To The Word – Day 75

₁Kgoši Nahashe wa Amone o ile a tšwa dira mme a hloma mešaša ya gagwe gore a tle a hlasele motse wa Jabeshe, nageng ya Gileade. Banna ba Jabeshe ba re go Nahashe: “Hle, kwana le rena, mme re tla ba batho ba gago.”

₂Nahashe a ba fetola a re: “Ke tla kwana le lena ge le ka dumela gore ke gonye yo mongwe le yo mongwe wa lena leihlo la la go ja. Ka go dira bjalo ke tla goboša Baisraele ka moka.”

₃Baetapele ba Jabeshe ba re: “Re fe matšatši a a šupago gore re rome batseta nageng ya Israele ka moka. Ge go se yo a ka re thušago, gona re tla ineela go wena.”

₄Batseta bao ba fihla Gibea, moo Saulo a bego a dula gona, gomme ya re ge ba bega taba yeo, batho ba hlaboša mantšu ba lla. ₅E be e le gona Saulo a gorogago a etšwa mašemong a gapa dipholo tša gagwe, gomme a botšiša a re: “A molato ke eng? Ke ka lebaka lang batho ba lla?” Ba mmotša se batseta ba ba tšwago Jabeshe ba se begilego. ₆Ge Saulo a ekwa seo, moya wa Modimo wa mo laola, gomme a galefa kudu. ₇A tšea dipholo tše pedi a di ripaganya, gomme a roma batseta gore ba iše diripana tšeo nageng ka moka ya Israele mme ba botše batho ba re: “Yo a sa latelego Saulo le Samuele ge ba eya ntweng – dipholo tša gagwe di tla ripaganywa ka mokgwa wo!”

Setšhaba sa Israele se be se boifa se Morena a ka se dirago, gomme ka moka ga bona ba tšwa e le seboka, gwa se šale motho. ₈Saulo a ba kgobokanya kua Beseke: ya ba ba dikete tše makgolo a mararo ba ba tšwago Israele le ba dikete tše masome a mararo ba ba tšwago Juda. ₉Ba re go batseta bale ba go tšwa Jabeshe: “Le botšeng batho ba gabolena gore pele ga mosegare wa sekgalela ka moswane ba tla phološwa.” Ge batho ba Jabeshe ba ekwa molaetša woo, ba thaba ₁₀gomme ba re go Nahashe: “Ka moswane re tla ineela go wena, gomme wa dira se o se ratago ka rena.”

₁₁Ka letšatši le le latelago ka masa Saulo a arola banna ba gagwe dihlopha tše tharo, mme ya re ka mahube ba šwahlela mešaša ya manaba gomme ba hlasela Baamone. Ba ba bolaya go fihlela mosegare wa sekgalela. Bao ba phonyokgilego ba šwalalana, monna yo mongwe le yo mongwe a tšhaba a nnoši.

₁₂Ke moo banna ba Israele ba itšego go Samuele: “A ba kae batho bale ba itšego Saulo ga a swanela go ba kgoši ya rena? Re gafele bona, re ba bolaye!”

₁₃Eupša Saulo a re: “Ga go bolawe motho lehono, ka gobane le ke letšatši leo ka lona Morena a hlakodišitšego Baisraele.” ₁₄Gomme Samuele a re go setšhaba: “Ka moka ga rena a re yeng Gilgale re yo bea Saulo gape kgoši ya rena.” ₁₅Ka gona ka moka ga bona ba ya Gilgale, gomme moo ba bea Saulo kgoši ka felo mo gokgethwa. Ba dira dihlabelo tša kagišano, gomme Saulo le setšhaba ka moka sa Israele ba bina monyanya wo mogolo wa go bea kgoši.

₁Samuele a re go setšhaba sa Israele: “Ke dirile se le nkgopetšego gore ke se dire. Ke le file kgoši ye e tlago le buša, ₂mme bjale e tla le eta pele. Ge e le nnaena, ke godile ke itšofaletše, fela barwa ba ka ba na le lena. Ke bile moetapele wa lena go tloga bofseng bja ka go fihlela bjale. ₃Ke nna yo. Ge eba go na le phošo ye nkilego ka e dira, mpegeng gonabjale mo pele ga Morena le kgoši ye a e kgethilego. Kgane nkile ka tšea kgomo goba pokolo ya yo mongwe? A nkile ka phošetša motho goba ka gatelela motho? Ke mang yo nkilego ka amogela tsogolekobong go yena gore ke tle ke se mmone molato? Ge eba nkile ka dira se sengwe sa tšeo, ke tla lefa seo ke se tšerego.”

