To The Word – Day 100

₁Ngwageng wa lesome le metšo ye mene wa pušo ya Kgoši Hiskia wa Juda, Sanheribe, kgoši ya Asiria, o ile a hlasela metse ya Juda ye e ageleditšwego ka merako, gomme a e thopa. ₂A romela madira a mantši a tloga Lakishe go yo hlasela Hiskia kua Jerusalema; a be a laolwa ke molaodi wa madira a gagwe yo mogolo. Molaodi yoo a dula tseleng ye e bapetšego le tšhemo ya mohlatswi wa mašela, kgauswi le mokero wo o tlišago meetse a a tšwago letshaneng la ka godimo. ₃Bahlankedi ba bararo ba Hiskia ba tšwa go yo mo gahlanetša. Bona e be e le Eliakime, mohlokomedi wa mošate, morwa wa Hilkia, Shebna, mongwaledi wa mošate, le Joage, mongwaledi wa mmušo, morwa wa Asafo. ₄Molaodi yola wa Baasiria a re go bona: “Kgošikgolo, kgoši ya Asiria, o nyaka go tseba gore ke eng se se dirago gore Hiskia a itshephe ka mokgwa wo. ₅Na Hiskia o gopola gore a ka boledišana le rena mola a swanetše go loga maano a ntwa le go rapa madira a gagwe. A o be a gopola gore o tla thušwa ke mang ge a be a tsogela Asiria maatla? ₆O tshephile Egepeta gore e tla mo thuša, eupša go bota Egepeta go bjalo ka ge motho a ka tšea lehlaka a hlotlela ka lona – le tla robega la mo hlaba seatla. Kgoši ya Egepeta e ka mokgwa woo ge motho a e tshephile.”

₇Molaodi yoo wa Moasiria a tšwela pele a re: “Kgane le nyaka go mpotša gore le tshephile Morena Modimo wa lena? Na ga se tšona dintotoma tše a khunamelwago go tšona le dialetare tša gagwe tše yena Hiskia a di kgerešitšego ge a botša batho ba Juda le ba Jerusalema gore ba direle fela aletareng ye e lego Jerusalema? ₈Ke nyaka gore a phegišane le mong wa ka, kgoši ya Asiria, ka tsela ye: Ke tla mo fa dipere tše dikete tše pedi ge eba o na le banna ba bakaaka ba ba tlago di namela! ₉A bjale a ka kgona bjang go fenya molaodi yo monyenyane ka maemo wa Moasiria? Gomme le ge go le bjalo o sa botile Egepeta gore e mo romele dikoloi tša ntwa le banamedi ba dipere. ₁₀Kgane le gopola gore ke hlasetše motse wo go tlo o senya e se thato ya Morena? Ke Morena ka boyena yo a mpoditšego gore ke hlasele naga ye ke e senye.”

₁₁Eliakime, Shebna, le Joage ba re go molaodi yoo: “Hle, mong wa rena, bolela le rena ka Searamo. Re a se tseba. O se ke wa bolela ka Seheberu. Batho ba ba lego godimo ga morako ba a go kwa.”

₁₂Molaodi yoo a ba fetola a re: “Na le gopola gore mong wa ka o nthomile go tlo botša lena le mong wa lena fela dilo tše ka moka? Aowaowaa, ke botša le batho bale ba dutšego godimo ga morako, bao ba tlago ba ba ja mantle a bona, ba ba ba nwa mehlapologo ya bona, go swana le lena.”

