To The Word – Day 86

₁Theofilose yo a hlomphegago, batho ba bantši ba lekile go ngwala taodišo ya ditaba tše di diregilego mo go rena. ₂Ba ngwadile tše re di boditšwego ke ba ba di bonego ka mahlo go tloga mathomong a tšona. Ke bona babegi ba Taba ye Botse ya Modimo. ₃Le nna ge ke seno nyakišiša ditaba tše ka moka gabotse go tloga mathomong a tšona, ke bone go lebane gore ke go ngwalele tšona ka lenaneo le lebotse, ₄gore o tle o tsebe gore tše o di rutilwego ke nnete.

₅Mehleng ya ge Heroda e le kgoši ya naga ya Judea, go be go na le moprista yo mongwe yo leina la gagwe e bego e le Sakaria, e le wa kgoro ya boprista ya Abia. Mosadi wa gagwe e be e le Elisabetha, le yena e le wa leloko la boprista. ₆Bobedi bja bona ba be ba phela ka mokgwa wa go kgahla Modimo, ba phetha melao le ditaelo tšohle tša Morena gabotse. ₇Ba be ba se na bana ka ge Elisabetha e be e le moopa, le gona ka babedi ba be ba šetše ba tšofetše kudu.

₈Ka tšatši le lengwe Sakaria o be a dira modiro wa gagwe wa boprista ka Tempeleng, ka ge e be e le mayo a kgoro ya gabo. ₉Go ya ka setlwaedi sa baprista, o be a kgethilwe ka matengwa go yo thuntšha seorelo aletareng. Ka gona a ya ka Tempeleng ya Morena, ₁₀mola lešaba ka moka la batho le eme ka ntle le rapela ka nako ya ge go thuntšhwa seorelo.

₁₁Morongwa wa Morena a iponagatša go yena a eme ka letsogong la go ja la aletare ya seorelo. ₁₂Ya re ge Sakaria a mmona a tšhoga, a boifa. ₁₃Morongwa a re go yena: “Se boife, Sakaria, gobane Modimo o kwele thapelo ya gago. Mosadi wa gago, Elisabetha, o tla go belegela morwa, mme o mo thee leina la Johanese. ₁₄Go tswalwa ga gagwe go tla go thabiša wa hlalala, gwa thabiša le ba bantši, ₁₅gobane e tla ba yo mogolo pele ga Morena. A ka se tsoge a nwele beine le seno se bogale. O tla tlala Moya wo Mokgethwa go thoma ge a belegwa, ₁₆gomme a sokollela Baisraele ba bantši go Morena Modimo wa bona. ₁₇O tla eta Morena pele a sa boife, a le bogale bjalo ka moprofeta Eliya. O tla boelanya bana le botatagobana; ba ba sa theeletšego o tla ba bušetša tseleng ye e lokilego, gore a lokišetše Morena setšhaba sa gagwe.”

₁₈Sakaria a re go morongwa: “Ke tla tseba bjang ge o bolela nnete? Gape ke mokgalabje, mosadi wa ka le yena o tšofetše.”

₁₉Morongwa a mo fetola a re: “Ke nna Gabriele yo a dulago a emetše go hlankela Modimo. Ke romilwe go tlo bolela le wena, go go begela ditaba tše dibotse tše. ₂₀Fela ka ge o se wa dumela se ke go botšago sona, sona se se tlago phethega ka nako ya sona, o tla ba semumu, wa se kgone go bolela, gwa ba gwa fihla letšatši le seo ke go boditšego sona se tlago phethega.”

₂₁Ge e le lešaba lona le be le letetše Sakaria, mme le makaditšwe ke gore na o diegišitšwe ke eng ka Tempeleng. ₂₂Ge a etšwa o be a sa kgone go bolela, gomme bona ba lemoga gore o bone pono ka Tempeleng. Ka ge a be a mumufetše o ile a bolela le bona ka diatla.

₂₃Ge nako ya gagwe ya go dira modiro wa gagwe ka Tempeleng e fetile, a boela gae. ₂₄Ka morago ga lebakanyana Elisabetha, mosadi wa gagwe, a ima, mme a dula ka gae dikgwedi tše tlhano, a re: ₂₅“Se ke se ke se diretšwego ke Morena. Bjale ke gona a nkgopotšego, a mphumola go goboga bathong.”

₂₆Ka kgwedi ya boselela ya ge Elisabetha e le moimana, Modimo a roma morongwa Gabriele motseng wo mongwe wa Galilea wo o bego o bitšwa Nasaretha, ₂₇go kgarebe ye nngwe ye e bego e beeleditšwe ke monna yo mongwe wa moloko wa Dafida, yo leina la gagwe e bego e le Josefa. Leina la kgarebe yeo e be e le Maria. ₂₈Morongwa a ya go yena, a fihla a mo dumediša a re: “Dumela, wena mokgahlago Modimo! Morena o na le wena!”

₂₉Maria a tlabega kudu ge morongwa a realo, gomme a ipotšiša gore na tumedišo yeo e ka ba e ra go reng. ₃₀Morongwa a re go yena: “Se tšhoge, Maria, gobane o kgahlile Modimo. ₃₁O tla ima, wa tla wa belega morwa yo o swanetšego go mo rea leina la Jesu. ₃₂Yena e tla ba yo mogolo, o tla bitšwa Morwa wa Yogodimodimo. Morena Modimo o tla mmea kgoši ya Baisraele bjalo ka Dafida, rakgolokhukhu wa gagwe. ₃₃O tla buša ditlogolo tša Jakobo go ya go ile, gomme bogoši bja gagwe bo ka se fele.”

₃₄Maria a botšiša morongwa a re: “Go ka kgonega bjang ke se ka ka ka robala le monna?”