₄Setšhaba sa mo fetola sa re: “Aowa, ga se wa ka wa re phošetša goba wa re gatelela; ga se wa ka wa amoga motho selo.”

₅Samuele a re: “Morena le kgoši ye a e kgethilego ke dihlatse lehono tša gore le hweditše ke se na molato le gatee.”

Ba mo fetola ba re: “Ee, Morena ke hlatse ya rena.”

₆Samuele a tšwela pele a re: “Morena ke yena yo a beilego Moshe le Arone baetapele, ebile ke yena yo a ntšhitšego borakgolokhukhu ba lena Egepeta. ₇Bjale emang mo le lego gona, mme ke tla le bega go Morena ka go le gopotša ditiro ka moka tše maatla tše Morena a di dirilego go phološa lena le borakgolokhukhu ba lena. ₈Ge Jakobo le ba lapa la gagwe ba eya Egepeta gomme Baegepeta ba ba gatelela, borakgolokhukhu ba lena ba ile ba llela Morena, mme yena a roma Moshe le Arone, ba ba ntšha Egepeta mme ba ba dudiša mo nageng ye. ₉Eupša batho bao ba ile ba lebala Morena Modimo wa bona, ka fao a lesa kgoši ya Moaba le Sisera, molaodi wa madira a motse wa Hatsore, le Bafilista ba elwa le borakgolokhukhu ba lena, mme a ba gafela diatleng tša bona. ₁₀Ke gona ba lletšego Morena ba re: ‘Re dirile sebe, ka gobane re go tlogetše, Morena, ra khunamela medimo ya diswantšho, Baale le Astarte. Re hlakodiše manabeng a rena, gomme re tla go khunamela.’ ₁₁Gomme Morena a ba romela Gideone, ka morago Barake, ka morago Jefta, mme la mafelelo a romela nna. Yo mongwe le yo mongwe wa rena o le hlakodišitše manabeng a lena, mme la phela le bolokegile. ₁₂Eupša ya re ge le bona gore Kgoši Nahashe wa Amone o batametše go le hlasela, la re go nna: ‘Re nyaka go bušwa ke kgoši,’ le ge Morena Modimo wa lena e be e le kgoši ya lena.

₁₃“Bjale kgoši ye le e kgethilego še; le e kgopetše, gomme bjale Morena o le file yona. ₁₄Tšohle di tla le atla ge le ka hlompha Morena Modimo wa lena, la mo direla, la mo theetša, la phetha le ditaelo tša gagwe, le gona lena le kgoši ya lena la mo latela. ₁₅Eupša ge le sa theetše Morena le sa phethe ditaelo tša gagwe, o tla le emela ka maoto bjalo ka ge a ile a emela borakgolokhukhu ba lena ka maoto. ₁₆Ka gona, emang mo le lego gona, gomme le tla bona mohlolo wo mogolo wo Morena a tlago o dira. ₁₇Ga ke re ga se nako ya pula? Fela ke tla rapela Morena, gomme yena o tla romela ledimo le pula. Ge seo se direga le tla lemoga gore le dirile sebe se segolo pele ga Morena ge le mo kgopela kgoši.”

₁₈Ka gona Samuele a rapela Morena, gomme ka lona tšatši leo Morena a romela ledimo le pula. Ke moo setšhaba ka moka se boifilego Morena le Samuele, ₁₉gomme sa re go Samuele: “Hle, re rapelele go Morena Modimo wa gago, rena bahlanka ba gago, gore re se ke ra hwa. Bjale re lemoga gore ntle le dibe tša rena tšohle, re dirile sebe se sengwe ka go kgopela gore re be le kgoši.”

