To The Word – Day 185

₁Shefatia, morwa wa Mathane, le Gedalia, morwa wa Pashure, le Jukale, morwa wa Shelemia, le Pashure, morwa wa Malkia, ba ile ba kwa gore Jeremia o be a botša setšhaba a re ₂Morena o re: “Yo a ka šalago mo motseng o tla bolawa ka tšhoša, goba ka tlala, goba ka leuba la bolwetši. Eupša yo a ka tšwago motseng a yo ineela go Bababilonia a ka se bolawe; o tla iphološa gomme a phela.” ₃A ba a ba botša le gore Morena o re: “Ruri, motse wo o tla gafelwa diatleng tša madira a kgoši ya Babilonia, gomme bona ba tla o thopa.”

₄Ke mo mantona a setšhaba a ilego go kgoši, a fihla a re: “Monna yo o swanetše go bolawa, gobane ka go bolela ka mokgwa wo o nola bahlabani ba ba šetšego mo motseng moko, setšhaba sohle le sona o se nola moko. Ga a lakaletše setšhaba sa gaborena boiketlo, o se lakaletša madimabe.”

₅Kgoši Tsedekia a ba fetola a re: “Šoowege, dirang ka yena se le se ratago; nna nka se kgone go le thibela.” ₆Ka gona ba tšea Jeremia ba yo mo tsenya ka dithapo ka sedibeng sa Malkia, morwa wa kgoši, se se bego se le ka kgorong ya kgolego. Ka moo sedibeng go be go se na meetse, ge e se leraga, gomme Jeremia a sobelela ka gare ga lona.

₇Ebedmeleke wa Etopia, moamogwabonna yo a bego a šoma ka mošate, a kwa gore ba tsentše Jeremia ka moo sedibeng. Ka nako yeo ke ge kgoši a swere lekgotla kua lesorong la Benjamene. ₈Ka fao Ebedmeleke a tšwa ka mošate, a yo bolela le kgoši a re: ₉“Kgoši, mong wa ka, banna ba ba dirile Jeremia taba ye mpe ka go mo lahlela ka sedibeng. O tla hwela gona ka tlala, ka ge go se sa na le dijo ka mo motseng.” ₁₀Ke mo kgoši a laetšego Ebedmeleke gore a ye le banna ba bararo go ntšha Jeremia ka moo sedibeng pele a ehwa. ₁₁Ka gona Ebedmeleke a ya le banna bao ka phapošing ya bobolokelo ya mošate, a yo tšea diaparo tša maratha, a di tsenyetša Jeremia ka moo sedibeng ka dithapo. ₁₂A mmotša gore a beeletše dithapo ka diaparo tšeo tša maratha ka mahwafeng. Jeremia a dira bjalo, ₁₃gomme ba mo goga ka dithapo ba mo ntšha ka moo sedibeng. A bewa gape ka kgorong ya kgolego.

₁₄Ka le lengwe la matšatši Kgoši Tsedekia a laela gore Jeremia a tlišwe go yena kua lesorong la boraro la go tsena ka Tempeleng ya Morena, gomme a re go yena: “Go na le taba ye ke nyakago go go botšiša yona, gomme o se ke wa mphihlela selo.” ₁₅Jeremia a mo fetola a re: “A ke re ge nka go botša o tla mpolaya? Ge nka go eletša le gona o ka se ntheeletše.” ₁₆Ke ge Kgoši Tsedekia a enela Jeremia ka sephiring a re: “Ka Morena yo a phelago, yena Morephediši, nka se go bolaye goba ka go gafela diatleng tša banna ba ba nyakago go go bolaya.”

₁₇Ke moka Jeremia a botša Tsedekia gore Morena Modimo Ramaatlaohle, Modimo wa Israele, o re: “Ge o ka ineela go balaodi ba madira a kgoši ya Babilonia o tla phologa, le motse wo o ka se tšhungwe ka mollo. Wena le lapa la gago le tla phologa. ₁₈Eupša ge o ka se ineele go bona, gona motse wo o tla gafelwa diatleng tša Bababilonia, ba o tšhuma ka mollo, le wena o ka se ba tšwe ka diatleng.”

