To The Word – Day 184

₁Ge Jeremia a sa golegilwe ka kgorong ya mošate, Morena a buša a bolela naye a re: ₂“Nna, Morena, yo ke dirilego lefase, nna, Morena, yo ke le bopilego ka le bea madulong, nna, yo leina la ka e lego Morena, ke re: ₃Ntlhaeletše, mme ke tla go araba; ke tla go botša dilo tše dikgolo le tše o sa di kwešišego, tše o sa di tsebego. ₄Mabapi le dintlo tša motse wo le tša magoši a Juda tšeo di lego kgauswi le go hlahlamollwa gore go agwe merako ka tšona ya go le šireletša go bahlasedi ba ba le hlaselago ba le dintotomeng tša mobu, nna, Morena Modimo wa Israele, ke re: ₅Bahlabani ba go lwa le Bababilonia ba etla, gomme dintlo tše di tla tlala ditopo tša bao ke yago go ba bolaya ke befetšwe, ke galefile, gobane motse wo ke o furaletše ka lebaka la tše mpe tše badudi ba wona ba di dirilego. ₆Fela ke tla alafa motse wo le badudi ba wona ka ba fodiša. Ke tla ba tlišetša boiketlo bja mmakgonthe le polokego. ₇Ke tla atla batho ba Juda le ba Israele gape, gomme ka ba tsošološa ba swana le pele. ₈Ke tla ba hlatswa dibe tše ba mphošeditšego ka tšona, ka ba swarela makgopo ohle a ba nkgopišitšego ka ona ba nthumola. ₉Jerusalema e tla ba felo mo go nthabišago le mo ke retwago gona, le mo ke ikgantšhago ka gona, gomme seo se tla tsebja ke ditšhaba tšohle tša lefase; di tla boifa tša thothomela ge di ekwa ka tšohle tše dibotse tše ke di direlago batho ba Jerusalema, le ka katlego ye ke e tlišetšago motse wo.”

₁₀Morena o re: “Lena le re felo mo go swana le lešoka, ga go batho goba diphoofolo tše di phelago gona. Eupša nna ke re metseng ya Juda le mekgotheng ya Jerusalema ye e se nago selo, go sego batho goba diphoofolo, go sa tlilo kwala ₁₁mekgolokwane ya lethabo le tlhalalo, le ya menyanya ya manyalo, gwa kwala le mantšu a baopedi ba tliša dikabelo tša tebogo Tempeleng ya ka. Ba tla be ba opela ba re:

₁₂Morena Ramaatlaohle o re: “Mo nageng ye ya go swana le lešoka ya go se dulwe ke batho le diphoofolo, le metseng yohle ya gona go tla buša gwa ba le mafulo mo badiša ba ka robatšago dihuswane tša bona gona. ₁₃Kua metseng ya dithabeng, le go ya nagatlase, le go ya seleteng sa ka borwa se se omilego, le seleteng sa Benjamene, le metseng ya kgauswi le Jerusalema le go ya Juda badiša ba tla buša ba bala dihuswane tša bona. Ke realo, nna, Morena.”

₁₄Morena o re: “Nako e etla mohla ke tlago phethagatša se ke se holofeditšego batho ba Israele le ba Juda. ₁₅Mehleng yeo kgoši ke tla bea setlogolo sa Dafida se se lokilego. Kgoši yeo e tla dira tše di swanelago le tše di lokilego mo nageng. ₁₆Batho ba Juda ba tla phološwa, ba Jerusalema le bona ba tla phela ba bolokegile. Motse wo o tla bitšwa ‘Morena Morephološi’. ₁₇Nna, Morena, ke holofetša gore ka mehla go tla dula go na le setlogolo sa Dafida se se tlago ba kgoši ya Israele, ₁₈gape go tla dula go na le baprista ba Balefi ba ba ntlhankelago gape ba dirago dihlabelo tša go tšhungwa ka moka, le dikabelo tša bupi, le dihlabelo tše dingwe.”