₂₀Samuele a ba fetola a re: “Le se ke la boifa. Le ge le dirile taba ye mpe ka mokgwa wo, le se ke la furalela Morena, eupša le mo direle ka dipelo tša lena ka moka. ₂₁Le se ke la arogela go medimo ya lefeela; e ka se le thuše goba ya le phološa, ka gobane ga se ya therešo. ₂₂Morena, ka lebaka la leina la gagwe le legolo, a ka se le lahle, ka gobane o ikemišeditše go le dira setšhaba sa gagwe. ₂₃Ge e le nna ke re go fošetša Morena ka go lesa go le rapelela a go be kgole le nna. A ke upše ke le rute se sebotse se se loketšego gore le se dire. ₂₄Boifang Morena gomme le mo direleng ka potego, le mo direleng ka dipelo tša lena ka moka. Gopolang tše kgolo tše a le diretšego tšona. ₂₅Eupša ge le ka fela le dira sebe, lena le kgoši ya lena le tla fedišwa.”

_{1 2}Saulo o ile a hlaola banna ba dikete tše tharo, a šala le ba dikete tše pedi kua Mikimase le nageng ya dithaba ya Bethele, gomme a romela ba sekete se tee le morwa wa gagwe, Jonathane, kua Gibea, nageng ya kgoro ya Benjamene. Banna ba bangwe bona Saulo a ba romela gae.

₃Jonathane o ile a bolaya Bafilista ba ba bego ba hlomile mešaša kua Geba, gomme Bafilista ka moka ba kwa taba yeo. Ke moo Saulo a laetšego gore phalafala e letšwe nageng ka moka go biletša Baheberu ntweng. ₄Baisraele ka moka ba botšwa gore Saulo o bolaile Bafilista ba ba bego ba hlomile mešaša, le gore Bafilista ba ba hloile. Ka gona banna ba tla pitšong go tlo kopana naye kua Gilgale.

₅Bafilista ba kgobokanela go tlo lwa le Baisraele; ba be ba na le makoloi a ntwa a dikete tše masome a mararo, bahlabani ba ba nametšego dipere ba dikete tše di selelago, le bahlabani ba bantšintši ba ba sepelago ka maoto ba ba lekanago le dithorwana tša lešabašaba lebopong la lewatle. Ba ya Mikimase, ka bohlabela bja Bethe-Abene, gomme ba hloma mešaša fao. ₆Baisraele ge ba bona gore ba tlaletšwe gomme ga go se ba ka se dirago, ba utama ka maweng le ka meleteng le ka dimphatšeng le ka dibong le ka megobeng ye e omilego; ₇ba bangwe ba tshela noka ya Jordane ba tsena nageng ya Gade le ya Gileade.

Saulo yena o be a sa le Gilgale, gomme banna ba ba bego ba na le yena ba be ba thothomela ka letšhogo. ₈O ile a letela Samuele matšatši a a šupago, ka ge Samuele a be a mo laetše bjalo, eupša Samuele o be a se a tšwe a etla Gilgale. Bahlabani ba thoma go tlogela Saulo, ₉ka gona a re go bona: “Ntlišetšeng dihlabelo tša go tšhungwa ka moka le dihlabelo tša kagišano.” O ile a dira sehlabelo sa go tšhungwa ka moka, ₁₀gomme ge a re ke a feleletša, Samuele a fihla. Saulo a tšwela ntle go mo gahlanetša mme a mo amogela, ₁₁eupša Samuele a re: “A o dirile eng?”

Saulo a mo fetola a re: “Bahlabani ba be ba ntlogela, gomme le wena ga se wa fihla ka nako yela o bego o ile o tla fihla ka yona; ntle le moo, Bafilista ba kgobokana kua Mikimase. ₁₂Ka fao, ke ile ka re ka pelong: ‘Bafilista ba tlilo ntlhasela mo Gilgale ke sešo ka kgopela Morena gore a nthuše.’ Ka gona ka beta pelo ka dira sehlabelo.”

₁₃Samuele a mo fetola a re: “O dirile taba ya botlaela. Ga se wa phetha taelo ye Morena Modimo wa gago a go filego yona. Ge nkabe o ile wa e phetha, o be a tla dira gore wena le ditlogolo tša gago le buše Israele go ya go ile. ₁₄Eupša bjale pušo ya gago e ka se swarelele. Ka gobane wena ga se wa dira se Morena a go laetšego sona, yena o tla inyakela monna yo a mo kgahlago, mme a mmea mmuši wa setšhaba sa gagwe.”