₁₉Kgoši a mo fetola a re: “Ke tšhaba batho ba Juda ba ba ineetšego go Bababilonia. Nka no gafelwa diatleng tša bona mme ka tlaišwa.”

₂₀Jeremia a re: “O ka se gafelwe diatleng tša bona. Ke go kgopela gore o phethe tše ke go botšago gore Morena o go laela tšona, gomme o ka se hlagelwe ke selo, o tla phela. ₂₁Eupša Morena o mpontšhitše mo ponong se se tlago go hlagela ge o ka gana go ineela. ₂₂Mo ponong yeo ke bone basadi ka moka ba ba šetšego mošate, ga kgoši ya Juda, ba išwa go balaodi ba kgoši ya Babilonia. Ge ba eya ba be ba re: ‘Bagwera ba gago ba o ba botilego ba go arošitše, ba go paletše. Gomme bjale ge o tantšwe ka lerageng ka maoto, ba go tlogetše.’ ”

₂₃Jeremia a iša pele a re: “Basadi ba gago le bana ba tla ntšhwa ba išwa go Bababilonia, gomme le wena ka noši o ka se phonyokge Bababilonia bao. O tla thopša ke kgoši ya Babilonia, gomme motse wo o tla tšhungwa ka mollo.”

₂₄Tsedekia a re go yena: “O se ke wa botša motho tše re di boletšego, gore o se tlo bolawa. ₂₅Ge mantona a setšhaba a ka kwa gore ke be ke bolela le wena, mme a tla go wena a go botšiša gore na re be re bolela eng, a tla go holofetša gore ba ka se go bolaye ge o ka se ba fihlele selo. ₂₆Wena o no ba botša gore o be o nkgopela gore ke se ke ka go bušetša ga Jonathane gore o hwele gona.” ₂₇Ka kgonthe mantona ale ka moka a ile a tla a botšiša Jeremia, gomme yena a ba fetola ka ona mantšu ale kgoši a mmoditšego ona. Ba napa ba lesa go mmotšiša, ka gobane tše ba bego ba di bolela go be go se yo a bego a di tšere ka tsebe. ₂₈Gomme Jeremia a bewa ka kgorong ya mošate go fihlela letšatši le Jerusalema e thopilwego ka lona.

₁Ka kgwedi ya lesome ya ngwaga wa senyane wa ge Tsedekia e le kgoši ya Juda, Nebukadnesare, kgoši ya Babilonia, a tla motseng wa Jerusalema le madira a gagwe ka moka, gomme a o dikanetša. ₂Ka tšatši la senyane la kgwedi ya bone ya ngwaga wa lesome le motšo o tee wa ge Tsedekia e le kgoši, morako wa motse wa phulwa.

₃Ge motse wa Jerusalema o thopša, bahlankedi ba bagolo ka moka ba kgoši ya Babilonia ba ile ba tlo dula Lesorong la Gare. E be e le Nergale-Saretsere le Shamgare-Nebu le Sare-Sekime, molaodi yo mogolo, le Nergale-Saretsere yo mongwe, yo le yena e bego e le molaodi yo mogolo, le ba bangwe bahlankedi ba kgoši ya Babilonia.