₁₉Morena a re go Jeremia: ₂₀“Nna, Morena, ke re: Ge eba le ka senya kgwerano ye ke e dirilego le letšatši goba ye ke e dirilego le bošego, gore letšatši le bošego di se sa ba gona ka nako ya tšona, ₂₁gona le kgwerano ye ke e dirilego le Dafida, mohlanka wa ka, e ka senyega, mme yena a se be le setlogolo sa go mo hlatlama bogošing, kgwerano ye ke e dirilego le baprista ba Balefi ba ba ntlhankelago le yona e ka senyega. ₂₂Ke tla atiša ditlogolo tša mohlanka wa ka, Dafida, le Balefi ba go ntlhankela, gore go se kgonege go ba bala bjalo ka ge go sa kgonege go bala dinaledi tša legodimo, goba dithorwana tša lešabašaba la lebopo la lewatle.”

₂₃Morena a re go Jeremia: ₂₄“Afa o lemogile ka mo batho ba ba rego nna ke ngadile Baisraele le Bajuda, yona meloko ye mebedi ye ke ikgethetšego yona? Ka gona ba nyatša setšhaba sa ka, gomme ga ba sa se tšea e le setšhaba. ₂₅Nna, Morena, ke re ge nkabe ke se ka dira kgwerano le letšatši le bošego, ke se ka bea melao ye e laolago leratadima le lefase, ₂₆gona ke be nka lahla ditlogolo tša Jakobo le tša mohlanka wa ka, Dafida, ka se kgethe yo mongwe wa ditlogolo tša gagwe gore a buše ditlogolo tša Abrahama le tša Isaka le tša Jakobo. Ke tla šokela setšhaba sa ka, ka se atla gape.”

₁Morena o ile a bolela le Jeremia mola Nebukadnesare, kgoši ya Babilonia, le madira a gagwe ba hlasela Jerusalema le metsana ya kgauswi, ba thušwa ke madira a go tšwa ditšhabeng le merafeng ka moka ye e bušwago ke yena. ₂Morena Modimo wa Israele a mmotša gore a ye a botše Tsedekia, kgoši ya Juda, a re: “Nna, Morena, ke tla gafela motse wo diatleng tša kgoši ya Babilonia, gomme yena o tla o tšhuma ka mollo. ₃Wena o ka se mo tšwe ka diatleng; o tla thopša, wa gafelwa go yena. O tla mmona o tomalelane naye mahlo gomme wa bolela naye ka bowena, ya ba gona o yago Babilonia. ₄Wena Tsedekia, kgoši ya Juda, theeletša se nna, Morena, ke go holofetšago sona. Se ke se bolelago ka wena ke gore o ka se bolawe ntweng. ₅O tla ithobalela ka khutšo, gomme bjalo ka ge borakgolokhukhu ba gago bao e bego e le magoši pele ga gago ba be ba tšhumelwa diorelo, ka mokgwa wo mobjalo le wena o tla tšhumelwa diorelo. Ba tla go llela ba re: ‘Jonna, mong wa rena!’ Seo ke se le se holofetšwago ke nna, Morena.”

₆Ke moka moprofeta Jeremia a botša Tsedekia, kgoši ya Juda, taba tšeo ka moka Jerusalema, ₇mola madira a kgoši ya Babilonia a hlasetše motse. Madira ao a be a hlasetše le Lakishe le Aseka, yeo e bego e le yona fela metse ye e sa šetšego gare ga metse ya Juda ye e ageleditšwego ka merako.

₈Kgoši Tsedekia le batho ka moka ba Jerusalema ba be ba kwane go lokolla ₉makgoba a bona a Baheberu, a banna le a basadi, gore go se sa ba le yo a šomelwago ke lekgoba le e lego Mojudakayena. ₁₀Baetapele bohle le batho bohle ba ba bego ba kwane gore yo mongwe le yo mongwe o tla lokolla lekgoba la gagwe, la monna goba la mosadi, le gore ba ka se sa tsoga ba ba dirile makgoba gape. Ba ile ba ya ka kwano yeo, ba ba lokolla. ₁₁Eupša ka morago ba ile ba hlanama, ba ba buša, ba ba gapeletša go ba makgoba gape.