₁₅Samuele a tloga Gilgale a sepela. Batho ka moka ba latela Saulo ge a eya go kopana le madira a gagwe. Ba tloga Gilgale ba ya Gibea nageng ya Benjamene. Saulo a lekola bahlabani ba gagwe, banna ba e ka bago ba makgolo a a selelago. ₁₆Saulo le morwa wa gagwe, Jonathane, le banna ba bona ba hloma mešaša Geba, nageng ya Benjamene; mešaša ya Bafilista e be e le kua Mikimase. ₁₇Bahlabani ba Bafilista ba tšwa mešašeng ya bona go yo ba hlasela ka dihlopha tše tharo: sehlopha se sengwe sa leba Ofra, nageng ya Shuale, ₁₈se sengwe sa ya thoko ya Bethe-Horone, mme se sengwe sa ya mollwaneng wo o okametšego moedi wa Tseboime le lešoka.

₁₉Go be go se barulatshipi nageng ya Israele, ka gobane Bafilista ba be ba itaile gore ba ka se dumelele Baheberu ba dira ditšhoša le marumo. ₂₀Baisraele ba be ba swanetše go ya go Bafilista go yo looletšwa megoma ya dipholo le ya diatla, dilepe le disekele; ₂₁tefo e be e le papetlana ye nnyane ya silibera ge go lootšwa dilepe le ge go tsenywa ntlhana ya tshipi phateng ya go gapa dikgomo, gomme e le dipapetlana tše pedi ge go lootšwa megoma ya dipholo le megoma ya diatla. ₂₂Ka gona, ge go tsogile ntwa go be go se le o tee wa bahlabani ba Baisraele yo a bego a swara tšhoša goba lerumo ntle le Saulo le morwa wa gagwe, Jonathane.

₂₃Bafilista ba ile ba romela sehlopha sa bahlabani go yo šireletša sefata sa Mikimase.

₁Ka letšatši le lengwe Jonathane a re go lesogana le le bego le mo rwalela dibetša: “A re putle mešaša ya Bafilista.” Eupša Jonathane a se ke a botša Saulo, tatagwe, ₂yo a bego a hlomile mošaša ka fase ga mohlare wa mogarenate kua Migrone, kgauswi le Gibea; o be a na le banna ba e ka bago ba makgolo a a selelago. ₃Gare ga bona go be go le Ahia yo a bego a swere seaparo se sekgethwa. Ahia e be e le morwa wa Ahitube, ngwanaboIkabode, yo e bego e le morwa wa Finease, morwa wa Eli, moprista wa Morena kua Shilo. Banna bao ba be ba sa tsebe gore Jonathane o sepetše.

₄Kua sefateng sa Mikimase, se Jonathane a bego a swanetše go putla go sona go yo fihla mešašeng ya Bafilista, go be go le marako a mabedi a dintsupi ka mo le ka mo ga sefata: le lengwe le be le bitšwa Botsetse, mme le lengwe le bitšwa Senne. ₅Le lengwe le be le le ka thoko ya leboa ya sefata, le lebane le Mikimase, mme le lengwe le le ka thoko ya borwa, le lebane le Geba.

₆Jonathane a re go lesogana lela: “A re tshelele mola mešašeng ya Bafilista bale ba go se bolle. Mohlomongwe Morena a ka re thuša, gobane ga go se se ka mo šitišago go namolela batho, ka ba bantši goba ka ba ba sego nene.”

₇Lesogana leo la mo fetola la re: “Se sengwe le se sengwe se o ratago go se dira, ke eme le wena.”

₈Jonathane a re: “Go lokile. Re tla putlela mola mme ra dira gore Bafilista ba re bone. ₉Ge ba ka re botša gore re ba letele ba tle go rena, gona re tla ema mo re lego gona. ₁₀Fela ge ba ka re botša gore re rotogele go bona, gona re tla ya, ka gobane seo e tla ba sešupo sa gore Morena o ba gafetše diatleng tša rena.”

