To The Word – Day 36

₁Morena o laetše Moshe ₂gore a fe Baisraele melawana ye e latelago. Ge monna goba mosadi a ikanne go ba Monasire mme a ineetše go Morena, ₃a ile beine le mabjala a mangwe. A se ke a nwa seno sa mohuta ofe le ofe se se dirilwego ka diterebe, goba a ja diterebe goba makwapi a diterebe. ₄Ge e sa le Monasire a se ke a ja selo se se tšwago moterebeng, le ge e le dithapo goba makgata a diterebe.

₅Ge a sa itlemile ka keno ya Banasire a se ke a kota moriri goba maledu. O itlemile ka keno nako ka moka ya ge a sa ineetše go Morena, gomme a tlogele moriri le maledu. _6-7Moriri wa gagwe ke sešupo sa go ineela ga gagwe go Modimo, ka gona a se ke a ikgotlela ka go batamela setopo, le ge e ka hlwe e le sa tatagwe, goba sa mmagwe, goba sa morwarragwe, goba sa kgaetšediagwe. ₈Ge e sa le Monasire o kgethwafaleditšwe Morena.

₉Ge mo pele ga gagwe go ka hwa motho ka bjako, ka fao moriri wo o neetšwego Morena wa kgotlelwa, a letele matšatši a a šupago, e be gona a kotago moriri le maledu, gomme a hlweke. ₁₀Ka letšatši la seswai a tliše mekuru ye mebedi goba maeba a mabedi go moprista mojakong wa Tente ya bodulo bja Morena. ₁₁Moprista a dire sehlabelo sa tshwarelo ya dibe ka le lengwe, mme ka le lengwe a dire sehlabelo sa go tšhungwa ka moka, gomme ka tsela ye a phethe tiro ya go mmoelanya le Morena ka ge a ikgotletše ka go ba kgauswi le setopo. Ka lona letšatši leo motho yoo a tlogele moriri wa gagwe o mele gape, ₁₂a ineele Morena ka lefsa, e be Monasire gape. Nako yela ya pele ga e balwe, ka gobane moriri wa gagwe wola o bego o neetšwe Morena o ile wa kgotlelwa. A tliše kwanyana ya ngwaga o tee e be sehlabelo sa tefelo ya dibe.

₁₃Ge nako ya gagwe ya go ikgethwafaletša Morena e fetile a dire ka mokgwa wo: A ye mojakong wa Tente, ₁₄a neele Morena diruiwa tše tharo tše di se nago bosodi: kgapana ya ngwaga o tee ya sehlabelo sa go tšhungwa ka moka, le kwanyana e tee ya tshatšana ya ngwaga o tee ya sehlabelo sa tshwarelo ya dibe, le kgapa ya sehlabelo sa kagišano. ₁₅A tliše le seroto sa dinkgwa tše di dubilwego ntle le komelo: tše di dirilwego ka bupi bjo bo hlakantšwego le makhura a mohlware, le dinkgwana tša diphaphathiana tše di tšhatšhitšwego ka makhura a mohlware, le dikabelo tše di nyakegago tša bupi le tša dino.

₁₆Moprista a di neele Morena, a dire sehlabelo sa tshwarelo ya dibe le sehlabelo sa go tšhungwa ka moka. ₁₇A direle Morena sehlabelo sa kagišano ka kgapa yeo, mme a se neele Morena gotee le seroto seo sa dinkgwa; a mo neele le dikabelo tša bupi le tša dino. ₁₈Monasire a kote moriri wa gagwe mojakong wa Tente, mme a ye a o lahlele mollong woo go wona go tšhungwago sehlabelo sa kagišano.

₁₉Moprista a tšee legetla la kgapa le le bego le apeilwe, le senkgwa se tee le senkgwana sa phaphathiana serotong, mme a di bee ka diatleng tša Monasire. ₂₀Ke moka moprista a di abele Morena e le mpho ye e fiwago yena ka tsela ye e itšeng; ke mpho ye kgethwa ya moprista go tlaleletša mpho ya leumo le kabelo ya serope tšeo di fiwago Morena ka tsela ye e itšeng. Go tloga moo Monasire a ka nwa beine.

