Re bolokegile go Jesu Kriste – Letšatši la 9

Jesu o be a hlokafetše, a bolokilwe. Josefa wa Arimathea a kgopela Pilato setopo sa Jesu. Morago ga go boledišana le mohlankedi wa gagwe, Pilato o boditše Josefa gore a ka tšea setopo. Ka gona Josefa a se tšea, a se phuthela ka lešela le le hlwekilego, a se bea ka lebitleng la gagwe, le a bego a sa tšo le gwaya leswikeng. Ke moka a kgokološetša leswika le legolo mojako wa lebitla mme a sepela.

Ka morago ga matšatši a mararo, go bile le tšhikinyego e kgolo ya lefase. Morongwa wa Morena a theoga legodimong, a tla a pshikološa leswika lela a le tloša. (Mateu 28:4)

Morongwa a re go basadi bale, “Le se ke la boifa; ke a tseba gore le nyaka Jesu … Ga a gona mo, o tsogile bahung … Napang le itlhaganele, le yo tsebiša barutiwa ba gagwe le re: ‘O tsogile bahung, gomme bjale o le thaka pele go ya Galilea; ke moo le tlago mmona gona.’ ” (Mateu 28:5-7) Bibele e re basadi ba itlhaganela go yo botša barutiwa, ba boifa eupša gape ba tletše ka lethabo.

Tlotlontšu e hlaloša lentšu lethabo bjalo ka go thaba kudukudu.

Matswalo a Jesu a tlišitše lethabo lefaseng; go tsoga ga gagwe bahung le gona go bile bjalo. Lerato la Jesu la go ikgafa le re kgontšhitše go boelana le Modimo. Bokriste ka nnete ke bodumedi bja lethabo.

Jesu o re fele fomula go bophelo bja lethabo:

“Ke le rata bjalo ka ge Tate a nthata. Dulang le le ba tee le nna gore ke dule ke le rata. Ge le phetha melao ya ka ke tla dula ke le rata, go swana le nna ge ke phethile melao ya Tate, gomme a dula a nthata. Ditaba tše ke le boditše tšona gore le be le lethabo le ke nago le lona, le gona lethabo la lena e be le le feletšego.” Johanese 15:9-11

Ge re nyaka lethabo, lethabo la nnete bophelong bja rena, re swanetše go batamela kgauswi le Jesu Mophološi wa rena.