₁₁Ka gona ba dira gore Bafilista ba ba bone, gomme Bafilista ba re: “Bonang! Baheberu ba bangwe ba tšwa ka meleteng ye ba bego ba utamile ka go yona!” ₁₂Ke moo ba goeletšego Jonathane le lesogana lela ba re: “Rotogelang mono! Le tla re hwetša!”

Jonathane a re go lesogana lela: “Ntšhale morago. Morena o ba gafetše diatleng tša Baisraele.” ₁₃Jonathane a namelela ka matsogo le maoto, gomme lesogana lela la mo latela. A hlasela Bafilista a ba uša fase mme lesogana la ba bolaya. ₁₄Moo polaong yeo ya mathomo Jonathane le lesogana lela ba ile ba bolaya banna ba e ka bago ba masome a mabedi felwaneng mo e ka bago seripa sa botelele bja tšhemo. ₁₅Bafilista ka moka ba ba bego ba le kua nageng ba tšhoga; bašwahledi le bahlabani ba ba bego ba le mešašeng ba thothomela ka letšhogo; lefase la šikinyega, gomme gwa ba le tlalelo ye kgolo.

₁₆Banna ba Saulo bao ba bego ba letile kua Gibea, nageng ya Benjamene, ba bona Bafilista ba tšhaba ba eya tlase le tletlolo. ₁₇Ka fao Saulo a re go banna ba gagwe: “Balang bahlabani mme le boneng yo a sego gona.” Ba dira bjalo gomme ba hwetša gore Jonathane le lesogana le le bego le mo rwalela dibetša ga ba gona. ₁₈Saulo a re go moprista Ahia: “Tliša seaparo se sekgethwa mo!” Ka letšatši leo Ahia o be a se swere pele ga banna ba Israele. ₁₉Ya re Saulo a sa bolela le moprista, kgakanego ka mešašeng ya Bafilista ya golela pele le pele, ka gona Saulo a re go yena: “Ga go nako ya go nyakišiša thato ya Morena!” ₂₀Ke moo yena le banna ba gagwe ba ipeakantšego ba ya ntweng, gomme moo ba hwetša Bafilista ba elwa seng sa bona kgakanegong ye kgolokgolo. ₂₁Baheberu ba bangwe bao pele ba bego ba ile ba ema le Bafilista mme ba ya nabo mešašeng, ba ile ba ba hlanogela mme ba ikopanya le Saulo le Jonathane. ₂₂Ba bangwe ba ba bego ba utamile nageng ya dithaba ya Efraime, ba kwa gore Bafilista ba a tšhaba, ka gona le bona ba ba rakediša ₂₃mme ba lwa le bona go ba go yo fihla ka thoko yela ya Bethe-Abene. Morena a phološa Baisraele tšatši leo.

₂₄Saulo o ile a kgareetša Baisraele kudu tšatši leo. O be a ba tlemile ka keno a re: “Go rogakwe yo a kago ja sejo se sengwenyana lehono pele ga ge ke itefeletša go manaba a ka.” Ka gona letšatši ka moka gwa se be le motho yo a latswago sejonyana. ₂₅Ka moka ga bona ba ile ba fihla dithokgweng gomme ba hwetša mamapo a dinose mo gongwe le mo gongwe. ₂₆Dithokgwa di be di tletše mamapo, eupša gwa se ke gwa ba le yo a a išago molomong ka gore ba be ba boifa thogako ya Saulo. ₂₇Fela Jonathane o be a se a kwa tatagwe ge a tlema banna ka keno yela; ka gona a obeletša lepara le a bego a le swere a le korobetša lemapong, gomme a ja todi. Gatee fela a kwa a lapologile. ₂₈Eupša yo mongwe wa banna a re: “Tatago o re tlemile ka keno ye bogale a re: ‘Go rogakwe yo a kago ja sejo se sengwenyana lehono.’ Ke ka lebaka leo banna ba ilego ba fokola.”

₂₉Jonathane a mo fetola a re: “Ke taba ye šorošoro bjang ye tate a e dirilego batho ba gaborena! Bonang gore ke lapologile bjang ka gobane ke latswitše totšana! ₃₀Go ka be go bile kaone kudu lehono ge banna ba ka be ba lle dijo tše ba di tšerego ge ba fenya manaba a bona. Ba ka be ba bolaile Bafilista ba bantšintši go feta mo!”