₂₁Yeo ke melawana ya Banasire; eupša ge yo mongwe wa bona a ka itlema go ntšha kabelo ye e fetago ye a ikanetšego yona, o swanetše go phetha se a itlemilego ka sona.

₂₂Morena o laetše Moshe ₂₃gore a botše Arone le barwa ba gagwe gore ba šegofatše Baisraele ba re:

₂₇Morena a ba a re: “Ge ba bolela leina la ka ka mokgwa wo go laetša gore ke setšhaba sa ka, gona nna ke tla ba šegofatša.”

₁Ka letšatši le Moshe a feditšego go hloma Tente ya bodulo bja Morena, o ile a e tlotša a e kgethwafatša gotee le ditlabakelo tša yona ka moka, le aletare le ditlabakelo tša yona ka moka. ₂Ke moo baetapele ba Baisraele, e lego mantona a dikgorwana, bona e bego e le baetapele dikgorong tša Baisraele, bale ba bego ba hlokometše go balwa ga setšhaba, ₃ba ilego ba tlišetša Morena dikabelo tša bona: dikoloi tše di selelago tša ditente, le dipholo tše lesome le tše pedi – koloi e tee e ntšhwa ke baetapele ba babedi ba babedi, le pholo e tee e ntšhwa ke moetapele o tee o tee. Ge ba di tlišitše pele ga Tente, ₄Morena a re go Moshe: ₅“Amogela dilo tše mme o di šomiše modirong wo o swanetšego go dirwa wa Tente; o di fe Balefi, go ya ka modiro wo kgorwana ye nngwe le ye nngwe e swanetšego go o dira.” ₆Ka gona Moshe a fa Balefi dikoloi le dipholo tšeo. ₇A fa Bagershone dikoloi tše pedi le dipholo tše nne; ₈a fa Bamerari dikoloi tše nne le dipholo tše seswai. Modiro wa bona ka moka o be o swanetše go dirwa ba laolwa ke Ithamara, morwa wa Arone. ₉Fela Moshe o ile a se ke a fa Bakehate dikoloi goba dipholo, ka gobane dilo tše kgethwa tše ba bego ba di hlokometše ba be ba swanetše go di rwala magetleng.

₁₀Baetapele ba tliša le dikabelo tšatšing la go kgethwafatša aletare le go e tlotša. Ba tliša dimpho tša bona aletareng. ₁₁Morena a re go Moshe: “Ba botše gore letšatši le lengwe le le lengwe moetapele yo mongwe a tliše dimpho tša gagwe tša go kgethwafatša aletare.”

_12-83Ba tlišitše dikabelo tša bona ka lenaneo le:

Dikabelo tšeo ba di tlišitšego di be di swana: sekotlelo se tee sa silibera ya boima bja 1,5 kilokramo, le sebjana se tee sa silibera ya boima bja dikramo tše 800 ye e etšwego go ya ka boima bja papetlana ya silibera ya ka Felo mo Gokgethwa, tšona di tletše bupi bjo bo hlakantšwego le makhura a mohlware e le kabelo ya bupi; pane e tee ya gauta ya boima bja dikramo tše 110 e tletše seorelo; powana e tee, kgapa e tee, le kwanyana ya ngwaga o tee tša sehlabelo sa go tšhungwa ka moka; phooko e tee ya sehlabelo sa tshwarelo ya dibe; dipoo tše pedi, dikgapa tše tlhano, diphooko tše tlhano, le dikwanyana tše di fetšago seatla tše di nago le ngwaga o tee tša sehlabelo sa kagišano.

_84-88Dikabelo tše di tlišitšwego ke baetapele ba lesome le ba babedi tša go khethwafatša aletare le go e tlotša e bile tše:

₈₉Ge Moshe a tsena ka Tenteng go yo bolela le Morena, o ile a kwa Morena a mmolediša ka godimo ga sekhurumelo godimo ga Polokelo ya Kgwerano, gare ga bakerubi ba babedi.

