Roadmap for Life – Day 5

₂O ntheeletše ge ke go llela,

wena Kgoši ya ka le Modimo wa ka,

gobane ke wena yo ke go rapelago.

₃O kwa lentšu la ka mosong, Morena;

ke go neela thapelo ya ka e sa le gosasa,

gomme ka letela gore o nkarabe.

₂Phagamišetšang matsogo Tempeleng le tumišeng Morena.

₁Hlabelang Morena mekgolokwane,

lena bohle ba lefase!

₂Direlang Morena ka lethabo;

tlaang pele ga gagwe le duduetša!

₃Tsebang gore Morena ke yena Modimo.

O re bopile gomme ke rena ba gagwe;

ke rena setšhaba sa gagwe,

re mohlape wa gagwe.

₄Tsenang ka masoro a Tempele ka ditebogo,

tsenang ka dikgorong tša yona ka dikopelo tša tumišo.

Mo lebogeng le mo reteng.

₅Gobane Morena ke yo botho;

lerato la gagwe ke la neng le neng,

potego ya gagwe ke ya go ya go ile.

₁Ngwanaka,

o se lebale tše ke go rutilego tšona,

o fele o gopola ditaelo tša ka,

₂gobane di tla go okeletša bophelo bja katlego.

₃O se lese go ba le leratorato le potego;

o ikgabiše ka tšona bjalo ka pheta molaleng,

o di boloke ka pelong ya gago.

₄Ge o ka dira bjalo o tla kgahla Modimo le batho,

wa ba le seriti mo go bona.

₁Bana ba ka,

le theetšeng tše tatagolena a le rutago tšona.

Le theetšeng, gore le tle le hlalefe.

₂Tše ke le rutago tšona di lokile,

ka gona le se di furalele.

₃Nna ka noši ke be ke le mošemanyana, ke rutwa ke tate,

ke le mmamoratwa, motswalwanoši wa mma.

₄Tate o be a nthuta a re:

“O gopole tše ke go botšago tšona.

O phethe taelo tša ka,

mme o tla phela.

₅O ikhweletše bohlale le temogo.

O se lebale goba wa furalela tše ke di bolelago.

₁₃Ka mehla o kgomarele tše ke go laelago tšona,

di se go phonyokge.

Bophelo bja gago bo itshwarelele ka tšona –

o di hlokomele gabotse.