₃₁Tšatši leo Baisraele ba ile ba fenya Bafilista, ba lwa go tloga Mikimase go yo fihla Ayalone. Ka nako yeo Baisraele ba be ba fokodišwa ke tlala kudu, ₃₂ka gona ba kgorogela tše ba bego ba di thopile manabeng a bona, ba tšea dihuswane le dikgomo, ba di hlaba semeetseng, mme ba ja nama yeo e sa na le madi. ₃₃Banna ba bangwe ba botša Saulo ba re: “Bona, batho ba dira sebe pele ga Morena ka go ja nama ye e sa nago le madi.”

Saulo a re: “Ga le botegele Morena! Kgokološetšang letlapa le legolo go nna ka bjako.” ₃₄A ba a re: “Šwalalanang le batho mme le ba botše gore ka moka ba tliše dihuswane le dikgomo tša bona mo. Ba swanetše go di hlabela mo mme ba di je; ga ba swanela go dira sebe pele ga Morena ka go ja nama ye e sa nago le madi.” Ka gona bošego bjoo yo mongwe le yo mongwe a tliša kgomo mme a e hlabela moo. ₃₅Saulo a agela Morena aletare; ya ba ya mathomo ya tše a ilego a di aga.

₃₆Saulo a re go banna ba gagwe: “A re theogeng re hlomareng Bafilista bošego, re ba šwahleleng go fihlela ka mahube mme re ba bolaye ka moka.”

Bona ba mo fetola ba re: “Dira se o bonago se lokile.”

Fela moprista a re: “A re nyakišišeng thato ya Modimo pele.”

₃₇Ka gona Saulo a botšiša Modimo a re: “Na ke rakediše Bafilista? A o tla ba gafela diatleng tša rena?” Eupša tšatši leo Modimo a se ke a mo fetola. ₃₈Ke moo Saulo a itšego go balaodi ba madira: “Tlaang mo le nyakišišeng le boneng gore ke sebe sefe se se dirilwego lehono. ₃₉Ka Morena yo a phelago, yo a phološago Baisraele, monna yo a nago le molato o tla bolawa, le ge e ka ba morwa wa ka, Jonathane.” Fela gwa se ke gwa ba le yo a mo fetolago. ₄₀Ke moo Saulo a itšego go bona: “Ka moka ga lena emelang mola, gomme nna le Jonathane re tla ema mo.”

Banna ba mo fetola ba re: “Dira se o bonago se lokile.”

₄₁Saulo a re go Morena Modimo wa Israele: “Morena, ke ka lebaka lang o se wa nkaraba, nna, mohlanka wa gago, lehono? Morena Modimo wa Israele, ge molato e le wa ka goba e le wa Jonathane, araba ka Urime, eupša ge e le wa bahlabani ba gago ba Israele, araba ka Tumime.” Karabo e ile ya šupa Jonathane le Saulo, mme banna ba tšwa molatong. ₄₂Ke moo Saulo a itšego: “Šupang wa phošo mo go nna le morwa wa ka, Jonathane.” Gomme gwa šupša Jonathane. ₄₃Ka gona Saulo a botšiša Jonathane a re: “A o dirile eng?”

Jonathane a mo fetola a re: “Ke latswitše totšana ntlheng ya lepara le ke le swerego. Ke nna yo – nka no bolawa.”

₄₄Saulo a re go yena: “A Modimo a mpolaye ge wena, Jonathane, o ka se bolawe!”

₄₅Eupša banna ba re go Saulo: “Na Jonathane a ka bolawa mola e le yena a dirilego gore Israele e fenye ka mokgwa wo mogolo wo? Aowaa! Re ena ka Morena yo a phelago gore a ka se lahlegelwe le ke ntsana ya moriri wa hlogo. Se a se dirilego lehono se dirilwe ka thušo ya Modimo.” Ka gona banna ba hlakodiša Jonathane mme a se ke a bolawa.

₄₆Ka morago ga moo Saulo a tlogela go rakediša Bafilista, gomme Bafilista ba gomela nageng ya bona.