₁Morena a re go Moshe: ₂“Botša Arone gore ge a hloma mabone a a šupago godimo ga sehlomamabone, a a bee ka moo e lego gore seetša se tla bonegela pele.” ₃Arone a phetha taelo yeo, a hloma mabone ka go a lebeletša pele ga sehlomamabone. ₄Sehlomamabone ka moka ga sona go tloga bogatong go fihla matšobeng a sona se be se dirilwe ka gauta ye e rutšwego. Moshe o be a se dirile ka go swantšha se Morena a bego a mmontšhitše sona.

₅Morena a re go Moshe: ₆“Ntšha Balefi go Baisraele ka moka, o ba hlwekiše ₇ka mokgwa wo: O ba fokele ka meetse a go hlwekiša; ba ipoole mmele ka moka, ba hlatswe le diaparo tša bona. Ke gona ba tlago hlweka. ₈Ba tšee powana le kabelo ya bupi ye e nyakegago ye e hlakantšwego le makhura a mohlware; o tšee le powana ye nngwe ya sehlabelo sa tshwarelo ya dibe. ₉E be gona o kgobokanyago setšhaba ka moka sa Israele, gomme o batametše Balefi pele ga Tente ya bodulo bja ka. ₁₀Baisraele ba bee Balefi diatla dihlogong, ₁₁mme Arone a nkabele Balefi e le mpho ya Baisraele ye e fiwago nna ka tsela ye e itšeng, gore ba tle ba dire modiro wa ka. ₁₂Ke moka Balefi bona ba bee diatla tša bona godimo ga dihlogo tša dipowana tšeo tše pedi; ka ye nngwe go dirwe sehlabelo sa tshwarelo ya dibe, mme ka ye nngwe go dirwe sehlabelo sa go tšhungwa ka moka, gore go tle go phethwe tiro ya go hlwekišwa ga Balefi.

₁₃“O nkabele Balefi e le mpho ye e fiwago nna ka tsela ye e itšeng, gomme o bee Arone le barwa ba gagwe baokamedi ba bona. ₁₄O hlaole Balefi ka tsela ye go Baisraele ka moka, gore e tle e be ba ka. ₁₅Ge o feditše go hlwekiša Balefi mme o nkabetše bona, ba ka thoma mošomo wa bona ka Tenteng. ₁₆Ke ikabetše bona sebakeng sa bašemane ba maitšibolo ka moka ba Baisraele, gomme ke ba ka ke nnoši. ₁₇Ge ke bolaya maitšibolo ka moka Egepeta, ke kgethwafaditše morwa wa mathomo wa lapa le lengwe le le lengwe la Moisraele gore e be wa ka, le leitšibolo la seruiwa se sengwe le se sengwe ke le kgethwafaditše. ₁₈Bjale ke tšea Balefi sebakeng sa maitšibolo ka moka a Baisraele, ₁₉gomme ke ba nea Arone le barwa ba gagwe e le mpho ye e tšwago go Baisraele go šomela Baisraele ka Tenteng, le go ba šireletša kotsing ye e tlago ba wela ge ba ka batamela Felo mo Gokgethwa.”

₂₀Ka gona Moshe le Arone le setšhaba ka moka sa Israele ba abela Morena Balefi bjalo ka ge Morena a laetše Moshe. ₂₁Balefi ba itlhwekiša mme ba hlatswa diaparo tša bona, gomme Arone a ba abela Morena e le mpho ye e fiwago yena ka tsela ye e itšeng. A ba a ba phethela tiro ya go ba hlwekiša. ₂₂Setšhaba sa dira tšohle tše Morena a ba laetšego tšona ka Balefi. Ka gona Balefi ba tla ba dira modiro wa bona ka Tenteng ba laolwa ke Arone le barwa ba gagwe.

₂₃Morena a re go Moshe: ₂₄“Molefi yo mongwe le yo mongwe yo a nago le mengwaga ye masome a mabedi le metšo ye mehlano goba go feta, a tle a dire modiro wa gagwe ka Tenteng ya bodulo bja ka, ₂₅gomme a tlogele modiro ge a na le mengwaga ye masome a mahlano. ₂₆Ka morago ga fao a ka thuša Balefi ba gabo go dira mediro ya bona ka Tenteng, eupša ga a swanela go phetha modiro ofe le ofe ka boyena. Ke ka moo o swanetšego go fa Balefi mediro ya bona.”

