To The Word – Day 11

₁Jakobo o ile a no fela a dutše nageng ya Kanana, moo tatagwe a bego a falaletše gona. ₂Ditaba tša lapa la gagwe šedi:

Josefa, lesoganyana la mengwaga ye lesome le metšo ye e šupago, o be a diša dihuswane le bomorwarragwe, barwa ba Bilha le Silpa, metlabo ya tatagwe. O be a botša tatagwe dilo tše mpe tše bomorwarragwe ba bego ba di dira.

₃Jakobo o be a rata Josefa go feta barwa ba bangwe ba gagwe ka moka, ka gobane o mmelegetšwe mola a tšofetše. A mo rokela seaparo se setelele sa matsogo a matelele. ₄Ge bomorwarragwe ba bona gore tatagobona o rata Josefa go ba feta, ba hloya ngwanabobona kudu moo e lego gore ba be ba sa mmolediše ka botho.

₅Bošegong bjo bongwe Josefa a lora toro, mme ge a e botša bomorwarragwe, bona ba mo hloya go fetišiša. ₆O ile a re: “Theetšang toro ye ke e lorilego. ₇Ka moka ga rena re be re le mašemong re tlema dingata tša mabele, gomme ngata ya ka ya tsoga ya ema thwii. Tša lena tša dikologa ya ka, gomme tša e obamela.”

₈Bomorwarragwe ba mmotšiša ba re: “A o gopola gore o tlile go ba kgoši ya rena? A o tlile go re buša?” Ka gona ba mo hloya go fetišiša ka lebaka la seo a se boletšego ka ditoro tša gagwe.

₉Josefa a lora ye nngwe toro gomme a botša bomorwarragwe a re: “Ke lorile toro ye nngwe, ka bona letšatši le ngwedi le dinaledi tše lesome le e tee di nkobamela.”

₁₀A botša le tatagwe toro yeo, gomme tatagwe a mo omanya a re: “Ke toro ya mohuta mang yeo? A o gopola gore mmago le bomorwarrago le nna re tlilo tla ra go obamela?” ₁₁BomorwarragoJosefa ba mo tsebafela, tatagwe yena a fela a gopodišiša taba yeo.

₁₂Ka nako ye nngwe ge bomorwarragoJosefa ba ile Shekeme go yo diša dihuswane tša tatagobona, ₁₃Jakobo o ile a re go Josefa: “Ke nyaka gore o ye Shekeme moo bomorwarrago ba dišitšego dihuswane.”

Josefa a mo fetola a re: “Go lokile.”

₁₄Tatagwe a re go yena: “Sepela o bone ge eba bomorwarrago ba sa iketlile, le ge eba dihuswane di sa le gabotse; gomme o boe o tle o mpotše.” Ka gona tatagwe a mo roma ba le moeding wa Hebrone.

Josefa a fihla Shekeme, ₁₅mme a ralala le naga yeo. Monna yo mongwe a mmona gomme a mmotšiša a re: “A o nyaka eng?”

₁₆Josefa a mo fetola a re: “Ke nyaka bomorwarre. Na o ka mpotša mo ba dišago gona?”

₁₇Monna yoo a re: “Ba šetše ba tlogile. Ke ba kwele ba re ba ya Dotane.” Ka fao Josefa a šala bomorwarragwe morago mme a ba hwetša kua Dotane.

₁₈Ba mmona a sa le kgole, gomme pele ga ge a fihla go bona, ba kwana go mmolaya. ₁₉Ba boledišana ba re: “Raditoro yola šo o etla. ₂₀Tlang re mmolayeng, re mo lahlele ka moleteng wo mongwe. Re tla re o bolailwe ke sebata. Ke moo re tlago bona gore na ditoro tša gagwe di tla feletša kae.”

₂₁Rubene a ba kwa, gomme a leka go phološa Josefa a re: “A re se ke ra mmolaya. ₂₂Se tšholleng madi. Mo lahleleng ka mo moleteng wo mo lešokeng, eupša le se ke la mo iša seatla.” A realo gore a mo phološe go bona gomme a mmušetše go tatagwe. ₂₃Ge Josefa a fihla go bomorwarragwe, ba mo hlobola seaparo sa gagwe se setelele sa matsogo a matelele. ₂₄Gomme ba mo tšea ba mo lahlela ka moleteng wo o bego o se na le meetse.

₂₅Ba dula fase ba ja, ya re ge ba iša mahlo ba bona sehlopha sa Baishmaele se etšwa Gileade se eya Egepeta. Dikamela tša bona di be di rwele dinoko le marokhu. ₂₆Juda a re go bomorwarragwe: “Re tla boelwa ke eng ka go bolaya ngwanaborena le ka go uta polao yeo? ₂₇A re mo rekišeng go Baishmaele ba, re se ke ra ba ra mo iša seatla. Ga ke re ke ngwanaborena, ke madi a borena?” Bongwanabo ba dumela, ₂₈gomme ge bagwebi ba Bamidiane ba etla, bongwanaboJosefa ba mo ntšha moleteng, ba mo rekišetša Baishmaele ka dipapetlana tša silibera tše masome a mabedi; bona ba mo tšea ba ya naye Egepeta.