₁₃Ke moo molaodi a emeletšego gomme a goeletša ka Seheberu a re: “Theeletšang se kgošikgolo, kgoši ya Asiria, a le botšago sona! ₁₄O le botša gore le se ke la lesa Hiskia a le lahletša. Hiskia a ka se le phološe. ₁₅Le gona le se ke la mo lesa a le goketša gore le tshephe Morena ge a re: ‘Ruri, Morena o tla re phološa, le gona motse wo o ka se gafelwe diatleng tša kgoši ya Asiria.’ ₁₆Le se ke la theeletša Hiskia. Kgoši ya Asiria e le laela gore le tšwe motseng le ineele. Ka moka ga lena le tla dumelelwa go ja diterebe tše di tšwago merareng ya lena le mago a mego ya lena, le go nwa meetse a didiba tša lena – ₁₇go fihlela ge kgoši a le hudušetša nageng ye e swanago le ya lena kudu, moo go nago le dirapa tša merara gore le be le beine, le mabele gore le be le bogobe. ₁₈Le se ke la lesa Hiskia a le fora a re: ‘Morena o tla re hlakodiša.’ Kgane medimo ya dinaga tše dingwe yona e kile ya phološa dinaga tša yona go kgoši ya Asiria? ₁₉A e kae bjale medimo ya Hamate le ya Arpade? E kae medimo ya Sefarabaime? Na go na le medimo ye e kilego ya phološa Samaria? ₂₀Ke ofe modimo wo o kilego wa phološa naga ya wona go kgoši ya rena? Bjale go ka kgonega bjang gore Morena a phološe Jerusalema?”

₂₁Batho ba no ikhomolela bjalo ka ge Kgoši Hiskia a be a ba boditše; ba se ke ba fetola. ₂₂Ke moo Eliakime le Shebna le Joage ba gagotšego diaparo tša bona ba nyamile, gomme ba ya ba begela kgoši tše molaodi yola wa Moasiria a di boletšego.

₁Ge Kgoši Hiskia a ekwa ditaba tšeo, a gagola diaparo tša gagwe ka manyami, a apara diaparo tša go ilela, gomme a ya Tempeleng ya Morena. ₂A roma Eliakime, mohlokomedi wa mošate, le Shebna, mongwaledi wa mošate, le baprista ba bagolo go moprofeta Jesaya, morwa wa Amotse. Le bona ba be ba apere diaparo tša go ilela. ₃A ba laela gore ba botše Jesaya ba re: “Lehono ke letšatši la tlalelo; re a otlwa gomme re a gobošwa. Re swana le mosadi yo a batametšego go belega, eupša a fedile maatla. ₄Kgoši ya Asiria e rometše molaodi wa madira a yona yo mogolo go tlo roga Modimo yo a phelago. Nke Morena Modimo wa gago a kwe mahlapa a gomme a otle bao ba a boletšego. Ka gona re rapelele go Modimo, rena mašaledi a batho ba Juda.”

₅Ge Jesaya a se no kwa se Kgoši Hiskia a se boletšego, ₆a mo fetola a re Morena o re: “O se ke wa tšhošwa ke mantšu ao Baasiria ba nkgobošitšego ka ona. ₇Ke tla dira gore kgoši ya Asiria e kwe pego ye e tlago e tlaletša mme e boele nageng ya gaboyona, gomme ka dira gore a bolawe moo.”

₈Molaodi yola wa Moasiria a kwa gore kgoši ya gabo e tlogile Lakishe gomme e lwa le ba motse wa Libna; ka gona a ya moo go yo bolela le yena. ₉Kgoši ya Baasiria ya kwa gore madira a Baegepeta a tseleng go tlo ba hlasela, mme a etilwe pele ke Kgoši Tirihaka wa Etopia. Ka gona yena a roma batseta ka lengwalo go Kgoši Hiskia wa Juda, ₁₀a re go yena: “Modimo yo o mo tshephilego o go boditše gore Jerusalema e ka se gafelwe diatleng tša ka, fela o se ke wa forwa ke Modimo yoo wa gago. ₁₁O kwele ka bowena tše magoši a Asiria a di dirilego dinaga ka moka – a sentše gohle! Kgane o gopola gore wena o ka phologa? ₁₂Borakgolokhukhu ba ka ba ile ba fediša motse wa Gosane, wa Harane, le wa Retsefo, gomme ba bolaya le batho ba Edene ba ba bego ba dula Telasare, mme le o tee wa medimo ya bona wa se kgone go ba phološa. ₁₃E kae kgoši ya motse wa Hamate, le ya motse wa Arpade, le ya motse wa Sefarabaime, le ya motse wa Hena, le ya motse wa Aba?”

