To The Word – Day 65

₁Ka morago ga lehu la Joshua setšhaba sa Israele se ile sa botšiša Morena sa re: “Ke efe ya dikgoro tša rena ye e swanetšego go ba ya mathomo ya go yo hlasela Bakanana?”

₂Morena a ba fetola a re: “Kgoro ya Juda a e ye pele. Ke ba gafela naga ye.”

₃Batho ba Juda ba re go batho ba Simeone: “Yaang le rena nageng yeo re aroletšwego yona, mme re lweng le Bakanana mmogo. Ka morago re tla ya le lena nageng yeo le e aroletšwego.” Ka gona kgoro ya Simeone ₄le ya Juda tša ya ntweng mmogo. Morena a gafela Bakanana le Baperise diatleng tša bona, gomme ba fenya banna ba dikete tše lesome kua Beseke. ₅Ba hwetša Adoni-Beseke moo mme ba lwa le yena. ₆O ile a tšhaba, fela ba mo rakediša, ba mo swara, mme ba mo ripa menwana ye megolo ya maoto le ya diatla. ₇Adoni-Beseke a re: “Magoši a masome a a šupago ao a ripilwego menwana ye megolo ya maoto le ya diatla a be a topa marathana ka fase ga tafola ya ka. Bjale Modimo o ntirile se ke ilego ka ba dira sona.” A išwa Jerusalema moo a hwetšego gona.

₈Banna ba Juda ba ile ba hlasela Jerusalema mme ba e thopa. Ba bolaya batho ba yona mme ba tšhuma motse woo. ₉Ka morago ga moo ba tšwela pele go yo lwa le Bakanana bao ba bego ba dula nageng ya dithaba le nagengtlase le nageng ya ka borwa ye e omilego. ₁₀Ba hlasela Bakanana ba ba bego ba dula motseng wa Hebrone wo o bego o bitšwa Kiriate-Arba. Moo ba fenya kgorwana ya Sheshai le ya Ahimane le ya Talmai.

₁₁Go tloga moo banna ba Juda ba hlasela motse wa Debire, woo ka nako yeo o bego o bitšwa Kiriate-Sefere. ₁₂Yo mongwe wa bona yo a bitšwago Kalebe a re: “Monna yo a ka hlaselago Kiriate-Sefere mme a e thopa ke tla mo fa morwedi wa ka, Aksa, gore e be mosadi wa gagwe.” ₁₃Otniele, morwa wa Kenase, ngwanaboKalebe, a thopa motse woo, ka gona Kalebe a mo neela Aksa, morwediagwe, gore e be mosadi wa gagwe. ₁₄Ge ngwetši e goroga mošašeng wa Otniele, yena a e tutuetša gore e kgopele tatagoyona tšhemo. Aksa a fologa pokolo, gomme Kalebe a mmotšiša gore o nyaka eng. ₁₅Yena a mo fetola a re: “Mphe mpho ya taelano. Ka ge karolo ye o mphilego yona e le nageng ye e omilego, mphe le methopo.” Ka gona Kalebe a mo fa methopo ya ka tletlolo le ya ka tlase.

₁₆Ditlogolo tša ratswalagoMoshe, Mokene, di ile tša tloga le batho ba kgoro ya Juda Jeriko, motseng wa mehlare ya mepalema, tša ya nageng ye e omilego, ka borwa bja Arade kua Juda. Moo tša dula gare ga Baamaleke. ₁₇Batho ba kgoro ya Juda ba ile ba ya le ba kgoro ya Simeone, gomme ba fenya Bakanana bao ba bego ba dula motseng wa Tsefate. Ba o pšhatla mme ba o rea leina la Horma. _18-19Morena a thuša batho ba Juda, gomme ba thopa naga ya dithaba. Eupša ba se ke ba thopa Gasa goba Ashkelone goba Ekrone, goba dinaga tše di bego di bapile le tšona. Batho bao ba bego ba dula moo go ipata le lebopo la lewatle ba be ba na le makoloi a ntwa a tshipi; ka gona batho ba Juda ba se ke ba kgona go ba leleka. ₂₀Bjalo ka ge Moshe a be a laetše, Hebrone e ile ya fiwa Kalebe, yo a ilego a leleka dikgorwana tše tharo tša Anake motseng. ₂₁Eupša batho ba kgoro ya Benjamene ba se ke ba leleka Bajebuse ba ba bego ba dula Jerusalema. Go tloga ka nako yeo Bajebuse ba dutše le batho ba Benjamene moo.