₁Morena o boletše le Moshe lešokeng la Sinai ka kgwedi ya mathomo ya ngwaga wa bobedi wa ge setšhaba sa Israele se tlogile Egepeta a re: _2-3“Baisraele ba keteke Paseka go thoma ge letšatši la lesome le metšo ye mene la kgwedi ye le diketše, go ya ka melao le ditaelo ka moka tša yona.” ₄Ka gona Moshe a botša setšhaba go keteka Paseka, ₅gomme ba dira bjalo mantšiboa a letšatši la lesome le metšo ye mene la kgwedi ya mathomo lešokeng la Sinai. Setšhaba sa dira tšohle ka moo Morena a laetšego Moshe.

₆Eupša go be go le banna ba bangwe bao ba bego ba tšhilafetše ka gobane ba be ba kgwathile setopo, gomme ba šitwa ke go keteka Paseka ka letšatši leo. Ba ile ba ya go Moshe le Arone ₇ba re: “Re tšhilafetše ka gore re kgwathile setopo, fela a re ka napa ra ganetšwa go dira sehlabelo sa Morena le Baisraele ba bangwe?”

₈Moshe a ba fetola a re: “Nkemeleng go fihlela ke ekwa se Morena a tlago ntaela sona mabapi le lena.”

₉Morena a laela Moshe ₁₀gore a botše Baisraele a re: “Le ge yo mongwe wa lena goba wa ditlogolo tša lena a tšhilafetše ka ge a kgwathile setopo, goba a le kgole leetong, o sa swanetše go keteka Paseka. ₁₁Batho bao ba dumeletšwe go e keteka mantšiboa a letšatši la lesome le metšo ye mene la kgwedi ya bobedi. Ba e je ka dinkgwa tše di se nago komelo, le dimela tše di galakago. ₁₂Ba se ke ba e šadiša molatša go fihlela mosong wa le le latelago, le gona ba se ke ba roba kwanyana ya Paseka lešapo. Ba keteke Paseka go ya ka melawana ya yona ka moka. ₁₃Fela yo a hlwekilego a bile a se kgole leetong, eupša a se keteke Paseka, a kgaolwe setšhabeng sa gabo ka gobane a se a dira sehlabelo sa ka ka nako ye e beilwego. O tla otlwa ka ge a dirile sebe.

₁₄“Ge mofaladi yo a dulago gare ga lena a nyaka go keteka Paseka, o swanetše go e keteka go ya ka melao le melawana ya yona ka moka. Molao woo o ama mang le mang, e ka ba ngwana wa mobu, goba mofaladi.”

_15-16Ka letšatši leo Tente ya bodulo bja Morena e hlomilwego ka lona, leru le ile la tla la e pipetša. Bošego le be le le bjalo ka mollo. Go ile gwa ba ka mokgwa woo ka mehla. ₁₇Nako ye nngwe le ye nngwe ge leru le phagama, Baisraele ba be ba huduga, mme e re mo le theogelago gona, ba hlome mešaša gape. ₁₈Ba be ba huduga ka taelo ya Morena, mme ka taelo ya gagwe ba hloma mešaša. Ge leru le sa le godimo ga Tente ba be ba dula gona moo mešašeng. ₁₉Ge leru le dutše godimo ga Tente nako ye telele, ba be ba phetha taelo ya Morena, ba sa huduge. ₂₀Ka nako ye nngwe leru le be le dula godimo ga Tente matšatši a se makae fela; mabakeng ao ka moka ba be ba dula mešašeng goba ba huduge go ya ka taelo ya Morena. ₂₁Ka nako ye nngwe leru le be le dula fao go tloga mantšiboa go fihlela fela mosong, gomme ba be ba huduga ge leru le seno phagama. Ge leru le phagama, le ge e le bošego le ge e le mosegare, ba be ba huduga. ₂₂Ge leru le sa le godimo ga Tente matšatši a mabedi goba kgwedi goba go feta fao, ba be ba sa huduge; eupša ge le phagama, ba be ba huduga. ₂₃Ba be ba hloma mešaša ba bile ba huduga ka go phetha ditaelo tše Morena a ba fago tšona ka Moshe.