₄Ge Kgoši Tsedekia le bahlabani ba gagwe ka moka ba bona tše di diregago, ba tšhaba motseng bošego, ba tšwa ka tsela ya go leba serapeng sa mošate, ba tšwa ka lesoro le le lego mokgahlo ga merako yeo ye mebedi, gomme ba tšhabela thokong ya moedi wa Jordane. ₅Eupša madira a Babilonia a ba hlomara mme a swara Tsedekia kua melaleng ya kgauswi le Jeriko, a mo thopa. Ba mo iša go Nebukadnesare, kgoši ya Babilonia, yo a bego a le motseng wa Ribla kua seleteng sa Hamate, gomme gona moo Nebukadnesare a mo ahlola. ₆Moo Ribla a bolaya barwa ba Tsedekia, yena Tsedekia a lebeletše, a bolaya le bahlomphegi bohle ba naga ya Juda. ₇Ka morago ga moo a laela gore Tsedekia a gonywe mahlo a be a kgokwe ka diketane mme a išwe Babilonia. ₈Bababilonia ba tšhuma mošate le dintlo tša batho ka mollo, ba ba ba kgereša merako ya Jerusalema. ₉Nebusaradane, molaodi wa baleti ba kgoši, a thopa mašaledi a motse a a iša Babilonia le bao ba bego ba ineetše go yena, gotee le mašaledi a setšhaba. ₁₀Nageng ya Juda a šadiša badiidi ba bangwenyana, ba go hloka le pudi ya leleme le letala, ya ba o ba fa dirapa tša merara le mašemo.

₁₁Nebukadnesare, kgoši ya Babilonia, a laela Nebusaradane, molaodi wa baleti ba kgoši, mabapi le Jeremia a re: ₁₂“Mo tšee, o mo hlokomele gabotse. O se ke wa mo kweša bohloko, eupša o mo direle se a se nyakago.” ₁₃Ka gona Nebusaradane gotee le balaodi ba bagolo, boNebushasbane, le Nergale-Seretsere, le balaodi ka moka ba kgoši ya Babilonia, ba roma batho ₁₄ba yo tšea Jeremia kgorong ya mošate. Ba bea Gedalia, morwa wa Ahikamo, setlogolo sa Shafane, gore a mo hlokomele mme a šetše gore a fihle gae a lotegile. Ka gona Jeremia a yo dula le batho ba gabo.

₁₅Ge Jeremia a sa golegilwe ka kgorong ya mošate Morena o ile a mmotša ₁₆gore a botše Ebedmeleke yola wa Moetopia gore yena Morena Ramaatlaohle, Modimo wa Israele, o re: “Motse wo ke tlilo o tlišetša masetlapelo bjalo ka ge ke boletše, e sego katlego. Taba ye e tla phethagala o lebeletše. ₁₇Mohlang woo wena ke tla go hlakodiša, nna, Morena, wa se gafelwe diatleng tša banna bao o ba tšhabago. ₁₈Ke tla go phološa, wa se bolawe ka tšhoša. O tla phologa ka gobane o mpotile. Ke realo, nna, Morena.”

₁Morena a bolela le Jeremia ka morago ga ge Nebusaradane, molaodi wa baleti ba kgoši, a mo lokolotše kua Rama. O be a išitšwe gona a kgokilwe ka diketane gotee le batho ka moka ba go tšwa Jerusalema le Juda ba ba bego ba išwa Babilonia e le dibofša.

₂Molaodi yoo wa baleti ba kgoši a laela gore Jeremia a tlišwe go yena, mme a re go yena: “Morena Modimo wa gago ke yena a rilego o tla tlišetša naga ye masetlapelo a, ₃gomme bjale o dirile se a rilego o tla se dira ka lebaka la ge le mo fošeditše, le se la mo theeletša. Ke ka lebaka leo le wetšwego ke masetlapelo a. ₄Fela wena lehono ke go bofolla diketane diatleng. Ge o rata go ya Babilonia le nna, a re ye, gomme ke tla go hlokomela. Eupša ge o sa rate, o ka no itšhalela. Naga še e ikadile, gomme o ka no ya mo o ratago.”

₅Ya re pele Jeremia a sepela, Nebusaradane a re: “O ka no boela go Gedalia, morwa wa Ahikamo, setlogolo sa Shafane, yoo kgoši ya Babilonia a mmeilego mmušiši metseng ya naga ya Juda. O ka no itulela le yena wa iphelela le batho ba gona, goba wa ikela mo gongwe le mo gongwe mo o bonago o ka ya gona.” A napa a mo fa mphago le mphonyana, a mo lesa a wela tsela. ₆Jeremia a ya go dula le Gedalia, morwa wa Ahikamo, motseng wa Mitsepa, mme a iphelela le batho bao ba bego ba šetše nageng ya Juda.