₃₅Morongwa a mo fetola a re: “Moya wo Mokgethwa o tla theogela go wena, gomme maatla a Yogodimodimo a tla go aparela. Ke ka lebaka leo yo o tlago mmelega a tlago bitšwa yo mokgethwa, a bitšwa Morwa wa Modimo. ₃₆Le Elisabetha, moloko weno, o imile morwa botšofading bja gagwe, gomme yena a tsebjago e le moopa o šetše a na le kgwedi tše di selelago e le moimana. ₃₇Gobane ga go se se ka palelago Modimo.”

₃₈Maria a re: “Ke nna mohlanka wa Morena; tše o di boletšego a di ntiregele.” Ke moka morongwa a mo tlogela.

₃₉Yona nakong yeo Maria a re go itokiša a itlhaganela a ya motseng wo mongwe nageng ya dithaba ya Judea. ₄₀A fihla a tsena ka ga Sakaria, a dumediša Elisabetha. ₄₁Ya re ge Elisabetha a ekwa Maria a mo dumediša, ngwana yo a mo imilego a itšhikinya. Elisabetha a tlala Moya wo Mokgethwa. ₄₂A goeletša a re: “O šegofaditšwe go feta basadi ka moka, le ngwana yo o tlago mmelega o šegofaditšwe. ₄₃Go tla bjang gore mmagoMorena wa ka a nketele? ₄₄Gobane ke rile ge ke ekwa o ntumediša, ngwana yo ke mo imilego yo a itšhikinya ka lethabo. ₄₅Go lehlogonolo wena o dumetšego gore tše Morena a go boditšego tšona di tla phethega.”

₄₆Maria a re:

₅₆Maria a dula moo ga Elisabetha dikgwedi tše e ka bago tše tharo, a kgona a boela gae.

₅₇Lebaka la Elisabetha la go belega la fihla, mme yena a belega ngwana wa mošemane. ₅₈Baagišani le meloko yabo ge ba ekwa gore Morena o mo gaugetše kudu o mo file ngwana, ba thaba le yena.

₅₉Ka letšatši la seswai la ge ngwana a tswetšwe ba tla go mmolotša; ba be ba nyaka go mo rea leina la Sakaria, tatagwe. ₆₀Eupša mmagwe a gana a re: “Aowa! Leina la gagwe e swanetše go ba Johanese.”

₆₁Bona ba re go yena: “Ga ke re mo melokong ya geno ga go na motho yo a nago le leina leo?” ₆₂Ba bolela le Sakaria ka diatla ba mmotšiša gore na leina la ngwana e swanetše go ba lefe.

₆₃Yena a kgopela gore ba mo tlišetše letlapa, mme a ngwala mo godimo ga lona a re: “Leina la gagwe ke Johanese.” Ba tlabega ka moka. ₆₄Ka yona nako yeo Sakaria a rarologa leleme a kgona go bolela gape, a reta Modimo. ₆₅Baagišani ba gagwe bohle ba welwa ke poifo; nageng ka moka ya dithaba ya Judea gwa bolelwa ditaba tše ka moka. ₆₆Bohle ba ba di kwago ba di nagana, ba ipotšiša ba re: “Na ngwana yo e tla ba eng?” Gobane go be go bonagala gabotse gore o thekgilwe ke maatla a Modimo.

₆₇Sakaria, tatagoJohanese, a tlala Moya wo Mokgethwa, mme a porofeta a re:

₈₀Ngwana yoo o ile a gola, a fela a tia le tlhaologanyong, a dula lešokeng gwa ba gwa fihla letšatši le a ilego a iponatša phatlalatša go setšhaba sa Israele.

₁Mehleng yeo Kesare Agostose a laela gore batho ka moka ba mmušo wa Roma ba balwe. ₂Ge batho ba balwa lekga le la mathomo, mmušiši wa Siria e be e le Kwiriniose. ₃Batho ka moka ba ile ba ya go ingwadiša, mongwe le mongwe a ya motseng wa gabo.

₄Josefa le yena a tloga motseng wa Nasaretha kua Galilea a ya Betlelehema, mo go tswaletšwego Kgoši Dafida, seleteng sa Judea. Josefa o ile gona ka ge e be e le wa leloko la Dafida. ₅A ya a ingwadiša le Maria yo a bego a mmeeleditše, yo e bego e le moimana. ₆Ya re ge ba le moo Betlelehema nako ya gore Maria a belege ya fihla. ₇A belega morwa wa leitšibolo, a mo phuthela ka mašela, gomme a mo robatša ka legopong, ka gobane go be go se na sekgoba ka ntlong ya baeti.

₈Gona seleteng seo go be go na le badiši ba ba bego ba letše merakeng ba letile mehlape ya bona ya dinku. ₉Morongwa wa Morena a iponagatša go bona, gomme letago la Morena la taga go ba dikologa. Ba tšhoga kudu, ₁₀eupša morongwa yoo a re go bona: “Le se ke la tšhoga! Ke tlile go le botša taba ye botse ye e tlago thabiša setšhaba ka moka kudu. ₁₁Lehono kua motseng wa Dafida le tswaletšwe Mophološi yo e lego Kriste Morena. ₁₂Gomme se le tlago mmona ka sona sese: Le tla hwetša lesea le phuthetšwe ka mašela le letše ka legopong.”

₁₃Ya re a sa tšo realo gwa tšwelela lešaba le legolo la madira a barongwa ba legodimo le ema le yena le tumiša Modimo le re:

₁₅E rile ge barongwa bao ba tloga ba boela legodimong, badiši bale ba šala ba botšana ba re: “A re yeng Betlelehema re yo bona taba ye e diregilego ye Morena a re boditšego yona.”

