To The Word – Day 101

₁Re le ngwalela mabapi le yo a bilego gona go tloga mathomong. Re mo kwele ra ba ra mmona ka a rena mahlo; re mmogetše ra ba ra mo kgwatha ka diatla, yena Lentšu yo e lego Bophelo. ₂E rile ge re bontšhwa yo Bophelo ra mmona; ka gona re le begela yena, re le tsebiša yena Bophelo bjo bo sa felego, yo a bilego le Tate mme ra mmontšhwa. ₃Se re se bonego gape re se kwelego, le lena re le begela sona gore le tle le be ba tee le rena. Le rena re ba tee le Tate le Jesu Kriste, Morwagwe. ₄Re le ngwalela ditaba tšeo gore lethabo la rena e tle e be le le feletšego.

₅Molaetša wo re o boditšwego ke yena Morwagwe mme re le begelago wona šo: Modimo ke seetša, gomme mo go yena ga go na leswiswi le gatee. ₆Bjale ge re re re ba tee le yena etšwe re dutše leswiswing, re a aketša, ga re phethe thato ya Modimo. ₇Eupša ge re phela seetšeng bjalo ka yena ge a le seetšeng, gona re ba tee seng sa rena, gomme madi a Jesu, Morwagwe, a re hlatswa dibe tšohle.

₈Ge re re ga re na sebe, re a iphora, re hloka nnete ka dipelong tša rena. ₉Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle. ₁₀Ge re re ga se ra dira sebe, re ra gore Modimo o na le maaka, le gore tše a re boditšego tšona ga se tša re tsena ka dipelong.

₁Bana ba ka, ke le ngwalela ditaba tše gore le se dire dibe; eupša ge motho a ka tšhoga a dirile sebe, re na le Mmoleledi wa go re bolelela go Tatagorena, e lego yena Jesu Kriste, Moloki. ₂Ke yena seloba sa dibe tša rena, e sego tša rena fela, eupša le tša batho ka moka.

₃Gomme se re nago le nnete ya sona gore re tseba Modimo, ke ge re phetha ditaelo tša gagwe. ₄Yo a rego: “Ke a mo tseba,” etšwe a sa phethe ditaelo tša gagwe, o na le maaka, o hloka nnete ka pelong ya gagwe. ₅Eupša yo a theeletšago molaetša wa gagwe, ke yena yo go rata Modimo ga gagwe e lego mo go feletšego. Se re nago le nnete ya sona gore re phela re le ba tee le Modimo ke gore ₆yo a rego o dula e le o tee le Modimo, a phele ka mokgwa wo Jesu Kriste a bego a phela ka wona.

₇Barategi, molao wo ke le ngwalelago wona wo ga se wo mofsa; ke molao wa kgale, wo le bilego le wona go tloga mathomong. Molao woo wa kgale ke molaetša wo le šetšego le o kwele. ₈Fela ke le ngwalela wona e le wo mofsa, ka gobane nnete ya wona e bonagala go Kriste le go lena. Gobane leswiswi le a feta, gomme seetša sa mmakgonthe se šetše se taga.

₉Yo a rego o mo seetšeng etšwe a hloile ngwanabo, o sa le leswiswing le gonabjale. ₁₀Yo a ratago ngwanabo ke yena yo a phelago seetšeng, ka gona go yena ga go na se se kago mo diriša sebe. ₁₁Eupša yo a hloilego ngwanabo o mo leswiswing; o sepela go lona gomme ga a tsebe mo a yago gona, ka ge leswiswi le mo foufaditše.

₁₅Le se ke la rata lefase goba dilo tša lona. Ge motho a rata lefase ga a rate Tatagorena. ₁₆Tšohle tše e lego tša lefase – tše nama e di dumago, le tše mpe tše mahlo a di dumago, le thoto ye motho a ikgantšhago ka yona – tšohle tšeo ga se tše di tšwago go Tatagorena, ke tše di tšwago go lefase. ₁₇Lefase le tša lona tše di dungwago ke batho di a feta, eupša yo a phethago thato ya Modimo yena o phelela ruri.

₁₈Bana ba ka, ke nako ya bofelo. Bjalo ka ge le kwele gore molwalekriste o etla, gonabjale go tsogile balwalekriste ba bantši, gomme ke sona se re bonago ka sona gore ke nako ya bofelo. ₁₉Ke batho ba ba tšwilego mo go rena; fela gabotse e be e se ba rena, gobane ge e ka be e be e le ba rena ba ka be ba sa dutše ba na le rena. Fela ba intšhitše, gore go tle go bonale gore bohle ga se ba rena.