₇Balaodi ba bangwe ba madira a naga ya Juda le bahlabani ba bona ba be ba sa le kua šokeng. Ba ile ba kwa gore kgoši ya Babilonia e beile Gedalia, morwa wa Ahikamo, mmušiši wa naga, ebile o mmeile mohlokomedi wa banna le basadi le bana ba e lego badiididiidi mo nageng, ba ba sego ba thopelwa Babilonia. ₈Ka gona, Ishmaele, morwa wa Netania, le Johanane le Jonathane, barwa ba Kareage, le Seraya, morwa wa Tanhumete, le barwa ba Efai wa Netofa, le Jaasania wa Maaka ba ya le bahlabani ba bona go Gedalia kua Mitsepa. ₉Gedalia, morwa wa Ahikamo, setlogolo sa Shafane, a re go bona: “Ke bolela ke tiišitše ke re le se ke la tšhaba go hlankela Bababilonia. Dulang mo nageng ye, le hlankele kgoši ya Babilonia, gomme le tla iketla. ₁₀Ge e le nna, ke tla dula Mitsepa ka le bolelela go Bababilonia ge ba etla mo. Ge e le lena, le bune diterebe, le dikenywa tša lehlabula, le dikenywa tša mohlware, le di tšhele ka dinkgong tša lena, mme le dule metseng yeo le e thopilego.” ₁₁Batho ba Juda ka moka ba ba bego ba le Moaba, le gare ga Baamone, le Edomo, le dinageng tše dingwe ba kwa gore kgoši ya Babilonia e dumeletše batho ba bangwe ba Juda gore ba šale moo, le gore o beile Gedalia mmuši wa bona. ₁₂Ka gona ba boa mafelong ohle ao ba bego ba šwalalanyeditšwe go ona, mme ba tla nageng ya Juda go Gedalia kua Mitsepa, gomme moo ba buna diterebe le dikenywa tše dintši tša lehlabula.

₁₃Johanane, morwa wa Kareage, le balaodi ka moka ba madira ba ba bego ba sa le kua šokeng ba tla go Gedalia kua Mitsepa ₁₄gomme ba re go yena: “Afa o a tseba gore Baalise, kgoši ya Baamone, o romile Ishmaele, morwa wa Netania, gore a tle a go bolaye?” Eupša Gedalia a se ba kgolwe. ₁₅Ke mo Johanane a boletšego naye ka sephiring a re: “Ntumelele ke yo bolaya Ishmaele, gomme go ka se tsebe motho gore o bolailwe ke mang. Yena o reng a nyaka go go bolaya, gore batho bohle ba Juda ba ba phelago le wena ba šwalalane, le gore bohle ba ba šetšego mo Juda ba bolawe?”

₁₆Eupša Gedalia a mo fetola a re: “O se ke wa ba wa dira taba yeo. Se o se bolelago ka Ishmaele ga se nnete!”

₁Ka kgwedi ya bošupa ya ngwaga woo Ishmaele, morwa wa Netania, setlogolo sa Elishama, wa lapa la mošate yo e bego e le yo mongwe wa balaodi ba madira a kgoši, a tla go Gedalia, morwa wa Ahikamo, motseng wa Mitsepa, a na le banna ba lesome. Ya re ge ba le dijong mmogo ₂Ishmaele le banna bale ba gagwe ba lesome ba emelela, ba hlasela Gedalia ka ditšhoša, ba mmolaya, yena yo kgoši ya Babilonia a bego a mmeile mmuši wa naga. ₃Ishmaele a bolaya le batho ba Juda bao ba bego ba na le Gedalia moo Mitsepa, le bahlabani ba Bababilonia bao ba bego ba le moo.

