To The Word – Day 210

₁Nna, Paulose, yo ka thato ya Modimo ke lego moapostola wa Kriste Jesu, ke dumediša bakgethwa ba ba lego motseng wa Efeso, ba ba dumelago go Kriste Jesu, ke re:

₂Nke Modimo, Tatagorena, le Morena Jesu Kriste ba le gaugele, ba le fe khutšo.

₃A go retwe Modimo, Tatago Morena wa rena, Jesu Kriste! Gobane o re šegofaditše ka Kriste ka dimpho tšohle tša legodimong tša go tšwa go Moya. ₄Le pele ga ge lefase le hlolwa, Modimo o be a šetše a re kgethile gore re be ba gagwe ka Kriste, gore re tle re be ba bakgethwa ba ba se nago molato mo pele ga gagwe, le ba ba tletšego lerato.

₅Modimo o be a šetše a feditše le pelo gore o tla re dira barwa ba gagwe ka Jesu Kriste – seo e le go kgahlwa ga gagwe le maikemišetšo a gagwe. ₆Ka fao, a re tumišeng Modimo ka lebaka la kgaugelo ya gagwe ye kgolo, ye e lego mpho ye a re filego yona ka Morwagwe yo a mo ratago. ₇Gobane ka madi a Kriste re a lopollwa, seo se ra gore re swarelwa dibe. Modimo, ka ge a re gaugetše gakaaka, ₈o re file bohlale bjo bontši le temogo ye ntši.

₉O re tsebišitše maikemišetšo a gagwe a sephiri go ya ka leano la gagwe le a bego a šetše a itherile go le phethagatša ka Kriste. ₁₀Lona leano le ke le Modimo a tlago le phethagatša ka nako ya gona, ke la go tlo kopanya dihlolwa tšohle tša legodimong le tša lefaseng, gomme Kriste ya ba hlogo ya tšona.

₁₁Dilo ka moka Modimo o di dira ka maikemišetšo le thato ya gagwe; rena Modimo o re kgethile gore re be ba gagwe ka Kriste, bjalo ka ge a be a beakantše. ₁₂Bjale ge, rena re bilego ba mathomo ba go holofela Kriste, a re tumišeng Modimo ka ge e le yo mogolo gakaaka.

₁₃Ka Kriste le lena le bile ba Modimo mola le ekwa molaetša wa nnete, e lego Taba ye Botse yona e le begetšego tša phološo. Le ile la dumela go Kriste, gomme Modimo a le swaya leswao la gagwe ka go le fa Moya wo Mokgethwa wo a bego a le holofeditše wona. ₁₄Moya wo ke yona peeletšo ya gore re tla fiwa tše Modimo a di holofeditšego ba e lego ba gagwe, gomme seo se re tiišetša gore Modimo o tla lokolla bao e lego ba gagwe. A re mo tumišeng ka ge e le yo mogolo gakaaka!

₁₅Ka lebaka leo, e sa le mola ka kwago ka mo le dumetšego go Morena Jesu le ka mo le ratago badumedi bohle, ₁₆ga se nke ke lese go le lebogela go Modimo ge ke le gopola ke rapela, ₁₇gomme ke kgopela Modimo wa Morena wa rena, Jesu Kriste, yena Raletago, gore a le fe Moya wo Mokgethwa, yo a tlago le hlalefiša, a le utollela Modimo gore le mo tsebe. ₁₈Ke rapela gore a le bonegele menagano, gore le tsebe se le bileditšwego go se holofela, le tsebe ge tše Modimo a tlago di fa badumedi e le tše di makatšago ruri, ₁₉le gore maatla a gagwe mo go rena re dumelago ke a makaakang. Ona maatla a a šomago mo go rena ke ona ale a magolo ₂₀a ilego a a šomiša mola a tsoša Kriste bahung a mmea madulong a bogoši kgauswi le yena kua legodimong. ₂₁Ke gona mo Kriste a okametšego magoši ohle a semoya, le balaodi bohle ba semoya, le maatla ohle a semoya, le babuši bohle ba semoya; o na le maemo a a fetago a babuši bohle ba mehleng yeno le ba ye e tlago. ₂₂Modimo o dirile gore tšohle di bušwe ke Kriste, a mo fa kereke gomme a ba hlogo ya tšohle. ₂₃Kereke ke mmele wa Kriste yo a e tlalago, yena Motlalatšohle mo gohle.