₁₂Ke mo Morena a boditšego Jeremia ₁₃gore a botše setšhaba gore yena Morena Modimo wa Israele o re: “Ke dirile kgwerano le borakgolokhukhu ba lena mola ke ba ntšha Egepeta mo e bego e le makgoba. Ke ba boditše gore ₁₄ka ngwaga wo mongwe le wo mongwe wa bošupa motho mang le mang wa bona a lokolle Moheberukayena yo a ithekišitšego go yena ya ba lekgoba mme a mo šomela mengwaga ye e selelago. Eupša borakgolokhukhu ba lena ba ile ba se nkele hloko goba ba ntheeletša. ₁₅Ga se kgale le hlaname le dirile tše di nkgahlago ka go lokolla Bajudakalena, la dira kgwerano pele ga ka ka Tempeleng moo ke swanetšego go khunamelwa gona. ₁₆Eupša ya re ka morago la hlanama gape gomme la nkgoboša. Ka moka ga lena le bušitše makgoba ale le bego le a lokolotše go ya ka mo a bego a nyakile, la a gapeletša go ba makgoba a lena gape. ₁₇Bjale ge, nna, Morena, ke re le nnyaditše ka go se lokolle Bajudakalena. Go lokile ge, nna ke tla le lokolla gore le bolawe ntweng, le bolawe le ka leuba la bolwetši, le ka tlala. Ke tla dira gore batho ba mebušo yohle ya lefase ba tšhošwe ke tše ke tlago le dira tšona. _18-19Baetapele ba Juda le ba Jerusalema, gotee le bahlanka ba ka mošate, le baprista, le batho ka moka ba naga ye ba ile ba dira kgwerano le nna ka go sepela magareng a mahlakore a mabedi a namane ye ba bego ba e pharotše ka bogare. Eupša ba lahlile kgwerano ye ba e dirilego pele ga ka, ba se phethe ditaelo tša yona. Ka gona batho ba ke tla ba dira se ba ilego ba se dira namane. ₂₀Ke tla ba gafela diatleng tša manaba a bona ao a nyakago go ba bolaya, gomme ditopo tša bona di tla jewa ke manong le dibata. ₂₁Tsedekia, kgoši ya Juda, le bakgomana ba gagwe le bona ke tla ba gafela diatleng tša manaba a bona ao a nyakago go ba bolaya, ka ba gafela madireng ao a kgoši ya Babilonia a sa tšogo boela morago ga gaboona. ₂₂Ke tla laela gore ba boele mo motseng wo. Ba tla o hlasela, ba o thopa, ba o tšhuma ka mollo. Ke tla dira gore metse ya Juda e be bjalo ka lešoka, mo go sa dulego motho. Ke realo, nna, Morena.”

₁Mola Joyakime, morwa wa Josia, e le kgoši ya Juda, Morena o ile a re go Jeremia: ₂“Eya go ba kgorwana ya Rekabe o yo boledišana le bona, e be o ba tliša ka phapošing ye nngwe ya Tempele ya ka, mme o ba tšhelele beine.” ₃Ka gona ka tšea bohle ba kgorwana ya Rekabe, e lego Jaasania, morwa wa Jeremia yo mongwe yo e bego e le morwa wa Habatsinya, gotee le bomorwarragwe le barwa ba gagwe ka moka, ₄ka ba tliša Tempeleng ya Morena. Ka ba iša ka phapošing ya barutiwa ba Hanane, monna wa Modimo, morwa wa Jigdalia. Phapoši ye e be e le ka godimo ga phapoši ya Maasea, morwa wa Shalume, yo e bego e le moletamojako wa Tempele, mme e le kgauswi le phapoši ya bahlankedi ba bangwe. ₅Ka napa ka bea dinkgo tše di tletšego beine, le dinwelo pele ga bona Barekabe bao, gomme ka re go bona: “Enwang beine še.”