₁Morena a re go Moshe: ₂“Dira diphala tše pedi tša silibera ye e rutšwego, e be tša ge go kgobokanywa setšhaba le ge go rutlollwa mešaša. ₃Ge ka dipedi di letšwa nako ye telele, setšhaba ka moka se kgobokane pele ga gago mojakong wa Tente ya bodulo bja ka. ₄Fela ge go letšwa e tee, go kgobokane mantona a dikgorwana. ₅Ge di letšwa di kgaotša, dikgoro tše di hlomilego mešaša ka bohlabela di e rutlolle. ₆Ge diphala di letšwa di kgaotšwa la bobedi, dikgoro tše di lego ka borwa di rutlolle mešaša ya tšona. Ka gona diphala di swanetše go letšwa di kgaotšwa gore go rutlollwe mešaša, ₇fela ge go kgobokanywa setšhaba di swanetše go letšwa di sa kgaotšwe. ₈Diphala tšeo di swanetše go letšwa ke baprista, barwa ba Arone.

“Yeo ke taelo ye e swanetšego go phethwa ke lena le ditlogolo tša lena go ya go ile. ₉Ge le le ntweng nageng ya lena, le itšhireletša manabeng a a le hlasetšego, le letšeng diphala tše le di kgaotša. Nna, Morena Modimo wa lena, ke tla le gopola mme ka le hlakodiša manabeng a lena. ₁₀Le ka mabaka a lethabo le menyanyeng ya lena ya ge kgwedi e balamile le menyanyeng ya lena ye mengwe, le swanetše go letša diphala ge le tliša dihlabelo tša lena tša go tšhungwa ka moka le tša kagišano. Ke moo ke tlago le thuša. Ke nna Morena Modimo wa lena.”

₁₁Ka letšatši la masome a mabedi la kgwedi ya bobedi ngwageng wa bobedi ka morago ga ge setšhaba se tlogile Egepeta, leru lela la ka godimo ga Tente ya bodulo bja Morena le ile la phagama, ₁₂gomme Baisraele ba thoma leeto la bona le go tšama ba ema go tšwa lešokeng la Sinai. Leru leo la ema lešokeng la Parane.

₁₃E be e le la mathomo ge Morena a ba laela ka Moshe gore ba huduge. ₁₄Nako ye nngwe le ye nngwe ge ba huduga, kgoro ya Juda e be e sepela pele e swere sefoka sa yona, madira a yona a beakantšwe ka dihlopha, Nagshone, morwa wa Aminadaba, e le yena a ba okametšego. ₁₅Netanele, morwa wa Tsuare, o be a laola madira a kgoro ya Isakara, ₁₆gomme Eliaba, morwa wa Helone, a laola a kgoro ya Sebulone.

₁₇Ya ba Tente e a rutlollwa, gomme kgorwana ya Gershone le ya Merari tše di bego di e rwala tša thoma leeto.

₁₈Ka morago gwa latela ba kgoro ya Rubene ba swere sefoka sa yona, madira a yona a beakantšwe ka dihlopha, ba okametšwe ke Elitsure, morwa wa Shedeure. ₁₉Shelumiele, morwa wa Tsurishadai, o be a laola madira a kgoro ya Simeone, ₂₀gomme Elisafo, morwa wa Reuele, a laola a Gade.

₂₁Ka morago gwa latela ba kgorwana ya Kehate bao ba bego ba rwele dilo tše kgethwa. Ka nako ye ba fihla lefelong le lefsa la go hloma mešaša, ba hwetša Tente e šetše e hlomilwe gape.

₂₂Ka morago gwa latela ba kgoro ya Efraime ba swere sefoka sa yona, madira a yona a beakantšwe ka dihlopha, Elishama, morwa wa Amihude, a ba laola. ₂₃Gamliele, morwa wa Pedatsure, o be a laola madira a kgoro ya Manase, ₂₄gomme Abidane, morwa wa Gidoni, a laola a kgoro ya Benjamene.