₄Ka letšatši le le latelago, pele go tseba motho ka go bolawa ga Gedalia, ₅gwa tla banna ba masome a seswai, ba bangwe ba etšwa Shekeme, bangwe Shilo, bangwe Samaria. Ba be ba ipootše maledu, ba ikgagoletše diaparo, ba bile ba ikgaile. Ba be ba iša dikabelo tša bupi le diorelo go di neela ka Tempeleng ya Morena. ₆Ka gona Ishmaele a tloga Mitsepa go yo ba gahlanetša a tšama a lla. Ge a fihla go bona a re: “A re yeng ga Gedalia, morwa wa Ahikamo.” ₇Ya re ge ba šetše ba le ka gare ga motse, Ishmaele le banna ba ba bego ba na le yena ba ba bolaya, gomme ba lahlela ditopo tša bona ka sekoting.

₈Ba lesome mo sehlopheng seo ba ile ba re go Ishmaele: “Hle, o se ke wa re bolaya! Re na le mabele le garase le makhura a mohlware le todi, mme dilo tšeo re di fihlile kua šokeng.” Ka gona a ba lesa, a se ba bolaye mmogo le bangwekabona. ₉Sekoti seo ka go sona Ishmaele a ilego a lahlela ditopo tša banna bale a ba bolailego ke sela se segolo sa go epša ke Kgoši Asa mola a hlaselwa ke Kgoši Basha wa Israele. Ishmaele a se tlatša ka ditopo tša bao a ba bolailego. ₁₀Ke moka a thopa barwedi ba kgoši le mašaledi ka moka a batho ba Mitsepa bao Nebusaradane, molaodi wa baleti ba kgoši, a bego a ba beetše Gedalia, morwa wa Ahikamo, gore e be mohlokomedi wa bona. Ishmaele a ba thopa, a tloga nabo a re o ya go Baamone.

₁₁Johanane, morwa wa Kareage, le balaodi bohle ba madira bao ba bego ba na le yena ba kwa dilo tšohle tše mpe tše Ishmaele a di dirilego. ₁₂Ka gona ba tšea bahlabani ka moka ba bona ba yo lwa le yena, ba mo swara mogobeng wo mogolo wa kua Gibeone. ₁₃Bohle ba ba bego ba na le Ishmaele, bao a bego a ba thopile Mitsepa, ge ba bona Johanane le balaodi bohle ba madira bao ba bego ba na le yena, ba thaba; ₁₄ba retologa ba boela go Johanane. ₁₅Eupša Ishmaele le banna ba gagwe ba seswai ba phonyokga Johanane ba tšhabela go Baamone.

₁₆Johanane le balaodi bohle ba madira ba ba bego ba na le yena ba nama ba tšea batho bao Ishmaele a bego a ba thopile kua Mitsepa ge a seno bolaya Gedalia, morwa wa Ahikamo, e lego bahlabani le basadi le bana le baamogwabonna, bao Johanane a bego a tšo ba gomiša Gibeone. _17-18Ba be ba boifa Bababilonia ka gore Ishmaele o be a bolaile Gedalia, yoo kgoši ya Babilonia e bego e mmeile mmuši wa naga. Ka fao ba tloga ba re ba ya Egepeta gore ba tšhabele Bababilonia. Mo tseleng ba ile ba ema bophirimalelong bja Kimehamo, kgauswi le Betlelehema.

₁Ke moka balaodi bohle ba madira, go balwa le Johanane, morwa wa Kareage, le Asaria, morwa wa Hoshaya, le batho ka moka, ba go nyatšega le ba go hlomphega, ba batamela ₂moprofeta Jeremia, ba re go yena: “Hle, dira se re go kgopelago sona! Re rapelele go Morena Modimo wa gago, rena ka moka re šetšego. Re be re le ba bantši, eupša bjale ba re šetšego ga re nene, bjalo ka ge le wena o iponela. ₃Rapela Morena Modimo wa gago, gore a re bontšhe tsela ye re swanetšego go tšea ka yona, le se re swanetšego go se dira.”

