To The Word – Day 12

₁Ge Jakobo a ekwa gore go ne mabele Egepeta, a re go barwa ba gagwe: “Le reng le sa itšhikinye? ₂Ke kwa gore go na le mabele kua Egepeta; sepelang gona le yo re rekela, gore re tle re phele re se ke ra hwa.” ₃Ka gona bomorwarragoJosefa ba lesome ba yo reka mabele Egepeta, ₄eupša Jakobo a se ke a ba roma le Benjamene, ngwanaboJosefa, ka gobane o be a boifa gore a ka welwa ke kotsi.

₅Barwa ba Jakobo ba fihla ba na le batho ba bangwe go tlo reka mabele, ka gobane go be go wele tlala nageng ya Kanana. ₆Josefa, ka ge e be e le mmušiši wa naga ya Egepeta, o be a rekišetša batho ba lefase ka moka mabele. Ka gona bomorwarragoJosefa ba fihla, mme ba obama pele ga gagwe. ₇Ge Josefa a bona bomorwarragwe, a ba tseba, fela a dira mo nkego ga a ba tsebe. A ba botšiša ka bogale a re: “Le tšwa kae?”

Bona ba mo fetola ba re: “Re tšwa Kanana, re tlile go reka dijo.”

₈Josefa a tseba bomorwarragwe, eupša bona ba se ke ba mo tseba. ₉A gopola ditoro tše a kilego a di lora ka bona, gomme a re: “Ke lena dihlodi; le tlile go bona moo naga ya rena e kago šwahlelwa gabonolo gona.”

₁₀Ba mo fetola ba re: “Aowa, mong wa rena. Rena bahlanka ba gago re tlile go reka dijo. ₁₁Re barwa ba monna o tee ka moka ga rena. Rena bahlanka ba gago ga re dihlodi, re batho bao ba botegago.”

₁₂Josefa a re go bona: “Ga go bjalo! Le tlile go bona moo naga ya rena e ka šwahlelwago gabonolo gona.”

₁₃Bona ba re: “Rena bahlanka ba gago re be re le barwa ba lesome le ba babedi, barwa ba monna o tee kua nageng ya Kanana. O tee ga a sa le gona, gomme wa phejane o šetše le tatagorena.”

₁₄Josefa a ba fetola a re: “Go no ba ka moo ke boletšego; le dihlodi. ₁₅Le tla lekwa ka mokgwa wo: Ke ena ka kgoši gore le ka se sepele, ge e se ge ngwanabolena wa mafelelo a ka tla mo. ₁₆Romang yo mongwe wa lena go yo mo tšea. Lena ba bangwe le tla dišwa go fihlela therešo ya se le se bolelago e kgonthišišwa. Go sego bjalo gona ke ena ka kgoši gore le dihlodi.” ₁₇Ge a seno realo, a ba tswalelela kgolegong matšatši a mararo.

₁₈Ka letšatši la boraro Josefa a re go bona: “Ke nna motho yo a boifago Modimo. Dirang se ke le botšago sona, gomme le tla phela. ₁₉Go laetša gore le a botega, yo mongwe wa lena o tla šala ka kgolegong ye le bego le le ka go yona; lena ba bangwe le ka sepela la iša mabele ao le a rekilego malapeng a lena ao a bolawago ke tlala. ₂₀Mme le tlišeng ngwanabolena wa mafelelo go nna. Seo se tla šupa gore le be le bolela therešo, gomme nka se le bolaye.”

Ba kwana le taba yeo, ₂₁gomme ba botšana ba re: “Ee, re tlaišwa ka lebaka la se re se dirilego ngwanaborena; re bone tlalelo ye kgolo yeo a bego a le go yona ge a be a kgopela kgaugelo, fela ra se ke ra mo theetša. Ke ka lebaka leo bjale re lego mo matshwenyegong a.”

₂₂Rubene a re: “Ke le boditše gore le se ke la dira mošemanyana yola bobe, fela la se ke la theetša. Gomme gonabjale lehu la gagwe le lefeletšwa ka rena.” ₂₃Josefa o be a kwešiša se ba se bolelago, eupša bona ba sa tsebe, ka gobane ba be ba bolela naye ka mohlatholledi. ₂₄Josefa a tloga go bona gomme a thoma go lla. Ge a kgona go bolela gape, a boa, a hlaola Simeone, mme a laela gore a tlengwe pele ga bona.

₂₅Josefa a laela gore mekotla ya bomorwarragwe e tlatšwe mabele, le gore tšhelete ya yo mongwe le yo mongwe e boetšwe ka mokotleng wa gagwe, le gore ba fiwe mefago. Seo sa dirwa. ₂₆Barwa bao ba rweša dipokolo tša bona mabele a ba a rekilego, gomme ba tloga. ₂₇Ge ba le lefelong leo go robalwago go lona tseleng, yo mongwe wa bona a tlemolla mokotla wa gagwe gore a fe pokolo ya gagwe dijo, mme a hwetša tšhelete ya gagwe ka molomong wa mokotla wa gagwe. ₂₈A bitša bomorwarragwe a re: “Tšhelete yela ya ka e bušitšwe; še ka mo mokotleng wa ka!” Ba gakanega, gomme ba botšišana ba tšhogile ba re: “Ke eng se Modimo a re dirilego sona?”