₂₀Eupša lena le na le Moya wo le o tšhetšwego ke Mokgethwa, gomme bohle le batsebi. ₂₁Ka gona, ga se ka le ngwalela ka gobane le sa tsebe therešo; ke le ngwaletše ka ge le e tseba. Le tseba le gore ga go maaka ao a kago tšwa therešong.

₂₂Bjale ke mang yo a nago le maaka? Ke yo a rego Jesu ga se yena Mesia. Yo mobjalo ke yena molwalekriste, o gana Tatagorena le Morwagwe. ₂₃Gobane yo a ganago Morwa wa Modimo, o gana le Tatagorena; yo a dumelago Morwa wa Modimo, o dumela le Tatagorena.

₂₄Ka gona, molaetša wo le o kwelego go tloga mathomong le o boloke. Ge le ka o boloka, gona le tla dula le le ba tee le Morwa wa Modimo le Tatagwe. ₂₅Gomme se Kriste ka boyena a re holofeditšego sona sese: ke bophelo bjo bo sa felego.

₂₆Ge ke le ngwalela ditaba tše ke ka lebaka la bao ba lekago go le timetša. ₂₇Fela lena Kriste o le tšhetše Moya wo o tlago dula ka dipelong tša lena; ka gona ga go sa nyakega gore le rutwe ke motho selo. Gobane Moya woo wa gagwe o le ruta tšohle, gomme tše o le rutago tšona ke therešo, ga se maaka. Le dule le le ba tee le Kriste go ya ka mo le rutilwego ke Moya.

₂₈Bjale ge, bana ba ka, dulang le le ba tee le Kriste, gore ge a etla re tie maatla, re se tlo lewa ke dihlong pele ga gagwe ka Letšatši le a tlago tla ka lona. ₂₉Le a tseba gore Kriste ke moloki; ka gona, le tsebe gore mang le mang yo a dirago tše di lokilego ke ngwana wa Modimo.

₁Bonang gore ke lerato le lekaakang le Modimo Tate a re ratilego ka lona mo re bilego re bitšwa bana ba gagwe, gomme ka kgonthe re bona. Ke ka lebaka leo lefase le sa re tsebego, gobane ga se la ka la tseba Modimo. ₂Barategi, bjale re bana ba Modimo, eupša se re sa tlago go ba sona ga sešo ra se tseba. Se re se tsebago ke gore mohla Kriste a tšwelela re tla swana le yena Modimo, ka ge re tla be re mmona ka mo a lego ka gona. ₃Mang le mang yo a mo holofelago ka mokgwa wo o dula a itlhwekišitše, bjalo ka ge Kriste le yena a hlwekile.

₄Mang le mang yo a phelago a dira sebe o tshela molao, ka gobane sebe ke go tshela molao. ₅Le a tseba gore Kriste o be a tletše go tloša dibe, gomme yena mong ga a na sebe. ₆Ka gona, mang le mang yo a dulago e le o tee le Kriste ga a phele dibeng; fela yo a phelago dibeng go ra gore ga se a ka a mmona, le go mo tseba ga se a ka a mo tseba.

₇Bana ba ka, le se timetšwe ke motho. Yo a dirago tše di lokilego ke moloki, go no swana le Kriste ge e le moloki. ₈Yo a phelago dibeng ke wa Diabolose, ka gobane Diabolose e sa le a tloga a dira dibe go tloga mathomong a lefase. Se Morwa wa Modimo a bego a se tletše ke go fediša tše di bego di dirilwe ke Diabolose.

₉Mang le mang yo e lego ngwana wa Modimo ga a phele a dira sebe, gobane o na le bophelo bja Modimo; le gona, ka ge e le ngwana wa Modimo, a ka se kgone go phela a dira sebe. ₁₀Se bana ba Modimo le bana ba Diabolose ba bonalago ka sona sese: motho yo a sa dirego tše di lokilego goba a sa ratego mongwekayena, ga se ngwana wa Modimo.

₁₁Molaetša wo le o boditšwego go tloga mathomong ke wa go re re rataneng. ₁₂Re se ke ra ba bjalo ka Kaine; yena e be e le wa Rabobe gomme a bolaya ngwanabo. Kaine o be a mmolaelang? O mmolaile ka ge ya gagwe mediro e be e le ye mebe, mola ya ngwanabo e le ye e lokilego.