₁₄Kgoši Hiskia a tšea lengwalo leo go batseta a le bala. Ke moka a ya Tempeleng a le phutholla moo pele ga Morena, ₁₅gomme a rapela a re: ₁₆“Wena Morena Ramaatlaohle, Modimo wa Israele, o dutšego setulong sa gago sa bogoši ka godimo ga bakerubi, ke wena o nnoši o lego Modimo, o bušago mebušo ka moka ya lefase. ₁₇Bjale Morena, lebelela tše di re hlagelago. Theeletša dilo ka moka tše Sanheribe a go rogago ka tšona, wena Modimo yo a phelago. ₁₈Ke therešo, Morena, gore magoši a Asiria a fedišitše ditšhaba tšohle le dinaga tša tšona, ₁₉a fiša medimo ya tšona; a kgona go e senya, ka ge e be e se medimo le gatee, eupša e le dilo tša kota le tša leswika tše di betlilwego ke batho. ₂₀Bjale, Morena Modimo wa rena, re phološe go Baasiria gore mebušo ka moka ya lefase e tle e tsebe gore ke wena o nnoši, Morena, o lego Modimo.”

₂₁Ke moo Jesaya a romilego motseta go Kgoši Hiskia, a mmotša gore Morena o kwele thapelo ya kgoši ₂₂gomme o re:

₃₀Ke moo Jesaya a rilego go Kgoši Hiskia: “Sešupo sa tše di tlago direga sese: Lenyaga le išago le tla ja mabele a a imelelago ka boona, eupša ka ngwaga wa boraro le tla kgona go ipšalela mabele, la ba la tla la a buna, la bjala merara, la ba la tla la ja dikenywa tša yona. ₃₁Mašaledi a Juda a tla boela a atlega boka dimela tše di tseneletšago medu fase tša enywa dikenywa. ₃₂Go tla ba le mašaledi Jerusalema le baphologi thabeng ya Sione, ka gobane Morena Ramaatlaohle o ikemišeditše go phethagatša seo.

₃₃“Tše Morena a di boletšego mabapi le kgoši ya Asiria šedi: ‘A ka se tsene motseng wo, goba a thuntšha le ka mosebe o tee. Ga go bahlabani ba ba tlago tla motseng ba swere dikotse, le gona ga go madira a a tlago kgobela ntotoma ya mobu gore a o hlasele. ₃₄Yena o tla boela morago ka yona tsela ye a tlilego ka yona, eupša mo motseng wo a ka se tsene. Ke realo, nna, Morena. ₃₅Ke tla phemela motse wo mme ka o phološa gore ke tle ke hlomphiwe, le gore ke tle ke phethe se ke se tshephišitšego mohlanka wa ka, Dafida.’ ”

₃₆Ke moka morongwa wa Morena a ya mešašeng ya Baasiria mme a bolaya bahlabani ba dikete tše lekgolo le tše masome a seswai le tše tlhano. Ka mahwibi a letšatši le le latelago ba be ba rapaletše moo, ka moka e le ditopo. ₃₇Ke moo Sanheribe, kgoši ya Asiria, a gomilego a boela Ninibe. ₃₈Ka letšatši le lengwe ge a sa rapela ka tempeleng ya Modimo wa gagwe, Nisroko, barwa ba gagwe, Adrameleke le Saretsere, ba mmolaya ka ditšhoša, gomme ba tšhabela nageng ya Ararate. Morwa wa gagwe yo mongwe, Esarhadone, a mo hlatlama bogošing.

₁Mehleng yeo Kgoši Hiskia a lwala mme a nyako hwa. Moprofeta Jesaya, morwa wa Amotse, a ya go yena a re: “Morena o re: ‘Beakanya tša lapa la gago, ka gobane o ka se fole; o tla hwa.’ ”

₂Hiskia a phekgoga a lebelela lebotong gomme a rapela a re: ₃“Hle, Morena, gopola gore ke go hlanketše ka potego le botshephegi, le gore ka mehla ke dirile tše o bego o nyaka ke di dira.” Gomme a thoma go lla gabohloko.

