To The Word – Day 85

₁Mehleng ya Jotamo le ya Ahase le ya Hiskia, magoši a Juda, Morena o ile a botša Mika wa motse wa Moreshete tše di ngwadilwego mo mabapi le Samaria le Jerusalema.

₅Tše ka moka di tla hlaga ka lebaka la ge setšhaba sa Israele se dirile dibe, le ka ge ditlogolo tšeo tša Jakobo di tsogetše Modimo maatla. Phošo ke ya mang ge di mo tsogetše maatla? Kgane ga se ya Samaria? Molato ke wa mang ge go khunamelwa medimo ya diswantšho mo Juda? A ga se wa Jerusalema? ₆Ke ka lebaka leo Morena a rego: “Ke tla dira Samaria marope a melaleng, le mo go bjalwago merara. Maswika a motse woo ke tla a lahlela molaleng, metheo ya wona ya šala nyanyeng. ₇Medimo ya wona ya diswantšho e tla pšhatlaganywa, dilo tšohle tše di filwego digwebakathobalo tša wona tša tempeleng di tla tšhungwa ka mollo, le medingwana yohle ya wona e tla ba thotobolo. Samaria e ikhweleditše dilo tše gore e tle e di šomišetše bofebe bjoo, gomme bjale manaba a yona a tla di thotha a yo di šomišetša bofebe bjoo mafelong a mangwe.”

₈Ke moka Mika a re: “Ka lebaka la dilo tšeo ke tla lla ka golola ka sepela ke se ka apara dieta, ebile ke hlobotše. Ke tla lla bjalo ka phukubje, ka tsetsela boka mpšhe. ₉Dintho tša Samaria di ka se fole, Juda le yona e kgauswi le go otlwa ka mokgwa woo; manaba a šetše a le masorong a Jerusalema mo go dulago setšhaba sa gešo.”

₁₀Le se ke la bolela kua Gathe gore re fentšwe, le go lla le se ke la lla. Lena ba Bethe-Leafora, le pshikologe maroleng go bontšha manyami. ₁₁Lena ba Shafire, fetang ka tsela le hlobotše, le lewa ke dihlong. Ba ba dulago Tsaanane ba šia go tšwa motseng. Ge le ekwa batho ba Bethe-Etsele ba lla, le tsebe gore ba ka se sa kgona go le thuša. ₁₂Batho ba Marote ba tlaletšwe, ba nyaka go lamolelwa, ka gobane Morena o dikaneditše Jerusalema ka madimabe. ₁₃Lena badudi ba Lakishe, panang dipere dikoloing tša ntwa, le tšhabe ka gobane le ekišitše Baisraele ge ba dira dibe, mme batho ba Jerusalema le bona ba le ekiša ba dira sebe. ₁₄Lena ba Juda, laelang batho ba Moreshete-Gathe. Ba motse wa Akesibe ba ka se kgone go thuša magoši a Israele, gomme magoši ao a tla swaba.

₁₅Lena badudi ba Maresha, Morena o tla le gafela diatleng tša ba ba tlago le fenya. Baetapele ba go tuma ba Israele ba tla tla moo Adulamo. ₁₆Lena ba Juda, boolang dihlogo, e be sešupo sa go llela bana ba lena ba le ba ratago. Intšheng mafatla le be bjalo ka manong, ka gobane le tlilo amogwa bana ba lena ba išwa bothopša.

₁Go madimabe ba ba lalago ba nagana tše kgopo le tše mpe malaong a bona. Ge go esa mme ba hwetša sebaka, ba dira tše mpe tše ba letšego ba di nagana. ₂Ge ba duma mašemo a batho ba a tšea ka swele; ge ba duma dintlo tša batho ba ipha tšona. Ba tšea motho le lapa la gagwe ka kgang, motho le thoto ya gagwe ka kgapeletšo.

₃Ka gona Morena o re: “Ke rera go le tlišetša masetlapelo, mme le ka se a phonyokge. Masetlapelo ao e tla ba a mašoro mo e lego gore le ka se sa sepela le kukile magetla. ₄Mohla nako yeo e etla batho ba tla le kodutla ka sefela sa go le llela ba re:

₆Batho ba re go nna: “Se re rute. Se re rute ka dilo tše. Re ka se welwe ke kgobogo. ₇Kgane rena re lego ditlogolo tša Jakobo re ka ba re rwele thogako? Kgane Morena o re feletše pelo? Na a ka napa a dira tšela a di rerilego? Ga ke re o bolela ka botho le ba ba dirago tše di lokilego?”