₁₃Bjale ge, banabešo, le se makale ge batho ba lefase ba le hloile. ₁₄Rena re a tseba gore re tšwile lehung ra tsena bophelong, ka gobane re rata bana ba borena. Yo a sa ratego ngwanabo o sa le diatleng tša lehu. ₁₅Yo a hloilego ngwanabo ke mmolai, gomme le a tseba gore mmolai ga a na bophelo bjo bo sa felego. ₁₆Se re tsebago lerato e le sona ke ge Kriste a gafile bophelo bja gagwe ka lebaka la rena. Ka gona, le rena re swanetše go gafa bja rena bophelo ka lebaka la bana ba borena. ₁₇Ge mohumi a ka re a bona ngwanabo a hloka a se mo šetše, na a ka re o rata Modimo? ₁₈Bana ba ka, lerato la rena a e se be la molomo, a e be la mmannete, le le ipontšhago ka mediro.

₁₉Ka gona, ke ka lona lerato mo re kago tseba gore re ba therešo; ke ka lona mo re kago tia maatla mo pele ga Modimo, ₂₀re sa ye le gore na letswalo la rena le a re ja goba ga le re je, gobane Modimo o feta letswalo la rena, le gona o tseba dilo tšohle. ₂₁Barategi, ge re sa lewe ke letswalo, re tia maatla mo pele ga Modimo. ₂₂Se re kago se kgopela o tla re fa sona, ka ge re phetha ditaelo tša gagwe re bile re dira tše di mo kgahlago. ₂₃Taelo ya gagwe ke gore re dumele go Jesu Kriste, Morwagwe, le gona re rataneng go ya ka mo Kriste a re laetšego ka gona. ₂₄Yo a phethago ditaelo tša gagwe o dula e le o tee le Modimo, le Modimo o dula e le o tee le yena. Gomme ka Moya wo Modimo a re filego wona, re tseba ge Modimo a dula e le o tee le rena.

₁Barategi, le se ke la dumela mang le mang yo a rego o tsenwe ke Moya; le hlahlobe gore na moya woo ke wa Modimo. Gobane lefase le le tletše baprofeta ba maaka. ₂Moya wa Modimo le tla o tseba ka se: mang le mang yo a hlatselago gore Jesu Kriste o tlile e le motho, o tsenwe ke Moya wa Modimo. ₃Eupša mang le mang yo a ganetšago taba ye mabapi le Jesu, ga se a tsenwa ke Moya wa Modimo. Moya wo o mo tsenego o tšwa go molwalekriste yo le kwelego gore o etla, gomme le bjale o šetše a le mo lefaseng.

₄Fela lena, bana ba ka, ke lena ba Modimo, gomme baprofeta bao ba maaka le ba fentše, gobane yo a le tsenego o feta yo a tsenego ba lefase. ₅Baprofeta bao ba maaka ke ba lefase; ka lebaka leo ba bolela tša lefase, gomme ba lefase ba a ba theeletša. ₆Fela rena re ba Modimo. Yo a tsebago Modimo o a re theeletša; yo e sego wa Modimo ga a re theeletše. Ke sona se re bonago ka sona ka mo Moya wa therešo le moya wa maaka e fapanago ka gona.

₇Barategi, a re rataneng, gobane lerato le tšwa go Modimo. Yo a nago le lerato ke ngwana wa Modimo gomme o tseba Modimo. ₈Yo a se nago le lerato ga a tsebe Modimo, gobane Modimo ke lerato. ₉Gomme Modimo o re bontšhitše gore o a re rata ka go roma Morwa a le noši wa gagwe mo lefaseng, gore re tle re phele ka yena. ₁₀Se e lego lerato sese: ga se gore ke rena re ratilego Modimo, eupša ke gore ke yena a re ratilego gomme a roma Morwagwe lefaseng gore e tle e be seloba sa dibe tša rena.

₁₁Barategi, ge Modimo a re ratile ka mokgwa wo, gona le rena re swanetše go ratana. ₁₂Ga go motho yo a kilego a bona Modimo, eupša ge re ratana ke gore Modimo o dula e le o tee le rena, gomme go re rata ga gagwe e be mo go feletšego.

₁₃Se re tsebago ka sona gore re dula re le ba tee le Modimo, le gore le yena o dula e le o tee le rena, ke ge a re file Moya wa gagwe. ₁₄Le gona re iponetše gore Tatagorena o romile Morwagwe gore e tle e be Mophološi wa lefase, gomme taba ye re e begela ba bangwe. ₁₅Motho yo a begago gore Jesu ke Morwa wa Modimo o dula e le o tee le yena, le yena o dula e le o tee le Modimo. ₁₆Le rena beng lerato le Modimo a re ratago ka lona re a le tseba ebile re a le dumela.