₄₇Ge Saulo e seno ba kgoši ya Israele, o ile a lwa le manaba a gagwe ka moka ka mathoko ohle: batho ba Moaba, ba Amone, le ba Edomo, magoši a Tsoba, le Bafilista. Mo gongwe le mo gongwe mo a lwago o be a fenya. ₄₈O ile a lwa ka bogale gomme a ba a fenya le bona batho ba Amaleke. A phološa le Baisraele diatleng tša bahlakodi ba bona.

₄₉Barwa ba Saulo e be e le Jonathane, Jishbi le Malkishua. Barwedi ba gagwe e be e le ba babedi: yo mogolo o ile a rewa leina la Merabe, mme yo monnyane a rewa la Migale. ₅₀Mosadi wa gagwe e be e le Ahinoamo, morwedi wa Ahimaatse; molaodi wa madira a gagwe e le Abnere, morwa wa Nere, rangwane wa Saulo. ₅₁Kishe, tatagoSaulo, le Nere, tatagoAbnere, e be e le barwa ba Abiele.

₅₂Bophelong ka moka bja Saulo Baisraele ba be ba elwa le Bafilista o šoro. Ka gona, mo Saulo a bego a hwetša monna yo a tiilego goba yo bogale, o be a mo tsenya madireng a gagwe.

₁Samuele o ile a re go Saulo: “Ke nna yo Morena a nthomilego go tlo go tlotša gore o be kgoši ya Israele. Bjale theetša se Morena Ramaatlaohle a se bolelago. ₂Yena o tlile go otla batho ba Amaleke ka gobane borakgolokhukhu ba bona ba ile ba thibela Baisraele ge ba etšwa Egepeta. ₃Sepela o yo hlasela Baamaleke, mme tšohle tše ba nago natšo o di fediše. O se ke wa šadiša selo; o bolaye banna, basadi, bana le masea; dikgomo, dihuswane, dikamela le dipokolo.”

₄Saulo a kgobokanya madira a gagwe gomme a a beakanya kua Telaime: go be go na le bahlabani ba ba sepelago ka maoto ba dikete tše makgolo a mabedi ba ba tšwago Israele le ba dikete tše lesome ba ba tšwago Juda. ₅Ke moka yena le banna ba gagwe ba ya motseng wa Amaleke gomme ba ba lalela ka molapong. ₆Saulo a roma tshebi ya dira go Bakene, batho bao borakgolokhukhu ba bona e itšego ya ba ba botho go Baisraele ge ba etšwa Egepeta, ya ba botša ya re: “Sepelang le tlogeleng Baamaleke, gore ke se ke ka tla ka le feleletša le bona.” Ka gona Bakene ba tloga.

₇Saulo a thopa Baamaleke go tloga Habila go yo fihla Shure, ka bohlabela bja Egepeta; ₈a swara kgoši Agaga a phela gomme a bolaya setšhaba sa gagwe ka moka. ₉Eupša Agaga Saulo le banna ba gagwe ba se ke ba mmolaya; le dihuswane le dikgomo le dikgapana le diphookwana tše di nonnego ba se ke ba di bolaya, le selo se sengwe le se sengwe se e bego e le se sebotse; ba ile ba bolaya fela tše di nyatšegago le tše ba sa di ratego.

₁₀Morena a re go Samuele: ₁₁“Ke a itshola ge ke ile ka dira Saulo kgoši; o ntlhanametše gomme o nyaditše ditaelo tša ka.” Samuele a befelwa, gomme bošego ka moka a phophotha go Morena. ₁₂Ya re e sa le bošego ka le le latelago a tloga a yo nyaka Saulo. A kwa gore Saulo o ile motseng wa Karmele moo a bego a ikagetše segopotšo, gomme a ba a fetela Gilgale. ₁₃Samuele a ya go Saulo mme Saulo a mo dumediša a re: “Morena a go šegofatše, Samuele! Ke phethile taelo ya Morena.”

₁₄Samuele a mmotšiša a re: “Ke go reng bjale ke ekwa dikgomo le dihuswane di lla?”

₁₅Saulo a mo fetola a re: “Banna ba ka ba di thopile go Baamaleke. Ba tšere dikgomo le dihuswane tše kaonekaone gore ba tle ba direle Morena Modimo wa gago sehlabelo ka tšona, mme tše dingwe tšona re di bolaile thoo.”