₄Ke moka Morena a laela Jesaya ₅gore a boele go Hiskia a yo mmotša a re: “Nna, Morena, Modimo wa rakgolokhukhu wa gago, Dafida, ke kwele thapelo ya gago mme ke bone meokgo ya gago; ke tla go lesa wa phela mengwaga ye mengwe ye lesome le ye mehlano. ₆Ke tla hlakodiša wena le motse wo wa Jerusalema go kgoši ya Asiria. Ke tla šireletša motse wo.”

₂₁ Jesaya a botša kgoši gore bahlokomedi ba gagwe ba tšee phaphathi ya makwapi a mago ba gatiše sekaku sa kgoši ka yona, gomme o tla fola. ₂₂Kgoši Hiskia a mmotšiša a re: “Sešupo sa gore ke tla ya Tempeleng ke eng?”

₇Jesaya a mo fetola a re: “Morena o tla go laetša sešupo sa gore yena o tla phetha se a se boletšego. ₈O tla dira gore moriti wo o lego mo manamelong a a agilwego ke Kgoši Ahase o boele morago ka dikgato tše lesome.” Gomme moriti wa boela morago dikgato tše lesome.

₉Ge Hiskia a fodile, o ile a ngwala kopelo ye ya go tumiša Morena:

₁Yona mehleng yeo kgoši ya Babilonia, Merodaka-Baladane, morwa wa Baladane, a kwa gore Kgoši Hiskia o be a lwala. Ka gona a mo ngwalela lengwalo, a mo romela le mpho ka batseta. ₂Hiskia a amogela batseta bao, gomme a ba bontšha polokelo ya mahumo a gagwe ye e bego e boloketše silibera le gauta, dikhanakhana le dinkgabose, le ngwako wa gagwe wa dibetša tša ntwa ka moka, le dilo tšohle ka mengwakong ya gagwe ya polokelo. Gwa se ke gwa ba le selo ka ngwakong wa kgoši le mmušong wa gagwe ka moka se a sa ba bontšhego sona. ₃Ke moo moprofeta Jesaya a ilego go Kgoši Hiskia a mmotšiša a re: “Banna bale ba tšwa kae, le gona ba go boditše eng?”

Hiskia a mo fetola a re: “Ba be ba tlile go nna ba etšwa nageng ya kgole, Babilonia.”

₄Jesaya a mmotšiša a re: “Ba boneng mo mošate?”

Hiskia a mo fetola a re: “Ba bone se sengwe le se sengwe. Ga go se ke sego ka ba bontšha sona ka mengwakong ya ka ya polokelo.”

₅Ke moo Jesaya a rilego go kgoši: “Morena Ramaatlaohle o re ₆nako e etla yeo ka yona se sengwe le se sengwe mo mošate, e lego tšohle tše borakgolokhukhu ba gago ba di bolokilego go fihlela lehono, di tlago thothelwa Babilonia. Go ka se šadišwe selo. ₇Mo go ditlogolo tša gago go tla thopša ba bangwe, gomme ya ba baamogwabonna ba go šoma mošate wa Babilonia.”

₈Kgoši Hiskia o ile a gopola gore se Jesaya a se bolelago se šupa gore go tla ba le khutšo le polokego nakong ya ge yena Hiskia a sa phela, ka gona a mo fetola a re: “Taba ye o mpoditšego yona e etšwa go Morena e lokile.”

₁Ge Jesu a theoga thabeng, lešaba le legolo le ile la mo latela. ₂Gwa nama gwa tla monna yo mongwe go yena a swerwe ke bolwetši bja letlalo bja go mo tšhilafatša, a khunama pele ga gagwe a re: “Morena, etse ge o rata o ka mphodiša ka hlweka!”

₃Jesu a otlolla letsogo a mo kgwatha a re: “Ke a rata; hlweka!” Gateetee monna yola a fola. ₄Ke moka Jesu a re go yena: “O se ke wa botša motho, eupša o ye go moprista a go bone, gomme o dire sehlabelo se se laetšwego ke Moshe, e be bohlatse go batho bja gore o hlwekile.”

