydel,

sodat hulle hande niks suksesvol

uitrig nie,

₁₃Hy wat wyses met hulle

eie slinksheid vang,

sodat die planne van geslepenes

vinnig tot 'n einde kom.

₁₄Oordag stuit hulle op die donker;

teen die middag tas hulle rond

asof dit in die nag is.

₁₅Hy verlos 'n behoeftige

uit die mag van sterkes,

van die swaard in hulle monde.

₁₆So is daar vir armes hoop,

en ongeregtigheid hou die mond toe.

₁₇“Kyk, gelukkig is die mens

vir wie God teregwys;

die tugtiging van die Almagtige –

moet dit nie verwerp nie!

₁₈Want Hy is die een

wat pyn veroorsaak,

maar ook verbind,

Hy verbrysel,

maar sy hande genees ook.

₁₉Uit ses benoudhede sal Hy jou red,

in sewe sal boosheid jou nie aantas nie.

₂₀In hongersnood sal Hy jou loskoop

van die dood,

in 'n geveg, uit die mag van die swaard.

₂₁Wanneer die tong gesel,

word jy weggesteek;

jy hoef nie te vrees vir verwoesting

wanneer dit kom nie.

₂₂Vir verwoesting en honger

sal jy lag;

vir die wilde diere van die aarde

sal jy nie bang wees nie.

₂₃Want met die klippe van die veld

het jy 'n verbond;

die diere van die veld

handhaaf vrede met jou.

₂₄Jy sal dit beleef

dat jou tent veilig is;

en as jy voorraad neem op jou weiveld,

vermis jy niks.

₂₅Jy sal dit beleef

dat jou nageslag baie is;

jou nakomelinge sal wees

soos die plante van die aarde.

₂₆Jy sal in volle lewenskrag

na die graf gaan,

soos gerwe op hulle tyd

na die dorsvloer gaan.

₂₇Kyk, dit is wat ons ondersoek het;

so is dit.

Luister daarna!

Beleef dit self!”