₁Pele le be le hwile moyeng ka lebaka la go tshela molao wa Modimo ga lena le ka lebaka la dibe tša lena. ₂Le be le phela bjalo ka batho ba babe ba mo lefaseng; le be le theeletša molaodi wa meoya ye e bušago lefaufaung, e lego yona meoya ye bjale e hlohleletšago ba ba nyatšago Modimo go dira tše mpe. ₃Gabotse bohle re be re swana le bona, mme re phela go ya ka ditumo tša rena tša nama, re dira se se nyakwago ke nama ya rena goba menagano ya rena. Re be re le batho ba nama mme, bjalo ka mang le mang, go se ka mo Modimo a ka se re otlelego dibe tša rena ka gona.

₄Eupša kgaugelo ya Modimo ke ye kgolo kudu, le go re rata ga gagwe ke mo gogolo, ₅mo e lego gore mola re sa hwile moyeng ka lebaka la dibe tša rena o ile a re tsoša le Kriste ra phela. Modimo o le phološitše ka kgaugelo ya gagwe. ₆Le rena, ka ge re le ba tee le Kriste Jesu, Modimo o re tsošitše naye gore re tle re dule naye legodimong. ₇O be a direla gore ka moso, ka lerato le a re ratago ka lona ka Kriste Jesu, a bonagatše kgaugelo ya gagwe ye e se nago kelo. ₈Gobane ke ka kgaugelo ya Modimo mo le phološitšwego ka tumelo; ga se la iphološa. Go phološwa ga lena ke mpho ya Modimo, ₉ga se maitekelo a lena. Ke ka lebaka leo go sego yo a kago itheta. ₁₀Modimo o re dirile se re lego sona, gomme ka Kriste Jesu o re hlodile gore re tle re phele re dira mediro ye mebotse ye a šetšego a e lokišeditše gore re tle re e dire.

₁₁Le gopole gore pele le be le le baditšhaba ka tswalo, lena bao Bajuda ba le bitšago “mašoboro” mme bona ba ipitšago “babolli” ka lebaka la leswao leo ba le swaiwago mebeleng ya bona. ₁₂Ka nako yeo lena le be le arogane le Kriste. Le be le se ba setšhaba sa Israele. Le be le se ba dikgwerano tše Modimo a di dirilego le setšhaba sa gagwe e le tše a bego a ba holofeditše tšona pele; le be le phela mo lefaseng le se na se le se letetšego, le sa tsebe Modimo. ₁₃Eupša bjale le ba tee le Kriste Jesu. Lena pele le bego le le kgole le Modimo bjale le batameditšwe ka madi a Kriste. ₁₄Gobane Kriste ka boyena o re dirile gore re phedišane ka khutšo, yena yo a dirilego Bajuda le baditšhaba selo se tee. Ka lehu la gagwe sefapanong o fedišitše bonaba bjo bo bego bo itirile leboto la go ba kgaogantšha. ₁₅O fedišitše melao ya Moshe le ditaelo tša yona le melawana ya yona, gore merafe ye mebedi yeo e bope setšhaba se tee se sefsa se se kopanego mo go yena, gomme ka tsela yeo a hlola khutšo. ₁₆Kriste, ka lehu la gagwe sefapanong, o fedišitše bonaba bja bona; ka lona o kopantše merafe ye ka mebedi a e dira selo se tee mme a e boelanya le Modimo. ₁₇Ka gona, Kriste o tlile a begela batho Taba ye Botse ya khutšo – a begela lena le bego le le kgole le Modimo, a begela le bona ba bego ba le kgauswi le yena. ₁₈Ke ka Kriste mo rena, Bajuda le baditšhaba, re kgonago go tla go Tatagorena ka Moya o tee.