₂₉Ge Rubene a etla moo moleteng gomme a hwetša gore Josefa ga a gona, a gagola diaparo tša gagwe. ₃₀A boela go bomorwarragwe a re: “Mošemanyana yola ga a gona! A ke tlilo dirang?”

₃₁Ke moo ba bolailego phooko, ba korobetša seaparo sa Josefa ka mading a yona. ₃₂Ba tšea seaparo seo ba se iša go tatagobona mme ba re: “Re hweditše seaparo sese. Nke o se lekodišiše o bone ge eba ke sa morwago goba ga se sona.”

₃₃A se lekodišiša mme a re: “Seaparo sa morwake! O llwe ke sebata! Morwa wa ka, Josefa, o rathagantšwe!” ₃₄Jakobo a gagola diaparo tša gagwe, a apara tša go ilela, a llela morwa wa gagwe nako ye telele. ₃₅Barwa ba gagwe ka moka le barwedi ba tla go mo homotša, eupša a gana go homotšwa mme a re: “Ke tla theogela bodulabahu ke sa llela morwa wa ka.” Ka gona a tšwela pele a llela morwa wa gagwe, Josefa.

₃₆Kua Egepeta Bamidiane ba ile ba rekiša Josefa go Potifare, mohlankedi yo mongwe wa kgoši, yo e bego e le molaodi wa baleti ba kgoši.

₁Yona mehleng yeo Juda a tlogela bomorwarragwe, a theoga a yo dula le Hira, monna yo a bego a etšwa motseng wa Adulamo. ₂Moo Juda a gahlana le mosetsana wa Mokanana yo tatagwe e bego e le Shua. A mo nyala, a robala naye, ₃gomme mosetsana a ima, a mmelegela morwa; Juda a mo rea leina la Ere. ₄A ima gape, a belega morwa yo mongwe, gomme a mo rea leina la Onane. ₅A ba le morwa gape, mme a mo rea leina la Shelage. Juda o be a le kua Akesibe ge mosadi a mmelegela Shelage.

₆Juda a hweletša morwa wa gagwe wa mathomo, Ere, mosadi; leina la gagwe e be e le Tamare. ₇Ere o be a fošetša Morena, ka gona Morena a mmolaya. ₈Ke moo Juda a itšego go Onane: “Sepela o yo robala le mohlologadi wa mogolwago. O mo tsenele gore mogolwago a tle a be le ditlogolo.” ₉Fela Onane a tseba gore bana bao e ka se tlo ba ba gagwe, ka gona nako ye nngwe le ye nngwe ge a robala le mohlologadi wa mogolwagwe, a tšhollela matšhedi fase gore go se ke gwa ba le bana ba mogolwagwe. ₁₀Se a se dirilego sa befediša Morena, mme le yena Morena a mmolaya. ₁₁Ke moo Juda a itšego go Tamare, ngwetši ya gagwe: “Ipoelele ga geno mme o fele o le mohlologadi go fihlela morwa wa ka, Shelage, a godile.” A realo ka gobane a boifa gore Shelage o tla bolawa bjalo ka bomogolwagwe. Ka gona Tamare a ipoelela ga gabo.

₁₂Ka morago ga lebaka le letelele mosadi wa Juda a hwa. Ge Juda a feditše go ilela, yena le mogwera wa gagwe, Hira wa Adulamo, ba ya Timna, moo dinku tša Juda di bego di kotwa ntshe. ₁₃Motho yo mongwe a botša Tamare a re: “Ratswalago o ya Timna go yo kota dinku tša gagwe.” ₁₄Ka gona Tamare a apola diaparo tša bohlologadi, a ipipa sefahlego ka lešira, a itira gore a se ke a tsebja, gomme a dula fase moo tsela e phamogelago Enaime, motse wo o bego o le tseleng ya go ya Timna. O be a tseba gabotse gore morwa wa Juda wa mafelelo, Shelage, bjale o godile, gomme le ge go le bjalo ga se a ka a mo fiwa gore a mo tsenele.

₁₅Ge Juda a mmona, a gopola gore ke segwebakathobalo, ka gore o be a ipipile sefahlego. ₁₆A ya go yena ka thoko ga tsela a re: “Etla re robale.” O be a sa tsebe gore ke ngwetši ya gagwe.

Tamare a re: “A o tla mpha eng?”

₁₇Juda a mo fetola a re: “Ke tla go romela putšane ya go tšwa mohlapeng wa ka.”

Tamare a re: “Go lokile, ge o ka mpha se ke tlago šala ke se swere go fihlela o e romela.”

₁₈Juda a mmotšiša a re: “Ke go neele eng se o tlago šala o se swere?”

Tamare a mo fetola a re: “Papetlana ya gago ya go itsebiša, le ketanyana ya yona, le lepara le o le swerego.” A mo neela tšona. A robala naye, gomme Tamare a ima. ₁₉Tamare a ya gae, a apola lešira, a apara diaparo tšela tša gagwe tša bohlologadi.

