Tlaišego, tsogo le lerato la Bakriste – letšatši la 17

Ke badile kanegelo ya monna wa go huma le dinala yo a lehlegetšego ke mo go nyakile go e ba thoto ya gagwe ka moka, e ntši diatleng tša morwarragwe wa moradia. Morago ga tobo ya gagwe, bjalo ka Jobo, o nyakile a lahlegelwa ke mosadi wa gagwe. Yena le balapa la gagwe ba phetše bjalo ka bakgopedi, ba ithekgile go botho bja batho ba bangwe.

Kudu bjalo ka Jobo, monna o tšere sephetho sa gore o tla bontšha lefase gore ga se a rate Modimo fela ka lebaka la mahumo a gagwe ka moka, eupša gore o tlo botega go Yena le ge a be a sa šala ka selo. Le ge go le bjalo, batho ba be ba sa rate motho yo, go sa šetšwe bonaba bjo bokaaka, a bego a phela ka potego le bophelo bja go hlompha Modimo. Go fegelwa go gongwe le go gongwie, manyami a mangwe le a mangwe a monna yo ba a hlalošitše bjalo ka sešupo sa borabele kgahlanong le Modimo goba o tšere sephetho sa go hlanogela Modimo. Monna o nyakile a tshwenyega kudukudu go kgodiša badudi ba motse gore o be a sa swane le bona. O boletše le Modimo gomme a mmotšiša gore a mmontšhe se a swanetšego go se dira, gore batho ba emiše go gonona tumelo ya gagwe ya Bokriste. Le ge go le bjalo, Modimo a sa mo arabe.

Ka tiro ya kwelobohloko, a neela ka tšhelete ka moka ye a kgonnego go e boloka, nakong ya mengwaga ya gagwe ya go phela ka bohloki, go bahloki. Bahloki ba lebogile kudu, eupša batho ba be ba sa kgodišega. “O leka go itirela dikliente,” ba realo. Gape, a bolela le Modimo gomme a mo phuphuthela gore a mo thuše. Gape, Modimo a se arabe. Gomme, a ba karolo ya protšeke ya go aga kereke e mpsha ya motse. E be e le moago o mmotse kudu wa go kgahliša bjalo ka sešupo sa letago la Modimo, go feta meago ka moka ya motse. Ga bjale, batho ba re o lekile go dira gore leina la gagwe le se hwelele.

Monna o be a nolegile moko gomme a boela gape go modimo. A makala ge Modimo a mo araba. O rile, “Go na le monna yo a dulago ntlong e kgolo kudu motseng, sehwirihwiri ka nnete – motho ofe goba ofe a sa mo hlomphego. Ga go motho yo a mmatamelago ka gobane ba a tseba gore ke moradia. O a mo tseba. Ke morwarrago. O hloka tlhokomelo. Eya o yo mo hlokomela le go mo rata. Ka gona, batho ka moka ba tla tseba gore o ngwana wa ka.”

Lerato le boima kudu ke go rata bao ba lego kgauswi kudu le wena bao ba go kwešitšego bohloko!