₁₉Ge go le bjalo ge, ga le sa le bašele le bafaladi; ke lena badudi ba tee le badumedi, gomme ke lena ba lapa la Modimo. ₂₀Le agilwe motheong wo o beilwego ke baapostola le baprofeta, motheo woo leswika la wona la sekhutlo e lego Kriste Jesu ka sebele. ₂₁Ke yena yo a thekgilego moago wohle mme a o godišago ya ba tempele ye kgethwa ye e neetšwego Morena. ₂₂Mo go yena le ageletšwe le ba bangwe la ba moago woo go ona go dulago Modimo ka Moya wa gagwe.

₁Ke sona se se dirilego gore nna, Paulose, ke be sebofša ka lebaka la Kriste Jesu, e le ka lebaka la lena, baditšhaba. ₂Le swanetše le kwele gore Modimo, ka kgaugelo ya gagwe, o mphile modiro wa go ba moapostola gore ke le hole. ₃Modimo o ntsebišitše sephiri sa gagwe ka go nkutollela sona, bjalo ka ge ke sa tšo ngwala ka boripana, ₄gomme ge eba le tla bala tše ke di ngwadilego le tla lemoga se ke se kwešišago ka sephiri se sa Kriste. ₅Mehleng ye e fetilego batho ga se ba utollelwa sephiri se, eupša bjale Modimo o se utolletše baapostola ba gagwe ba bakgethwa le baprofeta ka Moya. ₆Sephiri sa gona ke gore ka Ebangedi baditšhaba e tla ba bajalefa ba Modimo go no swana le Bajuda; le bona ke ditho tša mmele wa Kriste, bjalo ka Bajuda; le bona ba tla hwetša tše Modimo a di holofeditšego batho ka Kriste Jesu.

₇Ke yona Ebangedi ye ke dirilwego mohlanka wa yona, ye Modimo a mphilego yona ka kgaugelo ya gagwe le ka maatla a gagwe a a šomago mo go nna. ₈Nna ke fetwa le ke yo monyenyane wa badumedi; eupša Modimo o mpabaletše mo a ilego a nkgethela go yo begela baditšhaba Taba ye Botse ya mahumo a a se nago tekanyo a Kriste, ₉le go dira gore batho bohle ba bone ka mo maikemišetšo a sephiri sa Modimo a tlilogo dirišwa ka gona. Modimo, yena Mohlodi wa tšohle, o ile a uta maikemišetšo a a gagwe mehleng yela ya kgale, ₁₀gore mehleng yeno ya bjale magoši a semoya le balaodi ba semoya lefaufaung ba tsebe bohlale bja gagwe bja mehutahuta ka kereke. ₁₁Seo Modimo o se dirile go ya ka mo a bego a ikemišeditše ka gona go tloga le go tloga, mme o se phethile ka Kriste Jesu, Morena wa rena. ₁₂Ge re le ba Kriste re bile re dumela go yena, re ba le sebete sa go ya go Modimo re sa šie. ₁₃Ka gona, ke le kgopela gore le se ke la nyamišwa ke ge ke tlaišwa ka lebaka la lena, seo se a le godiša.

₁₄Tšeo ke tšona tše di ntirago gore ke khuname pele ga Tatagorena wa legodimong, ₁₅yena yo kgoro ye nngwe le ye nngwe legodimong le lefaseng e hlolwago ke yena. ₁₆Nna ke kgopela Modimo gore ka lehumo la letago la gagwe a le fe maatla ka Moya wa gagwe gore le tie ka dipelong tša lena, ₁₇gomme ke rapela gore nke Kriste a ka aga ka dipelong tša lena ka tumelo ye le nago le yona go yena, le gore le dule le tieletše leratong, le le ba ba agilego godimo ga lona, ₁₈gore lena le badumedi ka moka le kgone go kwešiša bophara le botelele le go phagama le go iša ₁₉ga lerato la Kriste. Nke nkabe le ka tla la le lemoga – le ge mokagona lona le sa lemogege – gomme la tlala Modimo ka boyena.

₂₀Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, ₂₁a a tumišwe ke ba meloko yohle ka kerekeng le go Kriste Jesu go ya go ile! Amene.