₅Ge Jesu a tsena motseng wa Kapernaume, a gahlanetšwa ke molaodi wa bahlabani ba lekgolo gomme yena a mo kgopela gore a mo thuše a re: ₆“Morena, mohlanka wa ka o a babja, o robetše kua gae; o rephile ditho, le gona o lwala kudu.”

₇Jesu a re: “Ke tla ya ka mo fodiša.”

₈Molaodi a mo fetola a re: “Morena, ga se ka swanela gore o tsene ka lapeng la ka. Eno bolela lentšu le tee, gomme mohlanka wa ka o tla fola. ₉Le nna ke le motho yo a bušwago, ke na le bahlabani ba ke ba bušago. Ge ke re go mohlabani: ‘Eya kua!’ o a ya; ge ke re go yo mongwe: ‘Etla mo!’ o a tla, le ge ke re go yo mongwe mohlanka wa ka: ‘Dira se!’ o a se dira.”

₁₀Ge Jesu a ekwa mantšu ao a kgotsa, gomme a botša batho ba ba bego ba mo latela a re: “Ruri, ke a le botša, ga se ka ka ka hwetša motho yo a nago le tumelo ye kaaka mo go Baisraele. ₁₁Ke le botša gore ba bantši ba tla tšwa bohlabela le bodikela, ba tla ba ja le Abrahama le Isaka le Jakobo legodimong. ₁₂Eupša bao ba bego ba loketše go tsena legodimong ba tla ntšhetšwa ka ntle leswiswing le legolo, moo ba tlago lla ba lomanya meno.” ₁₃Ka morago Jesu a re go molaodi yola: “Boela gae; se o se dumetšego se tla direga.”

Gomme mohlanka wa molaodi yola a fola ka yona nako yeo.

₁₄Jesu a ya lapeng la Petrose, gomme a hwetša mmatswale wa Petrose a robetše a swerwe ke letadi. ₁₅Jesu a mo kgwatha letsogo, mme a fola letadi, a tsoga, a fa Jesu dijo.

₁₆Ge leswiswi le swara, gwa tlišwa batho ba bantši go yena ba ba tsenwego ke bademone. Jesu a leleka meoya yeo ka go bolela lentšu fela, a fodiša le bohle ba ba babjago, ₁₇gore go phethege se se boletšwego ke moprofeta Jesaya mola a re: “Yena o tšere malwetši a rena, a ithweša le mefokolo ya rena.”

₁₈Ge Jesu a bona lešaba le mmokanetše, a laela barutiwa ba gagwe gore ba tshelele ka mošola wa letsha. ₁₉Ramangwalo yo mongwe a tla go yena a re: “Moruti, nna ke tla go latela gohle mo o yago gona.”

₂₀Jesu a re go yena: “Diphukubje di na le ditšaba, le dinonyana di na le dihlaga; Morwamotho yena ga a na mo a fihlago hlogo gona.”

₂₁Yo mongwe yo le yena e bego e le morutiwa wa gagwe a re: “Morena, ntumelele ke yo boloka tate pele.”

₂₂Jesu a mo fetola a re: “Ntatele, o lese bahu ba boloke bahu ba bobona.”

₂₃Jesu a tsena ka leselawatleng gomme barutiwa ba gagwe ba mo latela. ₂₄Ka bjako gwa tsoga ledimo le legolo letsheng, gomme leselawatle la khupetšwa ke maphoto. Jesu yena o be a robetše. ₂₅Barutiwa ba ya go yena, ba mo tsoša ba re: “Morena, re phološe, re a hwa!”

₂₆Jesu a ba botšiša a re: “Le reng le tšhogile, lena ba tumelo ye nnyane?” Ke moka a tsoga, a kgalema phefo le maphoto, gwa napa gwa homola, gwa re tuu.

₂₇Batho ba kgotsa ba re: “Ke motho mang yo ge phefo le maphoto di mo theeletša?”