₂₉Ge ba fihla go Jakobo, tatabo, kua Kanana, ba mmotša tšohle tše di diregilego ba re: ₃₀“Mmušiši wa Egepeta o boletše le rena ka bogale, a re bea molato wa go re re dihlodi tša naga ya gagwe. ₃₁Re ile ra mo fetola ra re: ‘Ga re dihlodi, re batho bao ba botegago. ₃₂Re be re le barwa ba lesome le ba babedi ba monna o tee. Yo mongwe o tlogile, gomme wa mafelelo bjale o kua Kanana le tatagorena.’ ₃₃Monna yoo a re fetola a re: ‘Ge eba le ba ba botegago ke tla bona ka mokgwa wo: Yo mongwe wa lena o tla šala le nna; ba bangwe le tla tšea mabele a malapa a lena a a bolawago ke tlala, la tloga. ₃₄Le tlišeng ngwanabolena wa mafelelo go nna. Ke moo ke tlago tseba gore ga le dihlodi, le batho ba ba botegago; ke tla le neela ngwanabolena, gomme le ka dula mo la sepela le lokologile.’ ”

₃₅Ge ba kgothola mekotla, yo mongwe le yo mongwe a hwetša mokotlana wa gagwe wa tšhelete; gomme ge ba bona tšhelete yeo, bona le Jakobo, tatabo, ba tšhoga. ₃₆Tatabo a re go bona: “A le nyaka go ntahlela bana ba ka ka moka? Josefa o ile, Simeone o ile, mme bjale le nyaka go tšea Benjamene. Bohloko bo kwewa ke nna!”

₃₇Rubene a re go tatagwe: “Ge nka se boe le Benjamene go wena, o bolaye barwa ba ka ba babedi. Mo gafele diatleng tša ka, gomme ke tla mmušetša go wena.”

₃₈Eupša Jakobo a re: “Morwa wa ka a ka se ye le lena; mogolwagwe o hwile, mme ke yena a nnoši yo a šetšego. Se sengwe se ka mo hlagela mo tseleng. Ke nna motho yo a tšofetšego, gomme manyami a le kago ntlišetša ona a tla mpolaya.”

₁Tlala e ile ya gakala nageng ya Kanana, ₂gomme ge lapa la Jakobo le feditše mabele ao ba bego ba tšo a tšea Egepeta, Jakobo a re go barwa ba gagwe: “Boelelang le yo re selela.”

₃Juda a re go yena: “Monna yola o re boditše tsebegokwa gore re ka se ke ra dumelelwa go boela go yena, ge e se ge re na le ngwanaborena. ₄Ge o dumela go re roma le ngwanaborena, re tla ya ra go rekela dijo. ₅Ge o sa dumele re ka se ye, ka gobane monna yola o re boditše gore re ka se dumelelwe go boela go yena ge e se ge ngwanaborena a na le rena.”

₆Jakobo a re: “Ke ka lebaka lang ge le ntsošeditše matshwenyego a makaaka ka go botša monna yola gore le na le ngwanabolena yo mongwe?”

₇Ba mo fetola ba re: “Monna yola o ile a fela a re botšiša tša rena le tša lapa laborena a re: ‘A tatagolena o sa phela? A le sa na le ngwanabolena?’ Re ile ra tlemega go fetola dipotšišo tša gagwe. Re be re ka tseba bjang gore o tla re botša gore re tle le ngwanaborena?”

₈Juda a re go tatagwe: “Lesa mošemanyana yo a sepele le nna, re napeng re tloge, gore rena le wena le bana ba rena re se tlo hwa ka tlala. ₉Molato e tla ba wa ka ge a ka se boe; o mo nyake go nna. Ge nka se mmušetše go wena a sa phela gabotse, ke tla šikara molato woo ka mehla. ₁₀Ge nkabe re se ra tšea nako ye telele re letile, nkabe bjale re ile fao gabedi mme e bile re boile.”

₁₁Tatabo a re go bona: “Ge eba go swanetše go ba bjalo, gona dirang se: Tšeang ditšweletšwa tše kaonekaone tša naga ka mekotla ya lena e le diloba tša mmušiši: borokhu bjo bonnyane, todi ye nnyane, dinoko, ditloomake le dialmone. ₁₂Le tšeeng le tšhelete ye e lekanago le yela gabedi, ka gobane le swanetše go bušetša tšhelete yela ya go bewa ka melomong ya mekotla ya lena. Mohlomongwe e be e le phošo. ₁₃Tšeang ngwanabolena, le nape le boeleng fao. ₁₄A Modimo Ramaatlaohle a dire gore monna yola a le šokele, a le bušetše Benjamene le yoo ngwanabolena yo mongwe. Ge e le nnaena, ge eba ke swanetše go lahlegelwa ke bana ba ka, ga go seo nka se dirago.”