₁₆Ba napa ba itlhaganela ba ya, ba hwetša Maria le Josefa le lona lesea le robetše ka legopong. ₁₇Ya re ge ba mmone ba yo anega tše morongwa a ba boditšego tšona mabapi le ngwana yoo. ₁₈Bohle ba ba di kwago ba tlabja ke tše ba di botšwago ke badiši. ₁₉Maria yena ditaba tše ka moka a di lota ka pelong mme a di nagantšhiša. ₂₀Badiši bale ba boela morago ba reta Modimo ba bile ba mo tumiša ka lebaka la tšohle tše ba bego ba di kwele ba bile ba di bone. Gape go be go le ka wona mokgwa wola morongwa a bego a ba boditše.

₂₁E rile ge go fetile matšatši a seswai, mola e le nako ya gore ngwana a bolotšwe, a thewa leina la Jesu, lona leina lela a bego a ile a le thewa ke morongwa a sešo a ingwa ke mmagwe.

₂₂Ge nako ya go hlwekišwa ga bona go ya ka molao wa Moshe e fetile, batswadi ba ngwana ba mo iša Jerusalema go yo mo neela Morena. ₂₃Gape go ngwadilwe ka molaong wa Morena gwa thwe: “Leitšibolo le lengwe le le lengwe le letona le neelwe Morena.” ₂₄Ba ile ba yo dira le sehlabelo ka mekuru ye mebedi goba maeba a mabedi, go ya ka moo go laetšwego ka molaong wa Morena.

₂₅Yona mehleng yeo moo Jerusalema go be go na le monna yo mongwe ba re ke Simeone. E be e le monna wa go loka, wa morapedi, mme a letetše go phološwa ga Baisraele. Moya wo Mokgethwa o be o na le yena, ₂₆ebile o mo utolletše gore a ka se hwe a se a bona Mesia yo a tshepišitšwego ke Morena. ₂₇Simeone yo a išwa ke Moya Tempeleng. Ya re ge batswadi ba ngwana Jesu ba mo tliša gona Tempeleng go mo phethela se se nyakwago ke molao, ₂₈Simeone a mo kuka ka matsogo, a reta Modimo a re:

₃₃Tatagwe le mmagwe ba tlabja ke tše Simeone a di bolelago ka yena. ₃₄Simeone a ba šegofatša, gomme a re go Maria, mmagongwana: “Tseba gore ngwana yo o beetšwe go fedišwa ga ba bantši le go phološwa ga ba bantši mo go Baisraele. E tla ba yena sešupo sa go tšwa go Modimo se se tlago ganetšwa ke batho ba bantši, ₃₅ya ba gona go utologa ga dikgopolo tša bona. Ge e le wena, mahloko a tla go hlaba pelo bjalo ka tšhoša.”

₃₆Gona moo go be go na le moprofeta wa mohlologadi, e le mokgekolokgekolo. Leina la gagwe e be e le Anna, morwedi wa Fanuele, wa kgoro ya Asere. O be a rile go nyalwa e sa le kgarebe, a dula le monna wa gagwe mengwaga ye e šupago. ₃₇Bjale o be a na le mengwaga ye masome a seswai le metšo ye mene. O be a sa tloge Tempeleng, bošego le mosegare a khunamela Modimo, a ikona dijo, a rapela. ₃₈Ka yona nako yeo le yena a fihla a reta Modimo, gomme bohle ba ba bego ba letetše gore Modimo a lokolle Jerusalema a bolela le bona ka ngwana yoo.

₃₉E rile ge Maria le Josefa ba phethile tšohle go ya ka molao wa Morena, ba boela Galilea, motseng wa gabobona wa Nasaretha. ₄₀Ngwana yena a gola mme a tia; o be a kwešiša gabotse se se nyakwago ke Modimo, a bile a šegofaditšwe ke yena.

₄₁Ngwaga wo mongwe le wo mongwe batswadi ba Jesu ba be ba eya Jerusalema Monyanyeng wa Paseka. ₄₂Ge Jesu a na le mengwaga ye lesome le ye mebedi, ba ya monyanyeng bjalo ka mengwageng. ₄₃Ya re ge monyanya o fetile ba boela gae, eupša mošemane Jesu a šala Jerusalema. Batswadi ba gagwe ba be ba sa tsebe. ₄₄Ba be ba gopola gore o mo sehlopheng sa gabobona, ka gona ba hlwa ba sepela leeto la letšatši, ya ba gona ba thomago go mo nyaka melokong le bagwereng ba bona. ₄₅Ba se mo hwetše; ka gona ba gomela Jerusalema ba mo nyaka. ₄₆E rile ka letšatši la boraro ba mo hwetša Tempeleng, a dutše le dirutegi tša Bajuda, a di theeleditše a bile a di botšiša dipotšišo. ₄₇Bohle ba ba mo kwago ba be ba tlabilwe ke kwešišo ya gagwe le diphetolo. ₄₈Batswadi ba gagwe ge ba mmona ba makala, gomme mmagwe a mmotšiša a re: “Ngwanaka, o re diretšeng ka mokgwa wo? Gape nna le tatago re be re go nyaka re tshwenyegile.”

₄₉Yena a mo fetola a re: “Le be le nnyakelang? Kgane le be le sa tsebe gore ke swanetše go ba mo ntlong ya Tate?” ₅₀Fela bona ba se kwešiše phetolo yeo ya gagwe.

₅₁Ke moka a gomela le bona Nasaretha, a dula a ba theeletša. Mmagwe yena ditaba tše ka moka a di lota ka pelong. ₅₂Jesu a gola, a hlalefa le go feta, a kgahla Modimo le batho.

