NUMERI 8

₁Morena a re go Moshe: ₂“Botša Arone gore ge a hloma mabone a a šupago godimo ga sehlomamabone, a a bee ka moo e lego gore seetša se tla bonegela pele.” ₃Arone a phetha taelo yeo, a hloma mabone ka go a lebeletša pele ga sehlomamabone. ₄Sehlomamabone ka moka ga sona go tloga bogatong go fihla matšobeng a sona se be se dirilwe ka gauta ye e rutšwego. Moshe o be a se dirile ka go swantšha se Morena a bego a mmontšhitše sona.

₅Morena a re go Moshe: ₆“Ntšha Balefi go Baisraele ka moka, o ba hlwekiše ₇ka mokgwa wo: O ba fokele ka meetse a go hlwekiša; ba ipoole mmele ka moka, ba hlatswe le diaparo tša bona. Ke gona ba tlago hlweka. ₈Ba tšee powana le kabelo ya bupi ye e nyakegago ye e hlakantšwego le makhura a mohlware; o tšee le powana ye nngwe ya sehlabelo sa tshwarelo ya dibe. ₉E be gona o kgobokanyago setšhaba ka moka sa Israele, gomme o batametše Balefi pele ga Tente ya bodulo bja ka. ₁₀Baisraele ba bee Balefi diatla dihlogong, ₁₁mme Arone a nkabele Balefi e le mpho ya Baisraele ye e fiwago nna ka tsela ye e itšeng, gore ba tle ba dire modiro wa ka. ₁₂Ke moka Balefi bona ba bee diatla tša bona godimo ga dihlogo tša dipowana tšeo tše pedi; ka ye nngwe go dirwe sehlabelo sa tshwarelo ya dibe, mme ka ye nngwe go dirwe sehlabelo sa go tšhungwa ka moka, gore go tle go phethwe tiro ya go hlwekišwa ga Balefi.

₁₃“O nkabele Balefi e le mpho ye e fiwago nna ka tsela ye e itšeng, gomme o bee Arone le barwa ba gagwe baokamedi ba bona. ₁₄O hlaole Balefi ka tsela ye go Baisraele ka moka, gore e tle e be ba ka. ₁₅Ge o feditše go hlwekiša Balefi mme o nkabetše bona, ba ka thoma mošomo wa bona ka Tenteng. ₁₆Ke ikabetše bona sebakeng sa bašemane ba maitšibolo ka moka ba Baisraele, gomme ke ba ka ke nnoši. ₁₇Ge ke bolaya maitšibolo ka moka Egepeta, ke kgethwafaditše morwa wa mathomo wa lapa le lengwe le le lengwe la Moisraele gore e be wa ka, le leitšibolo la seruiwa se sengwe le se sengwe ke le kgethwafaditše. ₁₈Bjale ke tšea Balefi sebakeng sa maitšibolo ka moka a Baisraele, ₁₉gomme ke ba nea Arone le barwa ba gagwe e le mpho ye e tšwago go Baisraele go šomela Baisraele ka Tenteng, le go ba šireletša kotsing ye e tlago ba wela ge ba ka batamela Felo mo Gokgethwa.”

₂₀Ka gona Moshe le Arone le setšhaba ka moka sa Israele ba abela Morena Balefi bjalo ka ge Morena a laetše Moshe. ₂₁Balefi ba itlhwekiša mme ba hlatswa diaparo tša bona, gomme Arone a ba abela Morena e le mpho ye e fiwago yena ka tsela ye e itšeng. A ba a ba phethela tiro ya go ba hlwekiša. ₂₂Setšhaba sa dira tšohle tše Morena a ba laetšego tšona ka Balefi. Ka gona Balefi ba tla ba dira modiro wa bona ka Tenteng ba laolwa ke Arone le barwa ba gagwe.

₂₃Morena a re go Moshe: ₂₄“Molefi yo mongwe le yo mongwe yo a nago le mengwaga ye masome a mabedi le metšo ye mehlano goba go feta, a tle a dire modiro wa gagwe ka Tenteng ya bodulo bja ka, ₂₅gomme a tlogele modiro ge a na le mengwaga ye masome a mahlano. ₂₆Ka morago ga fao a ka thuša Balefi ba gabo go dira mediro ya bona ka Tenteng, eupša ga a swanela go phetha modiro ofe le ofe ka boyena. Ke ka moo o swanetšego go fa Balefi mediro ya bona.”