₂₀Juda a roma Hira, mogwera wa gagwe, go iša putšane yela le go tšea dilo tšela mosadi yola a šadilego a di swere, fela a se ke a mo hwetša. ₂₁A botšiša banna ba bangwe kua Enaime a re: “A segwebakathobalo sela se bego se le mo tseleng se kae?”

Ba mo fetola ba re: “Ga se gwa ka gwa ba le segwebakathobalo mo.”

₂₂A boela go Juda a re: “Ga se ka mo hwetša. Banna ba felo fao ba re ga se gwa ka gwa ba le segwebakathobalo fao.”

₂₃Juda a re: “A a itshwarele dilo tšeo. Ga re nyake go segwa ke batho. Go leka gona ke lekile go mo lefa, fela ga se wa mo hwetša.”

₂₄Ka morago ga dikgwedi tše e ka bago tše tharo, motho yo mongwe a botša Juda a re: “Ngwetši ya gago, Tamare, e be e itirile sefebe, mme bjale e imile.”

Juda a re: “Mo ntšheng le mo tšhumeng a hwe.”

₂₅Ge a ntšhetšwa ntle, a roma motho go ratswalagwe a re: “Ke imišitšwe ke monna yoo dilo tše e lego tša gagwe. Di lebeledišiše mme o bone gore ke tša mang – papetlana ye ya go itsebiša, le ketanyana ya yona, le lepara le.”

₂₆Juda a di tseba gomme a re: “O a rereša ka gobane ga se ka mo neela morwa wa ka, Shelage, gore e be mosadi wa gagwe.” Juda a se ke a hlwa a robala naye gape.

₂₇Ge nako ya gagwe ya go belega e fihla, go ile gwa lemogwa gore o tlilo belega mafahla. ₂₈Ge a le gare a belega, yo mongwe wa bona a ntšha letsogwana; mmelegiši a le swara, a le tlema ka tlhale ye khubedu, gomme a re: “Yo o tswetšwe pele.” ₂₉Fela lesea la gomiša letsogwana lela, mme ngwanabolona a belegwa pele. Ke moo mmelegiši a itšego: “Jo, wa tla wa šwahla?” Ka gona a rewa leina la Peretse. ₃₀Ka morago gwa belegwa ngwanabo le tlhale yela ye khubedu letsogwaneng la gagwe, gomme a rewa leina la Serage.

₁Baishmaele ba be ba išitše Josefa Egepeta mme ba mo rekišeditše Potifare, mohlankedi yo mongwe wa kgoši, yo e bego e le molaodi wa baleti ba kgoši. ₂Morena a ba le Josefa mme a mo atla. O be a dula ngwakong wa mong wa gagwe wa Moegepeta. ₃Yena a bona gore Morena o na le Josefa, o mo atla go se sengwe le se sengwe se a se dirago. ₄Potifare a mo thabela mme a mo dira mohlanka wa gagwe yo mogolo, ka gona a mmea mohlokomedi wa ngwako wa gagwe le wa tšohle tša gagwe. ₅Go tloga ka nako yeo Morena a šegofatša lapa la Moegepeta yoo ka lebaka la Josefa. Morena a šegofatša se sengwe le se sengwe se a bego a na le sona lapeng la gagwe le mašemong a gagwe. ₆Potifare a bea Josefa mohlokomedi wa tšohle tše a nago le tšona, gomme a se ke a be a itshwenya ka selo ntle le dijo tše a bego a di ja.

Josefa o be a bopegile e le yo mobotse. ₇Ka morago ga lebaka mosadi wa mong wa gagwe a thoma go mo duma, gomme a mo kgopela gore a robale naye. ₈Josefa a gana a re go yena: “Bona, mong wa ka ga a sa itshwenya ka selo ka mo lapeng ka gobane ke le gona. O ntirile mohlokomedi wa tšohle tše a nago le tšona. ₉Ke na le maatla a a lekanago le a gagwe mo lapeng le, gomme ga go seo a nkganetšago sona ntle le wena. Bjale nka napa ka dira taba ye mpe ka mokgwa woo, ka fošetša Modimo?” ₁₀Le ge a be a kgopela Josefa letšatši ka letšatši, Josefa a se ke a dumela go robala naye.

₁₁Ka letšatši le lengwe ge Josefa a tsena ka ngwakong go yo dira mošomo wa gagwe, gwa be go se ne motho ka gae. ₁₂Mosadi wa Potifare a mo swara ka seaparo a re: “Tlaa o robale le nna!” Eupša Josefa a phonyokga a tšhabela ntle, a šia seaparo sela sa gagwe matsogong a mosadi yola. ₁₃Ge mosadi a bona gore Josefa o tlogetše seaparo sa gagwe gomme o tšhabetše ntle, ₁₄a bitša bahlanka ba lapa, a re: “Bonang! Moheberu yo mogatšake a mo tlišitšego mo lapeng o a re hlompholla. O tsene ka phapošing ya ka go tlo nkata, fela nna ka goeletša ka kudu. ₁₅Ge a ekwa ke goeletša, a tlogela seaparo sa gagwe ka thoko ga ka, a tšhabela ntle.”