₈Morena o fetola ka go re: “Le hlasela setšhaba sa ka bjalo ka manaba. Banna ba boa ntweng ba gopola gore gae ba lotegile, eupša lena le ba hlobola diaparo. ₉Le raka basadi ba setšhaba sa ka ka magaeng a bona ao ba a ratago, gomme bana ba bona le ba amoga tše ke ba atlilego ka tšona. ₁₀Emang le sepele, ka gobane mo ga go sa na boikhutšo. Naga ye e tlilo senyetšwa ruri, ka gobane le e tšhilafaditše.

₁₁“Se setšhaba se se se nyakago ke moprofeta wa go tšama a botša batho tša maaka le tša boradia a re: ‘Le tlilo fiwa beine le dino tše bogale tša maphaaphaa.’

₁₂“Ke tla le kgoboketša, lena ditlogolo tša Jakobo, lena mašaledi a setšhaba sa Israele. Ke tla le phutha bjalo ka dinku ka lešakeng, bjalo ka mohlape mafulong. Naga ya lena e tla buša ya biloga batho.”

₁₃Modimo o tla ba phulela tsela a ba ntšha bothopša. Ba tla šwahla kgoro ya motse ba tšwa. Ba tla etwa pele ke Morena, yena Kgoši ya bona.

₁Theeletšang, lena baetapele ba ditlogolo tša Jakobo, babuši ba setšhaba sa Israele. Sa lena e swanetše go ba go ela toka hloko, ₂eupša le hloile tše di lokilego gomme le rata tše mpe. Le bua batho ba ka, la ba kgakgamolla dinama marapong, ₃la ba la ba ja. Le ba khwamola letlalo, la ba robaganya marapo, mme la ba segelela bjalo ka nama ge e segelelwa ka pitšeng. ₄Go tla tla nako ye ka yona le tlago llela Morena, eupša yena a se le arabe. A ka se le theeletše ge le mo rapela, ka gobane le dirile tše mpe.

₅Baprofeta ba fora setšhaba sa ka ka go botša bao ba ba lefago gore ba tla atlega, eupša ba tšhošetša bao ba ganago go ba lefa ka go ba botša gore ba tla welwa ke madimabe. Go baprofeta bao Morena o re: ₆“Matšatši a lena a tla feta, la se sa theeletšwa ke motho. Ka ge le timetša setšhaba sa ka, le ka se sa bona dipono, le tla bona fela leswiswi. Go tla fifala mo e lego gore le ka se sa kgona go porofeta.” ₇Ba ba botšago batho tša ka moso ba tla hlabja ke dihlong, ba inamiša difahlego, ba gagabiša mahlo ka gobane Modimo a sa ba arabe.

₈Eupša nnaena Modimo o ntladitše moya wa gagwe a ba a mpha maatla, a ntira gore ke be le toka le sebete sa go botša setšhaba sa Israele dibe tša sona, le mpherefere wa ditlogolo tšeo tša Jakobo. ₉Ntheeletšeng, lena baetapele ba ditlogolo tša Jakobo, babuši ba setšhaba sa Israele, lena le šišingwago toka, le phetholago tše di lokilego la re ke tše mpe. ₁₀Le aga Jerusalema, motse wa Modimo, ka tšhelete ye le e hwetšago ka dipolao le ka go hlokiša batho toka. ₁₁Babuši ba motse ba ahlola ka go amogela tsogolekobong, baprista ba rutela moputso, baprofeta ba nyaka go lefiwa pele ba bolela tše ba rego ba di boditšwe ke Modimo – mme batho bao ka moka ba re: “Ga go kotsi ye e ka re welago. Morena o na le rena.”

₁₂Bjale ge, ka lebaka la lena, Sione e tla lengwa bjalo ka tšhemo, Jerusalema e tla fetošwa marope, gomme thaba ye Tempele e agilwego go yona ya ba sethokgwa.

₅Setšhaba se sengwe le se sengwe se ka khunamela modimo wa sona sa mo hlompha, ge e le rena re tla khunamela Morena Modimo wa rena ra ba ra mo hlompha go ya go ile.

