Tlaišego, tsogo le lerato la Bakriste – letšatši la 1
Jesu serapeng sa Getsemane (karolo ya 1)
(Di)temana ya Bibele
LUKASE 22
Jesu o rapela Thabeng ya Mehlware
Pele ga Labohlano le Lebotse, re tla be re lebeletše tiragalo ye e nyamišago ye e diragetšego serapeng sa Getsemane.
Bošego pele Jesu a swarwa, yena le barutiwa ba gagwe ba ile serapeng sa Getsemane. Ka mošola wa Moedi wa Kidrone, go be go na le serapa sa mehlare ya mehlware ye a nago le bopitlelo bja mehlware. Lentšu “Getsemane” ka bolona le hlaloša bopitlelo bja mehlware. Go bjalo ka ge eka mong wa lefelo o neile Jesu tumelelo ya go šomiša serapa sa mehlare ya mehlware ka gobane re bala temaneng ya ka mo tlase gore “Jesu a ya Thabeng ya Mehlware bjalo ka mehleng”. Johanese 18:2 gape e bolela gore Jesu bjalo ka mehleng o be a kopanela gona le barutiwa ba gagwe. Jesu o tsebile seo se bego se tla direga fao. Ka serapeng sa Getsemane, ke moo a itemogelago ntwa ya mafelelo ya semoya le Modimo go kwešiša thato ya gagwe. Go na le ditiragalo tša histori tše mmalwa tše di amago Bakriste ka tsela ye serapa sa Getsemane se dirago ka gona.
Lukase 22:39-40 Jesu a tloga motseng, a ya Thabeng ya Mehlware bjalo ka mehleng; barutiwa ba gagwe ba mo latela. Ge a fihla fao a re go bona: “Rapelang gore le se lekwe.”Ke hwetša go makatša gore selo sa pele se Jesu a se dirilego serapeng sa Getsemane e be e le go rapela. Ke dinakong tše bjalo ka tše moo o naganago ka motho yo bohlokwa kudu bophelong bja gago. Go Jesu, e be e le Modimo. Ge a be a boifa, kgopolo ya gagwe ya pele e be e le go rapela go Modimo. Jesu, e le motho yo a feletšego, o be a na le tlhoko ya go rapela. O be a nyaka go bolela le Tatagwe, go mo ntšhetša sa mafahleng. O be a nyaka go botša Tatagwe gore o a boifa. Nakong ya tlalelo, o be a nyaka go bitša Modimo.
Kgopolo ya bofokodi bja barutiwa ba gagwe e ka ba e imeditše le go feta morwalo wa bošego bjoo gore a o rwale. A ka ba a tsebile gore pefelo ya Kgorokgolo ya Bajuda e ka se ame yena fela, eupša le barutiwa ba gagwe gape. Ke ka lebaka leo, nakong ya tlhoko ya gagwe, Jesu a naganago ka maatla a semoya a barutiwa ba gagwe gomme o ba kgopela gore ba rapelele maphelo a bona a semoya. Mohlala wa thapelo ya Jesu le taletšo ya gagwe go barutiwa ba gagwe gore ba ithapelele gape ke taletšo go rena lehono: ga re a swanela go dikadika go bitša Modimo. E swanetše e be selo sa pele se re se dirago letšatši le letšatši, e swanetše e be selo sa pele se re se dirago ge re boifa le selo sa pele se re se dirago ge re thabile.