₁Ka ngwaga wa lesome le metšo ye mehlano wa ge Tiberiose e le Kesare, Pontiose Pilato e le mmušiši wa Judea, Heroda e le mmuši wa Galilea, Filipi, ngwanabo, e le mmuši wa selete sa Iturea le sa Tragonitise, Lisaniase e le mmuši wa Abilene, ₂gomme Hanase le Khayafase e le Baprista ba Bagologolo, Modimo a laela Johanese, morwa wa Sakaria, a le lešokeng gore a yo begela batho molaetša wa gagwe. ₃Ka gona a sepela le selete sohle go bapa le noka ya Jordane, a botša batho gore ba sokologe dibeng tša bona mme ba kolobetšwe, gomme Modimo o tla ba swarela tšona. ₄Gwa phethega se se ngwadilwego ka pukung ya Jesaya ge a re:

₇Mašaba a batho a be a etla go Johanese gore a ba kolobetše. Yena a re go bona: “Dinoga tenang, ke mang yo a le boditšego gore le ka phepha kotlo ye Modimo a lego kgauswi le go otla bakgopo ka yona? ₈Go kaone le dire tše di tlago bontšha gore le sokologile. Le se ke la forana la re le ka phepha kotlo ka lebaka la ge Abrahama e le rakgolokhukhu wa lena. Gobane ke le botša gore Modimo a ka fetoša maswika a gore e be ditlogolo tša Abrahama! ₉Selepe se šetše se loketše go rema dihlare medung; sehlare se sengwe le se sengwe se se sa enywego dikenywa tše dibotse se tla rengwa sa lahlelwa mollong.”

₁₀Batho ba mmotšiša ba re: “Bjale re direng?”

₁₁Yena a ba fetola a re: “Yo a nago le diaparo tše pedi, se sengwe a se fe yo a se nago le sona; yo a nago le dijo le yena a ngwathele yo a di hlokago.”

₁₂Balekgetho ba bangwe ba tla go kolobetšwa, gomme ba mmotšiša ba re: “Moruti, rena re direng?”

₁₃Yena a ba fetola a re: “Le se ke la ntšhiša batho go feta ka mo le laetšwego ka gona.”

₁₄Bahlabani ba bangwe le bona ba mmotšiša ba re: “Rena ge, re direng?”

Yena a ba fetola a re: “Le se ke la tšeela motho tšhelete ka kgang goba ka go mo tšhošetša la re le tla mo phara ka maaka. Le kgotsofale ka se le lefšago ka sona.”

₁₅Batho ba ile ba thoma go beega dipelo, mme bohle ba nagana gore mohlomong Johanese yo ke yena Mesia. ₁₆Ka gona Johanese a ba botša bohle a re: “Nna ke le kolobetša ka meetse, eupša go tla yo mongwe yo a mphetago ka maatla, yo ke sego ka swanela le go mmofolla marala a dieta. Yena o tla le kolobetša ka Moya wo Mokgethwa le ka mollo. ₁₇O swere leselo ka seatla, gomme o tla fefera mabele gabotse. O tla a tšhela ka letlolong la gagwe, mooko wona a o tšhuma ka mollo wo o sa timego.”

₁₈Johanese o be a begela batho Taba ye Botse ya Modimo a bile a ba kgothatša le ka mekgwa ye mentši. ₁₉O kile a kgala Heroda, mmuši, ka ge a be a tšere Herodiase, mosadi wa ngwanabo, a bile a dirile le tše dingwe tše mpe tše dintši. ₂₀Heroda a senya le go feta ka go lahlela Johanese ka kgolegong.

₂₁Mohla batho ka moka ba ba bego ba le moo ba kolobetšwa, Jesu le yena o ile a kolobetšwa. Ya re a sa rapela, legodimo la bulega, ₂₂gomme Moya wo Mokgethwa wa theogela godimo ga gagwe o le ka sebopego sa leeba. Gwa kwagala lentšu le etšwa legodimong le re: “O Morwa wa ka yo ke mo ratago. O nkgahla kudu!”

₂₃Jesu ge a thoma modiro wa gagwe o be a na le mengwaga ye e ka bago ye masome a mararo. Batho ba be ba re ke morwa wa Josefa, Josefa morwa wa Eli, ₂₄Eli morwa wa Matate, Matate morwa wa Lefi, Lefi morwa wa Melgi, Melgi morwa wa Janai, Janai morwa wa Josefa, ₂₅Josefa morwa wa Matatiase, Matatiase morwa wa Amose, Amose morwa wa Nahume, Nahume morwa wa Hesli, Hesli morwa wa Nagai, ₂₆Nagai morwa wa Mahate, Mahate morwa wa Matatiase, Matatiase morwa wa Shimi, Shimi morwa wa Josege, Josege morwa wa Joda, ₂₇Joda morwa wa Johanane, Johanane morwa wa Resa, Resa morwa wa Serubabele, Serubabele morwa wa Sealtiele, Sealtiele morwa wa Neri, ₂₈Neri morwa wa Melgi, Melgi morwa wa Adi, Adi morwa wa Kosamo, Kosamo morwa wa Elmadamo, Elmadamo morwa wa Ere, ₂₉Ere morwa wa Joshua, Joshua morwa wa Eliesere, Eliesere morwa wa Jorime, Jorime morwa wa Matate, Matate morwa wa Lefi, ₃₀Lefi morwa wa Simeone, Simeone morwa wa Juda, Juda morwa wa Josefa, Josefa morwa wa Jonamo, Jonamo morwa wa Eliakime, ₃₁Eliakime morwa wa Melea, Melea morwa wa Mena, Mena morwa wa Matata, Matata morwa wa Nathane, Nathane morwa wa Dafida, ₃₂Dafida morwa wa Isai, Isai morwa wa Obede, Obede morwa wa Boase, Boase morwa wa Salmone, Salmone morwa wa Nagshone, ₃₃Nagshone morwa wa Aminadaba, Aminadaba morwa wa Admine, Admine morwa wa Arni, Arni morwa wa Hetserone, Hetserone morwa wa Peretse, Peretse morwa wa Juda, ₃₄Juda morwa wa Jakobo, Jakobo morwa wa Isaka, Isaka morwa wa Abrahama, Abrahama morwa wa Terage, Terage morwa wa Nahoro, ₃₅Nahoro morwa wa Seruge, Seruge morwa wa Regu, Regu morwa wa Pelege, Pelege morwa wa Ebere, Ebere morwa wa Shelage, ₃₆Shelage morwa wa Kenane, Kenane morwa wa Arpakshade, Arpakshade morwa wa Seme, Seme morwa wa Noa, Noa morwa wa Lamege, ₃₇Lamege morwa wa Metushelage, Metushelage morwa wa Enoko, Enoko morwa wa Jerede, Jerede morwa wa Mahalalele, Mahalalele morwa wa Kenane, ₃₈Kenane morwa wa Enose, Enose morwa wa Sete, Sete morwa wa Adamo, Adamo morwa wa Modimo.