₆Morena o re: “Nako e etla yeo ka yona ke tlago kgoboketša setšhaba sa ka se ke ilego ka se otla ka go se iša bothopša, se se swanago le dinku tše di hlotšago tše di phatlaladitšwego ke dibata. ₇Ba ba hlotšago ke bona ke tlago ba dira mašaledi; bale ba bego ba rakilwe ka ba dira setšhaba se maatla. Ke tla ba Kgoši ya bona thabeng ya Sione go tloga nakong yeo go iša go sa felego.”

₈Gomme wena, Jerusalema, mo go lego thaba ya Sione, moo Modimo a dišago setšhaba sa gagwe a le gona bjalo ka modiša a nametše tora ya gagwe ya tlhapetšo, o tla buša wa ba mošate wa mmušo wo e kilego ya ba wa gago. ₉O reng o sa ntše o kgitla sello? Kgane ga go ne kgoši mo go wena? O inyokanyokelang boka mosadi a swerwe ke lešoko? Kgane ke ka lebaka la ge o se ne kgoši, gomme le baeletši ba gago ba hwile? ₁₀Inyokanyokeng le tsetle, lena ba Jerusalema, le etše mosadi ge a belega, gobane bjale le tla tloga mo motseng la yo dula nageng. Le tla ya Babilone, eupša gona kua Morena o tla le phološa a le hlakodiša diatleng tša manaba a lena. ₁₁Ditšhaba tše dintši di kgobokanetše go tlo le hlasela. Di re: “A re tšhilafatšeng Tempele; re ka kgahlega ge re ka bona Jerusalema e thubilwe!” ₁₂Eupša ditšhaba tše ga di tsebe se Morena a se gopolago. Ga di lemoge gore o di kgobokantše boka mabele ge a kgobetšwe seboeng.

₁₃Morena o re: “Lena ba Jerusalema, emelelang le foleng manaba ao a lena! Ke tla le kgwahliša la etša poo ya manaka a tshipi le dingatha tša mphiri. Le tla gataka ditšhaba tše dintši, gomme mahumo ao ba ikhweleditšego ona ka šiši le tla nkabela ona, nna, Morena wa lefase ka moka.”

₁₄Lena batho ba Jerusalema, rapang madira a lena! Manaba a re dikaneditše ka dintotoma tša mobu. Ba hlasela mmuši wa Israele!

₁Morena o re: “Wena Betlelehema ya tikologong ya Efrata, le ge o le wo mongwe wa metsana ye menyenyane kudu mo Juda, go wena go tla tšwa mmuši wa Israele yo a tlago ntlhompha, yo lešika la gagwe e lego la bogologolo le mehleng ya kgale.”

₂Ka lebaka leo Morena o tla gafela setšhaba sa gagwe manabeng a sona, go fihlela mosadi yo mongwenyana wa moimana a belega morwa. Ke gona mašaledi a gabomorwa yoo a a lego bothopša a tlago buša a kopana le magagaboona. ₃Mohla a etla o tla diša setšhaba sa gagwe a na le maatla a Morena le bogoši bja Modimo wa gagwe. Setšhaba sa gagwe se tla dula se iketlile, ka gobane batho lefaseng ka moka ba tla tseba gore ke yo mogolo kudu, ₄gomme yena o tla buša ka khutšo.

Ge Baasiria ba šwahlela naga ya rena mme ba kgereša dibo tša rena, re tla roma balaodi le mantona ba ba lekanego go yo lwa le bona. ₅Ba tla lwa le Baasiria, badudi ba naga ya Nimrode, ka ditšhoša ba ba fenya, gomme ba re hlakodiša diatleng tša Baasiria ge ba šwahlela naga ya gaborena.

₆Ona mašaledi a ditlogolo tša Jakobo a a lego gare ga ditšhaba tše dingwe a tla swana le phoka ye e tšwago go Morena; a tla etša pula ye e nelago dibjalo. Ba tla bota Modimo, e sego motho. ₇Ona mašaledi ao a ditlogolo tša Jakobo a a lego gare ga ditšhaba tše dingwe a tla swana le tau gare ga diphoofolo tša sethokgwa; a tla ba bjalo ka tawana gare ga mehlape ya dihuswane, yona e tšamago e di robakanya, e di rathaganya, mme gwa hlokega mohlakodiši. ₈Baisraele ba tla fenya manaba a bona ba a fediša taa.

