To The Word – Day 178

₁Puku ye e laodiša tše di boletšwego ke Jeremia, morwa wa Hilkia. Hilkia yena e be e le yo mongwe wa baprista ba motse wa Anathote, nageng ya Benjamene. ₂Morena o boletše le Jeremia ka ngwaga wa lesome le metšo ye meraro wa ge Josia, morwa wa Amone, e le kgoši ya Juda, ₃a tla a bolela le yena gape mola Joyakime, morwa wa Josia, e le kgoši. O be a fela a bolela le yena go fihlela mafelelong a ngwaga wa lesome le motšo o tee wa pušo ya Tsedekia, morwa wa Josia. Ka kgwedi ya bohlano ya ngwaga woo batho ba Jerusalema ba ile ba thopša.

₄Morena o ile a re go nna: ₅“Ke tsebile pele ke go bopa gore o tla ba eng, ka go kgethwafatša pele o tswalwa ke mmago, ka go dira moprofeta wa ditšhaba.”

₆Nna ka mo fetola ka re: “Aowii, Morena, Mong wa bohle, nna ga ke kgone polelo ka gobane ke sa le yo mofsa.”

₇Eupša Morena a re go nna: “O se ke wa re o sa le yo mofsa, gobane o tla ya go batho ka moka bao ke go romago go bona, wa ba botša tšohle tše ke go laelago tšona. ₈O se ke wa ba tšhaba, ka gobane ke tla ba le wena gore ke go šireletše. Ke realo, nna, Morena!”

₉Ke moka Morena a obeletša letsogo, a nkgoma molomo, a re go nna: “Bona, mantšu a o swanetšego go a bolela ke a tsenya ka molomong wa gago. ₁₀Lehono ke go fa maatla a go hlahlamolla le go uša, a go fediša le go menola, a go aga le go hloma ditšhaba le mebušo.”

₁₁Morena a mpotšiša a re: “Na o bonang?”

Nna ka mo fetola ka re: “Ke bona lekala la mooka, mophafogapele.”

₁₂Morena a re: “O bone gabotse. Ke dula ke phafogetše go phetha tše ke di boletšego.”

₁₃Ke mo Morena a boletšego le nna la bobedi a re: “Na o bonang gape?”

Ka mo fetola ka re: “Ke bona pitša ye e belago e le ka leboa e sekametše ka thoko yeno.”

₁₄Yena a re go nna: “Masetlapelo a tla tšhologela godimo ga bohle ba ba dulago mo nageng ye a etšwa ka thoko ya leboa, ₁₅ka gobane ke bitša ditšhaba tša mebušo ka moka leboa gore di tle. Magoši a tšona a tla hloma ditulo tša ona tša bogoši masorong a dikgoro tša Jerusalema le go dikologa merako ya yona, le metseng ye mengwe ya Juda. ₁₆Ke tla otla setšhaba sa ka ka lebaka la dibe tša sona; se ntlogetše sa direla medimo ye mengwe dihlabelo, sa itirela medimo ya diswantšho gomme sa e obamela. ₁₇Wena itokiše, o yo ba botša tšohle tše ke go laelago gore o ba botše tšona. O se ke wa ba boifa; ge o ka ba boifa, gona ge o na le bona ke tla go boifiša go fetiša.

_18-19“Bjale bona, mang le mang mo nageng ye o tla lwa nago – magoši a Juda, bakgomana, baprista le setšhaba. Eupša lehono ke go fa maatla a go ba kgotlelela: O tla ba bjalo ka motse wo o ageleditšwego ka morako, goba kokwane ya tshipi, goba ka leboto la mphiri. Ba ka se go fenye ka gobane ke tla ba nago gore ke go šireletše. Ke realo, nna, Morena.”

₁Morena o ntaetše gore ₂ke yo bega molaetša wo Jerusalema gore o kwewe ke batho ka moka.