_22-23Batho ba kgoro ya Efraime le ba ya Manase ba ile ba yo hlasela motse wa Bethele, woo mehleng yeo o bego o bitšwa Luse. Morena a ba thuša. Ba romela dihlodi motseng. ₂₄Dihlodi tšeo tša bona monna a etšwa moo motseng, gomme tša re go yena: “Re laetše felwana moo re ka tsenago gona, mme re tla go dira ka botho.” ₂₅Ka fao monna yoo a ba laetša, gomme banna ba kgoro ya Efraime le ba ya Manase ba bolaya bohle moo motseng, ntle le monna yola le ba kgorwana ya gabo ka moka. ₂₆Ka morago monna yoo a ya nageng ya Bahete, a aga motse fao, mme a o rea leina la Luse, leo le bjale e sa lego leina la wona.

₂₇Kgoro ya Manase e ile ya se ke ya leleka batho bao ba bego ba dula metseng ya Bethe-Sheane, Taanake, Doro, Jibleamo, Megido, le metsaneng ya kgauswi le yona; Bakanana ba ile ba ikgethela go dula moo. ₂₈Ge Baisraele ba eba le maatla go feta pele, ba ile ba gapeletša Bakanana go ba šomela, fela ba se ke ba ba leleka ka moka.

₂₉Kgoro ya Efraime e ile ya se ke ya leleka Bakanana ba ba bego ba agile motseng wa Gesere, ka gona Bakanana ba no fela ba dula moo le bona.

₃₀Kgoro ya Sebulone e ile ya se ke ya leleka batho motseng wa Kitrone le go wa Nahalole. Bakanana bao ba ile ba no fela ba dula moo nabo, gomme ba gapeletšwa gore ba ba šomele.

₃₁Kgoro ya Asere e ile ya se ke ya raka batho ba ba bego ba agile motseng wa Ako, wa Sidone, wa Mahalebe, wa Akesibe, wa Helba, wa Afeke, le wa Rehobo. ₃₂Batho ba Asere ba ile ba dula le Bakanana ba agišana nabo, ka ge ba ile ba se ke ba ba leleka.

₃₃Kgoro ya Naftali e ile ya se ke ya leleka batho ba ba bego ba dutše motseng wa Bethe-Shemeshe le wa Bethe-Anate. Ba ile ba dula le Bakanana ba agišana nabo, eupša ba ba gapeletša gore ba ba šomele.

₃₄Baamore ba ile ba thibelela batho ba kgoro ya Dane kua nageng ya dithaba, mme ba se ke ba ba lesa ba theogela molaleng. ₃₅Baamore ba ikgethela go dula kua Ayalone le Shaalbime le thabeng ya Herese, eupša batho ba kgoro ya Efraime le ba ya Manase ba ba gatelela, gomme ba ba gapeletša gore ba ba šomele.

₃₆Ka leboa la Sela mollwane wa Baedomo o be o putla Sefateng sa Diphepheng.

₁Morongwa wa Morena o kile a tloga Gilgale a ya Bokime gomme a re go Baisraele: “Ke le ntšhitše Egepeta ka le tliša nageng ye ke e enetšego borakgolokhukhu ba lena, ka re: ‘Nka se tsoge ke fedišitše kgwerano ya ka le lena, ₂fela le lena le se ke la dira kgwerano le batho ba ba dulago mo nageng ye. Le phušole dialetare tša bona.’ Eupša ga se la dira se ke le boditšego sona. Le diretšeng? ₃Ka lebaka leo, bjale ke le botša gore nka se leleke batho ba ge le le gare le tsena. E tla ba manaba a lena, mme le tla goketšwa ke ge ba khunamela medimo ya bona.” ₄Ge morongwa a fetša go realo, setšhaba sa Israele ka moka sa thoma go hlaboša mantšu sa lla, ₅mme ke ka moo felo fao go bitšwago Bokime. Ba ile ba direla Morena dihlabelo fao.