₁₅Ka gona barwa ba tšea diloba tšeo le tšhelete ye e lekanago le yela gabedi, ba leba Egepeta le Benjamene. Ba fihla ba itlhagiša go Josefa. ₁₆Ge Josefa a bona Benjamene a na le bona, a re go mohlokomedi wa ngwako wa gagwe: “Tšea banna ba o ba iše ka ngwakong. Ba tlile go ja le nna mosegare, ka gona o hlabe seruiwa o se apee.” ₁₇Monna yoo a dira ka moo a bego a laelwa ka gona, a iša banna bao ka ngwakong wa Josefa.

₁₈Ge ba išwa ngwakong ba boifa, ba re ka pelong: “Re tlišwa mo ka lebaka la tšhelete yela e ilego ya bušetšwa ka mekotleng ya rena la mathomo. Ba tla tloga ba re hlasela, ba tšea dipokolo tša rena, mme ba re dira makgoba a gagwe.” ₁₉Ka gona ge ba le lemating la ngwako ba re go mohlokomedi wa ngwako: ₂₀“Morena, hle, a re go botše: Re kile ra tla mo go sela. ₂₁Ge re le lefelong leo go robalwago go lona tseleng ya go ya gae, ra bula mekotla ya rena, gomme yo mongwe le yo mongwe wa rena a hwetša tšhelete ya gagwe ka moka ka molomong wa mokotla wa gagwe. Re boile le yona. ₂₂Re tlile le tšhelete ye nngwe go tlo sela gape. Ga re tsebe gore ke mang yo a bušeditšego tšhelete ya rena ka mekotleng ya rena.”

₂₃Mohlokomedi yoo a re: “Le se ke la tshwenyega. Le se ke la boifa. Modimo wa lena, Modimo wa tatagolena, o swanetše go ba a bušeditše tšhelete ya lena ka mekotleng ya lena. Nna ke amogetše tefelo ya lena.” Ke moka a tliša Simeone go bona.

₂₄Mohlokomedi yoo a iša bomorwarragoJosefa ka ngwakong. A ba fa meetse gore ba hlape maoto, a ba a fepa dipokolo tša bona. ₂₅Ba lokiša diloba tša bona gore e re ge Josefa a fihla mosegare, ba mo fe tšona, ka gobane ba be ba boditšwe gore ba tla ja naye. ₂₆Ge Josefa a fihla gae, ba iša diloba tšela ngwakong go yena, gomme ba obama pele ga gagwe. ₂₇A ba botšiša maphelo, a ba a tšwela pele a re: “A mokgalabje, tatagolena yo le mpoditšego ka yena, o kae? A o sa phela?”

₂₈Ba mo fetola ba re: “Tatagorena, mohlanka wa gago, o gona o sa phela.” Gomme ba khunama pele ga gagwe ba mo lotšha.

₂₉Ge Josefa a bona Benjamene, ngwana wa mmagwe, a re: “Na yo ke yena ngwanabolena wa mafelelo yo le mpoditšego ka yena?” Ke moka a re go Benjamene: “Modimo a go šegofatše, morwa wa ka.” ₃₀A tloga ka potlako, ka gobane o be a rata ngwanabo kudu. O be a nyaka go lla, ka fao a ya phapošing ya gagwe, a llela gona. ₃₁Ge a hlapile mahlo a tšwa a itshwere, a laela gore dijo di tlišwe. ₃₂Josefa o ile a fiwa dijo tafoleng ye nngwe, bomorwarragwe le bona ba fiwa dijo go ye nngwe. Baegepeta bao ba bego ba eja moo ba ile ba fiwa dijo ka thoko, ka gobane ba be ba bona e le go ikiša fase go ja le Baheberu. ₃₃BomorwarragoJosefa ba dudišwa tafoleng pele ga Josefa ka go latelana ga bona matswalong, go tloga ka yo mogolo go fihlela ka yo monnyane. Ge ba bona ka moo ba dudišitšwego ka gona, ba lebelelana ba tlabegile. ₃₄Ba ile ba fiwa dijo di etšwa tafoleng ya Josefa, gomme Benjamene a fiwa dijo gahlano go feta yo mongwe le yo mongwe wa bona. Ka gona ba ja, ba nwa le Josefa ba khora.