Morena o re:

₉Morena o re:

₂₀Morena Ramaatlaohle o re:

₂₆Morena o re:

₂₈“E kae medimo yela le itiretšego yona? Ge le le mathateng a e be yona e le hlakodišago, ge eba e a kgona, gobane le na le medimo ya go lekana le metse ya lena ka bontši, lena batho ba Juda. ₂₉Le reng le mpea molato? Bohle le ntsogetše maatla. ₃₀Ke le otlile, gwa se thuše selo. Le ganne ke le kgala. Bjalo ka tau ye e gaketšego le bolaile baprofeta ba lena ka tšhoša. ₃₁Lena setšhaba sa Israele, ekwang se ke le botšago sona. Kgane ke be ke le bjalo ka lešoka mo go lena, ke swana le naga ya lešobohlo? Bjale ge, lena tšhaba sa ka, le reng le nyaka go itirela se le se ratago, le re le ka se boele go nna? ₃₂Kgane lethari le ka lebala magakabje a lona, goba ngwetši e ka lebala lešira la yona? Eupša setšhaba sa ka sona ke kgale kudu se ntebetše. ₃₃Ga ke re le tseba gabotse mo metlabo ya lena le ka e hwetšago gona! Ke ka lebaka leo le tlwaetšego go dira tše mpe. ₃₄Merumo ya diaparo tša lena e thankgetše madi a bahlaki ba ba se nago molato, ba le se la kago la ba swara ba šwahlela ka dintlong tša lena.

“Le ge go le bjalo ₃₅le re: ‘Rena ga re ne molato; ruri, Morena ga a sa re galefetše.’ Eupša nna, Morena, ke tla le sekiša ka gobane le re ga se la dira dibe. ₃₆Ge le sa hwetše thušo setšhabeng se sengwe, le geremela go se sengwe. Egepeta e tla le swabiša, bjalo ka ge le ile la swabišwa ke Asiria. ₃₇Le lena le tla boa Egepeta le rwele megono. Ba le ba botilego ke ba ganne, nna, Morena; le ka se holege ka selo sa go tšwa go bona.”

₁Morena o re: “Ge monna a ka hlala mosadi wa gagwe, gomme mosadi yoo a mo tlogela a nyalwa ke yo mongwe monna, monna yola a ka se sa kgona go mo tšea gape. Seo se ka tšhilafatša naga e le ruri. Eupša lena Baisraele, le robetše le metlabo ye mentši, gomme bjale le nyaka go boela go nna! ₂Lebelelang kua godimo ga meboto. Kgane go na le felo mo metlabo ya lena e sego ya ka ya robala le lena? Le be le e lalela ka thoko ga tsela bjalo ka Moarabia ge a lalela batho lešokeng. Le kgotletše naga ka bofebe le bokgopo bja lena. ₃Ke ka lebaka leo le bego le hloka dipula tša matlorotloro, le ditsheola tša selemo di sa ne. Ebile le be le swana le sefebe, le sa inyatše. Le be le se na dihlong.

₄“Gomme ke gonabjale mo le rego go nna: ‘O Tatagorena, gomme o re ratile go tloga bjaneng bja rena. ₅O ka se fele o re befeletšwe; o ka se re galefele go ya go ile.’ Ke seo le bego le se bolela, lena Baisraele, gomme go dira tše mpe e le wona mokgwa wa lena.”

₆Mola Josia e le kgoši Morena o ile a re go nna: “Afa o bone tše Baisraele bao ba bakgelogi ba bego ba di dira? Ba be ba eya dithabeng tšohle tše di phagamego, le ka fase ga mehlare yohle ye metala, ba fihle ba febe. ₇Ke be ke gopola gore ge ba seno dira dilo tše ka moka ba tla boela go nna. Eupša ga se ba boa, gomme le batho ba Juda, bona bongwanabobona ba go se botege, ba di bone. ₈Ba bone le gore ke hladile Baisraele ba bakgelogi, ka ba fa lengwalo la tlhalo ka lebaka la bootswa bja bona. Eupša batho ba Juda, bona bongwanabobona ba go se botege, ba se boife, le bona ba dira tša bofebe. ₉Ba tšhilafaditše naga ka go feba ba sa inyatše, ba khunamela maswika le dikota, ya ba gona go otswa ga bona. ₁₀Ka morago ga tšeo ka moka batho ba Juda ba go se botege, bona bongwanabo Baisraele, ba itira tše nkego ba boela go nna, mokagona e se ka dipelo tša bona ka moka. Ke realo, nna, Morena.”

₁₁Ke moka Morena a mpotša gore batho ba Israele ba bakgelogi ga ba na molato go swana le ba Juda ba go se botege. ₁₂A mpotša gore ke yo kwalakwatša molaetša ke lebeletše leboa, ke re: Morena o re: “Lena batho ba Israele ba bakgelogi, sokologang. Nka se sa le galefela, ka gobane ke na le kgaugelo; ga ke galefe go ya go ile. ₁₃Lena dumelang fela gore le na le molato wa go kgeloga go Morena Modimo wa lena. Ipoleleng gore le be le khunamela medimo e šele ka fase ga mehlare yohle ye metala, le gore le be le sa ntlhomphe. Ke realo, nna, Morena.

₁₄“Lena setšhaba sa bakgelogi, sokologang; ke nna Mong wa lena. Ke tla tšea o tee wa lena motseng wo mongwe le wo mongwe, ka tšea ba babedi kgorwaneng ye nngwe le ye nngwe, gomme ka le iša thabeng ya Sione. ₁₅Ke tla le fa babuši ba go le buša ka mo ke nyakago ka gona, gomme ba tla le buša ka bohlale le tlhaologanyo. ₁₆E tla re ge le šetše le atile mo nageng yeo, batho ba se sa bolela ka Polokelo ya Kgwerano. Ba ka se sa nagana ka yona goba ba e gopola; le go e nyaka ba ka se sa e nyaka, le gona ba ka se dire ye nngwe. ₁₇Ka nako yeo Jerusalema e tla bitšwa ‘Setulo sa bogoši sa Morena’, gomme ditšhaba tšohle di tla kgobokana gona go nkhunamela. Ba ka se sa ngangabalela go dira tše mpe tše ba di ratago. ₁₈Batho ba Israele ba tla kopana le ba Juda, gomme ba tla boa mmogo ba tšwa nageng ya ka leboa ba boela nageng ye ke e abetšego borakgolokhukhu ba lena gore e be lefa la bona.”

₁₉Morena o re:

Etse le re: “Ke rena ba, re tla go wena, gobane o Morena Modimo wa rena. ₂₃Go loba medimo ya diswantšho kua mebotong le dithabeng ka mašata ga se gwa re thuša selo. Ke Morena Modimo wa rena yo a phološago Baisraele. ₂₄E sa le go tloga bjaneng bja rena Baale, modimo wa go leša dihlong, a kwametša tšohle tše di katanetšwego ke borakgolokhukhu ba rena – dihuswane tša bona, le mehlape ya bona, barwa le barwedi ba bona. ₂₅A re duleng fase re inyatšeng, kgobogo e be kobo ya rena, gobane re fošeditše Morena Modimo wa rena, rena gotee le borakgolokhukhu ba rena; re be re sa hlomphe Morena Modimo wa rena.”

₁Morena o re: “Lena setšhaba sa Israele, ge le nyaka go sokologa, gona sokologelang go nna. Ge le ka tloša medimo ya lena ya diswantšho ya go šišimiša ka se sa e bona mme la se sa kgeloga, ₂ge le ikana le tiišitše le eya ka toka le sa bolele maaka le re: ‘Ka Morena yo a phelago’, gona ditšhaba di tla šegofatšana di bitša leina la ka, tša ikgantšha ka nna.”

₃Morena o re go batho ba Juda le go badudi ba Jerusalema: “Kgathang megola ya lena, le se ke la bjala ka mašohlošohlong a meetlwa. ₄Ineeleng nna, Morena, le se sa ngangabala, lena batho ba Juda le lena badudi ba Jerusalema. Ge le ka se dire bjalo pefelo ya ka e tla lauma bjalo ka mollo ka lebaka la dilo tše mpe tše le di dirilego. E tla lauma, gomme ya hloka motimi.”

₅Begang mo nageng ya Juda, go kwagale le Jerusalema, le re:

₉Morena o re: “Tšatšing leo magoši le bakgomana ba tla nolega moko; baprista ba tla tšhoga, le baprofeta ba tla tlabega.”

₁₀Ke mo ke ilego ka re: “Jonna, Morena, Mong wa ka, o forile setšhaba se e le ruri, le batho ba Jerusalema! O rile go tla ba le khutšo, eupša ke tšhoša ye e lego megolong ya bona.”

₁₁Mehleng yeo setšhaba se le batho ba Jerusalema ba tlilo botšwa gore go foka phefo ye e fišago ya go tšwa mebotong ya lešoka e fokela go bona. E ka se be phefo ya go hlokola le go fefera. ₁₂Phefo yeo ya go tla ka taelo ya Morena e tla ba ye kgolo kudu go feta ye. Bjale ke Morena ka noši yo a sekišago setšhaba sa gagwe.

₁₃Bonang, manaba a rotoga bjalo ka maru. Dikoloi tša ntwa nke ke sesasedi, le dipere tša bona ke maphefo go feta ntšhu. Re lahlegile! Re hwile!

₁₄Hlatswa bokgopo pelong ya gago, wena Jerusalema, gore o tle o phologe. O tla feletša kae le go nagana tše mpe?

₁₅Mokgoši wa taba tše mpe o kwagala o etšwa motseng wa Dane, o hlabja o etšwa le nageng ya Efraime ya dithaba, ₁₆o re: Begelang ditšhaba, le tsebišeng le batho ba Jerusalema le re badikanetši ba etla ba tšwa nageng ya kgole. Ba tla kgeregela metse ya Juda ka megobo, ₁₇gomme ba tla dikanetša Jerusalema bjalo ka baleti ba tšhemo, ka gobane batho ba gona ba gana go bušwa ke Morena. O realo, yena Morena.

₁₈Lena batho ba Juda, le ipaketše taba tše ka maitshwaro a lena le ka ditiro tša lena. Ke bokgopo bja lena bjo bo le hloletšego ditlaišego tše, bjo bo le tsetsemeditšego pelo.

₁₂Setšhaba sa Morena se mo latotše sa re: “A ka se dire selo. Re ka se be mathateng; re ka se welwe ke ntwa goba tlala.” ₁₃Ba boletše gore baprofeta ke difafatlane fela, mme tše ba di bolelago ga se molaetša wa Morena. A matšhošetši a bona a wele bona beng! ₁₄Ke ka lebaka leo Morena Modimo Ramaatlaohle a rego go nna: “Ka ge batho ba ba boletše taba tša mohuta wo, ke tla dira gore mantšu a ka e be mollo ka molomong wa gago. Batho e tla ba dikgong, gomme mollo o tla ba ja.

₁₅“Lena setšhaba sa Israele, ke tliša setšhaba sa go tšwa kgole go tlo le hlasela. Ke setšhaba se se tiilego, setšhaba sa kgale, setšhaba seo polelo ya sona le sa e tsebego gape le sa e kwešišego. ₁₆Boramesebe ba bona ke ditsebi, ka moka ga bona ke bahlabani ba maatla. ₁₇Ba tlilo kwametša tše le di bunnego le dijo tša lena; ba tlilo bolaya barwa le barwedi ba lena, le dihuswane le dikgomo tša lena, ba ba ba senya merara le mego ya lena. Metse ya go ageletšwa ka merako ye le e botilego e tla pšhatlaganywa ke madira a bona.

₁₈“Le ge go le bjalo, le mehleng yeo nka se feleletše setšhaba sa ka molokwanarite. ₁₉Ge ba botšiša gore ke ka lebaka lang nna, Morena Modimo wa lena, ke dirile dilo tše ka moka, o ba botše gore bjalo ka ge ba ile ba ntlhanamela mme ba hlankela medimo e šele nageng ye e lego ya bona, ka mokgwa wo mobjalo ba tlilo hlankela batho ba šele nageng ye e sego ya bona.”

₂₀“Tsebišang ditlogolo tša Jakobo, begelang setšhaba sa Juda le re: ₂₁Ekwang taba ye, lena setšhaba sa ditlatla se se se nago tlhaologanyo, se se nago le mahlo, eupša se sa bone; se nago le ditsebe, eupša se sa kwe. ₂₂Na ga se la swanela go ntšhaba? Kgane ga se la swanela go thothomela pele ga ka? Etse ke nna ke dirilego lešabašaba mollwane wa lewatle, legora la go ya go ile leo lewatle le ka se kego la le tshela. Lewatle le ge le ka gakala bjang, le ka se tshele lešukuhledi le; maphoto le ge a ka poruma, a ka se le šwahle. ₂₃Eupša setšhaba se sona se ngangabetše se gana go bušwa ke nna; se arogile sa ntlogela. ₂₄Ga ba sa gopola go ntlhompha, nna, Morena Modimo wa bona, ke ba nešetšago dipula, kgogolamooko le tsheola ka nako ya tšona, ke ba tlišetšago sehla sa go buna ngwaga ka ngwaga. ₂₅Dikarogo le dibe tša bona di ba hlokišitše dilo tšeo tše dibotse.

₂₆“Mo setšhabeng sa ka go na le batho ba kgopo; ba lalela motho bjalo ka barei ba dinonyana, eupša ya bona melaba ke ya go thea batho. ₂₇Bjalo ka ge serobe se tlala dinonyana, dintlo tša bona le tšona di tletše tše ba di thopilego. Ke ka lebaka leo e lego ba maatla, ba bahumi, ₂₈ba go nona le go phadima. Mediro ya bona ye mebe ga e na magomo. Ga ba šetše gore ditšhiwana di direlwe ka toka, fela ba no atlega. Tshekong ga ba emele bahloki.

₂₉“Eupša nna, Morena, nka napa ka se ba otlele dilo tše dibjalo, ka se itefeletše ka setšhaba sa mohuta wo? ₃₀Go direga taba ya go selekiša, ya go tena mo nageng: ₃₁Baprofeta ba porofeta maaka, baprista ba buša go ya ka taelo ya baprofeta, gomme setšhaba sa ka se rata gona. Eupša ba tlilo dirang ge tšohle tšeo di fihla mafelelong?”

₁Lena Babenjamene, tšhabang, le tšwe Jerusalema, le itote, le yo letša phalafala kua Tekoa, gomme le gotše mollo e be sešupo sa ntwa kua Bethe-Kereme, gobane masetlapelo le tshenyo ye kgolo di etla di tšwa leboa. ₂Motse wa Sione o swana le morwedi yo mobotse wa seithati, fela ke tla o fediša; ₃magoši le madira a ona ba tla tla go o hlasela. Ba tla hloma mešaša ya bona go dikologa motse, gomme yo mongwe le yo mongwe o tla šwahlela karolo ye nngwe ya wona. ₄Magoši ao a tla re: “Itokišetšeng go hlasela Jerusalema! Itokišeng, re yo hlasela mosegare!” Eupša a mangwe a tla re: “Aowii, tšatši le šetše le thapame, le meriti ya mathapama e lelefetše. ₅Itokišeng, re tle re hlaseleng bošego, re pšhatlaganyeng dibo tša motse wo.”

₆Morena Ramaatlaohle o laetše magoši a gore a reme dihlare, a kgobele mokgobo wa mobu go dikanetša Jerusalema. A re: “Wo ke motse wo o swanetšego go otlwa, ka gobane o tletše batho ba go gatelela ba bangwe. ₇Bjalo ka ge meetse a sediba a sa pšhe, bobe bja Jerusalema le bjona bo ka se fele. Ke kwa šiši le tshenyo mo motseng; ke bona fela malwetši le dintho. ₈Lena batho ba Jerusalema, eletšegang, go sego bjalo gona ke tla le ngala, ka fetoša motse wa lena mašope, felo moo go sa dulego motho.”

₉Morena Ramaatlaohle a re go nna: “Mašaledi a setšhaba sa Israele a tla hlakolwa dithoto tša ona a ba bjalo ka serapa sa merara se se kgobišitšwego. Ka gona o hlakodiše bohle ba o ka kgonago go ba hlakodiša.”

₁₀Nna ka mo fetola ka re: “Ke mang yo a kago ntheeletša ge ke bolela nabo ke ba eletša? Ba thibane ditsebe mme ga ba kgone go theeletša; ba nyatša lentšu la gago, ga ba le thabele. ₁₁Ka gona, Morena, le nna ke ba galefetše go no swana nago, gomme ga ke sa kgona go itshwara.”

Ya ba Morena o re go nna: “Hlatšetša kgalefo ya ka godimo ga bana mebileng, ešita le godimo ga dihlopha tša masogana. Banna le basadi ba bona ba tla thopša, diputswa ešita le bona batšofaditšofadi. ₁₂Magae a bona gotee le mašemo le basadi ba bona di tla fiwa bangwe. Ke tlilo otla badudi ba naga ye, ₁₃ka gobane ka moka ga bona, ba go nyatšega le ba go hlomphega, ke ba megabaru; le baprofeta le baprista ba hlalefetša batho. ₁₄Ba dira tše nkego dintho tša setšhaba sa ka e dio ba go kgoboga fela. Ba re: ‘Tšohle di lokile,’ etšwe go se go loke selo. ₁₅Ba be ba swanetše go inyatša ka ge ba dirile dilo tše tša go šišimiša. Fela le gatee ga ba inyatše, le dihlong ga ba natšo. Ka gona, ba tla wa ba etša ba ba welego; ge ke ba otla, e tla napa ya ba pheletšo ya bona. Ke realo, nna, Morena.”

₁₆Morena o rile go setšhaba sa gagwe: “Emang magahlanong a ditsela le lebeleleng. Botšišang batho ditsela tša bogologolo, le kgethe ye kaonekaone. Le tšeeng yona, gomme le tla phela le iketlile.”

Fela bona ba re: “Aowa, ga re nyake!” ₁₇Gomme Morena a bea balebeledi gore ba theeletše mollo wa phalafala. Le bona ba re: “Ga re nyake.”

₁₈Ka gona Morena a re: “Theeletšang, lena ditšhaba, tsebang se se tlago hlagela setšhaba sa ka lena ka moka. ₁₉Theeletša, wena lefase! Ke fediša setšhaba se e le kotlo ya maanonyana a bona, ka gobane ga se ba phetha tše ke ba laetšego tšona, le thuto ya ka ba e ganne. ₂₀Kgane seorelo sa go tšwa Sheba se ba ntlišetšago sona, goba senkgabose sa go tšwa lefaseng la kgole ke na le taba natšo? Dihlabelo tša bona tša ditšhungwakamoka ga ke di amogele, le tše dingwe dihlabelo tša bona ga di nkgahle. ₂₁Ka gona, setšhaba se ke tla se beela dikgopi tša go ba kgopa. Botatagobana le barwa ba bona, le baagišani le bagwera ba bona ba tla hwa.”

₂₂Morena o re: “Setšhaba se se tšwago nageng ye nngwe ka leboa se etla; morafe wo maatla kua kgolekgole o itokišetša ntwa. ₂₃Ba itlhamile ka mesebe le marumo; ke ba sehlogo, ga ba na lešoko. Ba kwagala bjalo ka lewatle le le bopago ge ba nametše dipere tša bona. Ba itokišeditše go lwa le wena, motse wa Sione.”

₂₄Batho ba Jerusalema ba re: “Ditaba tšeo re di kwele, gomme re rephile matsogo; re aparetšwe ke tlalelo, re šokwa wa mosadi ge a belega. ₂₅Le se tšwele ka ntle nageng, goba la sepela ditseleng, ka gobane manaba a rena a itlhamile ka dihlabano gomme a re tšhoša ka gohle.”

₂₆“Lena setšhaba sa gešo, aparang tša go ilela, le pshikologeng meloreng. Kgitlang sello se bohloko bjalo ka yo a hwetšwego ke morwagwe a nnoši, ka gobane yo a tlilego go re fediša o tla re hlasela ka bjako. ₂₇Wena Jeremia, ke go beile mohlahlobi wa setšhaba sa ka; ke tla go tiiša. O nyakišiše o be o hlahlobe tše ba di dirago. ₂₈Bohle ke dinganganganga, ba tšama ba senya batho maina, ke ba thata bjalo ka mphiri le tshipi, bohle ke ba kgopo. ₂₉Mouba o butšwetša ka maatla go tšhuma morodi ka mollo; motološi o šomela lefeela, ka gobane manyedi a a ganelela. ₃₀Baisraele ba ba bitšwa siliberatahlwa, ka gobane nna, Morena, ke ba lahlile.”