Seswantšho se segolo – Letšatši la 13

Tlaišego e tla ka dibopego tše fapafapanego. E ka ba ka lebaka la bolwetši, bodiidi goba gaešita le tahlo ka lebaka la tumelo ya gago. Tlaišego ka sebopego le ge e le sefe e hlola ditlhohlo.

Bjalo ka motšea-diswantšho, motho gantši o lebeletšana le tlaišego. Se se bonala kudu ge o leka go tšea filimi. Gantši, batho ba o ba tšeago ba tla myemyela le go go botša gore tšohle di lokile. Ke ge fela o bea khamera fase, moo ba lokologago go ahlaahla ditabakgolo, gomme, bohloko bo a tšwelela.

Nakong ya maeto a ka kua Rwanda, ke kopane le sehlopha se kgethegilego sa batho. Re be re le godimo dithabeng kgole le ditsela tše kgolo. Ba bangwe ba batho sehlopheng ba thoma go bolela ka dinyakwa tša bona le maemo. Dikanegelo tša bona e bile bopaki bja tlhohleletšo le tumelo e kgolo. Ba ke batho ba ba bego ba swareletše go Modimo ka tumelo, go ba abela le go ba bontšha tsela ya go tšwa ka mathateng a bona.

Ba mmotšišitše, “O tlilo re direla eng?” Potšišo ye e ntlhohlile gomme ya dira gore ke nagane: “ke mang, ke eng morero wa ka, ke leka go fihlelela eng!” Se ke ba boditšego sona e bile gore ke tla leka go anega leswa dikanegelo tša bona ka nepo le ka lerato ka mo nka kgonago. Go direga eng ka morago, nka se tsebe.

Naa seo se be se lekane? Mohlomongwe aowa. Go dilo tša materiale, ke be nka se ba direle go tlala seatla. Mohlomongwe go hlwaya tsebe ga ka e bile monyetla go bona go bolela ka maikutlo a bona ao ba bego ba a utile dipelong tša bona.

Ka morago, ke lemogile gore batho bao ba bile le seabe se sekaone bophelong bja ka, ka gobane bopaki bjo ba bego ba bo phela bo be bo swanetše go latelwa. Le ge ba be ba tlaišega, ba be ba sa kgona go tumiša Modimo. Ba phetše tumelo ya bona go sa šetšwe diteko ka moka le ditlaišego tše ba bego ba itemogela tšona.

Ba bantši ba rena ba itemogela tlaišego gomme re kopane le batho ba bangwe ba ba tlaišegago ka ditsela tše fapafapanego. Potšišo ke gore: batho ba bona eng ge ba kopana le rena? Ba itemogela eng? Naa ba itemogela Kriste?