₂₅Mafelelong gwa latela ba kgoro ya Dane ba swere sefoka sa yona, madira a yona a beakantšwe ka dihlopha, ba okametšwe ke Ahiesere, morwa wa Amishadai. Madira a kgoro ya Dane e be e le bahlabani ba ka morago ba dikgoro ka moka. ₂₆Pagiele, morwa wa Okrane, o be a okametše ba kgoro ya Asere, ₂₇gomme Ahira, morwa wa Enane, a okametše ba ya Naftali. ₂₈Woo e be e le mokgwa wo Baisraele ba bego ba latelana ka wona, sehlopha ka sehlopha, nako ye nngwe le ye nngwe ge ba hlahlamolla mešaša ba huduga.

₂₉Moshe a re go Hobabe, mogweagwe, morwa wa Jetro, Momidiane: “Re batametše go thoma leeto la go ya lefelong leo Morena a itšego o tla re fa lona. O tshephišitše Baisraele gore o tla ba humiša, ka gona sepela le rena, gomme re tla go swara gabotse.”

₃₀Hobabe a mo fetola a re: “Aowa, ke boela nageng ya gešo.”

₃₁Moshe a re: “Hle, o se ke wa re tlogela. O tseba mo re kago hloma mešaša lešokeng, mme o ka ba mohlahli wa rena. ₃₂Ge o ka sepela le rena, re tla abelana le wena tšohle tše botse tše Morena a tlago re fa tšona.”

₃₃Ge setšhaba se tloga Sinai, thabeng ye kgethwa, se ile sa sepela matšatši a mararo, gomme Polokelo ya Kgwerano ya Morena ya ba eta pele go yo ba hweletša lefelo le ba ka hlomago mešaša go lona. ₃₄E be e re ge ba tloga mo ba bego ba hlomile mešaša gona, leru la Morena le be ka godimo ga bona mosegare.

₃₅Nako le nako ge Polokelo ya Kgwerano e tloga, Moshe o be a re:

₃₆Ge Polokelo e ema o be a re:

₁Nna, Judase, ke lego mohlanka wa Jesu Kriste, gape ke lego ngwanaboJakobose, ke dumediša lena le biditšwego ke Modimo, lena le phelago le ratwa ke Modimo, Tatagorena, le gona le šireleditšwe ke Jesu Kriste, ke re:

₂Nke le okeletšwe lešoko le khutšo le lerato.

₃Barategi, le ge ke be ke duma kudu go le ngwalela mabapi le phološo ye re e hlakanetšego le lena ye, ke bone e le tshwanelo gore ke le ngwalele go le kgothatša gore le hlabanele tumelo ye e filwego bakgethwa gatee ba e felwa sa ruri. ₄Gobane go na le banyatšamodimo ba bangwe ba ba khukhunetšego ka gare ga lena, ba ba phereketšago kgaugelo ya Modimo, gore ba tle ba ikemelele bohloleng bja bona, bona ba ba ganago Jesu Kriste, yo e lego yena fela Mong le Morena wa rena. Bona, kotlo ye ke yago go e hlaloša e sa le ba e beelwa go tloga kgale.

₅Gomme le ge tšohle tše le di tseba, ke rata go le gopotša gore Morena o kile a re go hlakodiša setšhaba sa Israele Egepeta, ka morago a bolaya ba ba sa dumelego, ₆le go le gopotša gore barongwa bale ba go se tiišetše maemong a bona a bolaodi, ba go tlogela madulo a bona, Modimo o ile a ba kgoka ka diketane, ba dula ba kgokilwe go ya go ile leswiswing, moo a ba beetšego Letšatšilegolo lela ka lona ba tlilogo ahlolelwa go lahlwa. ₇Gopolang motse wa Sodoma le wa Gomora le metse ye e bego e bapile le yona, yeo badudi ba yona ba bego ba itshwere sa barongwa bale mme ba ineetše bofebe le bohlola. Ba otlwa ka kotlo ya mollo wo o sa timego, ya ba sešupo sa go bonwa ke batho.

