To The Word – Day 140

₁Ba iša Polokelo ya Kgwerano tenteng ye Dafida a bego a e hlometše yona, gomme ba e bea ka moo. Ka morago ba direla Modimo dihlabelo tša go tšhungwa ka moka le dihlabelo tša kagišano. ₂Ge Dafida a feditše go dira dihlabelo, a šegofatša setšhaba ka leina la Morena, ₃gomme a ba fa dijo bohle. A fa monna le mosadi yo mongwe le yo mongwe mo Israele senkgwa, le nama ya go bešwa, le phaphathi ya makwapi a diterebe.

₄Dafida a bea Balefi ba bangwe gore ba hlankele Morena Modimo wa Israele pele ga Polokelo ya Kgwerano ka go mo reta, go mo tumiša, le go mo godiša. ₅Asafo a bewa moetapele, gomme Sakaria a bewa mothuši wa gagwe. Jeiele, Shemiramote, Jehiele, Matitia, Eliaba, Benaya, Obede-Edomo, le Jeiele ba be ba swanetše go letša diharepa le dikgapa. Asafo o be a swanetše go letša diletšo tša masenkana, ₆gomme baprista ba babedi, Benaya le Jaasiele, ba swanetše go letša diphala leboelela pele ga Polokelo ya Kgwerano. ₇Ka lona tšatši leo ya ba la mathomo ge Dafida a abela Asafo le Balefi ba gabo mošomo wa go tumiša Morena ka dikopelo.

Setšhaba ka moka sa re:

₃₇Kgoši Dafida o ile a bea Asafo le Balefi ba gabo gore ka mehla ba hlokomele tirelo ye e swarwago lefelong la Polokelo ya Kgwerano. Ba be ba swanetše go phetha mediro ya bona moo letšatši ka letšatši. ₃₈Obede-Edomo, morwa wa Jedutune, le banna ba masome a a selelago le metšo ye seswai ba kgorwana ya gabo ba be ba swanetše go ba thuša. Hosa le Obede-Edomo ba be ba leta masoro.

₃₉Moprista Tsadoko le baprista ba gabobona ba be ba hlokometše tirelo ya Morena lefelong la tirelo la ntotomeng kua Gibeone. ₄₀Mosong wo mongwe le wo mongwe le mantšiboa ba be ba swanetše go dira dihlabelo tša go tšhungwa ka moka aletareng go ya ka tšohle tše di ngwadilwego mo melaong ye Morena a e filego Baisraele. ₄₁Ba ba bego ba na le bona moo e be e le Hemane le Jedutune le ba bangwe ba ba bego ba kgethilwe ba bolelwa ka maina gore ba tumiše Morena ka dikopelo, ka gobane kgaugelo ya gagwe ke ye e sa felego. ₄₂Hemane le Jedutune ba be ba hlokometše le diphala le masenkana le diletšo tše dingwe tše di bego di letšwa ge dikopelo tša tumišo di opelwa. Ba kgorwana ya Jedutune ba be ba leta lesoro.

₄₃Ka morago yo mongwe le yo mongwe a ikela gae, gomme Dafida le yena a ya gae go yo šegofatša ba lapa la gagwe.

₁Kgoši Dafida bjale o be a dula mošate. Ka letšatši le lengwe a roma motho gore a yo bitša moprofeta Nathane gomme a re go yena: “Mo nna ke dula ka ngwakong wo o agilwego ka dikota tša mosedere, eupša Polokelo ya Kgwerano ya Morena yona e beilwe ka tenteng!”

₂Nathane a mo fetola a re: “Dira se o se gopotšego, ka gobane Modimo o na le wena.”

₃Eupša bošegong bjoo Modimo a re go Nathane: ₄“Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. ₅Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ka mehla ke be ke dula ka ditenteng gomme ke sepela le dinaga. ₆Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke ba laetšego gore ba diše setšhaba sa ka gore ke ka lebaka lang a sa nkagele tempele ka dikota tša mosedere.’

