Pesalome 10

₁Morena, o reng o emela kgole?

O reng o iphihla mohla wa mathata?

₂Bakgopo ka go ipona ba tlaiša bahlaki;

ba ba tanya ka maanomabe a ba ba logetšego ona.

₃Ba ikgantšha ka ditumo tša bona tše mpe;

ba megabaru ba rogaka Morena ba mo nyefola.

₄Ba bolela ba šinyaletše ba re:

“Modimo ga a lefeletše.”

Menaganong ya bona ye mebe ga ba bee Modimo felo.

₅Ba atlega go tšohle tše ba di dirago.

Ga ba nagane ka dikahlolo tša Modimo;

ba nyatša manaba a bona ohle.

₆Motho wa bona o ipotša a re:

“Nna nka se palelwe;

nka se tsoge ke wetše mathateng.”

₇Magano a bona a tletše mahlapa le boradia le ditšhošetšo.

Ge ba bolela,

ba tshwa mantšu a mabe le a makgopo.

₈Ba lalela batho kgauswi le metse;

ba bolaya ba ba se nago molato ka go ba khukhunetša.

Ba lalela bahlokamahlatse.

₉Ba batalala bjalo ka tau ka serobeng.

Ba lalela bahlaki gore ba ba sware.

Ba ba tanya ka difu tša bona ba ba goga.

₁₀Ba hlasela bahlokamahlatse ba ba pšhatlaganya,

ba ba hlasela gasehlogo.

₁₁Motho wa bona o gopola gore Modimo ga a di šetše.

O ikhurumeditše sefahlego,

a ka se mmone le gatee.

₁₂Nanoga, Morena!

Hle, Modimo, tsenya letsogo;

baikokobetši bona o se ba lebale!

₁₃Bakgopo ba reng ba nyatša Modimo,

motho wa bona a gopola gore yena Modimo a ka se mo otle?

₁₄Eupša wena, Modimo, o a di bona;

matshwenyego le mahlomola o a ela hloko,

wa a fediša.

Mohlokamahlatse o bota wena;

ka mehla Mothuši wa ditšhiwana ke wena.

₁₅Robaganya yo kgopo le yo mobe maatla;

mo otlele bokgopo bja gagwe go fihlela a se sa bo dira.

₁₆Morena ke Kgoši go iša go sa felego;

baditšhaba ba rakilwe nageng ya gagwe.

₁₇Morena, o kwele dillo tša banyatšegi;

o tla ba bea pelo, wa kwa

₁₈dillo tša ditšhiwana le tša ba ba gateletšwego,

wa ba lamolela,

gore ba se sa tšhošwa ke motho mo lefaseng.