Tlaišego, tsogo le lerato la Bakriste – letšatši la 18

Lerato la boikgafo go putla mellwane ka moka ka nnete e bile selo se kereke ya pele e bego e tsebja ka sona. Cyprian wa Carthage (200-257 AD) o hlohleleditše balatedi ba gagwe go bontšha kgaugelo le mogau. Go ya ka Cyprian, ga go selo sa go ikgetha ka go rata batho ba geno. Bao ba nyakago go fenya bobe ka botse ba swanetše go ithuta go rata bjalo ka ge Modimo a rata – mohuta wa lerato wa go akaretša manaba a gago. Ka nnete e be e le selo se Bakriste ba pele ba se dirilego, ge ba hlokomela Baroma nakong ya mauba a bona.

Pukung ya gagwe The Irresistible Revolution, Shane Claiborne o bolela ka dikgwedi tše a di feditšego a na le Mme Theresa dikelelatšhileng tša Kolkata. O bolela ka fao batho gantši ba mmotšišago gore Mme Theresa o be a le bjang. Shane o re, “E be e le kgopana, a na le mašošo, bjalo ka makgolo o mmotse gape o bohlale.” Selo se tee se a ka se tsogego a se lebetše ke maoto a gagwe ao a golofetšego. “Mesong e mengwe le e mengwe, nakong ya selalelo, ke be ke lebelela maoto a gagwe. Ke ipotšiša ge e ba Mme Theresa a ka ba a na le bolwetši bja letlalo. Ke nnete, ke be nka se botšiše.” Mesong e mengwe, yo mongwe wa baitlami ba basadi o botšišitše Shane ge e ba o bone Mme Theresa. Ka go rata go tseba, o rile, “Ee.” Moitlami a araba ka gore, “Ga re na dieta tše lekanego go ka fihlelela dinyakwa tša batho ka moka. Mme Theresa ga a nyake gore motho a be le dieta tše mpe kudu, ka gona o di apara ka boyena. Go apara dieta tšeo mengwagangwaga go golofaditše maoto a gagwe.” Le ke mohuta wa lerato la go bea ba bangwe pele ga gago. Ke lerato le le tšwago thwii pelong ya Jesu.

Go a kgonega go rata bjalo ka ge Jesu a be a rata ka gona. Morena Jesu o matlafatša modumedi yo mongwe le yo mongwe go phela ka lerato la mohuta wo. Therong ye e swanago moo Jesu a re laelago gore re rate (Johanese 14), o bolela ka Moya wo Mokgethwa wo o tlago matlafatša badumedi. Ka mošomo wa Moya, Tate le Morwa ba tla phela le badumedi, le go re ruta mantšu a gagwe le ditaelo. Moya wo Mokgethwa ka mehla o tla re gopotša se Jesu a se boletšego le go re matlafatša gore re obamele (Johanese 14:15-25). Moya wo Mokgethwa o tla re ruta go rata ka ntle le mellwane, bjalo ka ge Jesu a dirile.