₉Morena o re: “Mehleng yeo ke tla bolaya dipere tša lena, ka ba ka robaganya dikoloi tša lena tša ntwa. ₁₀Ke tla fediša metse ya naga ya lena, ka ba ka kgereša dibo tšohle tša lena. ₁₁Ke tla fediša boloi bja lena, le didupe le ka se sa ba natšo. ₁₂Ke tla pšhatlaganya medimo ya lena ya diswantšho le dikokwane tša lena tša borapedi tša maswika; le ka se sa khunamela dilwana tše le ipopetšego tšona ka diatla. ₁₃Ke tla tumola dikota tša borapedi nageng ya lena, ka ba ka fediša metse ya lena. ₁₄Ke tla itefeletša ke befetšwe, ke galefetše ditšhaba tše di sego tša ntheeletša.”

₁Theeletšang, Morena o re Baisraele ba obile molato.

Morena, ema o hlagiše taba ya gago pele ga dithaba, mme meboto e kwe tše o di bolelago.

₂Lena dithaba, lena metheo ya go ya go ile ya lefase, theeletšang taba ya Morena! Morena o na le taba ye a tšwago setšhaba sa gagwe go yona. O tlilo rweša Baisraele molato.

₃Morena o re: “Setšhaba sa ka, na ke le dirile eng? Ke le lapišitše ka eng? Mphetoleng! ₄Ke le ntšhitše Egepeta; ke le hlakodišitše bokgobeng; ke romile Moshe le Arone le Miriamo gore ba tle ba le ete pele. ₅Setšhaba sa ka, gopolang se Balaka, kgoši ya Moaba, a kilego a ikemišetša go le dira sona, le ka mo Bileamo, morwa wa Beore, a ilego a mo fetola ka gona. Gopolang dilo tše di ilego tša direga mo tseleng ge le tloga mešašeng kua Megohlong le eya Gilgale; ke moo le tlago lemoga tše ke le diretšego tšona gore ke le phološe.”

₆Na Morena, Modimo wa godimodimo, nka mo tlišetšang ge ke tlilo mo obamela? Kgane nka mo tlišetša marojana a go mo direla dihlabelo tša go tšhungwa ka moka? ₇Na Morena a ka thabišwa ke diketekete tša dikgapa tše nka mo tlišetšago tšona, goba meelaela ya makhura a mohlware? Kgane nka mo direla sehlabelo sa tshwarelo ya dibe ka morwa wa ka wa leitšibolo, ka lefa makgopo a ka ka morwa yo ke mo tswetšego? ₈Aowaa, Morena o boditše wena, motho, tše e lego tša go loka. Bjale ke eng se a se nyakago go wena, ge e se gore o dire tše di lokilego, o rate Modimo le batho ka mehla, le gore o phele o ikokobetša go Modimo wa gago?

₉Go boifa Morena ke bohlale. O bitša ba motse wa Jerusalema o re: “Theeletšang, lena le kgobokanego mo motseng wo! ₁₀Ka dintlong tša batho ba kgopo go na le mahumo ao ba a ikhweleditšego ona ka bohwirihwiri. Ba šomiša dikelo tša bofora, e lego selo se ke se hloilego. ₁₁Na nka napa ka swarela batho ba ba šomišago dikelo le dikeloboima tša bofora? ₁₂Bahumi ba gabolena ba rata boganka, le gona ka moka ga lena le bompheane ebile le baradia. ₁₃Ka gona ke šetše ke thomile go le otla, gomme ke tla le bolaya ka lebaka la dibe tša lena. ₁₄Le tla ja, fela la se khore – gabotsebotse la no swarwa ke tlala. Tše le di thopilego di ka se lotege. Se sengwe le se sengwe se le se lotilego ke tla se fediša ka ntwa. ₁₅Le tla bjala mabele, eupša la se a bune. Le tla pitla dihlware ka maoto, eupša la se tlole ka makhura a tšona. Le tla hlotla beine, eupša la se e nwe. ₁₆Tšeo di tla le hlagela ka ge le phethile ditaelo tša Omri, la ba la dira tše mpe tše ba ga Ahaba ba bego ba di dira. Le dirile tša maikemišetšo a bona, ka gona motse wa lena ke tla o fetoša marope, le tla kwerwa ke batho, la nyatšwa ke ditšhaba tše dingwe.”

