Barug 4

₁Dit is die •boekrol

met die voorskrifte van God

en die Wet wat duur tot in ewigheid.

Almal wat aan haar vashou,

sal leef,

maar dié wat haar verlaat,

sal sterf.

₂Keer terug, Jakob,

en gryp haar aan;

reis verder na die helder glans

van haar lig.

₃Moenie jou verering

aan 'n ander gee

en wat vir jou voordelig is,

aan 'n vreemde nasie nie.

₄Gelukkig is ons, Israel,

omdat dit wat vir God aanneemlik is,

aan ons bekend is.

₅Skep moed, my volk,

wat die nagedagtenis

van Israel bewaar!

₆Julle is aan die heidennasies

verkoop –

nie om julle te vernietig nie,

maar omdat julle God vertoorn het,

is julle aan teenstanders oorgegee.

₇Want julle het julle Skepper uitgetart

deurdat julle aan demone,

en nie aan God nie, geoffer het.

₈Julle het Hom vergeet,

die Ewige God wat julle versorg het,

en julle het ook Jerusalem bedroef

wat julle grootgemaak het.

₉Want sy het die toorn gesien

wat van God oor julle gekom het

en sy het gesê:

“Luister, bure van Sion,

God het groot smart oor my gebring,

₁₀want ek het die gevangenskap

van my seuns en dogters gesien

wat die Ewige oor hulle gebring het.

₁₁Want met vreugde

het ek hulle grootgemaak,

maar met weeklag en rou

het ek hulle laat gaan.

₁₂Laat niemand oor my, die weduwee,

ek wat deur so baie verlaat is,

verheug wees nie.

Ek is verlate as gevolg van

my kinders se sondes,

omdat hulle van die wet

van God afgewyk het.

₁₃Hulle het sy voorskrifte nie erken nie,

op die weë van God se gebooie

het hulle ook nie geloop nie,

en hulle het ook nie die paaie

van dissipline betree nie.

₁₄Laat die bure van Sion kom –

dink aan die gevangenskap

van my seuns en my dogters

wat die Ewige oor hulle gebring het,

₁₅want Hy het 'n heidennasie

uit die verte oor hulle gebring –

'n nasie, skaamteloos

en met 'n ander taal,

wat 'n ou man nie eerbiedig nie

en ook met 'n kind nie medelye het nie.

₁₆Hulle het die weduwee

se geliefde seuns ontvoer,

en die eensame vrou

van haar dogters beroof.

₁₇“Maar ek, hoe kan ek julle help?

₁₈Want Hy wat die kwaad

oor julle gebring het,

Hy sal julle uit die hand

van julle vyande bevry.

₁₉Gaan weg, kinders, gaan weg,

want ek is verlate agtergelaat.

₂₀Ek het die lang stola van vrede

uitgetrek

en die roukleed van my smeekgebed

aangetrek.

Ek sal my lewe lank tot die Ewige roep.

₂₁Skep moed, kinders!

Roep tot God

en Hy sal julle uit oorheersing,

uit die hand van die vyande, bevry.

₂₂Want ek het my hoop gevestig

op die Ewige om julle te red;

toe het vreugde van die heilige Een

na my gekom,

vanweë sy ontferming

wat binnekort na julle sal kom

van julle ewige Redder.

₂₃Want ek het julle weggestuur

met rou en geweeklaag,

maar God sal julle weer

aan my teruggee –

met ewige vreugde en blydskap.

₂₄Want soos die bure van Sion

nou julle gevangenskap gesien het,

so sal hulle binnekort julle redding

deur God sien,

wat na julle sal kom van die Ewige

met groot heerlikheid en glans.

₂₅Kinders, verdra met geduld

die toorn wat van God af

oor julle gekom het.

Jou vyand het jou agtervolg,

maar jy sal binnekort

hulle vernietiging sien

en jy sal op hulle nek trap.

₂₆My brose kinders het

op ruwe paaie gereis;

hulle is weggevoer soos 'n kudde

deur vyande geroof.

₂₇Skep moed, kinders,

en roep tot God,

want Hy wat dit oor julle gebring het,

Hy sal weer aan julle dink.

₂₈Want soos die gedagte

by julle ontstaan het

om van God weg te dwaal,

so moet julle met tienvoudige ywer

terugkeer om Hom te soek.

₂₉Want die Een wat die kwaad

oor julle gebring het,

sal saam met julle redding

vir julle ewige vreugde bring.”

₃₀Skep moed, Jerusalem,

die Een wat jou jou naam

gegee het, sal jou vertroos.

₃₁Verdoem sal hulle wees

wat jou sleg behandel het

en wat hulle oor jou val

verheug het.

₃₂Verdoem sal die stede wees

wat jou kinders verkneg het;

verdoem sal sy wees

wat jou kinders ontvang het,

₃₃want soos sy oor jou val

bly geword het

en haar oor jou verwoesting

verheug het,

net so sal sy oor haar eie

verlatenheid treur.

₃₄Ek sal die gejubel

oor haar groot bevolking

van haar wegneem

en haar trots sal in smart verander.

₃₅Want vuur van die Ewige af

sal baie dae lank oor haar kom

en sy sal vir 'n baie lang tyd

deur demone bewoon word.

₃₆Kyk om jou heen, Jerusalem,

na die ooste,

en sien die vreugde wat van God af

na jou toe kom.

₃₇Kyk, jou kinders kom,

hulle wat jy weggestuur het.

Hulle kom, van die ooste tot die weste,

versamel deur die woord van die Heilige,

en verheug hulle in die heerlikheid

van God.