₈Le bona banyatšamodimo bao ba ba le ditoro tše di dirago gore ba itšhilafatše mebele; ba nyatša bogoši bja Modimo ba bile ba nyefola dihlolwabarongwa tša letago. ₉Etse le Mikaele, morongwamogolo, taba ya mohuta woo ga se a ka a e dira. Mola a fapane le Diabolose ge ba be ba lebaka setopo sa Moshe, ga se a ka a ba le sebete sa go mo ahlola ka go mo hlapaola. O dio re: “A Morena a go otle!” ₁₀Eupša batho bao bona ba nyefola sengwe le sengwe se ba sa se tsebego, gomme le sengwe le sengwe se ba se tsebago ka tlhago, bjalo ka diphoofolo tše di sa kgonego go nagana, ba ipolaiša sona. ₁₁Go madimabe bona, gobane ba tšere ka tsela yela ya Kaine. Ba itahlile ka bofora bja Bileamo, e le ge ba gabile tšhelete. Ba gwaba bjalo ka Korage mme ba fedišwa bjalo ka yena. ₁₂Ke bona bomahlabišadihlong mengwathišanong ya lena ka go ja ba phaka ge ba eja le lena, ba gopotše fela tša bona dimpa. Ke bona maru a e sego a pula a a tšewago ke phefo. Ke mehlare ye e sa enywego, ešita le ka nako ya lehlabula, mehlare ye e tumotšwego mme e hwetšego ruri. ₁₃Ba bjalo ka maphoto a lewatle a a bilogago, ba tlokoma ditiro tša dihlong boka maphoto ge a tlokoma lepshilo. Ba bjalo ka dinaledi tše di phaphailago, mme Modimo o ba beetše madulo leswiswing le leso moo ba tlago dula go ya go ile.

₁₄Ke bona bale ba ilego ba porofetwa ke Enoko, monna yola wa moloko wa boselela wa Adamo, a re: “Tsebang, Morena o tla le barongwa ba gagwe ba bakgethwa ba diketekete ₁₅go sekiša bohle le go ba otla ka lebaka la ditiro tše di se nago borapedi tše ba di dirilego, le dipolelo tše mpe tše badiradibe ba ba se nago borapedi ba mmoletšego ka tšona.”

₁₆Batho ba ke bangongoregi ba go galala se sengwe le se sengwe, ba go laolwa ke ditumo tša bona, ba go bolela ka go ikgantšha le go gegea batho gore ba hwetše se ba se nyakago.

₁₇Baratiwa, le gopole tšela le di porofetetšwego ke baapostola ba Morena wa rena, Jesu Kriste. ₁₈Ba le boditše ba re: “Ge matšatši a mafelelo a fihla go tla tšwelela batho ba le kwera, batho ba ba itakelwago ke ditumo tša bona tše mpe.” ₁₉Bao ke bona ba ba hlolago dikarogano, ke ba go laolwa ke ditumo tša bona tša nama, ba ba se nago Moya wa Modimo. ₂₀Ge e le lena, baratiwa, le dule le ikaga godimo ga tumelo ya lena ye kgethwakgethwa. Le dule le rapela ka maatla a Moya wo Mokgethwa, ₂₁le dule le le leratong la Modimo, le ntše le letetše Morena wa rena, Jesu Kriste, gore ka ge a na le lešoko, a tle a le fe bophelo bjo bo sa felego.

₂₂Bao ba dikadikago le ba thuše. ₂₃Go na le ba bangwe ba le swanetšego go ba phološa bjalo ka ge nke le ba ubula mollong; ba bangwe ke ba le swanetšego go ba gaugela le ba boifa, eupša diaparo tša bona tše di tšhilafaditšwego ke ditiro tša bona tša nama tšona le di šišingwe.

₂₄Modimo yo a kgonago go le hlokomela gore le se kgopše le go le tliša pele ga gagwe le se ne bosodi mme le thabile kudu – ₂₅yena Modimo a le noši, Mophološi wa rena, sa gagwe e be letago le bogoši le maatla le pušo, go tloga mehleng ya kgale le gonabjale le go ya go ile, ka Jesu Kriste, Morena wa rena. Amene.