₇“Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke nna ke go tšerego madišong o diša dinku ka go dira mmuši wa setšhaba sa ka sa Israele. ₈Ke bile nago mo gohle mo o ilego wa ya gona, gomme ka fenya manaba a gago ka moka ge o a hlasela. Ke tla go dira gore o tume go swana le baetapele ba bagolo mo lefaseng. _9-10Ke kgethetše setšhaba sa ka sa Israele naga gomme ke se hlomile go yona moo ba kago dula ba se hlwe ba tšhošetšwa. E sa le go tloga mola ba tsenago mo nageng ye mehleng yela ya baahlodi ba gateletšwe ke batho ba babe, fela taba yeo e ka se direge gape. Ke tla kokobetša manaba a gago ka moka gomme ka go fa ditlogolo. ₁₁Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši gomme ka tiiša mmušo wa gagwe. ₁₂Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. ₁₃Ke tla ba tatagwe, gomme yena ya ba morwa wa ka. Nka se lese go mmotegela bjalo ka ge ke ile ka lesa go botegela yo a bušitšego pele ga gago. ₁₄Ke tla mo fa maemo a go ya go ile setšhabeng sa ka le mmušong wa ka. Bogoši bja lešika la gagwe bo ka se tsoge bo fedile.’ ”

₁₅Nathane a botša Dafida tšohle tše Modimo a mo utolletšego tšona.

₁₆Ka morago Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena Modimo, gomme le lona lapa la ka ga le a di swanela. ₁₇Le ge go le bjalo, tšeo ga se ya ba selo mahlong a gago, Modimo, wa tšwela pele wa bolela tše botse tša mehleng ye e tlago mabapi le ditlogolo tša ka, nna, mohlanka wa gago; gomme wena, Morena Modimo, o šetše o ntšea gore ke motho yo mogolo. ₁₈A nka hlwa ke sa go botša eng! O ntseba gabotse, gomme le ge go le bjalo o a ntlhompha, nna, mohlanka wa gago. ₁₉O ratile go direla nna, mohlanka wa gago, dilo tšeo tše kgolo, le go nkutollela bogolo bja ka bja ka moso. ₂₀Morena, ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. ₂₁Ga go setšhaba se sengwe lefaseng se se swanago le sa Israele se o se phološitšego bokgobeng go tlo se dira setšhaba sa gago. Dilo tše kgolo tše di šiišago tše o di dirilego mola o leleka ditšhaba tše dingwe ge setšhaba sa gago se o se lokolotšego Egepeta se goroga, di dirile gore o tume. ₂₂O dirile Baisraele setšhaba sa gago go ya go ile, gomme wena, Morena, wa ba Modimo wa bona.

₂₃“Bjale, Morena, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire tše o itšego o tla di dira. ₂₄Ke moo batho ba tlago go tshepha mme wa tuma kudu ka mehla, gomme ba re: ‘Morena Ramaatlaohle ke Modimo wa Israele.’ Le gona o tla boloka bogoši bja lešika la ka go ya go ile. ₂₅Ke na le sebete sa go go rapela ka thapelo ye, Modimo wa ka, ka gobane o nkutolletše dilo tše nna, mohlanka wa gago, wa ba wa mpotša gore o tla dira ditlogolo tša ka dikgoši. ₂₆Bjale ge, Morena, Modimo ke wena, gomme o nkholofeditše taba ye e makatšago ye. ₂₇O kgahlilwe ke go šegofatša ditlogolo tša ka gore di fele di ipshina ka botho bja gago. Wena, Morena, o ba šegofaditše, gomme tšhegofatšo ya gago e tla ba go bona go ya go ile.”

₁Ka morago ga lebaka Kgoši Dafida a hlasela Bafilista gape gomme a ba fenya. A ba amoga motse wa Gathe le metsana ye e bapilego le wona. ₂A fenya le Bamoaba, mme bona ya ba batho ba gagwe, ba tšhela metšhelo go yena.

₃Ka morago Dafida a hlasela Kgoši Hadade-Esere wa naga ya Tsoba, kgauswi le naga ya Hamate, ge Hadade-Esere a sa le tseleng go yo leka go thopa selete sa nokeng ya Yufratese. ₄Dafida a thopa dikoloi tša gagwe tša ntwa tše sekete, le banamedi ba dipere ba dikete tše di šupago, le bahlabani ba go sepela ka maoto ba dikete tše masome a mabedi. A ripa dipere ka moka tša dikoloi tša ntwa mešifa ge e se tše lekgolo.