₁Bjale ge, nna ke lego sebofša ka lebaka la ge ke direla Morena, ke le kgopela gore le phele ka mo go swanelago boemo bjo Modimo a le bileditšego go bjona. ₂Ka mehla le be ba go ikokobetša, ba boleta, le ba go se fele pelo, le ntše le kgotlelelana ka lerato. ₃Le ikokoropele go boloka botee bjo le bo fiwago ke Moya ka khutšo ye e le tlemaganyago. ₄Ka ge bohle le na le Moya o tee wo Mokgethwa, le bopa mmele o tee seng sa lena, bjalo ka ge se ke se holofetšego e le se tee gomme e le sona se Modimo a le bileditšego go se dira. ₅Morena ke o tee, tumelo ke e tee, le kolobetšo ke e tee. ₆Modimo ke o tee, yena Rabohle, Kokamabohle, Modirakabohle, Modulagobohle.

₇Mongwe le mongwe wa rena o filwe mpho ye nngwenyana go ya ka mo Kriste a re filego ka gona. ₈Ke ka lebaka leo Mangwalo a Makgethwa a rego:

₁₇Se ke se bolelago ke se gatelela legatong la Morena ke go re: Le se sa phela bjalo ka baditšhaba ba go nagana ka tše di se nago mohola, ₁₈ba go se be le se ba se kwešišago. Bao ga ba na bophelo bja Modimo gobane ba dio se tsebe selo ebile ba gwaletše. ₁₉Ba hwile dipelo. Ba iphile bofebe le bohlola bja mehutahuta bja go se ba tene.

₂₀Eupša lena bophelo bja mohuta woo ga se selo se le ithutilego sona mabapi le Kriste. ₂₁Ga ke re le kwele tša Jesu, le gona lena, balatedi ba gagwe, le rutilwe therešo ye e lego go yena? ₂₂Ka gona, le se sa phela ka mokgwa wola wa lena wa pele; lahlang tlhago ya lena ya kgale ye e senywago ke ditumo tša lena tša bofora. ₂₃Mokgwa wa lena wa go nagana o swanetše go mpshafatšwa, ₂₄gomme le tšee tlhago ye mpsha ye e hlodilwego ka go swantšhwa le Modimo, le phele le le baloki ba nnete le bakgethwa ba nnete.

₂₅Ka gona le lahle maaka. Motho a botše modumedikayena therešo, gobane bohle re ditho tša mmele o tee. ₂₆Ge le ka tšhoga le galefile le se ke la lesa kgalefo ya lena e le diriša sebe, le gona letšatši le se ke la le sobelela le sa galefile. ₂₇Le se ke la fa Diabolose sebaka. ₂₈Yo a lemetšego go utswa a se sa utswa, a upše a kgothalele go šoma, gore a tle a hwetše tše di mo lebanego tša go iphediša, le gore a tle a be le tša go thuša bahloki. ₂₉Melomong ya lena go se tšwe mahlapa; ge go nyakega gore le bolele, le bolele fela tše di lokilego le tše di holago batho, gore tše le di bolelago di hole ba ba le kwago. ₃₀Le gona le se ke la rumola Moya wo Mokgethwa wa Modimo, wo ka wona le swaetšwego letšatši la go lokollwa ga lena. ₃₁Le tlogeleng metsoto, le kgalefo, le swele, le mašata, le lesebo, le lehloyo ka moka. ₃₂Sa lena e be go swarana ka botho le ka kwelobohloko, le swarelaneng diphošo go etša Modimo ge a le swaretše ka Kriste.

₁Ka ge le le bana ba Modimo ba a le ratago, le mo ekiše. ₂Le phele ka lerato, bjalo ka ge Kriste a re ratile mme a re hwetše a ba seloba le sehlabelo se se kgahlago Modimo.

₃Ge e le bofebe le bohlola bja mehutahuta le megabaru mo go lena le go bolelwa di se ke tša bolelwa, go ya ka mo go swanelago badumedi. ₄Le dihlabišadihlong, le dipolelo tša bošilo, le meswaso ye e sa lokago di a le rona. Sa lena a e be go leboga Modimo. ₅Se le swanetšego go se tseba ke gore ga go sefebe goba sehlola goba wa megabaru yo a tlago tsena mmušong wa Kriste le Modimo. Gape wa megabaru ke sekhunamelamedingwana.