₁Jesu a tloga nokeng ya Jordane a tletše Moya wo Mokgethwa gomme a išwa ke wona lešokeng, ₂moo a fihlilego a lekwa ke Diabolose matšatši a masome a mane. Nakong yeo ka moka o be a sa je selo, ka gona ya re ge e feta ya ba o swerwe ke tlala.

₃Diabolose a re go yena: “Ge o le Morwa wa Modimo, laela leswika le gore le fetoge bogobe.”

₄Jesu a mo fetola a re: “Mangwalo a Makgethwa a re motho ga a phele ka bogobe fela.”

₅Ke moka Diabolose a mo iša thabeng, gomme ka go gadima fela a mmontšha dinaga ka moka tša lefase, ₆a re go yena: “Mahumo a dinaga tše ka moka le maatla a go laola ke tla go fa ona, ka gobane a filwe nna, gomme nka no a fa yo ke ratago go mo fa ona. ₇Bjale ge, ge o ka nkhunamela, dilo tše ka moka ga tšona e tla ba tša gago.”

₈Jesu a mo fetola a re: “Mangwalo a Makgethwa a re o khunamele Morena Modimo wa gago, o direle yena a nnoši.”

₉Diabolose a mo iša Jerusalema, a fihla a mo nametša ntlhohlong ya Tempele, a re go yena: “Ge o le Morwa wa Modimo ikwišetše fase o le fa, ₁₀gobane Mangwalo a Makgethwa a re: ‘Modimo o tla laela barongwa ba gagwe gore ba go hlokomele.’ ₁₁A ba a re: ‘Ba tla go kuka gore o se thetšwe ke maswika.’ ”

₁₂Jesu a mo fetola a re: “Mangwalo a Makgethwa a re: ‘O se ke wa leka Morena Modimo wa gago.’ ”

₁₃Ge Diabolose a seno leka Jesu ka tšeo ka moka, a mo tlogela lebakanyana.

₁₄Go tloga moo Jesu a boela Galilea a na le maatla a Moya wo Mokgethwa. Setumo sa gagwe sa phatlalala le selete seo ka moka. ₁₅A ruta ka disinagogeng gomme a retwa ke bohle.

₁₆Jesu a boela Nasaretha moo a bego a goletše gona, gomme ka letšatši la Sabatha a ya sinagogeng bjalo ka ge a be a tlwaetše. A ema gore a bale Mangwalo a Makgethwa. ₁₇A newa puku ya moprofeta Jesaya. A e phutholla ka mo go ngwadilwego go re:

₂₀Ke moka Jesu ge a seno phutha puku yeo, a e bušetša go mohlanka mme a dula fase. Batho ka moka ka sinagogeng ba mo tomolela mahlo. ₂₁Ge a thoma go ba hlalošetša temana yeo a re: “Lehono temana ye ya Mangwalo a Makgethwa ye le sa tšogo e kwa e phethagetše.”

₂₂A ba kgahla ka moka mme ba kgotsa ka mo a kgonago polelo ka gona. Ba re: “Na ga ke re ke yena morwa wa Josefa?”

₂₃Yena a re go bona: “Ke a tseba gore le tla ntlhaba ka seema se se rego ‘Moreku, ithekole.’ Le tla mpotša le gore le mono motseng wa gešo ke dire tše le kwelego go thwe ke di dirile kua Kapernaume.” ₂₄A ba a re: “Ruri, ke le botša gore moprofeta ga a ke a thabelwa motseng wa gabo.

₂₅“Ke le botša nnete ge ke re mehleng yela ya Eliya go be go na le bahlologadi ba bantši mo gare ga Baisraele, mola pula e tšere mengwaga ye meraro le seripa e sa ne, mme go wele tlala ye kgolo nageng ka moka. ₂₆Fela Eliya a se ke a rongwa le go o tee wa bona, ge e se go mohlologadi yo a bego a dula Tsarepate kua seleteng sa Sidone. ₂₇Le mehleng ya moprofeta Elisha go be go na le batho ba bantši ba ba bego ba bolawa ke bolwetši bja letlalo bja go ba tšhilafatša mo go Baisraele, fela ga go le o tee wa bona yo a kilego a fodišwa, ka ntle le Naamane yola wa Mosiria.”

₂₈Ge batho ba ba lego ka sinagogeng ba ekwa a realo, ba galefa. ₂₉Ba emelela, ba mo ntšhetša ka ntle ga motse, ba mo iša legageng la thaba yeo motse wa bona o bego o agilwe godimo ga yona, e le gore ba tle ba mo kgoromeletše fase, ₃₀eupša yena a ba ngaya a itlogela.

₃₁Ke moka Jesu a ya Kapernaume, motse wo o lego Galilea, a fihla a ruta batho ka matšatši a Sabatha. ₃₂Bohle ba be ba makatšwa ke mokgwa wo a bego a ruta ka wona, gobane o be a bolela e le yo a nago le maatla a go ba ruta. ₃₃Ka moo sinagogeng go be go na le motho yo a tsenwego ke modemone, e lego moya wo mobe. A goeletša kudu a re: ₃₄“Ao! O nyakang mo go rena, wena Jesu wa Nasaretha? A o tlile go re fediša? Nna ke a go tseba – o Mokgethwa wa Modimo!”