₁₆A swara seaparo seo sa Josefa go fihlela mong wa gagwe a etla gae. ₁₇Ke moo a mmoditšego yona taba yela a re: “Lekgoba lela la Moheberu o le tlišitšego mo le tsene ka phapošing ya ka mme la ntlhompholla. ₁₈Eupša ge ke goeletša, a tšhabela ka ntle, a šia seaparo sa gagwe ka thoko ga ka.”

₁₉Mong wa Josefa a befelwa kudu ₂₀gomme a laela gore Josefa a swarwe, a tsenywe ka kgolegong yeo bagolegwa ba kgoši ba bego ba tswaleletšwe ka go yona, gomme a dula fao. ₂₁Fela Modimo a ba le Josefa mme a mo šegofatša gore rakgolego a mo thabele. ₂₂A bea Josefa mohlokomedi wa bagolegwa ka moka, le wa tšohle tše di dirwago ka kgolegong. ₂₃Rakgolego a se hlwe a tlemegile go hlokomela selo se se bego se le diatleng tša Josefa, ka gobane Morena o be a na le yena, gomme a atla se sengwe le se sengwe se a se dirago.

₁Ka morago ga nako motšhelabeine wa kgoši ya Egepeta le moapeimogolo wa dinkgwa ba befediša kgoši. ₂O ile a befelelwa bahlankedi bao ba babedi, ₃gomme a ba hlahlela kgolegong ngwakong wa molaodi wa baleti ba kgoši, gona ka mola Josefa a bego a tswaleletšwe ka gona. ₄Ba tšea nako ye telele kgolegong, gomme molaodi a dira Josefa mohlanka wa bona.

₅Bošego bjo bongwe gona ka moo kgolegong motšhelabeine le moapeimogolo ba lora ditoro, mme ditoro tšeo di be di na le ditlhathollo tše di fapanego. ₆Ge Josefa a etla go bona mosong, a bona gore ba tshwenyegile. ₇A ba botšiša a re: “Ke ka lebaka lang le tshwenyegile lehono?”

₈Ba mo fetola ba re: “Yo mongwe le yo mongwe wa rena o lorile toro, gomme ga go na motho yo a kgonago go di hlatholla.”

Josefa a re: “A ga se Modimo yo a kgontšhago motho go hlatholla ditoro? Mpotšeng ditoro tša lena.”

₉Ka gona motšhelabeine a re: “Nna ke lorile ke bona morara pele ga ka ₁₀o na le mahlogedi a mararo. Ge matlakala a seno hloga, mabue a tšwelela, gomme diterebe tša butšwa. ₁₁Ke be ke swere senwelo sa kgoši; ka gona ka tšea diterebe ka di pitlela ka senwelong, ka se fa kgoši.”

₁₂Josefa a re: “Tlhathollo ya toro yeo še: Mahlogedi a mararo ke matšatši a mararo. ₁₃Ka morago ga matšatši a mararo kgoši o tla go lokolla, a go swarela, a go boetša maemong a gago. O tla mo fa senwelo sa gagwe bjale ka pele ge o be o le motšhelabeine wa gagwe. ₁₄Fela hle, o nkgopole ge tšohle di go sepelela gabotse, o ntšwele mohola ka go mpolelela kgoši, mme o nntšhe ka mo kgolegong. ₁₅Gabotsebotse ke tšhabišitšwe nageng ya Baheberu, mme le gona mo Egepeta ga go se ke se dirilego gore ke be ke lahlelwe kgolegong.”

₁₆Ge moapeimogolo wa dinkgwa a bona tlhathollo ya toro ya motšhelabeine e le ye botse, a re go Josefa: “Le nna ke lorile toro; ke be ke rwele diroto tše tharo tša dinkgwa hlogong. ₁₇Ka serotong sa ka godimodimo go be go na le dijo tša kgoši tša mehutahuta tše di apeilwego, gomme dinonyana di be di di ja.”

₁₈Josefa a mo fetola a re: “Tlhathollo ya toro yeo še: Diroto tše tharo ke matšatši a mararo. ₁₉Ka morago ga matšatši a mararo kgoši o tla go ripa hlogo. Ke moka a lekeletša setopo sa gago koteng, gomme manong a ja nama ya gago.”

₂₀Ka letšatši la boraro, letšatši la matswalo a kgoši, kgoši a direla bahlankedi ba gagwe ka moka monyanya; a lokolla motšhelabeine le moapeimogolo mme a ba tliša pele ga bahlankedi ba gagwe. ₂₁A boetša motšhelabeine maemong a gagwe a pele, ₂₂moapeimogolo yena a mmolaya, gwa direga bjalo ka ge Josefa a be a boletše. ₂₃Fela motšhelabeine a se ke a gopola Josefa, a mo lebala.