₆Joshua o ile a laelana le Baisraele, mme yo mongwe le yo mongwe a boela karolong ya gagwe ya naga a dula go yona. ₇Ge Joshua a be a sa phela, setšhaba sa Israele se be se direla Morena, mme le ka morago ga lehu la gagwe ba ile ba tšwela pele le go mo direla ge bagolo bale ba bonego dilo ka moka tše kgolo tše Morena a di diretšego Baisraele ba sa phela. ₈Mohlanka wa Morena, Joshua, morwa wa Nunu, o ile a hlokafala a na le mengwaga ye lekgolo le lesome. ₉ A bolokwa karolong ya gagwe ya naga kua Timnate-Herese, nageng ya dithaba ya Efraime, ka leboa la thaba ya Gaashe. ₁₀Moloko woo ka moka le wona o ile wa hwa, gomme moloko wo o o latelago wa lebala Morena le seo a se diretšego Baisraele.

₁₁Gomme setšhaba sa Israele sa dira sebe pele ga Morena, sa thoma go direla boBaale. ₁₂Ba furalela Morena, Modimo wa borakgolokhukhu ba bona, yo a ba ntšhitšego Egepeta, mme ba thoma go khunamela medimo ye mengwe, medimo ya ditšhaba tšeo di bego di bapile le bona. Ba e obamela mme ba rumola Morena. ₁₃Ba furalela Morena mme ba direla boBaale le boAstarte. ₁₄Ka gona Morena a ba tukela bogale, mme a ba gafela diatleng tša bahlakodi bao ba ilego ba ba tšeela dithoto tša bona. A lesa manaba ao a bapilego le bona a ba fenya, mme ba se sa kgona go itšhireletša. ₁₅Ka nako ye nngwe le ye nngwe ge ba eya ntweng, Morena o be a ba hlanamela, bjalo ka ge a be a ile a ena. Ba ile ba ba matshwenyegong a magolo.

₁₆Ka gona Morena a ba fa baetapele ba go ba phološa go bahlakodi ba bona. ₁₇Eupša baetapele bao ba ba hlokomologa. Baisraele ba se botegele Morena, eupša ba obamela medimo ye mengwe. Botatagobona bona ba be ba phetha ditaelo tša Morena, fela moloko wo wona wa phakiša wa lesa go di phetha. ₁₈Nako ye nngwe le ye nngwe ge Morena a ba fa moetapele, o be a mo thuša mme a phološa setšhaba manabeng a sona ge yena moetapele yoo a sa phela. Morena o be a ba šokela ka gobane ba be ba tsetla ge manaba a bona a ba tshwenya a ba gateletše. ₁₉Eupša ge moetapele yoo a ehwa, batho ba be ba boela ditseleng tša bona tša kgale mme ba itshwara gampe go feta botatagobona. Ba be ba obamela medimo ye mengwe ba e direla, mme ba ngangabala ba itshepelela ka ditsela tša bona tše mpe. ₂₀Morena o be a tukela Baisraele bogale gomme a re: “Setšhaba se se lahlile kgwerano ye ke laetšego borakgolokhukhu ba bona gore ba e botegele. Ka gobane ga se ba ntheeletša, ₂₁nka se sa leleka le se tee sa ditšhaba tše di bego di sa le mo nageng ge Joshua a ehwa. ₂₂Ke tla ba leka ka ditšhaba tše, gore ke bone ge eba ba tla sepela ka ditsela tša ka bjalo ka borakgolokhukhu ba bona.” ₂₃Ka gona Morena a lesa ditšhaba tšeo tša dula moo nageng. A se ke a ba gafela diatleng tša Joshua, goba a ba leleka ka pela ka morago ga lehu la gagwe.