₆Bona ba mphetola ba re: “Ga re nwe beine. Rakgolokhukhu wa rena, Jonadaba, morwa wa Rekabe, o re boditše gore rena le ditlogolo tša rena re se ke ra tsoga re nwele beine. ₇O re boditše le gore re se ke ra ikagela dintlo, goba ra lema mašemo, le gona re se ke ra bjala dirapa tša merara goba ra ba le tšona. O re laile gore ka mehla re dule ka mešašeng, gore re tle re phele galele nageng ye re falaletšego go yona ye. ₈Re phethile ditaelo tšohle tše rakgolokhukhu wa rena, Jonadaba, morwa wa Rekabe, a re filego tšona. Ga re ke re enwa beine, ešita le basadi ba rena, le barwa ba rena, le barwedi ba rena. _9-10Ga re ikagele dintlo tša go dula – re itulela ka mešašeng – le gona ga re ne dirapa tša merara, goba mašemo, goba peu. Re phethile tšohle tše rakgolokhukhu wa rena, Jonadaba, a re laetšego tšona. ₁₁Eupša mola Nebukadnesare, kgoši ya Babilonia, a šwahlela naga ye, re ile ra kwana go tla Jerusalema gore re tšhabele madira a Bababilonia le a Basiria. Ke ka lebaka leo re dulago mo Jerusalema.”

_12-13Ke moka Morena Ramaatlaohle, Modimo wa Israele, a botša Jeremia gore a ye go batho ba Juda le ba Jerusalema, a fihle a re: “Nna, Morena, ke botšiša gore le reng le gana go laiwa ke nna le go theeletša tše ke le botšago tšona. ₁₄Ditlogolo tša Jonadaba, morwa wa Rekabe, di phetha taelo ya gagwe ya gore ba se ke ba nwa beine, gomme le lehono ga ba e nwe, ba phetha taelo ya rakgolokhukhu yo wa bona. Eupša nna ke boletše le lena leboelela le sa ntheeletše. ₁₅Ke ile ka phegelela go le romela bahlanka ba ka, baprofeta, gomme ba le botša gore le sokologe ditseleng tša lena tše mpe le dire tše di lokilego, le gore le se khunamele medimo e šele la e loba. Ke mo le tlago fela le dutše nageng ye ke e filego lena le borakgolokhukhu ba lena. Eupša ga se la nkela hloko goba la ntheeletša. ₁₆Ditlogolo tša Jonadaba di swere taelo ye di e filwego ke rakgolokhukhu wa tšona, eupša lena ga se nke le ntheeletše. ₁₇Bjale ge, nna, Morena Ramaatlaohle, Modimo wa Israele, ke tla tlišetša lena batho ba Juda le ba Jerusalema masetlapelo ohle a ke a boletšego, ka gobane le ganne go ntheeletša ge ke bolela le lena, la se nkarabe le ge ke le bitša.”

₁₈Ke mo Jeremia a boditšego ba kgorwana ya Rekabe gore Morena Ramaatlaohle, Modimo wa Israele, o re: “Ka ge le phethile molao wa rakgolokhukhu wa lena, Jonadaba, la phetha le ditaelo tšohle tša gagwe, la dira tšohle go ya ka mo a laetšego ka gona, ₁₉nna, Morena Ramaatlaohle, Modimo wa Israele, ke re Jonadaba, morwa wa Rekabe, o tla fela a na le setlogolo sa monna sa go ntlhankela.”

₁Ka ngwaga wa bone wa ge Joyakime, morwa wa Josia, e le kgoši ya Juda, Morena o ile a re go Jeremia: ₂“Tšea puku o ngwale mantšu ohle a ke go boditšego ona ka ga Israele le Juda le ditšhaba tšohle. O ngwale tšohle tše ke go boditšego tšona go tloga ka nako yela ke thomilego go bolela le wena mola Josia e le kgoši, go fihlela bjale. ₃Mohlomongwe ge batho ba Juda ba ekwa ka ga masetlapelo a ke ikemišeditšego go ba otla ka ona, ba tla tlogela ditsela tša bona tše mpe. Ke moo ke tlago ba swarela bokgopo le dibe tša bona.”

₄Ka gona Jeremia a bitša Baruke, morwa wa Neria, mme a mmiletša mantšu ohle a Morena a bego a mmoditše ona. Gomme Baruke a a ngwala ka moka pukung. ₅Ka morago Jeremia a re go yena: “Ga ke sa dumeletšwe go tsena ka Tempeleng. ₆Eupša wena o ye gona ge batho ba ikona dijo gape. O hlaboše lentšu o ba balele puku yeo gore ba kwe mantšu ao Morena a mpoditšego ona ale o a bileditšwego ke nna, le gore batho ka moka le ba Juda ba ba tlilego ba etšwa metseng ya bona ba kgone go a kwa. ₇Mohlomongwe ba ka phophotha go Morena gomme ba tlogela ditsela tša bona tše mpe, ka gobane Morena o rile o tla ba otla o šoro a ba galefetše.” ₈Ka gona Baruke a dira se Jeremia a mmoditšego sona – a bala puku ya mantšu ao a Morena ka Tempeleng.