₁Ka morago ga mengwaga ye mebedi kgoši ya Egepeta ya lora e eme ka thoko ga noka ya Naele, ₂gomme a bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng. ₃Ke moka gwa rotoga dikgomo tše dingwe tše di šupago tša ditshadi; tšona e be e le makhoro, di otile. Di ile tša rotoga tša ema kgauswi le dikgomo tšela tše dingwe lebopong la noka. ₄Kgomo tša go ota tša ja dikgomo tšela tše di šupago tša go nona. Kgoši a phafoga. ₅A swarwa ke boroko gape, gomme a lora la bobedi. A bona diako tše di šupago tša mabele tše di tladitšego mme di budule, di metše lehlakeng le tee. ₆Diako tše dingwe tše di šupago tša mabele tša hloga; e be e le tše tshesenyane, mme di tšhumilwe ke phefo ya leganata. ₇Diako tšela tše tshesenyane tša metša tšela tša go šupa tša go tlatša tše koto. Kgoši a phafoga mme a lemoga gore o be a lora.

₈Ka moswane a tshwenyega, ka gona a bitša didupe ka moka le banna ba bohlale ba Egepeta. A ba botša ditoro tša gagwe, fela le o tee a se kgone go mo hlathollela tšona.

₉Ke moo motšhelabeine a itšego go kgoši: “Lehono ke swanetše go ipolela gore ke dirile phošo. ₁₀O be o mpefeletšwe, nna le moapeimogolo, wa re lahlela kgolegong ngwakong wa molaodi wa baleti ba kgoši. ₁₁Bošegong bjo bongwe yo mongwe le yo mongwe wa rena o ile a lora toro, mme ditoro tšeo di be di na le ditlhathollo tše di fapanego. ₁₂Lesogana la Moheberu, lekgoba la molaodi wa baleti ba kgoši, le be le na le rena moo. Re ile ra mmotša ditoro tša rena, gomme a re hlathollela tšona. ₁₃Go diregile ka mo a re hlatholletšego ka gona: O mpoeditše maemong a ka, moapeimogolo yena wa mmolaya.”

₁₄Kgoši a laela gore Josefa a tlišwe, gomme a ntšhwa kgolegong ka bjako. Ge a bootše maledu, a apara diaparo tše dingwe, a tsena, a ema pele ga kgoši. ₁₅Kgoši a re go yena: “Ke lorile toro, gomme ga go yo a kgonago go e hlathollago. Ke boditšwe gore wena o kgona go hlatholla ditoro.”

₁₆Josefa a mo fetola a re: “Ga ke kgone, kgoši, fela Modimo o tla go utollela tše botse ka yona.”

₁₇Kgoši a re: “Ke lorile ke eme lebopong la noka ya Naele, ₁₈gomme ka bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng. ₁₉Ke moka gwa rotoga dikgomo tše dingwe tše di šupago tša ditshadi tše di bego di gwametšwe, e le makhoro, di otile kudu. E be e le makhoro a ke sego ka ke ka a bona nageng ka moka ya Egepeta. ₂₀Dikgomo tšeo tša makhoro tša ja tšela tša go nona, ₂₁eupša go be go se yo a ka lemogago gore di di lle, ka gobane di ile tša no fela di sa otile bjalo ka pele. Gomme ka phafoga. ₂₂Ka buša ka lora ke bona diako tše di šupago tša mabele tšeo di bego di tladitše mme di budule, di metše lehlakeng le tee. ₂₃Ka bona go hloga tše dingwe diako tše di šupago, tše tshesenyane tše di tšhumilwego ke phefo ya leganata. ₂₄Diako tšeo tše tshesenyane tša mabele tša metša tšela tša go tlatša tše di šupago. Ke boditše didupe ditoro tše, fela ga go le o tee wa bona yo a kgonnego go ntlhathollela tšona.”

₂₅Josefa a re go kgoši: “Ditoro tšeo tše pedi di ra selo se tee, kgoši; Modimo o go boditše se a tlilego go se dira. ₂₆Dikgomo tša go nona tše di šupago ke mengwaga ye e šupago, mme diako tša mabele tše di tladitšego tše di šupago le tšona ke mengwaga ye e šupago; di ra selo se tee. ₂₇Dikgomo tše di šupago tša ditshadi tša makhoro tše di rotogilego ka morago, le diako tša mabele tše tshesenyane tše di šupago tše di tšhumilwego ke phefo ya leganata ke mengwaga ye e šupago ya tlala. ₂₈Go ka wona mokgwa woo ke go boditšego, kgoši – Modimo o go laeditše se a tlilego go se dira. ₂₉Go tla ba le mengwaga ye e šupago ya mokhora wo mogolo nageng ka moka ya Egepeta. ₃₀Ka morago ga moo go tla ba le mengwaga ye e šupago ya tlala, gomme mengwaga yela ya mokhora e tla lebalwa, ka gobane tlala e tla senya naga. ₃₁Mokhora wola o tla lebalwa, ka gobane tlala ye e tlago latela e tla ba ye šoro kudu. ₃₂Go ipoeletša ga toro ya gago go ra gore taba yeo e beilwe ke Modimo, le gore o tla e hlagiša kgauswinyana.

