BAAHLODI 5

₂Retang Morena!

Baetapele ba etile Baisraele pele;

setšhaba se ithaopile sa lwa.

₃Theetšang, lena magoši!

Nkweng, lena babuši!

Nna ke tla opelela Morena, ka leletša Morena,

Modimo wa Israele, diletšo.

₄Morena, ge o tloga dithabeng tša Seire,

ge o gwataka o etšwa seleteng sa Edomo,

lefase le ile la šikinyega,

legodimo la neša pula.

Ee, meetse a tšhologela fase a etšwa marung.

₅Dithaba tša šikinyega pele ga Morena wa Sinai,

pele ga Morena Modimo wa Israele.

₆Mehleng ya Shamgare, morwa wa Anate,

mehleng ya Jaele,

ditsela tše kgolo di be di se sa šomišwa,

mme basepedi ba tšea ka tsejana tša ka thoko.

₇Metse ya Israele e be e le marope;

e be e se ne motho go fihlela ge nna, Debora, ke etla,

ke etla bjalo ka mmagoBaisraele.

₈Go bile ntwa nageng ge Baisraele ba ikgethela medimo ye mefsa.

A go na le yo a kilego a rwala kotse goba lerumo

banneng ba dikete tše nne ba Israele?

₉Ka mehla ke fela ke gopotše balaodi ba madira ba Israele,

ke gopotše batho ba ba ithaopilego.

Retang Morena!

₁₀Di naganeng,

lena ba le namelago dipokolo tše tšhweu,

le dutše mašeleng a disala,

le lena ba le tlemegilego go sepela ka maoto gohle mo le yago.

₁₁Theetšang!

Bageledi ba meetse didibeng ba anega tša go fenya ga Morena,

go fenya ga setšhaba sa Israele!

Ke moo setšhaba sa Morena se ilego dikgorong tša metse ya sona.

₁₂Hlabelela, Debora, hlabelela!

Hlabelela! Opela kopelo! Hlabelela!

Emelela, Barake, morwa wa Abinoamo,

eta mathopša a gago pele a sepele!

₁₃Ke gona mašaledi a theogetšego go baetapele ba ona;

setšhaba sa Morena sa tla go yena se itokišeditše ntwa.

₁₄Ba tlile ba etšwa go Efraime,

ba tla ka moeding

ka morago ga kgoro ya Benjamene le batho ba yona.

Balaodi ba madira ba tlile ba etšwa Makire,

baetapele ba madira ba etšwa go Sebulone.

₁₅Mantona a Isakara a tlile le Debora;

ee, Baisakara ba ile ba tla,

Barake le yena.

Ba mo latetše ba kgeregela moeding.

Eupša kgoro ya Rubene ya no ba fela le maikemišetšo a magolo.

₁₆Ke ka lebaka lang ba ile ba šala merakeng

ba theeditše badiši ge ba letša dinakana?

Ee, kgoro ya Rubene ya no ba fela

le maikemišetšo a magolo.

₁₇Kgoro ya Gade e ile ya iketla ka bohlabela bja Jordane,

kgoro ya Dane yona ya fela e le kua maselawatleng.

Kgoro ya Asere e ile ya fela e dutše kua lebopong la lewatle,

ba itulela kua go emago maselawatle.

₁₈Eupša batho ba Sebulone le ba Naftali ba ile ba ipea kotsing ya go bolawa.

₁₉Kua Taanake, go ipata le moela wa Megido,

dikgoši di ile tša tla tša lwa;

magoši a Kanana a lwa,

fela ba se ke ba tloga le silibera.

₂₀Dinaledi di lwele di le legodimong;

di be di swere ditsela tša tšona

di elwa le Sisera.

₂₁Nokana ya Kishone e ile ya ba gogola,

nokana ya kgale, Kishone.

Ke tla gwatakela pele ke sa šie!

₂₂Ke moo dipere di tlilego di kgatha,

di kgatha di kiba fase ka ditlhako.

₂₃Morongwa wa Morena a re:

“Rogakang Merose, rogakang,

rogakang ba ba dulago moo!

Ga se ba tla go thuša Morena,

ba tla e le bahlabani go tlo mo lwela.”

₂₄Mošegofatšwa gare ga basadi ke Jaele, mosadi wa Hebere, Mokene;

ke mošegofaditšwa gare ga basadi ba ba dulago ka mešašeng.

₂₅Sisera o kgopetše meetse,

yena a mo fa maswi;

o mo file lebebe ka sebjana se sebotse.

₂₆Ka seatla se sengwe a tšea sebapolatente,

ka sa la go ja a swara notwana ya mošomi;

a kokotela Sisera gomme a mo pšhatla hlogo;

a mo phuleletša gare ga leihlo le tsebe.

₂₇Sisera a phuhlama ka matolo,

a wa fase mme a totompala maotong a Jaele.

A phuhlama fase ka matolo maotong a gagwe, mme a wa;

a wela fase, a hwa.

₂₈MmagoSisera a lebelela ntle ka lefasetere,

a balabala a lebeletše ka nthoba a re:

“Koloi ya gagwe ya ntwa e reng e diegile?

Ke ka lebaka lang dipere tša gagwe di sa boe ka pela?”

₂₉Makgarebe a bohlalehlale a mo fetola,

gomme yena a ipotša leboelela a re:

₃₀“Ba sa nyaka fela tše ba ka di thopago ba di abagana,

mosetsana o tee goba ba babedi mohlabaning yo mongwe le yo mongwe,

lešela la mebalabala la Sisera,

mašela a melogelelo a molala wa mohumagadi.”

₃₁A manaba a gago a hwe ka wona mokgwa woo, Morena,

ba ba go ratago bona

ba tage bjalo ka letšatši ge le hlaba ka letago!