₆Le se ke la forwa ke motho ka dipolelo tša lefeela; taba tše ke di bolelago tše ke tšona tše di dirago gore Modimo a otle bao ba sa mo theeletšego. ₇Ka gona, ba babjalo lena le se ke la šomišana nabo. ₈Pele le be le le leswiswing, eupša bjale, ka ge le le ba Morena, le mo seetšeng. Ka gona, le phele bjalo ka ba ba lego mo seetšeng, ₉gobane seetša se diriša batho sengwe le sengwe se sebotse le se se lokilego le sa nnete. ₁₀Lekang go ithuta tše di kgahlago Morena. ₁₁Le se ke la kgatha tema medirong ye e se nago mohola ya ka maswiswaneng; sa lena e be go e utolla. ₁₂Gape tše di dirwago ka sephiring, le go di bolela go leša dihlong, ₁₃gomme tšohle ge di utologa seetšeng, ke mo di bonalago gabotse se di lego sona, ₁₄gobane selo se sengwe le se sengwe se se utologago seetšeng se fetoga seetša. Ke ka lebaka leo sefela se rego:

₁₅Ka fao, le itlhokomele gabotse ka mo le phelago ka gona. Le se phele bjalo ka mašilo, le phele bjalo ka bahlale. ₁₆Le dule le direla Morena ka phišego, gobane lefase leno ke le lebe. ₁₇Ka gona, le se dire tša bošilo; sa lena e be go kwešiša se e lego thato ya Morena.

₁₈Le se tagwe ke bjala, ka gobane moo ke mo go tšwago bohlola; sa lena e be go tlala Moya wa Modimo. ₁₉Le boledišaneng ka dipesalome le difela le dikopelo tša semoya, le opelela Morena le mo tumiša ka dipelong tša lena. ₂₀Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.

₂₁Motho a ikokobetše go mongwekayena e le ka lebaka la ge le hlompha Kriste.

₂₂Lena basadi, le ikokobetše go banna ba lena, go etša ge le ikokobetša go Morena; ₂₃gobane monna ke hlogo ya mosadi, go no swana le Kriste ge e le hlogo ya kereke; gomme yo Kriste ke Mophološi wa kereke, yona e lego mmele wa gagwe. ₂₄Bjalo ka ge kereke e ikokobetša go Kriste, basadi le bona ba ikokobetše go banna ba bona go tšohle.

₂₅Lena banna, le rate basadi ba lena, bjalo ka ge Kriste le yena a ratile kereke a ba a ikgafela go e hwela, ₂₆e le gona go e kgethwafatša, ge a seno e hlwekiša ka go e hlatswa ka meetse, le ka molaetša wa Modimo, ₂₇gore a tle a itlhomele kereke ye e thakgegilego, ye e se nago sepatso goba lešošo goba bosodi bjo bongwenyana, eupša e be ye e hlwekilego, ye e se nago bosodi. ₂₈Banna ba swanetše go rata basadi ba bona bjalo, go no swana le ge ba rata mebele ya bona. Yo a ratago mosadi wa gagwe o a ithata. ₂₉Etse motho wa go hloya mmele wa gagwe ga se a ka a ba gona. Se motho a se dirago ke go o fepa le go o babalela, e lego sona se Kriste a se dirago kereke ya gagwe, ₃₀yona e lego mmele wa gagwe wo re lego ditho tša wona. ₃₁Mangwalo a Makgethwa a re: “Ka lebaka leo monna o tla tlogela tatagwe le mmagwe a kopana le mosadi wa gagwe, gomme bobedi bja bona ya ba mmele o tee.” ₃₂Temana ye e utolla sephiri se segolo, seo ke kwešišago gore se ra Kriste le kereke. ₃₃Fela se ra le lena: Monna yo mongwe le yo mongwe o swanetše go rata mosadi wa gagwe bjalo ka ge a ithata, le mosadi o swanetše go hlompha monna wa gagwe.