₉Ka kgwedi ya senyane ya ngwaga wa bohlano wa ge Joyakime e le kgoši ya Juda, setšhaba sa ikona dijo pele ga Morena. Go ikona dijo moo go ile gwa phethwa ke bohle ba ba bego ba dula Jerusalema, le bohle ba ba bego ba tlile moo ba etšwa metseng ya Juda. ₁₀Ya re mola batho ka moka ba theeleditše, Baruke a ba balela puku ya mantšu a Jeremia ka Tempeleng, a le ka phapošing ya Gemaria, morwa wa Shafane, mongwaledi wa kgoro. Phapoši yeo ya gagwe e be e le ka kgorong ya ka godimo, kgauswi le mojako wa Lesoro le Lefsa la Tempele.

₁₁Mikaya, morwa wa Gemaria le setlogolo sa Shafane, a kwa Baruke a bala mantšu ohle a Morena pukung. ₁₂A nama a ya ka mošate, phapošing ya mongwaledi wa kgoro, moo bakgomana ka moka ba bego ba dutše kgotla. Elishama, mongwaledi wa kgoro, Delaya, morwa wa Shemaya, Elnathane, morwa wa Akboro, Gemaria, morwa wa Shafane, Tsedekia, morwa wa Hanania, le bakgomana ka moka ba be ba le gona. ₁₃Mikaya a ba botša tšohle tše a kwelego Baruke a di balela setšhaba. ₁₄Ke moka bakgomana ba roma Jehudi go yo botša Baruke gore a tliše puku yela a e baletšego setšhaba. Jehudi e be e le morwa wa Netania, Netania morwa wa Shelemia, Shelemia morwa wa Kushi. Baruke a ba tlišetša puku yela. ₁₅Bona ba re: “Hle, dula fase, o re balele puku yeo.” Baruke a ba balela yona. ₁₆Ge a seno e bala, bona ba lebelelana ba tšhogile, mme ba re go Baruke: “Ruri, taba ye re swanetše go e begela kgoši.” ₁₇Ba napa ba mmotšiša ba re: “Hle, nke o re botše gore go tlile bjang gore o ngwale dilo tše ka moka. Kgane Jeremia o go bileditše tšona?”

₁₈Baruke a ba fetola a re: “Jeremia o mpileditše mantšu ohle, gomme nna ka a ngwala mo pukung ye ka enke.”

₁₉Ke moo ba rilego go yena: “Wena le Jeremia sepelang le yo iphihla. Go se ke gwa tseba motho mo le lego gona.”

₂₀Bakgomana ba bea puku yela ka phapošing ya Elishama, mongwaledi wa kgoro, mme ba ya kgorong ya kgoši, moo ba ilego ba begela kgoši ditaba tšeo ka moka. ₂₁Kgoši a nama a roma Jehudi go yo tšea puku yeo. A e tšea ka phapošing ya Elishama, gomme a e balela kgoši le bakgomana bohle ba ba bego ba eme pele ga gagwe. ₂₂E be e le marega, ka kgwedi ya senyane ya Sejuda, gomme kgoši a dutše mollong ka ngwakong wa gagwe wa marega. ₂₃E be e re ge Jehudi a fetša go bala diripa tše tharo goba tše nne, kgoši a di ripaganye ka mphaka wo o bego o šomišwa ke bangwaledi, gomme a di lahlele mollong. A tšwela pele le go dira bjalo go fihlela puku yohle e swele. ₂₄Eupša yena kgoši le bakgomana ba gagwe ba ba ilego ba kwa mantšu ao ga se ba ka ba boifa goba ba gagola diaparo tša bona ba nyamile. ₂₅Le ge Elnathane, Delaya le Gemaria ba be ba rapela kgoši gore a se ke a fiša puku yeo, yena o ile a se ke a ba ela hloko. ₂₆Ka morago a laela Jeragmeele, morwagwe, le Seraya, morwa wa Asriele, le Shelemia, morwa wa Abdeele, gore ba yo swara Jeremia le Baruke, mongwaledi wa gagwe. Eupša Morena o be a ba fihlile.