₃₃“Bjale, kgoši, kgetha monna wa bohlale le kwešišo, o mmee molaodi wa naga. ₃₄O be o bee bahlapetši ba go ntšhiša batho karolo ya bohlano ya tše ba di bunnego mo mengwageng ye e šupago ya mokhora. ₃₅O ba laele gore ba kgoboketše dijo ka moka mo mengwageng ya mokhora ye e tlago, gomme o ba fe maatla a go boloka mabele mo metseng, le go a leta. ₃₆Dijo tše di tla tla di fepa setšhaba mo mengwageng ye e šupago ya tlala ye e tlilego go wela Egepeta, gore batho ba se ke ba tla ba hwa ka tlala.”

₃₇Kgoši le bakgomana ba gagwe ba amogela keletšo yeo, ₃₈gomme kgoši a re go bona: “Re ka se tsoge re hweditše motho yo mokaone go feta Josefa, monna yo a nago le moya wa Modimo.” ₃₉Kgoši a re go Josefa: “Modimo o go utolletše tše ka moka, ka gona go molaleng gore o na le bohlale bjo bogolo le kwešišo go feta batho bohle. ₄₀Ke tla go bea mookamedi wa lapa la ka, gomme batho ba ka ka moka ba tla phetha ditaelo tša gago. Maatla a gago a tla fetwa ke a ka fela. ₄₁Bjale ke go bea mmušiši wa Egepeta ka moka.” ₄₂Kgoši a khwamola palamonwana ya gagwe ye e bego e tlokilwe sekibo sa mošate, a e khwamela monwaneng wa Josefa. A mo apeša seaparo sa lešela le boletiana, a mo apeša le ketane ya gauta molaleng. ₄₃A mo fa koloi ya bobedi ya mošate gore a sepele ka yona, gomme baleti ba gagwe ba mo eta pele ba goa ba re: “Tlogang tseleng! Tlogang tseleng!” Ka gona Josefa a bewa mmušiši wa naga ya Egepeta ka moka. ₄₄Kgoši a re go yena: “Kgoši ke nna – gomme ga go le o tee nageng ya Egepeta ka moka yo a tlago dira selo a se a dumelelwa ke wena.” _45-46A fa Josefa leina la Seegepeta la Tsafenate-Paneage. A mo fa mosadi, Asenate, morwedi wa Potifera, moprista wa motse wa Heliopolise.

Josefa o be a na le mengwaga ye masome a mararo ge a thoma go hlankela kgoši ya Egepeta. O ile a tloga kgorong ya kgoši gomme a ralala le naga ka moka. ₄₇Mo mengwageng ye e šupago ya mokhora naga e ile ya ntšha mabele a mantši. ₄₈Josefa a kgoboketša dijo ka moka moo mengwageng yeo e šupago, a di boloka mo metseng. Motseng wo mongwe le wo mongwe a boloka dijo tše di tšwago mašemong a wona. ₄₉A boloka mabele a mantši moo a ilego a šala a swana le lešabašaba la lewatle. Ya ba a mantši mo a ilego a ba a lesa go a ela.

₅₀Pele ga ge mengwaga ya tlala e etla Josefa o ile a ba le barwa ba babedi ka Asenate. ₅₁A re: “Modimo o ntebadišitše ditlaišego tša ka ka moka, le lapa la tate ka moka”; ka gona a rea morwa wa gagwe wa mathomo leina la Manase. ₅₂A ba a re: “Modimo o mphile bana nageng ye ke hlakilego go yona”; ka gona a rea morwa wa gagwe wa bobedi leina la Efraime.

₅₃Mengwaga ye e šupago ya mokhora nageng ya Egepeta ya fela, ₅₄mme gwa thoma mengwaga ye e šupago ya tlala, bjalo ka ge Josefa a boletše. Gwa wa tlala nageng ye nngwe le ye nngwe, eupša Egepeta ka moka gwa ba le dijo. ₅₅Ge Baegepeta ba thoma go kwa tlala, ba llela go kgoši gore a ba fe dijo. Yena a re go bona: “Sepelang go Josefa, le direng se a le botšago sona.” ₅₆Tlala ya ba ye šorošoro ya aparela naga ka moka, ka gona Josefa a bula mengwako ka moka ya polokelo, a rekišetša Baegepeta mabele. ₅₇Batho ba tla Egepeta ba etšwa gohle lefaseng go tlo reka mabele go Josefa, ka gobane tlala e be e iphile maatla mo gongwe le mo gongwe.

₁E rile maseng a Sontaga, Maria Magadalena a tsogela lebitleng e sa le ka mahwibi a banna, gomme a fihla a bona leswika le tlošitšwe mojako. ₂A tloga a kitima a yo botša Simone Petrose le morutiwa yola yo mongwe yo Jesu a bego a mo rata kudu, a fihla a re go bona: “Ba ntšhitše setopo sela sa Morena ka lebitleng, gomme ga re tsebe mo ba se beilego gona!”