₄Moprofeta Jeremia a ba fetola a re: “Go lokile. Ke tla rapela Morena Modimo wa lena, go ya ka mo le nkgopelago, gomme sengwe le sengwe se a se bolelago ke tla le botša sona. Nka se le fihlele selo.”

₅Bona ba re go Jeremia: “Re itlema go phetha tšohle tše Morena Modimo wa gago a go laelago gore o re botše tšona. Ge re ka se di phethe Morena a re tšwe, gobane yena ke hlatse ya nnete ye e tshephegago. ₆Re tla phetha ditaelo tša Morena Modimo wa rena, yena yo re go kgopelago gore o re rapelele go yena ge di re kgahla le ge di sa re kgahle, gore tšohle di tle di re atle.”

₇Ge go fetile matšatši a lesome Morena a bolela le Jeremia; ₈ka gona Jeremia a bitša Johanane, morwa wa Kareage, le balaodi bohle ba madira bao ba bego ba na le yena, le batho ka moka, ba go nyatšega le ba go hlomphega. ₉A re go bona: “Morena Modimo wa Israele, yo le nthomilego gore ke iše kgopelo ya lena go yena, o re: ₁₀‘Ge le ka fela le dutše mo nageng ye ke tla le phediša ka se le fediše; ke tla le hloma ka se le tumole, gobane ke itshola ka lebaka la masetlapelo a ke le otlilego ka ona. ₁₁Le se sa tšhaba kgoši ya Babilonia ye gabjale le e tšhabago. Nna, Morena, ke re le se sa mmoifa, gobane ke na le lena go le phološa le go le hlakodiša diatleng tša gagwe. ₁₂Ke tla le šokela gore le yena a le šokele mme a le lese le ipoelele nageng ya gabolena.’

₁₃“Eupša ge le ka no fela le re: ‘Ga re nyake go dula mo nageng ye,’ e le ge le sa theeletše Morena Modimo wa lena, ₁₄le ge le ka re: ‘Aowa, re tla ikela nageng ya Egepeta mo re ka se kego ra hlaselwa, goba ra kwa phalafala ya ntwa, goba ra bolawa ke tlala, moo ke mo re nyakago go dula gona,’ ₁₅gona Morena Ramaatlaohle, Modimo wa Israele, o re go lena, mašaledi a Juda: ‘Ge eba le tloga le ikemišeditše go falalela Egepeta, ₁₆gona ntwa ye le e tšhabago e tla le hwetša gona kua Egepeta, le tlala ye le e boifago e tla le hlomara le le Egepeta, gomme le tla hwela gona. ₁₇Batho ka moka ba ba ikemišeditšego go falalela Egepeta ba tla bolawa ka tšhoša, goba ka tlala, goba ka leuba la bolwetši. Go ka se phologe le o tee, le o tee wa bona a ka se phonyokge masetlapelo a ke tlago ba tlišetša ona.’

₁₈“Morena Ramaatlaohle, Modimo wa Israele, o re: ‘Bjalo ka ge ke ile ka tšhollela pefelo le kgalefo ya ka godimo ga batho ba Jerusalema, le lena, ge le ka ya Egepeta, ke tla tšhollela kgalefo ya ka godimo ga lena. Batho ba tla rogaka ka leina la lena; ba tla tšhoga ge ba le bona; ba le kgatlela motswiri, ba le kodutla. Le ka se sa tsoga le bone felo fa.’

₁₉“Morena o le boditše, lena mašaledi a Juda, gore le se ke la ya Egepeta. Tsebang gore lehono ke le kgadile. ₂₀Ge le be le nkgopela le re: ‘Re rapelele go Morena Modimo wa rena; tšohle tše a tlago re laela tšona o re botše, gomme re tla di phetha,’ le be le ikgakantšha. ₂₁Gomme bjale ke le boditše tšona, eupša la nyatša se sengwe le se sengwe se Morena Modimo wa rena a nthomilego gore ke le botše sona. ₂₂Bjale ge, tsebang gore le ya go bolawa ka tšhoša, goba ka tlala, goba ka leuba la bolwetši nageng ye le nyakago go falalela go yona.”