₁Ka gona, Morena a šadiša ditšhaba tše dingwe moo nageng go leka Baisraele ba ba bego ba sa tsebe dintwa tšela tša Kanana. ₂O ile a dira seo e le fela go ruta moloko wo mongwe le wo mongwe wa Baisraele ntwa, gagologolo bao ba bego ba se ba ka ba ya ntweng. ₃Ba ba ilego ba leswa moo nageng e be e le ba metse ye mehlano ya Bafilista, Bakanana ka moka, Basidone, le Bahibe ba ba bego ba dula thabeng ya Lebanone, go tloga thabeng ya Baale-Hermone go ba go yo fihla sefateng sa Hamate. ₄E be e tla ba go leka Baisraele gore Morena a bone ge eba ba tla phetha ditaelo tše a di filego borakgolokhukhu ba bona ka Moshe, goba ba ka se di phethe. ₅Ka fao setšhaba sa Israele sa dula gare ga Bakanana, Bahete, Baamore, Baperise, Bahibe le Bajebuse. ₆Ba nyalelana le bona, mme ba khunamela medimo ya bona.

₇Setšhaba sa Israele se ile sa dira sebe pele ga Morena Modimo wa sona, sa mo lebala sa khunamela boBaale le dikota tša borapedi. ₈Ka gona Morena a befelelwa Baisraele mme a lesa Kgoši Kushane-Rishataime wa Mesopotamia a ba thopa, mme a ba buša mengwaga ye seswai. ₉Ke mo Baisraele ba lletšego Morena, mme yena a ba romela motho yo a ilego a ba lokolla. Yena e be e le Otniele, morwa wa Kenase, ngwanaboKalebe. ₁₀Moya wa Morena wa mo aparela, gomme ya ba moetapele wa Baisraele. Otniele a ya ntweng, gomme Morena a gafela kgoši ya Mesopotamia diatleng tša gagwe. ₁₁Go ile gwa ba le khutšo nageng mengwaga ye masome a mane. Ka morago Otniele a hwa.

₁₂Setšhaba sa Israele se ile sa dira sebe gape pele ga Morena. Ka lebaka la taba yeo Morena a dira gore Kgoši Eglone wa Moaba a be le maatla go feta Baisraele. ₁₃Eglone a bokanya Baamone le Baamaleke; bona ba fenya Baisraele gomme ba thopa Jeriko, motse wa mehlare ya mepalema. ₁₄Baisraele ba hlankela Eglone mengwaga ye lesome le ye seswai.

₁₅Ka morago ba llela Morena, gomme yena a ba romela monna wa go tla go ba lokolla. Yoo e be e le Ehude, monna wa nngejane, morwa wa Gera, wa kgoro ya Benjamene. Setšhaba sa Israele sa romela diloba go Kgoši Eglone wa Moaba ka yena. ₁₆Ehude o be a itiretše tšhoša ya magale a mabedi, mme botelele bja yona e ka ba disentimetara tše masome a mane le tše di selelago. O be a e tlemelela ka lehlakoreng la gagwe la go ja, ka gare ga diaparo tša gagwe. ₁₇A iša diloba tšeo go Eglone yo e bego e le monna wa go nona kudu. ₁₈Ge Ehude a seno mo fa diloba tšeo o ile a tloga le banna bale ba bego ba di rwele ge ba boela gae. ₁₉Fela yena a ba gomela mo go bego go le medimo ya go betlwa ka maswika, kgauswi le Gilgale, mme a boela go Eglone a re: “Kgoši, ke go swaretše molaetša wa ka thopeng.”

Ka gona kgoši a laela bahlanka ba gagwe a re: “Re tlogeleng re nnoši!” Mme ka moka ga bona ba tšwa.