₃₅Jesu a laela modemone yoo a re: “Homola, o tšwe go motho yo!” Modemone wa lahlela motho yola fase gare ga bona, wa napa wa tšwa go yena o se wa mo dira selo.

₃₆Batho ka moka ba tlabega mme ba botšišana ba re: “Ke maatla mang a a lego polelong ya motho yo? Gape o laela meoya ye mebe ka maatla le ka šiši gore e tšwe, gomme e tšwe!” ₃₇Setumo sa gagwe se ile sa phatlalala gohle seleteng seo.

₃₈Jesu a tloga moo sinagogeng a ya ga Simone. Mmatswale wa Simone o be a lwala kudu a bolawa ke letadi, gomme Jesu a kgopelwa gore a mo thuše. ₃₉A ema ka dihlogong tša malao a gagwe, gomme a laela letadi gore le mo tlogele. Letadi la mo tlogela ka bjako, gomme a tsoga, a ba fa dijo.

₄₀Ge letšatši le dikela bohle ba ba nago le balwetši ba mehutahuta ba ba tliša go Jesu; yena a bea yo mongwe le yo mongwe wa bona diatla, a ba fodiša. ₄₁Le bademone ba tšwa go batho ba bantši ba goeletša ba re: “Wena o Morwa wa Modimo!”

Jesu a ba kgalema a ba ganetša go bolela, ka gore ba be ba tseba gore ke yena Mesia.

₄₂Ge go esa Jesu a tloga motseng a ya felo mo go se nago motho. Batho ba thoma go mo nyaka, gomme ya re ge ba mo hweditše ba leka go mo thibela gore a se tloge. ₄₃Eupša a re go bona: “Le metse ye mengwe ke swanetše go e ruta Taba ye Botse ya mmušo wa Modimo, ka gobane ke sona se Modimo a nthomilego gore ke se dire.”

₄₄A tšwela pele le go ruta batho ka disinagogeng tša naga ka moka ya Bajuda.

₁Ka tšatši le lengwe e rile ge Jesu a eme lebopong la letsha la Genesarete, lešaba la mo pitlaganya, le rata go kwa lentšu la Modimo. ₂A bona maselawatle a mabedi a eme lebopong; barei ba dihlapi ba be ba a tlogetše moo ba hlatswa malokwa a bona. ₃Jesu a tsena ka go le lengwe la ona, e le la Simone, gomme a mo kgopela gore a le šuthišetše lebopong go se nene. A dula ka gare ga lona a ruta lešaba leo.

₄Ge a feditše go ba ruta, a re go Simone: “Šuthišetša leselawatle le garenyana kua go išago gomme le theošetše malokwa a lena le sware dihlapi.”

₅Simone a mo fetola a re: “Mong wa ka, re letše re katana bošego ka moka, fela ra se sware selo. Eupša ge o realo, ke tla no theošetša malokwa.” ₆Ba ile ba a theošetša gomme ba swara dihlapi tše dintšintši, malokwa a ba a nyaka go gagoga. ₇Ba kgwathetša bagwera ba bona ba ka leselawatleng lela le lengwe gore ba tle ba ba thuše. Ba tla ba tlatša maselawatle ale ka mabedi a ba a nyaka go sobela. ₈Ge Simone Petrose a bona se se diregilego a itahlela fase pele ga Jesu, a re: “Morena, tloga mo go nna, ka gobane ke nna monna wa modiradibe!”

₉Gape yena le bohle ba ba bego ba na le yena ba be ba tlabilwe ke bontši bja dihlapi tše ba bego ba di swere. ₁₀Le bagwera ba Simone, e lego Jakobose le Johanese, barwa ba Sebediose, ba be ba tlabegile. Jesu a re go Simone: “O se tšhoge, go tloga bjale o tla ba morei wa batho.”

₁₁Ba bušetša maselawatle ale lebopong, ba tlogela tšohle, ba latela Jesu.

₁₂Ka tšatši le lengwe Jesu o be a le motseng wo mongwe moo go bego go na le monna yo a bolawago ke bolwetši bja letlalo bja go mo tšhilafatša. Ya re ge a bona Jesu, a itahlela fase ka sefahlego, a mo kgopela a re: “Morena, etse ge o rata o ka mphodiša ka hlweka.”

₁₃Jesu a otlolla letsogo a mo kgwatha a re: “Ke a rata; hlweka!” Gateetee a fola. ₁₄Jesu a mo laya a re: “O se ke wa botša motho, eupša eya go moprista a go bone, gomme o dire sehlabelo ka mo go laetšego Moshe, gore e be bohlatse go batho ka moka bja gore o hlwekile.”

₁₅Setumo sa Jesu sa phatlalala le go feta, gomme mašabašaba a batho a tla a mmokanela go mo kwa, yena a fodiša ba ba lwalago gare ga bona. ₁₆O be a tlwaetše go ngwegela mašokeng, a ye go rapela.

₁₇Ka tšatši le lengwe Jesu o be a ruta batho. Bafarisei ba bangwe le boramangwalo ba ba bego ba etšwa metseng ka moka ya Galilea le Judea ešita le kua Jerusalema le bona ba be ba dutše fase moo. Maatla a Morena a be a le mo go Jesu gore a fodiše balwetši. ₁₈Gwa tla banna ba bangwe ba kukile monna wa go repha ditho ka leako, ba leka go mo tsenya ka ntlong gore ba mmee pele ga Jesu. ₁₉Fela ka lebaka la bontši bja batho ba palelwa ke go mo tsenya. Ka gona ba namela tlhakeng, ba phula lešoba gona, gomme ba mo theošetša ka gare ka leako, a ba mo pele ga Jesu gare ga batho ba ba bego ba le ka moo. ₂₀Jesu ge a bona ka mo ba nago le tumelo ka gona, a re go monna yoo: “Motho wa batho, o swaretšwe dibe tša gago.”