₁Josefa o ile a laela mohlokomedi wa ngwako wa gagwe a re: “Tšhelela banna ba dijo ka mekotleng ya bona tše ba ka kgonago go di rwala, gomme o bee tšhelete ya monna yo mongwe le yo mongwe ka molomong wa mokotla wa gagwe. ₂O bee senwelo sa ka sa silibera ka molomong wa mokotla wa yo monnyane, gotee le tšhelete ya mabele a gagwe.” Mohlokomedi a dira ka moo a laetšwego ka gona. ₃E rile e sa le bošego ka la ka moswane bomorwarragoJosefa ba fiwa tsela le dipokolo tša bona. ₄Ge ba sa sepetše sekgalanyana go tloga motseng, Josefa a re go mohlokomedi wa ngwako wa gagwe: “Kitima o šale banna bale morago. Ge o seno ba swara tseleng o ba botšiše o re: ‘Ke ka lebaka la eng le lefeleditše botse ka bobe? ₅Le reng le utswitše senwelo sa mong wa ka sa silibera? Ke senwelo se mong wa ka a nwago ka sona, gape a laolago ka sona. Le obile molato wo mogolo!’ ”

₆Ge mohlokomedi yoo a ba swere tseleng, o ile a bolela ka mokgwa woo. ₇Ba mo fetola ba re: “O ra eng, morena, ge o bolela ka mokgwa wo? Ruri, re a go botša, ga ra dira taba ya mohuta woo. ₈O a tseba gore re go boetše le tšhelete yela ra go e hwetša ka melomong ya mekotla ya rena ge re boa nageng ya Kanana. Bjale re ka napa ra utswa silibera goba gauta ya ngwako wa mong wa gago? ₉Morena, ge yo mongwe wa rena a ka hwetšwa a se swere, a a bolawe, mme rena ka moka re tla ba makgoba a gago.”

₁₀Yena a re: “Go lokile; eupša ke fela yoo a tlago hwetšwa a swere senwelo yo e tlago ba lekgoba la ka, lena ka moka le tla lokologa.” ₁₁Ka gona ba phakiša ba theoša mekotla ya bona, gomme yo mongwe le yo mongwe a tlemolla mokotla wa gagwe. ₁₂Mohlanka yoo wa Josefa a nyaka ka tlhokomelo, a thoma ka wa yo mogolo a feleletša ka wa yo monnyane, gomme senwelo seo sa hwetšwa ka mokotleng wa Benjamene. ₁₃BomorwarragoJosefa ba gagola diaparo tša bona, ba rweša dipokolo tša bona mekotla, mme ba gomela motseng.

₁₄Ge Juda le bomorwarragwe ba fihla ngwakong wa Josefa, Josefa o be a sa le fao. Ba itahlela fase pele ga gagwe, ₁₅gomme yena a re: “Le dirile eng? A le be le sa tsebe gore motho wa maemo a ka o na le maatla a go le utolla ka go phekola?”

₁₆Juda a mo fetola a re: “Ke ge re ka hlwa re sa go botšang, mong wa ka? Re ka go ngangiša bjang? Re ka laetša bjang gore ga re na le molato? Modimo o utolotše molato wa rena, bahlanka ba gago. Ka moka ga rena bjale re makgoba a gago, mong wa ka, e sego fela yoo senwelo se hweditšwego go yena.”

₁₇Josefa a re: “Aowaowaa! Nka se tsoge ke dirile taba yeo! Ke yoo senwelo se hweditšwego go yena fela yo e tlago ba lekgoba la ka. Lena ka moka le ka ipoelela go tatagolena ka khutšo.”

₁₈Juda a batamela go Josefa a re: “Hle, mong wa ka, ntumelele gore ke bolele nago ke lokologile. O se ke wa mpefelelwa; o swana le kgoši ka sebele. ₁₉Mong wa ka, o re botšišitše wa re: ‘A le na le tatagolena goba ngwanabolena yo mongwe?’ ₂₀Ra go fetola, mong wa ka, ra re: ‘Re na le tatagorena yo a tšofetšego, le ngwanaborena yo monnyane yo a mmelegetšwego botšofading bja gagwe. Mogolo wa mošemanyana yoo o hlokafetše, gomme yena ke yena a nnoši wa bana ba mmagwe yo a sa phelago; tatagwe o mo rata ka kudu.’ ₂₁Ke mo o rilego go rena, bahlanka ba gago: ‘Le mo tlišeng mo, gore ke tle ke mmone.’ ₂₂Gomme rena ra go fetola, mong wa ka, ra re: ‘Mošemanyana yoo a ka se tlogele tatagwe; ge a ka mo tlogela, tatagwe o tla hwa.’ ₂₃Ke moo wena o itšego go rena, bahlanka ba gago: ‘Le ka se dumelelwe go boela mo go nna ge e se ge ngwanabolena wa mafelelo a ka tla le lena.’

