Tlaišego, tsogo le lerato la Bakriste – letšatši la 2

Ke tiragalo ye e tsebjago go difilimi le dithelebišene: motho yo a se nago molato o ikhwetša a swanetše go lefela sekoloto sa motho yo mongwe. Gantši, ke ka lebaka la phošo ya tša molao goba bohlatse bja maaka bjo motho yo a se nago molato a latofatšwago ka bjona go šikara ditiro tša motho yo mongwe. Ge se se direga, re a befela ka lebaka la go hloka toka ye e fiwago motho yo a se nago molato. Ge re lebelela Jesu ka kgopolo ye, re hlabja ke dihlong kudu gore o tlaišegile legatong la rena. O tlaišegile ka go hloka toka gore rena re kgone go phela ka tokologo. Ka boithaopo o nwele senwelo se se bego se swanetše rena. Rena, bao re befetšwego ka lebaka la go hloka toka lefaseng, ke rena bao re nago le molato, eupša ka go ithaopa a ithweša molato. Jesu o nwele senwelo se gore tlaišego ya rena e kgotlelelege.

Thapelo ya Jesu serapeng sa Getsemane e gatelela bomotho bja gagwe le boikokobetšo. Bafilipi 2:7 e re thuša go kwešiša gore Jesu e be e le motho le gore o be a ikokobeditše. Ga se a gomarela boModimo bja gagwe go efoga tlaišego. Ge Jesu a rapetše thapelo ye, a ka be a lemogile gore o dirile bjalo gore bohloko bja rena bo kgotlelelege, gore tlaišego ya rena e se be mafelelo, gore re be le kholofelo.

Re tumiša Modimo ka tebogo lehono ka gobane sekoloto sa rena sa sebe se lefilwe, ka gobane Jesu o nwele senwelo sa tlaišego le ka gobane tlaišego ya re le mathata ga di hlaloše mafelo a rena. Jesu o šetše a tlaišegile. Go a makatša gore tlaišego ya gagwe e re fa kholofelo. Go bohloko go rena Bakriste go nagana ka yona, kudukudu nakong ya Paseka!