₂₁Boramangwalo le Bafarisei ba botšišana ba re: “Motho yo o itira mang ge a nyefola Modimo ka mokgwa wo? Ke mang yo a ka swarelago batho dibe ntle le Modimo?”

₂₂Jesu, ge a lemoga tše ba di naganago, a re go bona: “Le reng le nagana ka mokgwa wo? ₂₃Se bonolo ke sefe, go re: ‘O swaretšwe dibe tša gago,’ goba go re: ‘Emelela, o sepele’? ₂₄Bjale ge, ke nyaka go le bontšha gore Morwamotho o na le maatla a go swarela batho dibe mo lefaseng.” Ya ba o re go morephaditho: “Ke a go botša ke re: Emelela, o rwale leako la gago, o ikele gae!”

₂₅Monna yoo a emelela ka ntle le go dikadika bohle ba mmona, a tšea leako le a bego a robetše go lona, a ya gae a reta Modimo. ₂₆Bohle ba tlabega, ba reta Modimo ba tšhogile e le ruri ba re: “Jo, tše re di bonego lehono di a tlaba!”

₂₇Ka morago Jesu ge a tloga moo a bona molekgetho yo leina la gagwe e bego e le Lefi a dutše ngwakong wa lekgetho. A re go yena: “Ntatele!” ₂₈Lefi a emelela, a tlogela tšohle, a mo latela.

₂₉Ka morago a direla Jesu monyanya wo mogolo ka ga gagwe, gomme gare ga bao ba bego ba tlile dijong go be go na le balekgetho ba bantši le batho ba bangwe. ₃₀Bafarisei le boramangwalo ba bangwe bao le bona e bego e le Bafarisei ba ngongoregela barutiwa ba Jesu ba re: “Le reng le eja le balekgetho le bile le enwa le bona le badiradibe ba bangwe?”

₃₁Jesu a ba fetola a re: “Ngaka ga e nyakwe ke batho ba ba iketlilego, e nyakwa ke ba ba lwalago. ₃₂Nna ga se ka tlela go botša baloki gore ba sokologe, ke tletše go botša badiradibe.”

₃₃Batho ba bangwe ba kile ba re go Jesu: “Barutiwa ba Johanese Mokolobetši ba ikona dijo gantši ba rapela, barutiwa ba Bafarisei le bona ba dira bjalo, eupša ba gago bona ba a ja, ba a nwa.”

₃₄Jesu a ba fetola a re: “Kgane baeng ba ba tlilego monyanyeng wa lenyalo le ka kgona go ba gapeletša go ikona dijo monyadi a sa na le bona? ₃₅Fela nako e tla tla yeo ka yona monyadi a tlago tlošwa go bona, ya ba gona ba ikonago.”

₃₆Jesu a ba botša le ka seswantšho a re: “Ga go motho yo a segago segaswa seaparong se sefsa go se phara go sa kgale. Ge a ka dira bjalo o tla be a kgeitše seaparo seo se sefsa, gomme segaswa seo sa go tšwa seaparong se sefsa se ka rona sa kgale. ₃₇Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane e ka a paleša, beine ya tšhologa, le ona makuka a loba. ₃₈Beine ye e sa tšogo hlotlwa yona e tšhelwa ka makukeng a mafsa. ₃₉Le gona ga go motho yo a nyakago beine ye e sa tšogo hlotlwa a šetše a nwele ye e hlotlilwego kgale. O re: ‘Ye e hlotlilwego kgale e phala ye e sa tšogo hlotlwa.’ ”

₁Ka tšatši le lengwe la Sabatha Jesu o be a putla ka mašemong a korong. Barutiwa ba gagwe ba tšama ba ekga diako ba di fogohlela ka diatleng, ba eja dithoro. ₂Bafarisei ba bangwe ba ba botšiša ba re: “Le reng le dira se se sego sa dumelelwa ka letšatši la Sabatha?”

₃Jesu a ba fetola a re: “Na ga se la bala se Dafida a kilego a se dira mohla wola yena le banna ba ba bego ba na le yena ba swerwe ke tlala – ₄ka mo a ilego a tsena ka ngwakong wa Modimo, a tšea dinkgwa tše di bego di abetšwe Modimo, a di ja, a di ngwathela le bao ba bego ba na le yena? Etse bona ba be ba se ba dumelelwa go di ja; go be go dumeletšwe baprista fela.”

₅A fetša ka go re: “Morwamotho o na le tokelo ya go laetša ge eba melao ya Sabatha e swanetše go phethwa.”

₆Ka le lengwe letšatši la Sabatha Jesu a tsena ka sinagogeng a ruta batho. Go be go na le monna wa go repha letsogo la go ja. ₇Boramangwalo le Bafarisei ba be ba beile Jesu leihlo gore ba bone ge a ka mo fodiša ka letšatši la Sabatha, gore ba tle ba mmee molato. ₈Fela Jesu o be a tseba tše di lego ka dipelong tša bona, gomme a re go morephaletsogo: “Etla o eme mono pele.” Monna yoo a emelela a ya go ema ka pele. ₉Ke moka Jesu a re go bona: “Ke a le botšiša ke re ke eng se se dumeletšwego ka tšatši la Sabatha, ke se sebotse goba ke se sebe, ke go phološa motho goba ke go mmolaya?” ₁₀A ba gadima bohle, a napa a re go morephaletsogo: “Otlolla letsogo la gago!” A le otlolla, gomme la fola, la swana le lela le lengwe.

₁₁Bona ba galefa mme ba rerišana ka se ba ka se dirago Jesu.