₂₄“Ge re boetše go tatagorena, re ile ra mmotša seo o se boletšego. ₂₅Ke moo yena a itšego: ‘Boelelang le yo re selela.’ ₂₆Rena ra mo fetola ra re: ‘Re ka se kgone go ya; re ka se dumelelwe go boela go monna yola ge e se ge ngwanaborena wa mafelelo a na le rena. Re tla ya fela ge ngwanaborena wa mafelelo a ka ya le rena.’ ₂₇Tate, mohlanka wa gago, a re go rena: ‘Le a tseba gore mogatšake, Ragele, o mpelegetše barwa ba babedi fela. ₂₈Yo mongwe wa bona o šetše a ntlogetše. O swanetše go ba a rathagantšwe ke dibata, ka gore e sa le go tloga mola ga se ka ke ka mmona gape. ₂₉Ge bjale le ka tšea yo mo go nna, gomme a hlagelwa ke se sengwe, manyami a le tlago a tliša a tla mpolaya, ka gore ke tšofetše kudu.’ ”

_30-31Juda a tšwela pele a re: “Bjale, mong wa rena, ge nka boela go tate ke se ne mošemanyana yo, ge a seno bona gore mošemanyana ga a ne nna, o tla hwa, ka gobane o rata mošemanyana yo kudu. Le gona o tšofetše mo e lego gore manyami a re ka mo tlišetšago ona a ka mmolaya. ₃₂Go feta moo, nna, mohlanka wa gago, ke itlemile go tate ka lebaka la mošemanyana yo. Ke mmoditše gore ge nka se bušetše mošemanyana yo go yena, ke tla šikara molato woo bophelo bja ka ka moka. ₃₃Gomme bjale, mong wa ka, a go šale nna, mohlanka wa gago, ke le lekgoba la gago bakeng sa mošemanyana yo; mo lese a boele morago le bomorwarragwe. ₃₄Nka boela bjang go tate ge mošemanyana yo a se na le nna? Nka se kgotlelele go bona masetlapelo ao a ka welago tate.”

₁Josefa o be a se sa kgona go itshwara pele ga bahlanka ba gagwe, ka gona a ba laela ka moka gore ba tloge go yena. Go be go se na motho yo mongwe ge Josefa a botša bomorwarragwe gore ke yena mang. ₂O be a llela godimo moo e lego gore Baegepeta ba ile ba mo kwa, gomme taba yeo ya begwa mošate. ₃Josefa a re go bomorwarragwe: “Ke nna Josefa. A tate o sa phela?” Fela bomorwarragwe ba be ba mmoifa moo e lego gore ba ile ba se ke ba mo fetola. ₄Ke moo Josefa a itšego go bona: “Hle, batamelang.” Ba batamela, gomme a re: “Ke nna ngwanabolena, Josefa, yola le mo rekišitšego Egepeta. ₅Bjale le se ke la tshwenyega goba la itshola ka ge le nthekišitše fa. Gabotsebotse ke Modimo yo a nthometšego mo pele ga ge le etla, gore ke tle ke phološe malapa a lena. ₆Wo e sa le fela ngwaga wa bobedi wa tlala nageng; go tla ba le mengwaga ye mehlano gape yeo ka yona go ka se kego gwa lengwa goba gwa bunwa. ₇Modimo o nthometše mo pele ga ge le etla gore a tle a phološe ba bantši ba lena, gore le se ke la hwa la felela mo lefaseng. ₈Ga se lena le nthometšego mo, ke Modimo. O ntirile mohlankedi yo mogologolo wa kgoši. Ke okametše lapa la gagwe lohle; ke nna mmuši wa Egepeta ka moka.

₉“Bjale itlhaganeleng le boeleng go tate le fihle le mmotše le re Josefa, morwago, o re: ‘Modimo o ntirile mmuši wa Egepeta ka moka; tlaa go nna ntle le go dikadika. ₁₀O tla dula seleteng sa Goshene moo o tlago ba kgauswi le nna – wena, le bana ba gago, le ditlogolo tša gago, le dihuswane tša gago, le dikgomo tša gago, le tšohle tše e lego tša gago. ₁₁Ge o le Goshene ke tla kgona go go hlokomela. Go sa tlo ba le mengwaga ye mehlano ya tlala; gomme ga ke nyake gore wena le lapa la gago le diruiwa tša gago le bolawe ke tlala.’ ”

₁₂Josefa a tšwela pele a re: “Bjale ka moka ga lena, le wena ngwanešo, Benjamene, le a bona gore ke tloge ke le yena Josefa. ₁₃Le botšeng tate gore ke yo mogolo bjang mo Egepeta, le mmotšeng le ka tšohle tše le di bonego. Gomme le akgofeng le mo tlišeng mo.”

₁₄A ubarela ngwanabo, Benjamene, gomme a lla; Benjamene le yena a lla ge a mo ubarela. ₁₅A re a sa lla, a ubarela yo mongwe le yo mongwe wa bomorwarragwe, a ba atla. Ka morago ga fao bomorwarragwe ba thoma go bolela le yena.