Modimo ke lerato, gomme yo a phelago ka lerato o dula e le o tee le Modimo, le Modimo o dula e le o tee le yena. ₁₇Go re rata ga gagwe e ba mo go feletšego, gore ka Letšatši la Kahlolo re tle re se boife selo, ka gobane bophelo bja rena mo lefaseng le bo swana le bja Kriste. ₁₈Lerato ga le na poifo; lerato le le feletšego le raka poifo. Ka gona, yo a boifago ga a na lerato le le feletšego, ka gore o tseba ge a tlilo otlwa.

₁₉Re rata Modimo ka gobane ke yena a re ratilego pele. ₂₀Ge motho a ka re o rata Modimo etšwe a hloile ngwanabo, o bolela maaka, gobane a ka se re a sa rate ngwanabo yo a mmonago, a kgona go rata Modimo yo a sa mmonego. ₂₁Molao wo Kriste a re filego wona šo: Yo a ratago Modimo a rate le ngwanabo.

₁Mang le mang yo a dumelago gore Jesu ke yena Mesia ke ngwana wa Modimo; le yo a ratago TatagoJesu o rata le bana ba Modimo. ₂Se re tsebago gore re rata bana ba Modimo ka sona ke ge re rata yena Modimo re bile re phetha ditaelo tša gagwe. ₃Gobane go rata Modimo ke go phetha ditaelo tša gagwe, gomme ditaelo tša gagwe ga di boima, ₄gobane ngwana yo mongwe le yo mongwe wa Modimo o fenya lefase. Gomme se re fenyago lefase ka sona ke tumelo ya rena. ₅Ke mang yo a fenyago lefase? Ke fela yo a dumelago gore Jesu ke Morwa wa Modimo.

₆Jesu Kriste ke yena wa go tla ka meetse le ka madi, e sego ka meetse fela, eupša ka meetse le ka madi. Moya ka boyena o hlatsela taba ye, ka ge yena Moya e le therešo. ₇Dihlatse ke tše tharo: ₈ke Moya, le meetse, le madi; gomme ka ditharo ga tšona di hlatsela go swana. ₉Etse bohlatse bja batho re a bo dumela, gomme bohlatse bja Modimo bjona bo tiile le go feta, ka ge e le bja Modimo, gomme yena Modimo o fa bohlatse bjo ka Morwagwe. ₁₀Yo a dumelago go Morwa wa Modimo o na le bohlatse bjo ka pelong ya gagwe; eupša yo a sa dumelego Modimo o ra gore Modimo o na le maaka, ka ge a sa dumele tše Modimo a di hlatsetšego mabapi le Morwagwe. ₁₁Bohlatse bja gona šebo: Modimo o re file bophelo bjo bo sa felego, gomme bophelo bjo re bo hwetša ka Morwagwe. ₁₂Yo a nago le Morwa wa Modimo o na le bophelo bjo; yo a se nago le yena ga a na le bjona.

₁₃Lena le dumelago go Morwa wa Modimo ke le ngwaletše ditaba tše gore le tsebe gore le na le bophelo bjo bo sa felego. ₁₄Re ka ya go Modimo re sa šie, ka ge re tseba gore ge re mo kgopela go ya ka thato ya gagwe o a re kwa. ₁₅Ka ge re tseba gore ka mehla ge re mo kgopela selo o a re kwa, re tseba gore se re mo kgopelago sona o a re fa.

₁₆Ge motho a ka bona modumedikayena a dira sebe se se sa išego lehung, a mo rapelele, gomme Modimo o tla mo phediša. Ke bolela ka ba go dira dibe tše di sa išego lehung. Gobane go na le sebe se se išago lehung, gomme modumedi yo a dirago se sebjalo ga se yo ke rego a rapelelwe. ₁₇Tšohle tša go se loke ke dibe, fela ga se dibe tšohle tše di išago lehung.

₁₈Re a tseba gore ga go ngwana wa Modimo yo a ka nogo tšwela pele le go dira dibe, gobane Morwa wa Modimo o a mo lota, gomme Rabobe a ka se mo dire selo.

₁₉Re tseba gore ke rena ba Modimo, le gore bohle ba ba sa theeletšego Modimo ba laolwa ke Rabobe.

₂₀Re a tseba gore Morwa wa Modimo o tlile mme o re file tlhaologanyo, gomme bjale re tseba Modimo wa nnete. Re phela re le ba tee le Modimo wa nnete – re le ba tee le Morwagwe, Jesu Kriste. Ke yena Modimo wa nnete, ke yena bophelo bjo bo sa felego.

₂₁Ka gona, bana ba ka, le se ke la ikopanya le medimo ya maaka.