₂₇Ka morago ga ge Kgoši Joyakime a fišitše puku yela mantšu a yona Jeremia a bego a a bileditše Baruke, Morena a botša Jeremia ₂₈gore a tšee puku ye nngwe a ngwale go yona se sengwe le se sengwe se se bego se ngwadilwe ka go yela ya pele. ₂₉Morena a laela le gore a botše kgoši a re: “O fišitše puku yela, wa ba wa botšiša Jeremia gore ke ka lebaka lang a ngwadile gore ruri kgoši ya Babilonia e tla tla go senya naga ye, mme ya bolaya batho ba yona le diruiwa. ₃₀Bjale ge, mabapi le Kgoši Joyakime, nna, Morena, ke re ga go setlogolo sa gagwe se se tlago tsoga e bile kgoši mmušong wa Dafida. Setopo sa gagwe se tla lahlelwa moo se tlago tšhungwa ke letšatši mosegare, sa welwa ke tšhwaane bošego. ₃₁Ke tla otla yena le ditlogolo tša gagwe le bakgomana ba gagwe ka lebaka la bokgopo bja bona. Bona le badudi ba Jerusalema le batho ba Juda ga se ba šetša ge ke ba kgala; ka gona ke tla ba tlišetša masetlapelo ale ke ba boditšego ona ka moka.”

₃₂Ke moka Jeremia a tšea puku ye nngwe, a e neela Baruke, mongwaledi wa gagwe, yo a ilego a ngwala mantšu a Jeremia a bego a mmiletša ona. A ngwala se sengwe le se sengwe se se bego se le ka pukung yela ya go fišwa ke kgoši, le melaetša ya go swana le yela a bego a e bileditšwe ke Jeremia.

₁Nebukadnesare, kgoši ya Babilonia, a bea Tsedekia, morwa wa Josia, kgoši ya naga ya Juda legatong la Joyakine, morwa wa Joyakime. ₂Tsedekia le bahlanka ba gagwe le batho ba naga yeo ba ile ba se theeletše tše Morena a ba botšago tšona ka moprofeta Jeremia.

₃Kgoši Tsedekia a roma Jukale, morwa wa Shelemia, le moprista Sofonia, morwa wa Maasea, go moprofeta Jeremia, ba fihla ba re: “Nke o re rapelele go Morena Modimo wa rena.” ₄O be a sešo a išwa kgolegong, a sa itshepelela ka go rata gare ga batho. ₅Madira a Babilonia a be a dikaneditše Jerusalema, eupša ge ba ekwa gore madira a Egepeta a tshetše mollwane wa Egepeta, ba boela morago.

₆Ke mo Morena Modimo wa Israele a boditšego Jeremia ₇gore a botše banna bale ba babedi gore ba yo botša kgoši ya Juda ye e bego e ba romile go yena go kgopela maele ba re: “Madira a kgoši ya Egepeta ao a lego tseleng go tlo le thuša a tlilo boela nageng ya gaboona, nageng ya Egepeta. ₈Ya ba gona go boago Bababilonia, ba hlasela motse, ba o thopa, gomme ba o tšhuma ka mollo. ₉Nna, Morena, ke le botša gore le se ke la iphora ka go gopola gore Bababilonia ba ka se boe, gobane go boa gona ba tla boa. ₁₀Le ge le be le ka fenya madira ohle a Bababilonia a a lwago le lena, gwa šala fela dikgobadi tše di ithobaletšego ka mešašeng, tšona dikgobadi tšeo di be di tla tsoga tša tšhuma motse wo ka mollo.”

₁₁Madira a Bababilonia a ile a boela morago a tloga Jerusalema ka gobane madira a kgoši ya Egepeta a be a batametše. ₁₂Ka gona, Jeremia ge a re o tloga Jerusalema o ya seleteng sa Benjamene go yo rerišana le meloko yabo ka tša go aba bohwa bja gabo, ₁₃ge a fihla lesorong la Benjamene, molaodi wa baletalesoro, yo leina la gagwe e bego e le Jiria, morwa wa Shelemia, Shelemia morwa wa Hanania, a mo thibela a re: “Etse o tšhabela go Bababilonia!”

