Genesis 2

₁God het die hemel en alles daarin klaar gemaak en ook die aarde en alles daarop. ₂Op die sewende dag was al die werk wat God gedoen het, klaar. Hy het op die sewende dag gerus, Hy het nie gewerk nie.

₃God het die sewende dag geseën. Hy het dit 'n gewyde dag gemaak, want op daardie dag het Hy gerus nadat Hy al sy werk klaar gedoen het.

₄Dit is hoe die hemel en die aarde begin het toe God dit gemaak het.

Toe die Here God die hemel en die aarde gemaak het, ₅was daar nog nie plante in die veld op die aarde nie. Daar het nog nie plante gegroei nie, want die Here God het nog nie reën op die aarde laat val nie. Daar was ook nog nie 'n mens wat in die grond kon werk nie.

₆Daar het water uit die aarde opgekom en die water het die grond natgemaak. ₇Toe het die Here God stof geneem uit die grond en Hy het van die stof 'n mens gemaak.

Die Here God het asem in die mens se neus geblaas, en die mens het begin lewe.

₈Die Here God het bome geplant in 'n tuin in Eden in die ooste. Hy het die mens wat Hy gemaak het, daar laat woon. ₉Die Here God het verskillende soorte bome uit die grond laat groei. Dit was mooi bome wat lekker vrugte gedra het. In die middel van die tuin was die boom wat lewe gee, en ook die boom wat vir mense die kennis kan gee sodat hulle sal weet wat goed is en wat sleg is. ₁₀Daar het 'n rivier uit Eden gekom om die tuin nat te maak. Die rivier het verdeel en dit het vier riviere geword. ₁₁Die naam van die een rivier was Pison. Hierdie rivier het om die hele Gawila-land gevloei. Daar was goud ₁₂en die goud was goed. Daar was ook balsem en oniks. ₁₃Die naam van die tweede rivier was Gihon. Dit het om die hele land Kus gevloei. ₁₄Die naam van die derde rivier was Tigris. Dit het oos van die land Assirië gevloei. Die naam van die vierde rivier was Eufraat. ₁₅Die Here God het die mens in die Eden-tuin laat woon om daarin te werk en dit op te pas.

₁₆Die Here God het vir die mens gesê: “Jy mag van al die vrugte in die tuin eet, ₁₇maar een boom se vrugte mag jy nie eet nie. Dit is die boom wat jou kan help om te weet wat goed is en wat sleg is. As jy van daardie vrugte eet, dan sal jy sterf. Dit is seker.”

₁₈Die Here God het gesê: “Dit is nie goed dat die mens alleen is nie. Ek sal vir hom 'n maat maak wat hom kan help.”

₁₉Die Here God neem toe grond en Hy maak al die diere op die land en al die voëls.

Toe bring Hy al die diere en die voëls na die mens toe. Die Here God wou weet watter name die mens vir die diere sou gee. So het die diere hulle name gekry. ₂₀Die mens het name gegee vir al die mak diere, die voëls en die wilde diere, maar vir homself kon hy nie 'n maat kry om hom te help nie.

₂₁Die Here God het toe die mens vas laat slaap. Hy het 'n rib uit die mens se bors gehaal, en Hy het die plek weer toegemaak waar Hy dit uitgehaal het. ₂₂Daarna het die Here God 'n vrou gemaak van die man se rib en Hy het haar na die mens toe gebring.

₂₃Die mens sê toe:

₂₄Daarom gaan 'n man weg van sy pa en ma en hy gaan woon by sy vrou, sodat hulle een kan word. ₂₅Die mens en sy vrou was kaal, maar hulle was nie skaam daaroor nie.