₂₀Bjale, ge kgoši a sa dutše a nnoši ka phapošing ya gagwe ye e fodilego ya kua tlhakeng ya ntlo, Ehude a mmatamela a re: “Ke go swaretše molaetša wo o tšwago go Modimo.” Kgoši a ema ka maoto. ₂₁Ka letsogo la nngele Ehude a ntšha tšhoša yela moo lehlakoreng la gagwe la go ja mme a e tsotsometša dimpeng tša kgoši. ₂₂Tšhoša ka moka ya sobelela le maswaro, mme mabipi a e pipetša ka gobane Ehude o ile a se ke a e ntšha dimpeng tša kgoši. Tšhoša yeo ya tšwelela ka morago. ₂₃Ke moo Ehude a tšwetšego mathuding, a tswalela mejako, a e kgonya, ₂₄mme a tloga. Bahlanka bale ba tla ba hwetša mejako e kgontšwe, fela ba no gopola gore kgoši o ka gare, o sa ithoma. ₂₅Ba ile ba leta moo go fihlela ba thoma go belaela, mme ge ba bona a sa bule mejako, ba tšea sekgonyo ba e kgonyolla. Ba makala ba bona mong wa bona fao, a rapaletše fase a hwile.

₂₆Ehude o ile a tloga mola ba sa letile, a sepela a ba a feta mola go bego go le medimo ya go betlwa ka maswika mme a tšhabela Seira. ₂₇Ge a fihla moo a letša phalafala nageng ya dithaba ya Efraime go biletša banna ba Israele ntweng, mme a ba eta pele ba theoga dithaba. ₂₈A re go bona: “Ntateleng! Morena o gafetše Bamoaba, manaba a lena, diatleng tša lena.” Ka gona ba latela Ehude ba theoga mme ba thopa madibogo a Jordane; ba se ke ba lesa le monna o tee a tshela. ₂₉Tšatši leo ba bolaya bahlabani ba e ka bago ba dikete tše lesome ba Bamoaba ba go tia ba dinatla; gwa se be le o tee wa bona yo a phologago. ₃₀Baisraele ba fenya Bamoaba tšatši leo, gomme gwa ba le khutšo nageng mengwaga ye masome a seswai.

₃₁Moetapele yo a ilego a latela Ehude e bile Shamgare, morwa wa Anate. Le yena o ile a phološa Baisraele ka go bolaya Bafilista ba makgolo a a selelago ka phata ya go gapa dipholo.

₁Ka morago ga ge Ehude a hwile, setšhaba sa Israele se ile sa dira sebe gape pele ga Morena. ₂Ka gona Morena a ba gafela diatleng tša Jabine, kgoši ya Mokanana, yo a bego a buša a le motseng wa Hatsore. Molaodi wa madira a gagwe e be e le Sisera, yo a bego a dula kua Haroshete-ya-Baditšhaba. ₃Jabine o be a na le makoloi a ntwa a tshipi a makgolo a senyane, gomme a gateletše setšhaba sa Israele ka sehlogo mengwaga ye lesome. Ke mo Baisraele ba lletšego Morena gore a ba thuše.

₄Bjale Debora, mosadi wa Lapidote, e be e le moprofeta wa mosadi, gomme a ahlola Baisraele mehleng yeo. ₅O be a fela a dula ka fase ga mohlare wa mopalema wo o bego o bitšwa mopalema wa Debora, gare ga Rama le Bethele, nageng ya dithaba ya Efraime, mme setšhaba sa Israele se etla moo go yena gore a se ahlole. ₆Ka letšatši le lengwe a roma motho go yo bitša Barake, morwa wa Abinoamo, wa motse wa Kedeshe kua Naftali, mme a re go yena: “Morena Modimo wa Israele o a go laela o re: ‘Tšea banna ba dikete tše lesome kgorong ya Naftali le go ya Sebulone mme o ba ete pele go ya thabeng ya Taboro. ₇Ke tla tliša Sisera, molaodi wa madira a Jabine, go tlo lwa nago kua nokaneng ya Kishone. O tla be a na le makoloi a gagwe a ntwa le madira a gagwe, fela ke tla mo gafela diatleng tša gago.’ ”

₈Ke moo Barake a mo fetotšego a re: “Ke tla ya ge o eya le nna, eupša ge o sa ye le nna, gona nka se ye.”