₁₄Jeremia a mo fetola a re: “Ke maaka! Nna ga ke tšhabele go Bababilonia.” Eupša Jiria a se mo theeletše. A mo swara a mo iša go ba bagolo. ₁₅Bona ba mo galefela, ba laela gore a bethwe mme a tswalelelwe ka ntlong ya Jonathane, mongwaledi wa kgoro, yo ntlo ya gagwe e bego e dirilwe kgolego. ₁₆A tsenywa ka phapošing ya ka tlase mme a dula ka moo nako ye telele.

₁₇Ka morago Kgoši Tsedekia a roma batho gore ba yo mo tšea, gomme a fihla a mmotšiša ka sephiring kua mošate a re: “Kgane o na le molaetša wa go tšwa go Morena?”

Jeremia a mo fetola a re: “Ke nawo.” A ba a tlaleletša ka go re: “Wena o tla gafelwa diatleng tša kgoši ya Babilonia.” ₁₈A mmotšiša a re: “Ke go senyeditše ka eng, wena le bahlanka ba gago, le setšhaba se ge e bile le nkgolegile? ₁₉Ba kae baprofeta bale ba lena ba go le botša gore kgoši ya Babilonia e ka se le hlasele, lena goba naga ya lena? ₂₀Bjale ge, kgoši, mong wa ka, ke a go rapela, hle, amogela kgopelo ya ka. Se mpušetše ga mongwaledi Jonathane, ka gore nka hwela gona.”

₂₁Ka gona, Kgoši Tsedekia a laela gore Jeremia a tswalelelwe ka kgorong ya mošate. A dula gona, gomme tšatši le lengwe le le lengwe a fiwa senkgwa sa go tšwa go baapei ba dinkgwa. Gwa ba bjalo, go fihlela go se sa na le senkgwa moo motseng.

₁O se ke wa duma batho ba babe, goba wa šika le bona. ₂Se ba se naganago ke šiši fela; ba bolela fela ka tša go hlola mathata.

₃Lapa le thewa ka kwešišo, la agwa ka bohlale. ₄Ke ka tsebo ge diphapoši tša lona di tlala diphahla tša mehutahuta tše bohlokwa, tša go kgahliša.

₅Monna yo bohlale ke kwankwetla; monaletsebo o feta senatla ka maatla. ₆Gape ntwa e kgonwa ka go itokišetša yona gabotse; go fenya go fenywa ka maele a baeletši ba bantši.

₇Go lešilo bohlale ke phetatlhaologanyo; ge le le kgorong ga le bolele.

₈Yo a dulago a rera tše mpe batho ba mmitša ramaanomabe. ₉Go akanya tša bošilo ke sebe; batho ka moka ba šišingwa mokodutli.

₁₀Ge o se na sebete nakong ya tlalelo go ra gore ga o na maatla a selo.

₁₃Ngwanaka, o je todi ya dinose, e lokile. Bjalo ka ge todi ya mamapo e le bose lelemeng, ₁₄tseba gore le bohlale bo bjalo mothong. Ge o ka bo hwetša o tla ba le bokamoso bjo bo kgahlišago, le kholofelo ya gago e ka se be ya lefeela.

₁₅O se lalele moloki ka ga gagwe boka yo kgopo, goba wa thopa tša lapa la gagwe. ₁₆Moloki le ge a ka wa leboelela o a tsoga, yo kgopo yena o phekgolwa ke madimabe.

₁₇O se thabele go wa ga lenaba la gago, goba wa thakgala ge a kgopša. ₁₈Morena a ka go bona mme a se kgahlege, a lesa go mo otla.

₁₉O se ferekane ka lebaka la badiratšempe, goba wa duma bakgopo. ₂₀Motho yo mobe a ka se atlege; yo kgopo a ka se phele go ya kae.

₂₁O boife Morena, ngwanaka, o boife le kgoši. O se tlwaelane le bao ba ba tsogelago maatla; ₂₂ba babjalo ba ka khukhunetšwa ke madimabe. Kgane ke mang yo a tsebago madimabe a ba ka a tlišetšwago ke Morena le kgoši?

₂₃Tše dingwe diema tša bahlale šedi: