To The Word – Day 176

₁Nna, Paulose, yo ka thato ya Modimo ke lego moapostola wa Kriste Jesu, nna yo ke romilwego go yo bega kholofetšo ya bophelo bjo re nago le bjona ka go ba ba tee le Kriste Jesu, ₂ke dumediša wena, Timotheose, morwa wa ka yo ke mo ratago, ke re:

Nke Modimo, Tatagorena, le Kriste Jesu, Morena wa rena, ba go gaugele, ba go šokele, mme ba go fe khutšo.

₃Ke leboga Modimo yo ke mo hlankelago bjalo ka borakgolokhukhu, ke sa itshetshengwe. Ke mo leboga ge ke go gopola ka mehla mo dithapelong tša ka bošego le mosegare. ₄Ke gopola ge o be o lla, gomme ke duma go go bona gape, gore ke tle ke thakgale e le ruri. ₅Ke gopola tumelo ya mmakgonthe ye o nago le yona, tumelo ya go swana le yela makgoloago, Loise, le mmago, Onika, ba bego ba na le yona. Ke tloga ke kgolwa gore le wena o na le yona. ₆Ke ka lebaka leo ke go gopotšago gore o tsošološe mpho ye Modimo a go filego yona mola ke go bea diatla. ₇Gobane moya wo Modimo a re filego wona ga o re dire gore re boife; o re tlatša maatla le lerato le boitshwaro.

₈Se hlabje ke dihlong tša go hlatsela Morena wa rena, goba wa hlabja ke dihlong ka nna ge ke le mogolegwa ka lebaka la gagwe. Wena o kgathe tema mo go tlaišetšweng Taba ye Botse go ya ka maatla ao Modimo a go fago ona, ₉yena yo a re phološitšego mme a re biditšego gore re be ba gagwe, e se ka lebaka la mediro ya rena, eupša e le ka lebaka la maikemišetšo a gagwe le kgaugelo ya gagwe. O re file kgaugelo ye ka Kriste Jesu go tloga le go tloga, ₁₀eupša bjale kgaugelo ye ya gagwe re e utolletšwe ka go tla ga Mophološi wa rena, yena Kriste Jesu. Yena o fedišitše maatla a lehu, a utolla bophelo bja go ya go ile ka Ebangedi.

₁₁Modimo o mpeile mmegi le moapostola le moruti wa Taba ye Botse ye, ₁₂gomme ke ka lebaka le ke tlaišwago ka dilo tše. Eupša seo ga se nteše dihlong, ka gobane yo ke mmotilego ke a mo tseba, gomme ga ke na pelaelo ya gore o na le maatla a go lota tše a mphilego tšona go fihla ka Letšatši la Morena. ₁₃O itshwarelele ka thuto ya nnete ye ke go lailego ka yona, e be tsela ye o e latelago, gomme o dule o le tumelong le leratong le re nago le lona re le ba Kriste Jesu. ₁₄Tše dibotse tše o di filwego o di lote ka maatla a Moya wo Mokgethwa wo o phelago ka go rena.

₁₅O a tseba gore batho ka moka seleteng sa Asia ba ntlhanametše; mo go bona ke boFigelose le Hermogenese. ₁₆Nke Morena a ka gaugela ba lapa la Onesiforose, gobane o nkgothaditše makgathe a mantši. Go golegwa ga ka ga se gwa ka gwa mo leša dihlong, ₁₇eupša o rile go fihla Roma a nnyaka a kgothetše a ba a nkhwetša. ₁₈Nke Morena a ka mo gaugela ka Tšatši leo la Morena. Gomme dilo tše dintši tše a ntiretšego tšona kwa Efeso wena o di tseba gabotse.

₁Bjale wena, ngwanaka, o tiišwe ke kgaugelo ya Modimo ye e bago ya rena ge re le ba Kriste Jesu. ₂Tšela o kwelego ke go botša tšona pele ga dihlatse tše dintši o di botše batho ba ba tshepegago, ba ba tlago kgona go di ruta ba bangwe.

₃O kgotlelele le nna ditlaišo, o be mohlabani yo a botegago wa Kriste Jesu. ₄Gape mohlabani o leka go kgahla molaodi wa gagwe gomme ga a itsenye ditabeng tša bophelo bjo e sego bja bohlabani. ₅Le mophadišani a ka se thope sefoka a sa latele melao ya go phadišana. ₆Mabutšwapele a lebane molemi wa sekalokani. ₇Nagana ka tše ke di bolelago tše, gobane Morena o tla go kgontšha go di kwešiša.

₈Gopola Jesu Kriste, Motsošwabahung, setlogolo sa Dafida; ke yona Taba ye Botse ye ke e begago. ₉Ka ge ke bega yona Taba ye Botse ye, ke a hlokofatšwa ke be ke kgokwe ka diketane bjalo ka sesenyi. Eupša lentšu la Modimo lona ga se la kgokwa; ₁₀ke ka lebaka leo ke meletšago tšohle ka lebaka la bao Modimo a ba kgethilego, gore le bona ba tle ba hwetše phologo ka Kriste Jesu le letago le le sa felego. ₁₁Taba ye ke nnete gore:

₁₄Badumedi o fele o ba gopotša taba tše, o ba laya tsebegokwa mo pele ga Modimo gore ba se tšee kgang goba ba ngangišana ka tlhalošo ya mantšu, e lego taba tše di se nago mohola, ge e se go lahla ba ba di theeletšago. ₁₅O ikokoropele go kgahla Modimo, go ba modiri yo a sa lewego ke dihlong ka mošomo wa gagwe, le yo a rutago molaetša wa nnete ya Modimo ka tshwanelo. ₁₆O kgaogane le dipolelo tša lefeela tša batho ba lefase. Ba ba kgahlwago ke dipolelo tša mohuta woo, ba tla ikgaogantšha le Modimo ba ntše ba eya pele. ₁₇Dipolelo tša mohuta woo di swana le bolwetši bja sesepedi bjo bo kitimago le mmele. Ba bangwe ba dipolelo tša mohuta woo ke boHimeneose le Filetose. ₁₈Ba phamogile tseleng ya nnete mme ba ferekanya tumelo ya badumedi ba bangwe ka go bolela gore re šetše re tsogile bahung. ₁₉Fela motheo wo o beilwego ke Modimo o ka se šikinyege, gomme mo godimo ga wona go ngwadilwe mantšu a go re: “Morena o tseba ba e lego ba gagwe,” le a go re: “Bohle ba ba ipitšago ba Morena a ba tlogele bokgopo.”

₂₀Ka ntlong ya mohumi dibjana ga se tša gauta le tša silibera fela, eupša le tša kota le tša letsopa di gona; dingwe ke tša go šomišwa ka matšatši a magolo, dingwe ke tša mehleng. ₂₁Ge motho a ka kgaogana le dipolelo tša lefeela tše di se nago borapedi, e tla be e le wa go šomišwa ka matšatši a magolo; o tla be a ikgafile mme e le wa mohola go mong wa gagwe, a ikemišeditše go dirišwa medirong yohle ye mebotse. ₂₂O tšhabe ditumo tša bosogana, mme o katanele toka le tumelo le lerato le phedišano gotee le ba ba rapelago Morena ka dipelo tše di hlwekilego. ₂₃O kgaogane le dikgang tša bošilo le tša botlaela; o a tseba gore di hlola diphapano. ₂₄Mohlanka wa Morena diphapano di a mo rona. Se se mo swanelago ke go lokela batho ka moka, go ba moruti wa go kgona go ruta, wa go kgotlelela ge a dirwa bošula, ₂₅wa boleta ge a kgala ba ba mo ganetšago. Mohlomongwe Modimo a ka ba fa sebaka sa go itshola le go tseba nnete. ₂₆Ke mo ba kago inagana ba phonyokga sefu sa Diabolose yo a bego a ba swere a ba dirile gore ba phethe thato ya gagwe.

₁Tseba gore mehleng ya mafelelo go tla ba le mabaka a mathata. ₂Batho e tla ba dijato, le barati ba tšhelete, le baikgantšhi, le baiponi; e tla ba banyefodi, le banyatšabatswadi; e tla ba bahlokatebogo, le ba go se hlomphe Modimo; ₃e tla ba ba go hloka lerato, le ba go gana poelano, le ba lesebo, le ba go hloka maitshwaro; e tla ba diganka, le bahloyatoka, ₄le mahlabapshio, le bahlokašedi, le baikgogomoši; e tla ba ba go rata boithabišo bakeng sa go rata Modimo; ₅ba tla bonala nke ke badumedi, etšwe maatla a bodumedi ba a gana. Ba babjalo o ba katologe. ₆Ba bangwe ba bona ba khukhunela ka dintlong tša batho, ba foraforetša basatšana ba ba tšeetšegago, ba ba lewago ke letswalo ka lebaka la dibe tša bona gape ba hlohleletšwago ke ditumo tša mehutahuta, ₇ba ba ratago go dula ba rutwa, fela ba ka se kgone go tseba therešo. ₈Bjalo ka ge Janese le Jambrese ba ile ba ganetša Moshe, le bona batho ba ba ganetša therešo – ke bona ba menagano ye e sa šomego gabotse, ba go palelwa mo go tša tumelo. ₉Fela ba ka se tšwelele go ya kae, ka gobane bošilo bja bona bo tla tšwelela pepeneneng bjalo ka bja bale ba babedi.

₁₀Fela wena o botegetše thuto ya ka, wa ba le maitshwaro a go swana le a ka, le maikemišetšo, le tumelo, wa etša nna ka go se fele pelo, le ka lerato, le ka kgotlelelo, ₁₁le ka go hlomarwa, le ka go tlaišwa mola ke tlaišwa kua Antiokia le Ikoniomo le Listra. Ditlhomaro tše ke ilego ka di kgotlelela di a šiiša. Fela Morena a ntlhakodiša go tšona ka moka. ₁₂Bohle ba ba ratago go phela bophelo bja borapedi e le ba tee le Kriste Jesu ba tla hlomarwa. ₁₃Ge e le bakgopo le baradia, bobe bja bona bo tla keka bo eya pele, gomme bona beng ba tla tšwela pele le go radia le go radiwa. ₁₄Ge e le wena, o kgomarele tše o di rutilwego, gape o di dumelago o holofetše. O tseba ba ba go rutilego tšona. ₁₅O se lebale gore Mangwalo a Makgethwa o a tsebile go tloga bjaneng bja gago; ke ona a a kgonago go go fa bohlale bjo bo išago phologong ka go dumela go Kriste Jesu. ₁₆Mangwalo a Makgethwa ka moka a ngwadilwe ka go huetšwa ke Modimo, gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo, ₁₇gore motho yo a ineetšego Modimo e be yo a kgonago gape a loketšego go dira mediro yohle ye mebotse.

₁Ke go laya Modimo le Kriste Jesu yo a tlago ahlola ba ba phelago le ba ba hwilego e le dihlatse tša ka. Ke go laya le ka gobane yena o tlilo buša e le Kgoši, ke re ₂o begele batho molaetša wa Modimo, o phegelele go ba begela wona, e ka ba ka nako ya gona, le ge e se nako ya gona, o ba kgale, o ba sole, o ba kgopele, o ntše o ba ruta o sa ba felele pelo. ₃Nako e tla tla ya gore batho ba se rate go theeletša thuto ya nnete, eupša ba tla latela ditumo tša bona, gomme ba tla goketša baruti ba bantši ba go ba botša tše bona beng ditsebe tša bona di hlohlonelago go di kwa. ₄Ba tla ithiba ditsebe gore ba se kwe nnete, ba di hlwaela dinonwane. ₅Ge e le wena, o itshware mabakeng ka moka; o meletše ditlaišo, o dire modiro wa mmegi wa Taba ye Botse, gomme modiro woo wa gago o o phethe.

₆Ge e le nna, ke šetše ke dirwa sehlabelo; e fihlile nako ya gore ke hwe. ₇Ke šiane mošianong wo mogolo wa tumelo, ke kgathile tema ke e weditše, le tumelo ke sa e swere. ₈Gomme bjale se se ntetetšego ke sefoka se se fiwago ba ba phetšego bophelo bjo bo lokilego; ke letetšwe ke sefoka se ke tlago se fiwa ke Morena ka Letšatši leo a tlago tla ka lona, yena Moahlodi wa toka – sa se fiwe nna fela, eupša sa fiwa le bao ba letetšego go iponagatša ga gagwe ka lerato.

₉O leke go tla mono go nna kgauswinyana. ₁₀Demase o ntahlile ka lebaka la go rata tša lefase le, gomme o iketše Thesalonika. Kresense o ile Galatia, Titose yena o ile Dalmatia. ₁₁Ke Lukase fela yo a šetšego le nna. O nyake Markose o tle le yena ka gobane o tla nthuša kudu mo modirong. ₁₂Tigikose yena ke mo romile Efeso. ₁₃Ge o etla o ntlele le kobo ya ka ye ke e tlogetšego Troase ka ga Karpose; le dipuku o ntlele natšo, gagolo tša matlalo.

₁₄Aleksandere wa mathulatshipi o ntirile gampe kudu. Fela Morena o tla mo putsa ka mo go swanetšego mediro ya gagwe. ₁₅Le wena o itotele yena, gobane tše re di rutago batho o be a di gana tha.

₁₆Mohla wola ke iphetolela la mathomo ga go yo a ilego a ema le nna; bohle ba ile ba nngaloga. A Modimo a se ba bone molato. ₁₇Fela Morena o ile a ba le nna, a mmaatlafatša gomme ka kgona go bega molaetša ka botlalo gore baditšhaba ka moka ba o kwe; gomme ka hlakodišwa dinaleng tša lehu. ₁₈Morena o sa tlilo no ntlhakodiša bobeng bjohle, a nkiša mmušong wa gagwe wa legodimong ke bolokegile. A a tumišwe go ya go ile! Amene.

₁₉O dumediše Prisila le Akhwila le ba ga Onesiforose. ₂₀Erastose o šetše Korinte, Trofimose yena ke mo tlogetše Miletose, ka ge a be a lwala. ₂₁O leke go tla mono marega a sešo a tsene.

Yubulose le Pudense le Linose le Klaudia le badumedikarena ka moka ba re o dumele.

₂₂Morena a be le wena. A Modimo a le gaugele.

₂₂O se hlalefetše modiidi ka ge e le modiidi, le mohlaki o se mo tšeatšee kgorong. ₂₃Gobane bona bao tabeng ya bona ba tla bolelelwa ke Morena, bahlakodi le bona Morena o tla ba hlakola bophelo.

₂₄O se gwerane le sefelapelwana; o se sepelelane le motho wa pelwana ye nyennyane, ₂₅ka gore o ka tla wa tlwaela mekgwa ya gagwe, mme wa šitwa ke go e lahla.

₂₆O se itleme go lefela motho molato wa gagwe ge yena a palelwa; o se ikane go lefela motho yo a jetšego molato mpeng, ₂₇ka gore ge o ka šitwa ke go lefa, ba ka go amoga le bolao bja gago, wa šala o robetše fase.

₂₈O se šuthiše mollwane wa gago wa bogologolo wo o tsemilwego ke borakgolokhukhu ba gago.

₂₉Sekgoni sa modiro ke sa go direla magoši, e sego bathofela.