₉Debora a mo fetola a re: “Go lokile, ke tla ya nago, fela go ka se tumišwe wena ka lebaka la go fenya moo, ka gobane Morena o tla gafela Sisera diatleng tša mosadi.” Ka gona Debora a tloga a ya Kedeshe a na le Barake. ₁₀Barake a laela kgoro ya Sebulone le ya Naftali gore di ye Kedeshe, gomme a latelwa ke banna ba dikete tše lesome. Debora o be a na le yena.

₁₁Ka yona nako yeo Hebere, Mokene, o be a hlomile mošaša wa gagwe go batamela moo Kedeshe, kgauswi le mohlare wa moeike kua Tsaananime. O be a tlogile go Bakene ba bangwe, ditlogolo tša Hobabe, molamo wa Moshe.

₁₂Ge Sisera a ekwa gore Barake o rotogetše thabeng ya Taboro, ₁₃a laela gore makoloi a gagwe a ntwa a makgolo a senyane le bahlabani ba gagwe ka moka ba tloge Haroshete-ya-Baditšhaba ba ye nokaneng ya Kishone.

₁₄Ke moo Debora a itšego go Barake: “Sepela! Morena o go etile pele! Lehono o gafetše Sisera diatleng tša gago.” Ka gona Barake a fologa thaba ya Taboro le bahlabani ba gagwe ba dikete tše lesome. ₁₅Ge Barake a hlasela ka madira a gagwe, Morena a gakantšha Sisera le makoloi a gagwe ohle a ntwa le bahlabani ba gagwe ka moka. Sisera a fologa koloi ya gagwe ya ntwa gomme a tšhaba ka maoto. ₁₆Barake a rakediša makoloi ao a ntwa le madira go ba go yo fihla Haroshete-ya-Baditšhaba, gomme madira ka moka a Sisera a bolawa. Gwa se ke gwa šala motho.

₁₇Sisera o ile a tšhabela mošašeng wa Jaele, mosadi wa Hebere, Mokene, ka gobane Kgoši Jabine wa Hatsore o be a sa lwe le lapa la Hebere. ₁₈Jaele o ile a tšwa go yo gahlanetša Sisera gomme a re go yena: “Tsena, mong wa ka; tsena ka mošašeng wa ka. O se ke wa boifa.” Ka gona a tsena, mme a mo uta ka morago ga seširo. ₁₉Sisera a re go yena: “Hle, mphe meetse a go nwa; ke swerwe ke lenyora.” Jaele a khuromolla lekuka la maswi, a mo noša, mme a mo uta gape. ₂₀Ke moo Sisera a mmoditšego a re: “Ema kua mojakong wa mošaša, gomme ge motho a ka tla mo mme a go botšiša ge eba ga go motho mo, o re: ‘Aowa.’ ”

₂₁Sisera o be a lapile moo e lego gore o ile a napa a ya ka boroko. Ke mo Jaele a tšerego notwana le sebapola sa tente, a nanyetša go Sisera, mme a mmolaya ka go kokotela sebapola sela gare ga leihlo le tsebe go fihlela se phuleletša hlogo e bile se tsenelela fase. ₂₂Ge Barake a re o hlomere Sisera, Jaele a tšwela ntle go yo mo gahlanetša gomme a re go yena: “Tlaa mo! Ke tla go laetša monna yo o mo nyakago.” Ka gona Barake a tsena ka moo mošašeng le Jaele, mme a hwetša Sisera a rapaletše fase a hwile, sebapola sela sa tente se sa tseneletše hlogong ya gagwe.

₂₃Letšatšing leo Modimo a goboša Jabine, kgoši ya Mokanana, pele ga Baisraele. ₂₄Ba ile ba fela ba mo hlasela go fihlela yena le madira a gagwe ba fedišwa.

₁Ka letšatši leo Debora le Barake, morwa wa Abinoamo, ba opela kopelo ye:

Go ile gwa ba le khutšo nageng mengwaga ye masome a mane.