Tema ya mehlare ka Bibeleng – Letšatši la 20

Go ya ka kanegelo ya kgale mohlare wa mo-Dogwood o šomišitšwe go dira sefapano seo Jesu a bapotšwego go sona. E oketša gore Kriste o bakile gore matšoba a mo-Dogwood go ba segopotšo sa sefapano moo a hlokafaletšego gona ka go fa letšoba dipetale tše pedi tše telele le tše pedi tše kopana, le go ba le tše di bonalago di swana le dikgatišo tša dipikiri dipetaleng go re gopotša ka tlaišego ya gagwe. Ke kanegelo ye botse, eupša ga e na bohlatse bja Bibele goba thutadimela. Ga re tsebe gore ke mohlare wa mohuta mang wo o šomišitšwego, gomme ga go bohlokwa.

Se bohlokwa ke gore ka lehu la gagwe sefapanong, Jesu o re lokolotše go thogako ya molao. Ka go ba sehlabelo se phethagetšego, ga re sa swanetše ke go lefela kotlo ya sebe – lehu. Sefapano ke lefelo moo Modimo a rwetšego dibe tša rena le go fenya tlaišego le lehu, gore a kgone go nea bophelo go lefase le le tletšego ka sebe le lehu (Kutollo 22:14).

Kriste o rwetše dibe tša rena mohlareng gomme ka lehu la gagwe le tsogo re boelantšwe go tswalano e phelago le Modimo. Ka moka re hloka Jesu go ka hlwekiša diphošo tša rena tša go feta. Re hloka yena go ka lokiša go robega maphelong a rena. Re hloka yena go re hlahla letšatši le letšatši.