₅Basiria ba Damaskose ba romela madira go tlo thuša Kgoši Hadade-Esere, fela Dafida a a hlasela, a bolaya banna ba dikete tše masome a mabedi le tše pedi. ₆Ka morago a hloma mešaša ya bahlabani nageng ya bona, gomme ya ba batho ba gagwe, ba mo ntšhetša metšhelo. Morena a dira gore Dafida a fenye mo gongwe le mo gongwe mo a lwago gona. ₇Dafida a thopa dikotse tša gauta tše di bego di swerwe ke bahlankedi ba Hadade-Esere, gomme a di iša Jerusalema. ₈A tšea le mphiri wo montšintši kua Tibehate le Kune, metse ye e bego e bušwa ke Hadade-Esere. Ka morago Solomone o ile a tla a bopa legopo le dikokwane le dibjana tša Tempele tša mphiri ka mphiri woo.

₉Kgoši Toi wa Hamate a kwa gore Dafida o fentše madira ka moka a Hadade-Esere. ₁₀Ka gona a roma morwa wa gagwe, Joramo, go yo dumediša Kgoši Dafida le go mo lebogiša ka ge a fentše Hadade-Esere yo Toi a bego a be a šetše a lwele naye gantši. Joramo a išetša Dafida dimpho tše di dirilwego ka gauta, ka silibera, le ka mphiri. ₁₁Kgoši Dafida a di abela Morena gotee le silibera le gauta ye a e thopilego go Baedomo le Bamoaba le Baamone le Bafilista le Baamaleke.

₁₂Abishai, yo mmagwe e bego e le Tseruya, o ile a fenya Baedomo Moeding wa Letswai, gomme a bolaya ba dikete tše lesome le metšo ye seswai. ₁₃A hloma mešaša ya bahlabani nageng ya Edomo, gomme batho ba moo ya ba ba Kgoši Dafida. Morena a dira gore Dafida a fenye mo gongwe le mo gongwe mo a lwago gona.

₁₄Dafida a buša naga yohle ya Israele, gomme a hlokomela gore setšhaba sa gagwe ka mehla se swarwe ka tshwanelo le ka toka. ₁₅Joaba, yo mmagwe e bego e le Tseruya, e be e le molaodi wa madira; Joshafate, morwa wa Ahilude, e be e le mongwaledi wa mmušo; ₁₆Tsadoko, morwa wa Ahitube, le Ahimeleke, morwa wa Abiatare, e be e le baprista. Seraya e be e le mongwaledi wa kgoši; ₁₇Benaya, morwa wa Joyada, e be e le mohlokomedi wa baleti ba Dafida, gomme barwa ba Kgoši Dafida e le bakgomana ba bagolo mmušong.

₁Ka morago ga lebaka Kgoši Nahashe wa Amone a hwa, gomme morwa wa gagwe, Hanune, ya ba kgoši. ₂Kgoši Dafida a re: “Ke nyaka go kwana le Hanune ka gobane Nahashe, tatagwe, o be a kwana le nna.” Ka gona Dafida a roma batseta gore ba ye maemong.

Ge ba fihla nageng ya Amone go Kgoši Hanune go tlo mo lliša, ₃baetapele ba Baamone ba re go kgoši: “A o gopola gore ke gona go hlompha tatago ge Dafida a romile batho ba go tlo go lliša? Le gateetee! O ba romile mo go tlo hlola naga le go e lekola gore a tle a e menole!”

₄Hanune a swara batseta bale ba Dafida, a ba boola maledu, a ripa diaparo tša bona dinokeng, gomme a ba šupa tsela. ₅Ba be ba lewa ke dihlong kudu go ka boela gae. Ge Dafida a ekwa gore go diregile eng, a roma batho go yo ba botša gore ba dule Jeriko mme ba se ke ba boa go fihlela maledu a bona a hlogile gape.

₆Baamone ba lemoga gore ba befedišitše Dafida. Ka gona ba ntšha silibera ya dikilokramo tše dikete tše masome a mararo go thwala banamedi ba dipere le dikoloi tša ntwa tša Basiria kua Mesopotamia le tša mebušo ya Siria, e lego wa Maaka le wa Tsoba. ₇Ba thwala madira a Maaka le kgoši ya naga yeo le dikoloi tša ntwa tše dikete tše masome a mararo le tše pedi, gomme ba tla ba hloma mešaša pele ga motse wa Medeba. Baamone le bona ba tšwa metseng ya bona gomme ba itokišetša ntwa.