₁₆Ge lapa la mošate le ekwa gore bomorwarragoJosefa ba tlile, kgoši le bakgomana ba gagwe ba thaba. ₁₇Kgoši a re go Josefa: “Botša bongwaneno ba rweše diruiwa tša bona merwalo, ba boele nageng ya Kanana; ₁₈ba yo tšea tatagobona le malapa a bona, ba boe. Ke tla ba fa naga ye kaonekaone mo Egepeta, gomme ba tla ba le dijo tše ntšintši. ₁₉O ba botše le gore ba tloge le dikoloi mo Egepeta tše di tlago namelwa ke basadi ba bona le bana ba bona ba bannyane, le gore ba tle le tatagobona. ₂₀Ba se ke ba tshwenyega ge ba ka tlogela dilo tše dingwe tša bona, ka gobane tše kaonekaone tša naga ka moka ya Egepeta e tla ba tša bona.”

₂₁Barwa ba Jakobo ba dira ka moo ba boditšwego ka gona. Josefa a ba fa dikoloi bjalo ka ge kgoši a laetše, a ba a ba fa le mefago. ₂₂A fa le yo mongwe le yo mongwe diaparo tše mpsha, Benjamene yena a mo fa dipapetlana tša silibera tše makgolo a mararo, le diaparo tše mpsha tše tlhano. ₂₃A romela tatagwe dipokolo tše lesome di rwele dithoto tše kaonekaone tša Egepeta, le tše lesome di rwele mabele le dinkgwa le mefago ye mengwe ya tatagwe. ₂₄A laelana le bomorwarragwe, ya re ge ba sepela a re go bona: “Le se ke la tšama le elwa mo tseleng.”

₂₅Ba tloga Egepeta, ba boela gae go Jakobo, tatabo, kua Kanana. ₂₆Ba fihla ba mmotša ba re: “Josefa o sa phela! Ke mmuši wa Egepeta ka moka!” Jakobo a gakgamala mme a se ke a ba kgolwa.

₂₇Eupša ge ba mmotša tšohle tše Josefa a ba boditšego tšona, le ge a bona dikoloi tše Josefa a di rometšego go tlo mo iša Egepeta, a beega pelo. ₂₈Ke moo a itšego: “Morwa wa ka Josefa o sa phela! Di kwetše! Ke swanetše go yo mmona pele ga ge ke ehwa.”

₁Jakobo o ile a phutha tšohle tše a bego a na le tšona gomme a ya Beresheba, moo a fihla a direla Modimo wa tatagwe Isaka dihlabelo. ₂Modimo a bolela le yena ka pono bošego a mmitša a re: “Jakobo! Jakobo!”

Jakobo a mo araba a re: “Iše, ke theeditše.”

₃Modimo a re: “Ke nna Modimo, Modimo wa tatago. O se ke wa boifa go ya Egepeta; ke tla dira ditlogolo tša gago setšhaba se segolo fao. ₄Ke tla ya nago Egepeta, gomme ka kgonthe ke tla bušetša ditlogolo tša gago mo nageng ye. Josefa o tla ba le wena ge o ehwa.”

₅Jakobo a tloga Beresheba. Barwa ba gagwe ba mo nametša le bana ba bona ba bannyane le basadi ba bona dikoloi tšeo kgoši ya Egepeta e bego e di rometše. ₆Ba tšea diruiwa tša bona le tšohle tše ba di kgobokantšego Kanana, ba ya Egepeta. Jakobo a tšea ditlogolo ka moka tša gagwe: ₇barwa ba gagwe, le ditlogolo tša gagwe tša bašemane, le barwedi ba gagwe, le ditlogolo tša gagwe tša basetsana.

₈Šeba bana ba lapa la Jakobo bao ba ilego le yena Egepeta: Rubene, morwa yo mogolo wa Jakobo, ₉le barwa ba gagwe: Enoko, Palu, Hetserone le Karmi. ₁₀Simeone le barwa ba gagwe: Jemuele, Jamine, Ohade, Jakine, Tsohare le Shaulo, morwa wa mosadi wa Mokanana. ₁₁Lefi le barwa ba gagwe: Gershone, Kehate le Merari. ₁₂Juda le barwa ba gagwe: Shelage, Peretse le Serage. Barwa ba bangwe ba Juda, Ere le Onane, ba hwetše Kanana. Barwa ba Peretse e be e le Hetserone le Hamule. ₁₃Isakara le barwa ba gagwe: Tola, Puba, Jashube le Shimrone. ₁₄Sebulone le barwa ba gagwe: Serede, Elone le Jagliele. ₁₅Bao ke barwa ba Lea a ba belegetšego Jakobo kua Mesopotamia, go sa balwe le morwedi wa gagwe, Dina. Ka moka ditlogolo tša gagwe ka Lea e be e le tše masome a mararo a metšo ye meraro.