₂₈Ge Jesu a fihla nageng ya Gadara ka mošola wa letsha, banna ba babedi ba ba bego ba etšwa mabitleng ba gahlana le yena. Ba be ba tsenwe ke bademone, gomme ba le kotsi mo go bego go se motho yo a bego a ka beta pelo a feta ka tsela yeo. ₂₉Gateetee ba goa ba re: “O na le taba mang le rena, wena Morwa wa Modimo? A o tlilo re tlaiša pele ga nako?”

₃₀Mola kgojana go be go na le mohlape wo mogolo wa dikolobe o fula. ₃₁Bademone bao ba kgopela Jesu ba re: “Ge eba o tlilo re leleka bathong ba, gona re romele mohlapeng wola wa dikolobe.”

₃₂Jesu a ba fetola a re: “Sepelang!” Ka gona bademone bao ba tloga ba yo tsena dikolobe tšela. Mohlape woo ka moka wa thetheoga leribeng le legolo, wa wela ka letsheng, wa betwa ke meetse.

₃₃Banna ba ba bego ba dišitše dikolobe tšela ba tšhaba, ba tsena motseng, ba botša batho taba tšeo ka moka le se se hlagetšego banna bale ba bademone. ₃₄Ka gona batho bohle ba tšwa motseng go yo bona Jesu, gomme ge ba mo hweditše ba mo kgopela gore a tloge nageng ya bona.

₁Jesu a tsena ka leselawatleng, a tshela letsha, a gomela motseng wa gabo. ₂Ke moka batho ba bangwe ba tliša monna yo a rephilego ditho go yena, a robetše legogweng. Ge Jesu a bona ka moo ba dumelago go yena ka gona, a re go morephaditho: “Beta pelo, ngwanaka! O lebaletšwe dibe tša gago.”

₃Ke ge boramangwalo ba bangwe ba botšana ba re: “Motho yo o nyefola Modimo!”

₄Jesu a lemoga se ba se gopolago, mme a re: “Le reng le gopola dilo tše mpe ka dipelong tša lena? ₅Se bonolo ke eng, go re: ‘O lebaletšwe dibe,’ goba go re: ‘Emelela o sepele’? ₆Bjale ge, ke tla le laetša gore Morwamotho o na le maatla lefaseng a go lebalela batho dibe.” Ke ge a re go monna yoo wa go repha ditho: “Emelela, o tšee legogwa la gago, o ikele gae!”

₇Monna yola a emelela, a ya gae. ₈Ge lešaba le bona seo, la boifa gomme la tumiša Modimo ka ge a file batho maatla a makaaka.

₉Ge Jesu a tloga fao a bona monna yo mongwe yo leina la gagwe e bego e le Mateu a dutše ngwakong wa lekgetho. A re go yena: “Ntatele!”

Mateu a emelela a mo latela.

₁₀Ya re ge Jesu a le dijong ka ngwakong wa Mateu, balekgetho ba bantši le badiradibekabona ba tla ba ja le yena le barutiwa ba gagwe. ₁₁Bafarisei ge ba bona seo ba botšiša barutiwa ba Jesu ba re: “Moruti wa lena o reng a eja le balekgetho le badiradibekabona?”

₁₂Jesu a ba kwa, gomme a ba fetola a re: “Ngaka ga e nyakwe ke batho ba ba iketlilego, e nyakwa ke ba ba babjago. ₁₃Sepelang le yo botšiša gore na Mangwalo a Makgethwa a ra go reng a a rego: ‘Se ke se nyakago ke ge le ka ba le lešoko go na le gore le ntirele dihlabelo.’ Ga se ka tlela go bitša ba ba phethago thato ya Modimo, ke tletše go bitša badiradibe.”

₁₄Barutiwa ba Johanese Mokolobetši ba tla go Jesu, ba mmotšiša ba re: “Ke ka lebaka lang rena le Bafarisei re ikona dijo gantši, barutiwa ba gago bona le gatee ba sa ikone?”