₃Ke mo Petrose le morutiwa yola yo mongwe ba tlogilego ba ya lebitleng. ₄Ba be ba kitima mmogo, fela morutiwa yola yo mongwe a šia Petrose a mo fihlela pele lebitleng. ₅A inama, a bona mašela ale a bego a phuthetše setopo a le ka moo, fela a se ke a tsena ka gare. ₆Simone Petrose o be a mo šetše morago, gomme yena a fihla a tsena ka lebitleng. A bona mašela ale ka moo, ₇le lela le bego le tatile setopo hlogo. Lona le be le se na ale a mangwe; le be le phuthilwe le nnoši. ₈Morutiwa yola yo mongwe wa go fihla pele lebitleng le yena a tsena, a bona, a dumela. ₉Gape ba be ba sešo ba kwešiša Mangwalo a Makgethwa ge a re o swanetše go tsoga bahung.

₁₀Ke moka barutiwa bale ba boela gae.

₁₁Maria o be a eme ka ntle ga lebitla a lla. Ya re a sa lla bjalo a inama a hlodimela ka lebitleng, ₁₂gomme a bona barongwa ba babedi ba go apara diaparo tše ditšhweu ba dutše mola go bego go beilwe setopo sa Jesu, yo mongwe a le ka dihlogong, yo mongwe a le ka maotong. ₁₃Ba mmotšiša ba re: “Mosadi, o llelang?”

Yena a re: “Ba tšere setopo sa Morena wa ka, gomme ga ke tsebe mo ba se beilego gona.”

₁₄Ge a seno realo a retologa, gomme a bona Jesu a eme moo, fela a se tsebe gore ke yena. ₁₅Jesu a mmotšiša a re: “Mosadi, o reng o lla? O nyaka mang?”

Maria, ka go gopola gore yoo ke moletaserapa, a re go yena: “Morena, ge eba ke wena o tšerego mohu, mpotše mo o mmeilego gona, gomme ke tla mo lata.”

₁₆Jesu a mmitša a re: “Maria!”

Yena a retologela go yena, a re ka Seheberu: “Rabuni!” (Ke go re “Moruti”.)

₁₇Jesu a re go yena: “O se ke wa ntshwara, ka gobane ga sešo ka rotogela go Tate. Wena eya go banabešo o yo ba botša gore ke rotogela go yo e lego Tate le Tatagobona, go yo e lego Modimo wa ka le Modimo wa bona.”

₁₈Ke ge Maria a eya a fihla a botša barutiwa gore o bone Morena, gomme a ba anegela tše Morena a mmoditšego tšona.

₁₉Mantšiboeng a sona Sontaga seo barutiwa ba be ba kopane, ba itswaleletše ka ntlong ka lebaka la go boifa baetapele ba Bajuda. Jesu a tla a ema mo gare ga bona, a ba dumediša a re: “Khutšo a e be le lena!” ₂₀Ge a seno realo a ba bontšha diatla tša gagwe le lehlakore. Bona ba thaba kudu ge ba bona Morena. ₂₁Jesu a boeletša a re: “Khutšo a e be le lena! Bjalo ka ge Tate a nthomile, le nna ke a le roma.” ₂₂Ya ba o a ba budulela o re: “Amogelang Moya wo Mokgethwa. ₂₃Ge le swaretše batho dibe ba swaretšwe; ge le ganne go ba swarela ga se ba swarelwa.”

₂₄Thomase, yo mongwe wa barutiwa bale ba lesome le ba babedi, yo a bitšwago Lefahla, o be a se gona ge Jesu a itšweletša go bona. ₂₅Ka gona barutiwa bale ba bangwe ba mmotša ba re: “Re bone Morena!”

Yena a re go bona: “Nna ge ke se ka bona dintho tša dibapola diatleng tša gagwe, ka kgoma dintho tšela ka monwana, ka phophola le lehlakore la gagwe ka seatla, nka se tsoge ke dumetše.”

₂₆Ka Sontaga se se latelago barutiwa ba be ba le ka ntlong gape, gomme Thomase a na le bona. Mabati a be a tswaletšwe, fela Jesu a tla a ema mo gare ga bona, a ba dumediša a re: “Khutšo a e be le lena!” ₂₇Ke moka a re go Thomase: “Mphophole ka monwana mo, o lebelele le diatla tša ka, o otlolle letsogo o mphophole mo lehlakoreng, gomme o lese go belaela, o dumele.”

₂₈Thomase ge a mo fetola a re: “Morena wa ka le Modimo wa ka!”

₂₉Jesu a re: “Na bjale o a dumela ka ge o mpone? Go lehlogonolo ba ba dumelago ba se ba mpona.”

₃₀Jesu o ile a dira mehlolo ye mengwe ye mentši a na le barutiwa ba gagwe, fela yona ga se ya ngwalwa ka pukung ye. ₃₁Ye e ngwaletšwe gore le dumele gore Jesu ke yena Mesia, Morwa wa Modimo, le gore ka go dumela le tle le be le bophelo bjo bo sa felego ka yena.

₁Ka morago ga moo Jesu a itšweletša gape go barutiwa ba gagwe kua letsheng la Tiberiase. A itšweletša ka mokgwa wo: ₂Simone Petrose le Thomase, yo a bego a bitšwa Lefahla, le Nathaniele wa go tšwa Kana kua Galilea, le barwa ba Sebediose, le barutiwa ba bangwe ba babedi ba Jesu ba be ba le mmogo. ₃Simone Petrose a re go bale ba bangwe: “Nna ke sa yo thea dihlapi.”