₁Lena bana, le hlomphe batswadi ba lena ka ge le le ba ba dumelago go Morena, gomme seo e le se se lokilego. ₂“Hlompha tatago le mmago” ke molao wa mathomo wo o nago le kholofetšo ye e o tlaleletšago ka go re: ₃“gore o tle o atlege, o phele nako ye telele mo lefaseng.”

₄Lena botatagobana, le se galefiše bana ba lena. Sa lena e be go ba godiša ka kgalemo le thuto ya Morena.

₅Lena makgoba, le hlomphe ka botlalo beng ba lena ba mo lefaseng, gomme seo le se dire ka botshepegi, bjalo ka ge nke le direla Kriste. ₆Seo le se se direle gore ba le bone mme ba le rete, eupša ka dipelo tšohle tša lena le dire se se nyakwago ke Modimo, ka ge le le makgoba a Kriste. ₇Le ba šomele ka dipelo tše ditšhweu mo nkego le šomela Morena, e sego batho. ₈Le a tseba gore Morena o tla putsa bohle, makgoba le balokologi, ka lebaka la tše dibotse tše ba di dirago.

₉Lena bengmakgoba, le sware makgoba a lena ka wona mokgwa woo, gomme le tlogele go hlwa le ba tšhošetša. Le gopole gore lena le makgoba a lena mong wa lena ke o tee wa legodimong, yo a sa kgethollego batho.

₁₀A ke fetše ka go re: Ikopanyeng le Morena le itiiše le ka maatla a gagwe. ₁₁Itlhameng ka dihlabani tšohle tše Morena a le fago tšona gore le kgone go iphahlela bomenemene bja Diabolose. ₁₂Gobane ya rena ntwa ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le. ₁₃Ka fao, itlhameng ka dihlabani tša Modimo, gore mohla go le gobe le kgone go iphahlela; e tle e re ge le lwele go fihla mafelelong a ntwa le ikhwetše le ba paletše.

₁₄Ka gona, ebang komana madulaabapile, gomme nnete e be bjalo ka lepanta la go itlema letheka, toka e be bjalo ka sefahlo sa kgara, ₁₅mafolofolo a lena a go bega Ebangedi ya khutšo e be dieta tša lena. ₁₆Ntle le tšeo, tumelo e be thebe ya lena, gobane ka yona le tla kgona go tima mesebe ye e tukago ye Rabobe a le hlaselago ka yona. ₁₇Le amogele phologo ye e lego mpho ya Modimo; e tla le šireletša boka kefa ya tshipi. Le amogele le molaetša wa Modimo wo le o fiwago ke Moya wo Mokgethwa; wona o tla ba bjalo ka tšhoša. ₁₈Tšohle tše le di dire le rapela, le kgopela Modimo gore a le thuše. Le rapele ka mehla ka mo le hlahlwago ke Moya. Ka gona, le phafoge le sa lape, le dule le rapelela badumedi bohle. ₁₉Le nna le nthapelele gore Modimo a mpotše se ke swanetšego go se bolela ge ke ahlama, gore ke utolle sephiri sa Ebangedi ke sa šie. ₂₀Le ge gonabjale ke le sebofša, ke sa ntše ke le mmaditsela wa go bega Ebangedi ye. Le nthapeleleng gore ke bolele ka yona ke sa boife, bjalo ka ge ke swanetše.

₂₁Tigikose, ngwanaborena yo re mo ratago, yo e lego mohlanka wa go botegela modiro wa Morena, o tla le anegela tšohle ka nna, gore le lena le tsebe ka mo ke phelago ka gona. ₂₂Ke ka lebaka leo ke mo romago go lena gore a tle a le botše gore na re phela bjang, le gore a tle a le kgothatše.

₂₃A Modimo, Tatagorena, le Morena Jesu Kriste ba kgontšhe badumedi go phedišana ka khutšo le go ratana le go dumela go Modimo. ₂₄A Modimo a gaugele bohle ba ba ratago Morena wa rena, Jesu Kriste, ka lerato le le sa felego.