₁₆Gade le barwa ba gagwe: Tsifione, Hagi, Shuni, Etsebone, Eri, Arode le Areli. ₁₇Asere le barwa ba gagwe: Jimna, Jishba, Jishbi le Beria, le kgaetšedi ya bona, Serage. Barwa ba Beria e be e le Hebere le Malkiele. ₁₈Batho ba ba lesome le metšo ye e selelago ke ditlogolo tša Jakobo ka Silpa, mosetsana wa lekgoba yo Labane a mo filego Lea, morwediagwe.

₁₉Mosadi wa Jakobo, Ragele, o ile a mmelegela barwa ba babedi: Josefa le Benjamene. ₂₀Kua Egepeta Josefa o ile a ba le barwa ba babedi, Manase le Efraime, ka Asenate, morwedi wa Potifera, moprista wa Heliopolise. ₂₁Barwa ba Benjamene e be e le Bela, Bekere, Ashbele, Gera, Naamane, Ehi, Roshe, Mupime, Hupime le Arde. ₂₂Batho ba ba lesome le ba bane ke ditlogolo tša Jakobo ka Ragele.

₂₃Dane le morwa wa gagwe, Hushime. ₂₄Naftali le barwa ba gagwe: Jagtsiele, Guni, Jetsere le Shileme. ₂₅Batho ba ba šupago ba ke ditlogolo tša Jakobo ka Bilha, mosetsana wa lekgoba yoo Labane a mo filego Ragele, morwediagwe.

₂₆Batho ka moka ba leloko la Jakobo ka madi ba ba ilego ba ya Egepeta le yena e be e le ba masome a a selelago le metšo ye e selelago, go sa balwe basadi ba barwa ba gagwe. ₂₇Barwa ba ba belegetšwego Josefa kua Egepeta e be e le ba babedi, ka gona batho ba lapa la Jakobo ka moka ba ba bilego fao ya ba ba masome a a šupago.

₂₈Jakobo o ile a roma Juda go ba eta pele go kgopela Josefa gore a ba gahlanetše kua Goshene. Ge ba fihla, ₂₉Josefa a namela koloi ya gagwe gomme a ya Goshene go yo gahlanetša tatagwe. Ge ba gahlana, Josefa a ubarela tatagwe molaleng, gomme a lla nako ye telele. ₃₀Jakobo a re go Josefa: “Bjale ka gore ke go bone gomme ke a tseba gore o sa phela, nka no ikhwela.”

₃₁Ke moo Josefa a itšego go bomorwarragwe le go ba bangwe ka moka ba lapa la Jakobo: “Ke tla ya ka begela kgoši gore bomorwarre le ba lapa la tate ka moka bao ba bego ba dula Kanana, ba tlile go nna. ₃₂Ke tla mmotša gore lena le badiši mme le batho ba leruo, le gore le tlile le dihuswane le dikgomo le tšohle tše e lego tša lena. ₃₃Ge kgoši a le bitša a le botšiša gore modiro wa lena ke eng, ₃₄le mmotše gore le dišitše diruiwa bophelo bja lena ka moka, bjalo ka borakgolokhukhu ba lena. Ke moo a tlago le dumelela go dula seleteng sa Goshene.” Josefa o ile realo ka gobane Baegepeta ba be ba hlaswa badiši.

_1-2Ka gona Josefa a tšea bomorwarragwe ba bahlano a ya nabo go kgoši. A botša kgoši a re: “Tate le bomorwarre ba tlile ba etšwa Kanana le dihuswane le dikgomo tša bona le tšohle tše e lego tša bona. Bjale ba mo seleteng sa Goshene.” A napa a tsebiša kgoši bomorwarragwe. ₃Kgoši a ba botšiša a re: “Mošomo wa lena ke eng?”

Ba mo fetola ba re: “Re badiši, rena bahlanka ba gago, bjalo ka borakgolokhukhu ba rena. ₄Re falaletše mo nageng ye ka gobane nageng ya Kanana komelelo ke ye šorošoro mo e lego gore ga go phulo ya mehlape ya rena. Hle, re dumelele go dula seleteng sa Goshene.”

₅Kgoši a re go Josefa: “Bjale ka gore tatago le bomorwarrago ba fihlile, ₆naga ya Egepeta ke ya bona. A ba dule seleteng sa Goshene, karolong ye kaonekaone ya naga. Gomme ge eba go na le banna ba tsebo ya leruo gare ga bona, o ba bee bahlokomedi ba diruiwa tša ka.”

₇Ke moka Josefa a yo tšea Jakobo, tatagwe, a mo tsebiša kgoši. Jakobo a šegofatša kgoši, ₈gomme kgoši a mmotšiša a re: “A o na le mengwaga ye mekae?”