Bona ba re: “Le rena re ya le wena.” Ba nama ba tloga ba namela leselawatle, fela bošego bjoo ka moka ba se sware selo. ₄E rile ge go šetše go sele Jesu a ema lebopong, eupša barutiwa ba gagwe ba sa tsebe gore ke yena. ₅Ke moka a ba botšiša a re: “Banna, afa le tantše sa go šeba?”

Bona ba mo fetola ba re: “Aowa, ga se ra tanya.”

₆Jesu a re go bona: “Lahlelang lelokwa la lena ka lehlakoreng la go ja la leselawatle, gomme le tla tanya.” Ke moka ba lahlela lelokwa, gomme ba šitwa le ke go le gogela ka leselawatleng ka lebaka la bontši bja dihlapi.

₇Morutiwa yola Jesu a bego a mo rata kudu a re go Petrose: “A! Ke Morena!” Petrose ge a ekwa gore ke Morena, a itata ka kobo, ka gore o be a e apotše, a itahlela ka meetseng. ₈Barutiwa bale ba bangwe ba tla ka leselawatle, ba ntše ba goga lelokwa lela la dihlapi. Ba be ba se kgole le lebopo, ba ka ba dimetara tše lekgolo. ₉E rile ge ba fologela lebopong, ba bona mollo woo go wona go bego go bešitšwe hlapi, ba bona le senkgwa. ₁₀Ke ge Jesu a re go bona: “Tlišang dihlapi tše dingwenyana tše le sa tšogo di tanya.”

₁₁Simone Petrose a namela leselawatle, a gogela lelokwa lebopong le tletše dihlapi tše dikgolo, e le tše lekgolo le masome a mahlano le tše tharo, gomme le ge e le tše dintši bjalo, lelokwa la se gagoge. ₁₂Jesu a re go bona: “Etlang le jeng!” Gwa se be le o tee mo go bona wa go beta pelo a mmotšiša a re: “Ke wena mang?” gobane ba be ba tseba gore ke Morena. ₁₃Ke moka Jesu a batamela, a tšea senkgwa sela a ba fa sona; a ba fa le hlapi yela.

₁₄Ke ge bjale e šetše e le la boraro Jesu a itšweletša go barutiwa ba gagwe ka morago ga ge a tsogile bahung.

₁₅Ge ba feditše go ja, Jesu a re go Simone Petrose: “Simone, morwa wa Johanese, na o nthata go feta ba?”

Yena a mo fetola a re: “Ee, Morena, o a tseba gore ke a go rata.”

Jesu a re go yena: “Fudiša dikwanyana tša ka.”

₁₆A mmotšiša la bobedi a re: “Simone, morwa wa Johanese, na o a nthata?”

Yena a mo fetola a re: “Ee, Morena, o a tseba gore ke a go rata.”

Jesu a re go yena: “Diša dinku tša ka.”

₁₇A mmotšiša la boraro a re: “Simone, morwa wa Johanese, na o a nthata?”

Petrose a nyama ge Jesu a mmotšiša la boraro a re: “Na o a nthata?” Ka gona a mo fetola a re: “Ke wena o tsebago tšohle; o a tseba gore ke a go rata.”

Jesu a re go yena: “Fudiša dinku tša ka. ₁₈Ruri, ruri, ke go botša gore mola o sa le yo mofsa o be o ipofa letheka ka bowena, o ye mo o ratago gona; eupša ge o tšofetše o tla otlolla matsogo wa bofša ke yo mongwe a go iša mo o sa ratego go ya gona.” ₁₉Etse ge a realo o be a mo swantšhetša lehu le yena Petrose a tlago le hwa a tumiša Modimo. Ke moka Jesu a re go yena: “Ntatele!”

₂₀Petrose ge a retologa a bona morutiwa yola wa go ratwa ke Jesu kudu a ba šetše morago, yena yola wa go ka a sekamela go Jesu a mmotšiša ba le dijong a re: “Morena, ke mang yo a tlago go eka?” ₂₁E rile ge Petrose a mmona, a botšiša Jesu a re: “Morena, yo yena o reng ka yena?”

₂₂Jesu a mo fetola a re: “Na ge eba ke nyaka gore a phele go fihlela ke boa, o tshwenywa ke eng? Wena ntatele!”

₂₃Mo go balatedi ba Jesu gwa napa gwa tuma gore morutiwa yoo a ka se hwe, mokagona Jesu yena a se a re morutiwa yoo a ka se hwe, a dio re: “Ge eba ke nyaka gore a phele go fihlela ke boa, wena o tshwenywa ke eng?”

₂₄Ke yena a hlatselago taba tše, le gona ke yena a di ngwadilego, gomme rena re a tseba gore bohlatse bja gagwe ke bja nnete.

₂₅Go sa na le dilo tše dingwe tše dintši tše Jesu a di dirilego. Ge di ka be di ngwadilwe ka moka ga tšona, ga ke kgolwe gore lefase ka bolona le be le ka kgona go phutha dipuku tše di ka bego di ngwadilwe.