₈Ge Dafida a ekwa taba yeo, a romela Joaba le madira go yo lwa le bona. Ka moka ga bona e be e le bahlabani ba bogale. ₉Baamone ba tšwa motseng wa bona mme ba ipeakanya kgorong, gomme magoši a a bego a tlile go thuša a ema thoko ye nngwe kua nageng.

₁₀Joaba a bona gore madira a manaba a mo potile ka pele le ka morago, ka gona a kgetha bahlabani ba bogalegale ba Baisraele a ba beakanya go lebana le Basiria. ₁₁Madira a a šetšego a a nea Abishai, morwarragwe, gore a a laole, gomme Abishai a a beakanya go lebana le Baamone. ₁₂Joaba a re go yena: “Ge o bona gore Basiria ba a mphenya, o tle o nthuše, gomme ge Baamone ba go fenya, ke tla tla ka go thuša. ₁₃O tiiše, re be le sebete, re lwele setšhaba sa gaborena le metse ya Modimo wa rena ka bogale. Gomme a thato ya Morena e direge.”

₁₄Joaba le banna ba gagwe ba batamela gore ba hlasele, gomme Basiria ba hlanola direthe. ₁₅Ge Baamone ba bona Basiria ba tšhaba, le bona ba tšhaba Abishai ba boela motseng. Ke moo Joaba a ipoeletšego Jerusalema.

₁₆Basiria ba lemoga gore ba fentšwe ke Baisraele, ka gona ba roma batseta go yo bitša Basiria ba ba bego ba le ka bohlabela bja noka ya Yufratese, gomme ba tla ba laolwa ke Shobake, molaodi wa madira a Kgoši Hadade-Esere. ₁₇Ge Dafida a ekwa taba yeo, a kgobokanya madira ka moka a Baisraele, a tshela Jordane, gomme a ba beakanya gore ba lwe le Basiria. Ntwa ya thoma, ₁₈gomme Basiria ba tšhaba Baisraele. Dafida le banna ba gagwe ba bolaya baotledi ba dikoloi tša ntwa tša Basiria ba dikete tše di šupago, le bahlabani ba go sepela ka maoto ba dikete tše masome a mane. Ba bolaya le Shobake, molaodi wa madira a Siria. ₁₉Ge magoši a a bego a bušwa ke Hadade-Esere a lemoga gore a fentšwe ke Baisraele, a kwana le Dafida gore ntwa e fele, gomme ba napa ba ba batho ba gagwe. Basiria ba se hlwe ba rata go thuša Baamone gape.

₁Seruthwane se se latelago, nakong ya ngwaga ye ka yona magoši gantši a yago ntweng, Joaba a tšwa ka madira a yo senya naga ya Baamone; eupša Kgoši Dafida yena o be a šetše Jerusalema. Ba dikanetša motse wa Raba, ba o hlasela mme ba o thubaganya. ₂Hlogong ya Milkomo, modimo wa seswantšho wa Baamone, Dafida a tšea mphapahlogo wa gauta wa boima bjo e ka bago dikilokramo tše masome a mararo wo o nago le legakabje, a ithweša wona hlogong. A ba a thopa le thoto ye ntšintši motseng. ₃A laela batho ba motse woo gore ba šome ka disaga le ka megoma ya tshipi le ka dilepe. A dira sona seo go batho ba metse ye mengwe ka moka ya Baamone. Ka morago yena le banna ba gagwe ba boela Jerusalema.

₄Go ile gwa tsoga ntwa ya Baisraele le Bafilista kua Gesere. Ke ntweng yeo moo Sibekai wa Husha a ilego a bolaya tšitširipa ye leina la yona e bego e le Sipai, gomme Bafilista ba fenywa.

₅Ka morago gwa tsoga ntwa ya Baisraele le Bafilista gape, gomme Elhanane, morwa wa Jaire, a bolaya Lagmi, morwarragoGoliate wa Gathe, yo theko ya lerumo la gagwe e bego e lekana le mpheng wa mogoma.

₆Ntwa ye nngwe ya tsoga kua Gathe, moo go bego go le tšitširipa ye teleletelele ya menwana ye e selelago diatleng ka pedi le ye selelago maotong ka mabedi. ₇A rumola Baisraele, gomme Jonathane, morwa wa Shama, morwarragoDafida, a mmolaya.

₈Dinatla tšeo tša go bolawa ke Dafida le banna ba gagwe e be e le ditlogolo tša ditšitširipa tša kua Gathe.