₉Jakobo a mo fetola a re: “Bophelo bja ka bja go ralala le naga e bile mengwaga ye lekgolo le masome a mararo. Mengwaga yeo e bile ye mennyane ye methata, ga se ya swana le mengwaga ye mentši ya botate ya go ralala ga bona.” ₁₀Jakobo a laela kgoši ka tšhegofatšo, gomme a tloga. ₁₁Ka gona Josefa a dudiša tatagwe le bomorwarragwe nageng ya Egepeta, a ba fa naga mo go kaonekaone kgauswi le motse wa Ramsese, ka moo kgoši a laetšego ka gona. ₁₂Josefa a fa tatagwe le bomorwarragwe le batho ka moka ba lapa la tatagwe dijo, gotee le ba bannyane.

₁₃Tlala e be e iphile maatla go se na le dijo nageng ka moka, gomme batho ba Egepeta le ba Kanana ba fokola ka lebaka la yona. ₁₄Ge ba reka mabele Josefa a kgoboketša tšhelete ka moka, a e iša mošate. ₁₅Ge tšhelete ka moka ya Egepeta le Kanana e fedile, Baegepeta ba tla go Josefa ba re: “Re fe dijo! O se ke wa re lesa re ehwa. Tšhelete ya rena e fedile.”

₁₆Josefa a ba fetola a re: “Tlišang diruiwa tša lena; ke tla di tšea ka le fa dijo ge eba tšhelete ya lena e fedile.” ₁₇Ka gona ba tliša diruiwa tša bona go Josefa, gomme a ba fa dijo; a tšea dipere le dihuswane le dikgomo le dipokolo. Ngwaga woo ba reka mabele go yena ka diruiwa tšohle tša bona.

₁₈Ka ngwaga wo o latelago ba tla go yena ba re: “Re ka se go utele, mong wa rena, gore tšhelete ya rena e fedile taa, gomme le diruiwa tša rena di feletše go wena. Ga go seo se šetšego se re ka go neago sona ge e se rena beng le mašemo a rena. ₁₉Se re lese re ehwa, le mašemo a rena a omelela wena o lebeletše. Re reke ka dijo, rena gotee le mašemo a rena. Re tla ba makgoba a kgoši, gomme mašemo a rena ya ba a gagwe. Re fe peu gore re phele re se ke ra hwa, le gore mašemo a rena a se ke a senyega.”

₂₀Josefa a rekela kgoši naga ka moka ya Egepeta. Moegepeta yo mongwe le yo mongwe a gapeletšega go rekiša tšhemo ya gagwe, ka gobane tlala e be e le ye šoro kudu, gomme naga ka moka ya ba ya kgoši. ₂₁Josefa a dira batho ka moka ba naga ya Egepeta makgoba. ₂₂Ke naga ya baprista fela ye a ilego a se ke a e reka. Bona ba ile ba se gapeletšege go rekiša naga ya bona ka gobane kgoši o ile a ba fa kabelo ye ba ka phelago ka yona. ₂₃Josefa a re go batho: “Bonang, bjale ke le rekile gore le be ba kgoši, lena le mašemo a lena. Peu še, le e bjale mašemong a lena. ₂₄Ka nako ya go buna le swanetše go fa kgoši karolo ya bohlano ya tše le di bunnego. Mabele a a šalago le ka a beela peu le dijo tša lena le tša ba malapa a lena.”

₂₅Ba mo fetola ba re: “O re phološitše; o ile wa re lokela, mong wa rena, gomme re tla ba makgoba a kgoši.” ₂₆Ka gona Josefa a beela naga ya Egepeta molao wa go re karolo ya bohlano ya tše di bunnwego ke ya kgoši. Molao wo o sa le gona le lehono. E bile naga ya baprista fela ye e sego ya ka ya ba ya kgoši.

₂₇Baisraele ba ile ba dula Egepeta seleteng sa Goshene; ba iketla gomme ba ba le bana ba bantši. ₂₈Jakobo o dutše Egepeta mengwaga ye lesome le ye e šupago, ka gona o phetše mengwaga ye lekgolo le masome a mane a metšo ye e šupago. ₂₉Ge nako ya gore a hwe e batamela, a laela gore morwa wa gagwe, Josefa, a bitšwe, gomme a re go yena: “Hle, tsenya seatla sa gago gare ga dirope tša ka, gomme o ene o tiišitše gore o ka se mpoloke Egepeta. ₃₀Ke nyaka go bolokwa moo botate ba lego gona; o nthwale o nntšhe mo Egepeta, gomme o yo mpoloka moo ba bolokilwego gona.”

Josefa a mo fetola a re: “Ke tla dira ka moo o nkgopelago ka gona.”

₃₁Jakobo a re: “Nkenele gore o tla dira bjalo.” Josefa a ena, gomme Jakobo a obama a leboga Modimo a le malaong a gagwe.