₁₅Jesu a ba fetola a re: “Kgane baeng ba ba tlilego monyanyeng ba ka hlonama monyadi a sa na le bona? Eupša nako e tla tla yeo ka yona monyadi a tlago tlošwa go bona, ya ba gona ba ikonago dijo.

₁₆“Ga go motho yo a pharago segaswa se sefsa seaparong se setala, ka gobane se ka šošobana sa oketša lešoba lela mola seaparong. ₁₇Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane makuka ao a ka palega, beine ya tšhologa, le ona makuka a loba. Beine ye e sa tšogo hlotlwa e tšhelwa ka makukeng a mafsa, gomme yona le makuka bobedi tša lotega.”

₁₈Ya re ge Jesu a sa bolela, mookamedi yo mongwe wa sinagoge a tla go yena, a khunama pele ga gagwe a re: “Morwedi wa ka o sa tšo hlokafala, eupša etla o mmee diatla, gomme o tla buša a phela.”

₁₉Jesu a emelela a mo latela, le barutiwa ba gagwe ba ya le yena.

₂₀Gwa tla mosadi yo mongwe yo a bego a feditše mengwaga ye lesome le metšo ye mebedi a bolawa ke bolwetši bja ngope, gomme a kgwatha morumo wa seaparo sa gagwe. ₂₁O be a rile ka pelong: “Ge nka no kgwatha seaparo sa gagwe, ke tla fola.”

₂₂Jesu a retologa, a mmona a re: “Beta pelo, morwedi wa ka! Tumelo ya gago e go fodišitše.” Ka yona nako yeo mosadi yoo a fola.

₂₃Jesu ge a tsena ka ngwakong wa mookamedi yola, a bona baletši ba dinaka le lešaba le le tladitšego lešata la sello, ₂₄a re: “Etšwang! Ngwanenyana yo ga se a hwa – o ithobaletše.” Gomme bona ba mo sega. ₂₅Ge lešaba le seno ntšhetšwa ntle, Jesu a tsena ka phapošing ya ngwanenyana yola, a mo swara ka letsogo, mme ngwanenyana a emelela. ₂₆Taba tšeo tša phatlalala seleteng seo ka moka.

₂₇Ge Jesu a tloga fao a latelwa ke banna ba babedi ba difofu. Ba be ba goa ba re: “Re šokele, Morwa wa Dafida!”

₂₈Ge Jesu a tsene ka ngwakong, banna bale ba difofu ba tla go yena, gomme yena a ba botšiša a re: “Na le dumela gore nka le fodiša?”

Bona ba mo fetola ba re: “Ee, Morena!”

₂₉Ke moo Jesu a ba kgwathilego mahlo a re: “A go direge ka mo le dumelago ka gona!” ₃₀Gomme ba buduloga mahlo. Jesu a ba botša tsebegokwa a re: “Le se ke la botša motho taba ye!”

₃₁Eupša bona ge ba tloga moo ba phatlalatša taba yeo ya gagwe seleteng seo ka moka.

₃₂Ge ba tloga, batho ba bangwe ba mo tlišetša monna wa semumu yo a tsenwego ke modemone. ₃₃Ya re ge modemone yoo a seno lelekwa, monna yola a thoma go bolela, gomme lešaba la kgotsa la re: “Taba ya mohuta wo ga se ya ka ya direga mo Israele!”

₃₄Eupša Bafarisei bona ba re: “Maatla a go leleka bademone o a fiwa ke kgoši ya bona.”

₃₅Jesu a šika le metse le metsana ka moka, a ruta batho ka disinagogeng, a bega Taba ye Botse ya mmušo wa Modimo, a fodiša batho malwetši le mafokodi a bona. ₃₆Ya re ge a bona lešaba, a le šokela ka gobane le be le tshwenyegile le se na mothuši, le le bjalo ka dinku tše di hlokago modiša. ₃₇Ka gona a re go barutiwa ba gagwe: “Puno ke ye ntši, eupša babuni ga ba nene. ₃₈Rapelang Morena, yo e lego yena mong wa puno, gore a romele babuni tšhemong ya gagwe.”