₁₂Matšatšing ona ao Jesu a rotogela thabeng go yo rapela. A lala a rapela Modimo moo bošego ka moka. ₁₃Ge go esa a bitša barutiwa ba gagwe ba tla go yena, gomme a kgetha ba lesome le ba babedi mo go bona a ba bitša baapostola. ₁₄Ke Simone, yo a mo theilego Petrose, le Andrease, ngwanabo, le Jakobose le Johanese, le Filipi le Bartolomeose, ₁₅le Mateu le Thomase, le Jakobose, morwa wa Alfeose, le Simone, yo a bego a bitšwa Mollelatokologo, ₁₆le Judase, morwa wa Jakobose, le Judase Iskariote, yo a ilego a tla a mo eka.

₁₇Ge Jesu a seno theoga thabeng le baapostola ba gagwe, o ile a ema mo e lego lebala a na le barutiwa ba gagwe ba bantši. Lešaba le lentši la batho ba go tšwa gohle nageng ya Judea le Jerusalema le seleteng sa lebopong la lewatle, mo go lego Tirose le Sidone, la tla go yena. ₁₈Ba be ba tlile go mo kwa le go fodišwa malwetši a bona. Bao ba bego ba tshwenywa ke meoya ye mebe le bona ba ile ba fodišwa. ₁₉Batho ka moka ba be ba leka go mo kgwatha, ka gobane go yena go be go etšwa maatla mme a ba fodiša bohle.

₂₀Jesu a lebelela barutiwa ba gagwe a re:

₂₇“Lena ba le nkwago, ke a le botša ke re: Le rate manaba a lena, ba ba le hloilego le ba direle tše di lokilego, ₂₈ba ba le rogago le ba šegofatše, gomme ba ba le swerego gampe le ba rapelele. ₂₉Ge motho a ka go betha thama, o mo retollele le ye nngwe. Ge motho a ka go amoga seaparo sa ka ntle, o mo lese a tšee le sa ka gare. ₃₀Ge motho a ka go kgopela selo, o mo fe sona, le ge motho a ka tšea selo sa gago, o se ke wa re a se buše. ₃₁Le direle batho tše le lena le ratago gore ba le direle tšona.

₃₂“Ge le rata fela ba ba le ratago, le tla be le sa tlilo putsetšwang? Gape seo ke se se dirwago le ke badiradibe. ₃₃Le ge le hola fela ba ba le holago, le tla be le sa tlilo putsetšwang? Etse seo ke se se dirwago le ke badiradibe. ₃₄Le ge le adima bao le holofelago gore ba tla buša, le tla be le sa tlilo putsetšwang? Ga ke re le badiradibe ba a adimana, ba tle ba buše sa go lekana le se ba se adimilego? ₃₅Sa lena a e be go rata manaba a lena le go ba hola, le go adima batho le sa lebelele go bušetšwa. Ke mo Modimo a tlago le putsa kudu, le gona la ba bana ba Modimo yoo Yogodimodimo. Gobane bahlokatebogo le bakgopo le bona o ba loketše. ₃₆Le gaugele bjalo ka ge Tatagolena le yena a gaugela.”

₃₇“Le se ke la bona ba bangwe diphošo, gomme le lena Modimo a ka se tlo le bona diphošo; le se ke la tšwa motho, gomme le lena Modimo a ka se tlo le tšwa; le swarele ba ba le fošeditšego, gomme Modimo o tla le swarela. ₃₈Le fe ba bangwe, gomme Modimo le yena o tla le fa. Le tla fiwa ka kelo ya mmapaale ye e katetšwego ya ba ya ntšhwa mohlopha. Gape kelo ye le elelago ba bangwe ka yona, ke yona ye Modimo a tlago le elela ka yona.”

₃₉Jesu a ba botša le ka seswantšho a re: “Kgane sefofu se ka hlahla se sengwe? Ga ke re bobedi bja bona ba tla wela ka leopeng? ₄₀Morutiwa ga a fete morutiši wa gagwe; morutiwa yo mongwe le yo mongwe ge a feditše dithuto tša gagwe o lekana le morutiši wa gagwe.

₄₁“O reng o bona phatšana ye e fahlilego ngwaneno, etšwe o sa bone kota ye e fahlilego wena? ₄₂Na o ka botša ngwaneno wa re: ‘Ngwanešo, a ke go fahlolle phatšana yeo e go fahlilego,’ mola wena kota ye e go fahlilego le go e bona o sa e bone? Moikaketši tena! Pele iphahlolle kota yeo e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego.”

₄₃“Mohlare wo mobotse ga o enywe dikenywa tše e sego tše dibotse, le wo e sego wo mobotse ga o enywe dikenywa tše dibotse. ₄₄Mohlare wo mongwe le wo mongwe o tsebja ka dikenywa tša wona. Motho ga a fule mago mehlareng ya meetlwa, le diterebe ga a di fule monganeng. ₄₅Motho wa go loka o nagana tše di lokilego ka pelong ya gagwe, ka gona o bolela tše di lokilego; yo mobe le yena o nagana tše mpe, ka fao o bolela tše mpe. Ga ke re se motho a se bolelago ke se se tšwago ka pelong ya gagwe?”

₄₆“Le mpiletšang ‘Morena, Morena,’ le sa dire tše ke le botšago tšona? ₄₇Yo a tlago go nna a kwa tše ke di bolelago mme a di phetha, ke tla le botša gore o swana le mang. ₄₈O swana le monna yo e rilego ge a aga ntlo ya gagwe a epa go iša fase, a aga motheo godimo ga letlapa. Ya re ge lefula le etla mme moela o tšhologela godimo ga yona, meetse a se ke a e šikinya, ka gobane e agilwe gabotse. ₄₉Eupša yo a kwago tše ke di bolelago gomme a se di phethe, yena o swana le monna yo a agilego ntlo ya gagwe mabung a se a e agela motheo; ya re ge moela o tšhologela godimo ga yona, ya wa le semeetseng – gomme go pšhatlagana ga yona ya ba mo go šiišago.”