₁₆Samuele a re go yena: “Homola, ke go botše se Morena a mpoditšego sona bošegong bjo bo fetilego.”

Saulo a re: “Mpotše.”

₁₇Samuele a re: “Le ge o itšea gore ga se wena wa selo, a ga o yena moetapele wa dikgoro tša Israele? Morena o go tloditše gore o be kgoši ya Israele, ₁₈gomme a go roma a re o yo fediša badiradibe bale ba Amaleke. O go boditše gore o lwe le bona go fihlela o ba bolaya ka moka. ₁₉Ke ka lebaka lang bjale, o se wa phetha ditaelo tša gagwe? Ke ka lebaka lang o akgofetše go thopa thoto, mme ka go dira bjalo wa dira se se nyamišago Morena?”

₂₀Saulo a mo fetola a re: “Ke tloga ke phethile ditaelo tša Morena. Ke tšwile bjalo ka ge a mpoditše, ka boa le kgoši Agaga, gomme Baamaleke ka ba bolaya ka moka. ₂₁Eupša banna ba ka ga se ba bolaya dihuswane le dikgomo tše kaonekaone tše ba di thopilego; bakeng sa seo, ba di tlišitše mo Gilgale go tlo direla Morena Modimo wa gago sehlabelo ka tšona.”

₂₂Samuele a re: “A ke eng seo se kgahlago Morena kudu: go phetha ditaelo tša gagwe, goba go mo direla dihlabelo tša go tšhungwa ka moka le dihlabelo tše dingwe? Go kaone go mo theetša go na le gore o mo direle sehlabelo ka dikgapa tše kaonekaone. ₂₃Go mo tsogela maatla ke mo gobe bjalo ka boloi, gomme go ikgogomoša ke sebe go swana le go rapela medimo e šele. Ka gobane o ganne taelo ya Morena, le yena o go ganne mme o ka se hlwe o le kgoši.”

₂₄Saulo a mo fetola a re: “Ee, ke dirile sebe. Ga se ka phetha taelo ya Morena le tša gago ditaelo. Ke boifile banna ba ka mme ka dira se ba se nyakago. ₂₅Eupša bjale ke a go kgopela, ntebalele sebe seo mme o boele le nna Gilgale, gore ke yo khunamela Morena.”

₂₆Samuele a mo fetola a re: “Nka se boele nago. O ganne taelo ya Morena mme bjale le yena o go ganne, mme o ka se hlwe o le kgoši ya Israele.”

₂₇Ke moo Samuele a retologilego a re ke a tloga, eupša Saulo a mo swara ka morumo wa seaparo, gomme wa gagoga. ₂₈Samuele a re go yena: “Morena o gagotše bogoši bja Israele go wena lehono mme o bo neetše monna yo mongwe wa geno yo a go phalago. ₂₉Modimo yo Baisraele ba ikgantšhago ka yena ga a bolele maaka goba a itshola. Ga se yena motho – ga a hlanoge.”

₃₀Saulo a mo fetola a re: “Ke dirile sebe. Fela se ntlhompholle mo pele ga baetapele ba banna ba ka le pele ga Baisraele ka moka. Boela morago le nna gore ke yo khunamela Morena Modimo wa gago.” ₃₁Ka gona Samuele a boela le yena Gilgale, gomme Saulo a khunamela Morena.

₃₂Samuele a re: “Tlišang Kgoši Agaga mo go nna.” Agaga a tla go yena a thabile a ipotša a re: “Ka therešo bohloko bja lehu bo fetile!” ₃₃Eupša Samuele a re: “Bjalo ka ge tšhoša ya gago e lobišitše basadi bana, bjale mmago le yena o tla loba ngwana.” Gomme a ripaganya Agaga pele ga aletare kua Gilgale.

₃₄Ka morago Samuele a ya Rama, gomme Kgoši Saulo a ya gae kua Gibea. ₃₅Samuele o ile a se hlwe a bonana le Saulo go fihlela a ehwa; le ge go le bjalo o ile a fela a nyamile ka lebaka la gagwe. Gomme Morena a itshola ge a ile a dira Saulo kgoši ya Israele.