Pesalome 29

₁Retang Morena,

lena dibopiwa tša legodimong!

Mo reteleng letago la gagwe le maatla a gagwe!

₂Retang Morena wa letago ka mo go mo lebanego.

Obamelang Morena

le apere diaparo tše dikgethwa!

₃Modumo wa Morena o kwala godimo ga mawatle;

Modimo wa letago o a duma;

Morena o duma ka godimo ga phamphamadiba.

₄Modumo wa Morena ke wo maatla;

modumo wa Morena ke wa borena.

₅Modumo wa Morena o robaganya mehlare ya mesedere,

Morena o robaganya le mesedere ya Lebanone.

₆O kganakgantšha dithaba tša Lebanone boka namane;

Sirione o e tlolatlodiša boka pholwana ya nare.

₇Modumo wa Morena o gadimiša dikgadima.

₈Modumo wa Morena o reketliša lešoka;

o reketliša lešoka la Kadeshe.

₉Modumo wa Morena o tswadiša tshephe;

o hlobodiša mehlare ya šala e le fela.

Mola Tempeleng ya gagwe bohle ba re:

“A go tumišwe Modimo!”

₁₀Morena o buša phamphamadiba;

o buša e le kgoši go ya go ile.

₁₁A Morena a fe setšhaba sa gagwe maatla,

a se šegofatše a dire gore se iketle.