₁Jo nna joo! Ke swana le motho yo e rego a swerwe ke tlala a se ke a hwetša dienywa mehlareng le diterebe tša morago. Diterebe tšohle le mago a pele di futšwe. ₂Ga go sa na le motho yo a botegelago Modimo nageng ya Israele, ga go sa ne moloki yo a šetšego setšhabeng. Bohle ba dula ba lalelane gore ba bolayane, ba theana ka melaba. ₃Ka moka ke dithwadi tša go dira tše mpe. Bahlankedi le baahlodi ba nyaka tsogolekobong. Motho wa maemo o ba botša se a se nyakago, gomme bohle ba šarakanya toka. ₄Yo mokaonekaone go bona o swana le ditshehlo, moloki o hlaba bjalo ka lešaša la meetlwa.

Letšatši le Modimo a tlago otla setšhaba ka lona, letšatši le le boletšwego ke baprofeta, le fihlile. Setšhaba seo se kgauswi le go gakanega. ₅O se ke wa kgolwa wa geno goba wa tshepa mogwera wa gago. O hlokomele se o se botšago le yena mosadi wa gago. ₆Mehleng yeno barwa ba nyatša botatagobona, barwedi ba ngangiša bommagobona, le dingwetši di tsogela bommatswalagotšona maatla; manaba a motho ke ba lapa labo.

₇Eupša nna ke tla letela Morena; ke tla fišegela go amogela Modimo, ke yena yo a tlago mphološa. Modimo wa ka o tla nkwa.

₈Lena manaba a rena, le se thabele madimabe a rena. Re wele, fela re tla tsoga gape. Bjale re mo leswiswing, eupša Morena o tla re fa seetša. ₉Re tla kgotlelela ge Morena a re galefetše ka gobane re dirile dibe pele ga gagwe. Eupša mafelelong o tla re emelela tshekong, gomme a šetša gore re ahlolwe ka toka. O tla re ntšhetša seetšeng; re tla mmona ge a re phološa. ₁₀Seo se tla bonwa le ke manaba a rena, gomme a lewa ke dihlong – ona manaba ale a bego a re kwera a re: “O kae Morena Modimo wa lena?” Re tla a bona a fenywa, a gatakwa bjalo ka leraga mekgotheng.

₁₁Lena batho ba Jerusalema, nako ya go tsošološa merako ya motse wo e etla. Mehleng yeo naga ya lena e tla oketšwa. ₁₂Batho ba gabolena ba tla boela go lena ba etšwa gohle – ba etšwa Asiria ka bohlabatšatši, le Egepeta ka borwa, le seleteng sa Yufratese, le mawatleng a kgakala, le dithabeng tša kgole. ₁₃Eupša lefase le tla senyega ka lebaka la makgopo a bao ba dutšego go lona.

₁₄Hle, Morena, diša setšhaba se sa gago o se kgethilego; se diše bjalo ka modiša ge a diša mohlape wa gagwe. Le ge se phela se le tee lešokeng, naga ye e se dikaneditšego e nonne go swana le selete sa Karmele. Ba lese ba yo dula ba iketlile nageng ya Bashane le ya Gileade go swana le kgale.

₁₅Re direle mehlolo, hle, Morena, o etše mehleng yela o re ntšha Egepeta. ₁₆Yona e tla bonwa ke ditšhaba tše dingwe gomme tša inyatša le ge e le tše maatla. Ba tla ahlama ba tlabegile mme ba thibja ditsebe ke tše Morena a di dirago. ₁₇Ba tla gagaba fase bjalo ka dinoga; ba tla tšwa dibong tša bona ba thothomela ba tšhogile. Ba tla tla go Morena Modimo wa rena ba thothomela ka letšhogo.

₁₈Ke ofe Modimo wa go swana le wena Morena, yo a swarelago mašaledi a setšhaba sa gago makgopo a bona, yo a sa ba otlelego dibe tša bona? Wena ga o galefele sa ruri, eupša o thabela go re rata ka lerato le le sa fetogego. ₁₉O tla buša wa re gaugela. O tla gata makgopo a rena ka maoto, wa lahlela dibe tša rena fasefase ka lewatleng! ₂₀O tla bontšha setšhaba sa gago, ditlogolo tša Jakobo, gore o a se botegela, ebile o se rata ka leratorato bjalo ka ge o ile wa enela borakgolokhukhu ba rena kgalekgale.